ສັງຄົມອອນລາຍ ຄ້າຍມີດສອງຄົມ

- advert banner 728 90 728x90 - ສັງຄົມອອນລາຍ ຄ້າຍມີດສອງຄົມ

ສັງຄົມ ອອນລາຍ (Online) ນັ້ນ ກຳລັງແຜ່ຂະຫຍາຍໃນວົງກວ້າງຂອງສັງຄົມລາວ ເພື່ອຕິດຕໍ່ສື່ສານ ຢ່າງໄວວາ ແຕ່ສື່ສັງຄົມອັນນີ້ ມີທັງອາວຸດອັນໜ້າຫຼົງໄຫຼ ແລະເປັນຕາຢ້ານນຳອີກ.

ສື່ສັງຄົມ ອອນລາຍ ໄດ້ກາຍເປັນອາວຸດອັນແຫຼມຄົມໃນການເຜີຍແຜ່ຂໍ້ມູນຂ່າວສານ ເຫດບ້ານການເມືອງ ໄດ້ຢ່າງ ວ່ອງໄວ ທັນໃຈ, ຜູ້ຄົນສາມາດເຂົ້າເຖິງໄດ້ງ່າຍ ເຊິ່ງມາຮອດປັດຈຸບັນ ຄົນລາວຫຼາຍກວ່າ 35% ຂອງຈຳນວນ ປະຊາກອນທັງໝົດ 6,4 ລ້ານ ແມ່ນສາມາດ ນຳໃຊ້ ອິນເຕີເນັດ ທີ່ສາມາດນຳໃຊ້ ເຟສບຸກ, ເວບໄຊ໌ ໄດ້.

ສື່ສັງຄົມອອນລາຍ ໄດ້ເປັນກະບອກສຽງທີ່ສຳຄັນຂອງລັດຖະບານ, ພໍແຕ່ທ່ານ ທອງລຸນ ສີສຸລິດ ກ້າວມາເປັນ ນາຍົກ ລັດຖະມົນຕີຂອງ ສປປລາວ ໃນປີ 2015 ກໍໄດ້ຕັ້ງ ເຟສສະບຸກ (facebook) ຂອງທ່າຍນາຍົກຂຶ້ນ ເພື່ອເຜີຍແຜ່ ການເຄື່ອນໄຫວວຽກງານຂອງເພິ່ນ ກໍຄືວຽກງານທີ່ພົ້ນເດັ່ນຂອງຊາດດ້ານອື່ນໆ ຢ່າງກົງໄປກົງມາ. ມາຮອດປັດຈຸບັນ ຖືວ່າມີ ຄົນຕິດຕາມເກືອບ 2​ ແສນຄົນແລ້ວ.

ຈາກການຈຳນວນຄົນທີ່ຕິດຕາມຫຼາຍຄືແນວນັ້ນ ການເຜີຍແຜ່ຂໍ້ມູນຂ່າວສານຈຶ່ງໄວ ແລະແຜ່ເປັນວົງກວ້າງທີ່ສຸດ, ເຮັດໃຫ້ປະຊາຊົນລາວ ຮັບຮູ້ ເຂົ້າໃຈ ການເຄື່ອນໄຫວວຽກງານ ຂອງພັກ-ລັດ ໂດຍສະເພາະ ທ່ານ ນາຍົກຂອງ ສປປລາວ ໄດ້ດີຍິ່ງຂຶ້ນ ພ້ອມທັງປະຊາຊົນ ກໍມີສ່ວຮ່ວມ ໃນການອອກຄຳຄິດເຫັນຕໍ່ບັນຫາຕ່າງໆ ເພື່ອປັບປຸງ ແລະພັດທະນາປະເທດຊາດຢ່າງສອດຄ່ອງ, ປະຊາຊົນ ກໍເຂົ້າໃຈບັນດາ ແນວທາງຂອງ ລັດຖະບານ ແຕ່ລະໄລຍະ ເປັນຢ່າງດີ.

