7 ເຄັດລັບຊ່ວຍໃຫ້ຫ່າງໄກຈາກພະຍາດຫົວໃຈ

  1. ນອນໄວ ຕື່ນເຊົ້າ : ເປັນເລື່ອງງ່າຍໆທີ່ຫລາຍໆຄົນອາດເຮັດບໍ່ໄດ້ ແຕ່ເຊື່ອວ່າຫາກເຮັດໄດ້ສຸຂະພາບທ່ານຈະດີຂຶ້ນແນ່ນອນ ແລະ ຫົວໃຈຂອງທ່ານນກໍຈະແຂງແຮງຂຶ້ນນຳ ເພາະຮ່າງກາຍໄດ້ພັກຜ່ອນຢ່າງພຽງພໍ, ລະບົບພາຍໃນບໍ່ປັ່ນປ່ວນ, ຫົວໃຈບໍ່ຕ້ອງເຮັດວຽກໜັກເກີນໄປ. ນອກຈາກນີ້, ຫາກທ່ານຕື່ນເຊົ້າ ທ່ານກໍຈະມີເວລາກິນອາຫານເຊົ້າ ເຊິ່ງເປັນຄາບທີ່ສຳຄັນທີ່ສຸດຂອງຮ່າງກາຍ.
  2. ອອກກຳລັງກາຍແດ່ : ຫາກຮ່າງກາຍບໍ່ໄດ້ອອກກຳລັງກາຍກໍຈະເຮັດໃຫ້ທ່ານຕຸ້ຍງ່າຍ, ບໍ່ແຂງແຮງ, ເປັນໄຂ້ຫວັດ, ນຳ້ມູກໄຫລໄດ້ງ່າຍ. ຫົວໃຈກໍຄືກັນ ຫາກບໍ່ໄດ້ອອກກຳລັງກາຍກໍຈະບໍ່ແຂງແຮງຕໍ່ສູ້ກັບພະຍາດຕ່າງໆບໍ່ໄຫວຄືກັນ. ເພີ່ມກ້າມຊີ້ນຫົວໃຈດ້ວຍການອອກກຳລັງກາຍແບບຄາດິໂອແດ່ ເພື່ອໃຫ້ຫົວໃຈໄດ້ຟອກເລືອດ ເຮັດໃຫ້ຫົວໃຈເຕັ້ນໄວໆແດ່ ຫົວໃຈຈະໄດ້ແຂງແຮງ.
  3. ຜ່ອນຄາຍແດ່ : ບໍ່ວ່າວຽກຈະຫລາຍປານໃດ ທ່ານກໍຕ້ອງພັກຜ່ອນແດ່, ຍືດເສັ້ນຍືດເອັນ, ພັກຜ່ອນສາຍຕາທຸກໆ 1 – 2 ຊົ່ວໂມງ ເພື່ອຜ່ອນຄາຍສະໝອງ, ມື້ພັກສຸກ ເສົາ – ອາທິດ ກໍຄວນຫາເວລາໄປເຮັດກິດຈະກຳກັບຄົນຮັກ, ຄອບຄົວ ຫລື ໝູ່ເພື່ອນແດ່ ພຽງແຕ່ໄດ້ລົມກັນ, ໄດ້ມ່ວນຫົວກັບຄົນທີ່ທ່ານຮັກ ຈະຊ່ວຍໃຫ້ຫົວໃຈຂອງທ່ານສົດຊື່ນຫ້າວຫັນ ແລະ ຜ່ອນຄາຍໄດ້ທັງໃຈ ແລະ ສະໝອງ.
  4. ດື່ມນຳ້ຫລາຍໆ : ການດື່ມນຳ້ຫລາຍໆຊ່ວຍໃຫ້ຫົວໃຈຟອກເລືອດງ່າຍຂຶ້ນ ຫົວໃຈຈະໄດ້ເຮັດວຽກເມື່ອຍໜ້ອຍລົງ ທັງຍັງຊ່ວຍໃຫ້ຜິວກ້ຽງງາມສົດໃສ ແລະ ຂັບຖ່າຍສະດວກຂຶ້ນນຳ.
