ໄພພິບັດ ໄພຂົ່ມຂູ່ຕໍ່ການພັດທະນາ

- advert banner 728 90 728x90 - ໄພພິບັດ ໄພຂົ່ມຂູ່ຕໍ່ການພັດທະນາ

ໂດຍ : ມຶກບໍ່ແຫ້ງ

ເຖິງວ່າ ໃນໄລຍະຜ່ານມາ ໄພພິບັດທີ່ຮ້າຍແຮງ ອາດບໍ່ຄ່ອຍເກີດຂຶ້ນຕໍ່ກັບປະເທດລາວ ແລະປະຊາຊົນລາວຖີ່ ພໍເທົ່າໃດ, ແຕ່ມາຮອດປັດຈຸບັນຖືໄດ້ວ່າ ໄພພິບັດ ແມ່ນໄພຂົ່ມຂູ່ທີ່ສຳຄັນຂອງການພັດທະນາປະເທດເຮົາ.

ສະພາບນໍ້າຖ້ວມ ຖືເປັນໄພພິບັດອັນຮ້າຍແຮງຢູ່ປະເທດເຮົາປີນີ້, ມາຮອດປັດຈຸບັນ ມີຮອດ 16 ແຂວງ ທີ່ໄດ້ປະສົບພົບພໍ້ກັບໄພນໍ້າຖ້ວມ ແຕ່ເໜືອຮອດໃຕ້ ເຊິ່ງກາຍເປັນອຸທົກກະໄພ ທີ່ໜັກໜ່ວງໃນຮອບຫຼາຍປີຂອງ ປະເທດກໍວ່າໄດ້.

ພ້ອມນັ້ນ, ປະເທດອື່ນໃນຂົງເຂດກໍພົບພໍ້ໄພພິບັດເຊັ່ນດຽວກັນ ບໍ່ວ່າຈະເປັນ ດິນເຊາະເຈື່ອນ ນໍ້າໄຫຼຊຸ ຄືຢູ່ຫວຽດນາມ ເມື່ອເດືອນມິຖຸນາ, ແລະຊ່ວງເດືອນກໍລະກົດຫາ ເດືອນກັນຍາ ກໍເກີດ ແຜ່ນດິນໄຫວຢູ່ ອິນໂດເນເຊຍ, ນໍ້າຖ້ວມ ແລະ ການອົບພະຍົບຄົນ ຍ້ອນຢ້ານເຂື່ອນແຕກ ຢູ່ມຽນມາ, ຖ້າໄກອອກໄປ ອີກກໍ ແມ່ນພະຍຸ ພັດຖະຫຼົ່ມ ແລະແຜ່ນດິນໄຫວ ຢູ່ຍີ່ປຸ່ນ ແລະອື່ນໆ ເຊິ່ງເປັນເລື່ອງທີ່ໜ້າວາດກົວຂຶ້ນທຸກມື້.

ອີງຕາມ ຂໍ້ມູນ ມູນນິທິອາຊີ ສະແດງໃຫ້ເຫັນວ່າ ສປປລາວ ເປັນປະເທດທີ່ມີຄວາມສ່ຽງຕໍ່ໄພພິບັດ ເປັນຕົ້ນ ນໍ້າຖ້ວມ, ໄພແຫ້ງແລ້ງ, ດິນເຊາະເຈື່ອນ, ພາຍຸຕ່າງໆ. ແຕ່ປີ 1970-2010, ໄພພິບັດທາງທຳມະຊາດ ຂ້ອນຂ້າງຮ້າຍແຮງເກີດຂຶ້ນ 33​ ຄັ້ງ ໂດຍສະເພາະ ໄພນໍ້າຖ້ວມ ແລະໄພແຫ້ງແລ້ງ ສົ່ງຜົນກະທົບ ເກືອບ 9 ລ້ານຄົນ ແລະສ້າງຜົນເສຍຫາຍ ຄິດເປັນເງິນປະມານ 400 ລ້ານໂດລາ.

ໄພນໍ້າຖ້ວມຢູ່ລາວປີນີ້ ກວມເອົາບໍລິເວນກວ້າງ ແລະແກ່ຍາວເປັນເວລາດົນ ໄດ້ນຳຜົນກະທົບໂດຍກົງ ຕໍ່ການພັດທເສດຖະກິດ-ສັງຄົມຂອງປະເທດ, ນັບແຕ່ລາຄາ ຫອມລາບ ກ່ອນນໍ້າຖ້ວມ ຊື້ສອງພັນ ປຸງແຕ່ງອາຫານໄດ້ຫຼາຍເທື່ອ ແຕ່ພາຍຫຼັງນໍ້າຖ້ວມ ເຂດນະຄອນຫຼວງ ກໍຄືແຂວງອ້ອມຂ້າງ ຊື້ສອງພັນ ໄດ້ແຕ່ໜ້ອຍດຽວ, ຍັງບໍ່ເວົ້າຮອດພືດຜັກທັນຍາຫານອື່ນໆ.