ບໍ່ສະເພາະແຕ່ ຊ່ອງທາງ ຂອງເຟສບຸກ ທີ່ສະໜັບສະໜູນ ທ່ານນາຍົກເທົ່ານັ້ນ, ບັນດາສຳນັກຂ່າວ ທາງການຫຼາຍສຳນັກຂອງ ສປປລາວ ເຊັ່ນວ່າ: ສຳນັກຂ່າວສານປະເທດລາວ, ໜັງສືພິມລາວພັດທະນາ, ໜັງມືພິມເສດຖະກິດ-ການຄ້າ ແລະອື່ນໆ ກໍສາມາດສະໜອງຂໍ້ມູນ-ຂ່າວສານ ທີ່ໜ້າເຊື່ອຖື ແລະ ເຮັດໃຫ້ປະຊາຊົນລາວຮັບຮູ້ຂ່າວສານ ບ້ານເມືອງໄດ້ທຸກເວລາ.

- Tiger Head 728x90 - ສັງຄົມອອນລາຍ ຄ້າຍມີດສອງຄົມ
- 1 1 - ສັງຄົມອອນລາຍ ຄ້າຍມີດສອງຄົມ

ແຕ່ຢ່າງໃດກໍຕາມ, ເຖິງແມ່ນວ່າການນຳໃຊ້ ສື່ສັງຄົມອອນລາຍ ຈະມີຜົນດີຄືດັ່ງກ່າວມານັ້ນກໍຕາມ, ຍ້ອນການຄຸ້ມຄອງ ທີ່ຫຍຸ້ງຍາກຫຼາຍປະການ ຈຶ່ງເກີດມີການເສກສັນປັ້ນແຕ່ງຂ່າວທີ່ພະຍາຍາມດຶງດູດ ເອົາຄວາມສົນໃຈ ຂອງຄົນຈຳນວນຫຼາຍ ເພື່ອຜົນປະໂຫຍດໃດໜຶ່ງ ເຊິ່ງບັນດາຂໍ້ມູນທີ່ລົງຜ່ານສຳນັກຂ່າວ ຊາວບ້ານນີ້ ບາງອັນກໍຖືກ ຫຼາຍອັນກໍປອມແປງ ເຊິ່ງເຮັດໃຫ້ພວກເຮົາຕ້ອງມີສະຕິຢູ່ສະເໝີໃນການບໍລິໂພກຂ່າວ.

ຜູ້ຂຽນເຄີຍໄດ້ອ່ານບົດບັນທຶກຂອງຊາວຕ່າງປະເທດຄົນໜຶ່ງທີ່ເຂົ້າມາລາວໃນສະໄໝ ອານາຈັກລາວລ້ານຊ້າງ ເຊິ່ງເພິ່ນໄດ້ບັນທຶກໄວ້ວ່າ “ຄົນລາວເປັນຄົນອ່ອນນ້ອມຖ່ອມຕົນ ແລະ ເຊື່ອຄົນງ່າຍ”,  ເມື່ອມາສັງເກດເບິ່ງ ກໍຫາກຄ້າຍຄືກັນກັບເພິ່ນວ່າແທ້ ເພາະຄົນລາວ ເປັນຄົນຈິງໃຈ ບໍ່ມີເຫຼ່ຫຼ່ຽມຫຼາຍ, ການອ່ອນນ້ອມຖ່ອມຕົນ ອາດເປັນບຸກຄະລິກກະພາບທີ່ດີ ແຕ່ການເຊື່ອຄົນງ່າຍນັ້ນພວກເຮົາກໍຄວນຄິດຄືນ ໂດຍສະເພາະ ທ່າມກາງ ການເຜີຍແຜ່ ຂໍ້ມູນ-ຂ່າວສານຈາກຫຼາຍສຳນັກຜ່ານສື່ສັງຄົມອອນລາຍ ທີ່ຂາດການກັ່ນຕອງ ແລະກວດແກ້ ຢ່າງລະອຽດນັ້ນ ກໍຫາກອັນຕະລາຍແທ້ໆ.

ເພາະສະນັ້ນ, ພວກເຮົາຄວນມີສະຕິ ໃນການບໍລິໂພກຂໍ້ມູນ-ຂ່າວສານ ຈາກແຫຼ່ງຂ່າວຕ່າງໆ ຜ່ານສື່ສັງຄົມ ອອນລາຍ, ສິ່ງສຳຄັນບໍ່ຄວນເຊື່ອຫຍັງຢ່າງງ່າຍດາຍ, ບໍ່ດັ່ງນັ້ນ ຈະຕົກເປັນເຍື່ອຂອງດ້ານລົບ ຂອງສື່ສັງຄົມອອນລາຍ ນັ້ນເອງ.

error: Content is protected !!