  5. ຫລຸດອາຫານມັນ, ອາຫານຈືນ ຫລື ແປ້ງ : ເພາະອາຫານຈຳພວກນີ້ມີໄຂມັນຫລາຍ ເຮັດໃຫ້ເປັນພະຍາດເສັ້ນເລືອດຫົວໃຈຕີບ ເຊິ່ງຈະເຮັດໃຫ້ຫົວໃຈຕ້ອງບີບໂຕເພື່ອຟອກເລືອດຫລໍ່ລ້ຽງຮ່າງກາຍໜັກຂຶ້ນ ເມື່ອຫົວໃຈເມື່ອຍຫລາຍຂຶ້ນກ່ວາເກົ່າ ກໍສ່ຽງຕໍ່ການເປັນຫົວໃຈລົ້ມເຫລວ. ສະນັ້ນ ຄວນຫັນໄປກິນອາຫານທີ່ຍ່ອຍງ່າຍໆ ດັ່ງໝາກໄມ້, ຜັກ, ເຂົ້າຫລາຍສີ ເພື່ອຊ່ວຍໃຫ້ຫົວໃຈເຮັດວຽກສະດວກຂຶ້ນ.
  6. ນັ່ງສະມາທິ : ການນັ່ງສະມາທິຊ່ວຍຝຶກຫົວໃຈໃຫ້ສະຫງົບ, ສົ່ງຜົນດີຕໍ່ຮ່າງກາຍ, ສະໝອງ ແລະ ຫົວໃຈແທ້ໆ ເພາະການນັ່ງສະມາທິເປັນການຝຶກກຳນົດຈັງຫວະການຫາຍໃຈເຂົ້າອອກຢ່າງສະໝໍ່າສະເໝີ ຜ່ອນຄາຍສະໝອງໂດຍການຄິດເຖິງແຕ່ເລື່ອງການຫາຍໃຈ ບໍ່ເຄັ່ງຄຽດ ແລະ ຫົວໃຈກໍໄດ້ເຮັດວຽກຢ່າງເປັນລະບົບ, ສະຫງົບນິ້ງ ຈະເຮັດກ່ອນນອນມື້ລະ 10 ນາທີ ກໍຊ່ວຍໃຫ້ຫົວໃຈຂອງທ່ານແຂງແຮງຂຶ້ນໄດ້.
  7. ເບິ່ງໂລກໃນແງ່ດີ : ສາເຫດຕົ້ນຕໍຂອງພະຍາດຫົວໃຈ ນອກຈາກພຶດຕິກຳໃນການໃຊ້ຊີວິດແລ້ວ ຍັງມາຈາກຄວາມຄິດຂອງເຮົານຳ ຄວາມຄິດສາມາດກຳນົດສຸຂະພາບຂອງເຮົາໄດ້ ຫາກເຮົາພົບບັນຫາແລ້ວເມົາແຕ່ຄິດວ່າມັນເປັນບັນຫາທີ່ແກ້ໄຂບໍ່ໄດ້ ຫລື ຄິດໄປແຕ່ໃນທາງບໍ່ດີ ບໍ່ມີຫຍັງດີຂຶ້ນ ສຸຂະພາບກໍບໍ່ດີ, ຄວາມເຄັ່ງຄຽດກໍຈະສະສົມ ຈົນສົ່ງຜົນຕໍ່ການເຮັດວຽກຂອງຫົວໃຈໄດ້ຄືກັນ ດັ່ງນັ້ນ ຫາກທ່ານລອງປັບທັດສະນະຄະຕິທີ່ມີຕໍ່ບັນຫາຕ່າງໆໃຫ້ດີຂຶ້ນ, ເບິ່ງບັນຫາໃນຫລາຍໆດ້ານ, ເບິ່ງມຸມມອງດີໆຂອງເຫດການນັ້ນໆ, ຄ່ອຍໆແກ້ບັນຫາຢ່າງມີສະຕິ ຮັບຮອງວ່າບັນຫາໃດໆກໍບໍ່ອາດເຂົ້າມາທຳຮ້າຍຫົວໃຈຂອງທ່ານໄດ້.

error: Alert: Content is protected !!