- 1 1 - ໄພພິບັດ ໄພຂົ່ມຂູ່ຕໍ່ການພັດທະນາ
- lattana 1 - ໄພພິບັດ ໄພຂົ່ມຂູ່ຕໍ່ການພັດທະນາ

ຍິ່ງກວ່ານັ້ນ, ການຜະລິດສະບຽງອາຫານ ໂດຍສະເພາະແມ່ນເຂົ້າ ຖືວ່າໄດ້ຮັບຜົນເສຍຫາຍຫຼາຍສິບພັນ ເຮັກຕາ, ອັນນີ້ອາດນຳມາເຊິ່ງ ການຂາດແຄນສະບຽງອາຫານ ເຮັດໃຫ້ປະຊາຊົນຫຼາຍພັນຄົນ ກາຍເປັນຜູ້ທຸກຈົນ ທີ່ເປັນການແກ່ດຶງການພັດທະນາຂອງປະເທດຊັກຊ້າລົງໄປຕຶ່ມ, ນອກນັ້ນ ໂຄງຮ່າງ ພື້ນຖານຕ່າງໆ ເປັນຕົ້ນເສັ້ນທາງ ຫຼາຍສາຍ ຂົວຫຼາຍແຫ່ງ ໄດ້ຮັບຄວາມເສຍຫາຍຢ່າງໜັກໜ່ວງ ຊຶ່ງລັດຖະບານຈະຕ້ອງນຳໃຊ້ງົບປະມານໃນການສ້ອມແປງບໍ່ແມ່ນໜ້ອຍ.

ໄພພິບັດເກີດຂຶ້ນທົ່ວທຸກຫົນແຫ່ງ ເຊິ່ງພວກເຮົາບໍ່ອາດສາມາດຄາດເດົາ ຫຼື ຄວບຄຸມໄດ້ ແຕ່ພວກເຮົາສາມາດ ຫຼຸດຜ່ອນ ແລະສາມາດ ກຽມຄວາມພ້ອມໃນການຮັບມືທີ່ດີໄດ້!

ຜ່ານມາລັດຖະບານກໍໄດ້ພະຍາຍາມສ້າງຂີດຄວາມອາດສາມາດ ຮ່ວມກັບຄູ່ຮ່ວມງານທັງພາຍໃນ ແລະຕ່າງປະເທດ ເພື່ອຮັບມືກັບໄພພິບັດຈາກທຳມະຊາດ ເຊັ່ນວ່າ ໂຄງການສ້າງຄວາມເຂັ້ມແຂງ ແລະກຽມພ້ອມຕໍ່ກັບໄພພິບັດ ຂອງຊຸມຊົນໃນ ລາວ ທີ່ລັດຖະບານໄດ້ເຮັດວຽກຮ່ວມກັບ ມູນນິທິອາຊີ ແລະບັນດາ ໂຄງການຂອງລັດ, ໂຄງການ ທີ່ໄດ້ຮັບການຊ່ວຍເຫຼືອຈາກສາກົນອື່ນໆ ເຊິ່ງສາມາດປູກຈິດສຳນຶກ ແລະສ້າງຄວາມ ຕື່ນໂຕ ໃນການກຽມພ້ອມຮັບມືຕໍ່ກັບໄພພິບັດຕໍ່ທຳມະຊາດໄດ້ສ່ວນໜຶ່ງ.

ແຕ່ຕາມທີ່ຜູ້ຂຽນສັງເກດເຫັນຕົວຈິງ ຫຼາຍຊຸມຊົມ ກໍຄືອຳນາດການປົກຄອງທ້ອງຖິ່ນ ພາຍຫຼັງໄດ້ຮຽນຮູ້ ບົດຮຽນຜ່ານໂຄງການ ກ່ຽວກັບການກຽມພ້ອມ ແລະຮັບມື ຕໍ່ໄພພິບັດແລ້ວ ບາດວ່າເອົາມາໃຊ້ຕົວຈິງແມ່ນ ເຮັດໄດ້ບໍ່ດີເລີຍ ເຊິ່ງກໍອາດມາຈາກຫຼາຍສາເຫດ ແຕ່ສິ່ງສຳຄັນ ຂໍໃຫ້ປະຊາຊົນ ທຸກຄົນ ຈົ່ງຈິງຈັງ ແລະອຳນາດການປົກຄອງທ້ອງຖິ່ນທຸກຂັ້ນ ຈົ່ງຢ່າໄດ້ຖືເບົາໃນການກຽມພ້ອມໄພພິບັດທຸກເມື່ອ, ທັງສູນກາງ ກໍເພີ່ມທະວີ ຄວາມໃກ້ຊິດຕິດແທດ ແລະແລກປ່ຽນຂໍ້ມູນຂ່າວສານ ທີ່ຖືກຕ້ອງ ແລະທັນການຕຶ່ມ ແລະ ມີແຜນການຕອບໂຕ້ຢ່າງມີປະສິດທິພາບກວ່າເກົ່າ ຈຶ່ງຈະສາມາດຫຼຸດຜ່ອນຜົນເສຍຫາຍລົງແດ່!

error: Content is protected !!