ລາວເລັ່ງສ້າງນິຕິກໍາຫລາຍສະບັບເພື່ອຄຸ້ມຄອງງົບປະມານ

- Untitled design - ລາວເລັ່ງສ້າງນິຕິກໍາຫລາຍສະບັບເພື່ອຄຸ້ມຄອງງົບປະມານ

ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ສົມດີ ດວງດີ ແຈ້ງຕໍ່ກອງປະຊຸມສະພາແຫ່ງຊາດທີ່ພວມຍັງດໍາເນີນໃນປັດຈຸບັນນີ້ວ່າ: ໃນໄລຍະຜ່ານມາ, ລັດຖະບານໄດ້ເອົາໃຈ່ໃສ່ຈັດຕັ້ງປະຕິບັດມະຕິ ແລະ ຂໍ້ກໍານົດຕ່າງໆຂອງສະພາແຫ່ງຊາດຢ່າງເຂັ້ມງວດ, ໂດຍສະເພາະໄດ້ເອົາໃຈໃສ່ຊີ້ນໍາການຈັດຕັ້ງປະຕິບັດແຜນງົບປະມານແຫ່ງລັດຢ່າງເຄັ່ງຄັດດ້ວຍການສ້າງ ແລະ ປັບປຸງນິຕິກຳໃນຂະແໜງການເງິນຫລາຍສະບັບຄື: ການສ້າງຮ່າງກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ ແລະ ກົດໝາຍວ່າດ້ວຍການຈັດຊື້-ຈັດຈ້າງດ້ວຍງົບປະມານຂອງລັດ ເພື່ອຈະຜ່ານກອງປະຊຸມສະພາແຫ່ງຊາດໃນໄວໆນີ້. ຄົ້ນຄວ້າປັບປຸງ ແລະ ສ້າງບັນດານິຕິກຳລຸ່ມກົດໝາຍໃໝ່ໃຫ້ສຳເລັດໃນປີ 2017-2018 ຈໍານວນ 47 ສະບັນ ແລະ ສະເພາະປີ 2017 ນີ້ໃຫ້ສຳເລັດ 41 ສະບັບ ແລະ ໃຫ້ສຳເລັດ 6 ສະບັບໃນປີ 2018.

ສຳລັບນິຕິກຳລຸ່ມກົດໝາຍທີ່ສ້າງສຳເລັດແລ້ວໃນປີ 2017 ມີຄື: ດຳລັດວ່າດ້ວຍການປະກອບ ແລະ ຄຸ້ມຄອງລົດປະຈຳຕຳແໜ່ງພະນັກງານການນຳລະ ດັບສູງ. ຄຳສັ່ງຂອງທ່ານນາຍົກລັດຖະມົນຕີວ່າດ້ວຍການເກັບກຳ ແລະ ສຳຫລວດຖານລາຍຮັບງົບປະມານຄືນໃໝ່ໃນຂອບເຂດທົ່ວປະເທດ. ຄຳສັ່ງຂອງທ່ານນາຍົກລັດຖະມົນຕີວ່າດ້ວຍມາດຕະການຄຸ້ມຄອງ ແລະ ຈັດຕັ້ງປະຕິບັດລາຍຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍ. ຄຳແນະນຳຂອງລັດຖະມົນຕີກະຊວງການເງິນກ່ຽວກັບການຈັດຕັ້ງປະຕິບັດກົດໝາຍວ່າດ້ວຍອາກອນມູນຄ່າເພີ່ມ. ຄຳແນະນຳຂອງທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນວ່າດ້ວຍການເກັບກຳ ແລະ ສຳຫລວດຖານລາຍຮັບງົບປະມານຄືນໃໝ່ໃນຂອບເຂດທົ່ວປະເທດ ແລະ ວິໄສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025 ເຊິ່ງໄດ້ຜ່ານການຮັບຮອງຈາກກອງປະຊຸມລັດຖະບານປະຈຳເດືອນເມສາ 2017 ແລ້ວ. ນອກຈາກນີ້ຍັງມີຮ່າງລັດຖະບັນຍັດຂອງປະທານປະເທດວ່າດ້ວຍການກຳນົດອັດຕາຄ່າທຳນຽບທາງປະຈຳປີເຊິ່ງໄດ້ນຳສະເໜີສະພາແຫ່ງຊາດພິຈາລະນາ, ຮ່າງຄຳສັ່ງຂອງນາຍົກລັດຖະມົນຕີວ່າດ້ວຍການປະຢັດການນຳໃຊ້ງົບປະມານຂອງລັດ, ປັບປຸງຂໍ້ຕົກລົງວ່າດ້ວຍກຳນົດໝາຍໃຊ້ຈ່າຍງົບປະມານຂອງລັດ, ລະບຽບການວ່າດ້ວຍການນຳໃຊ້ເງິນບຳເນັດເກັບລາຍຮັບເກີນແຜນ ແລະ ນິຕິກຳອື່ນໆຈຳນວນໜຶ່ງ.

ທ່ານຮອງນາຍົກ ກ່າວວ່າ: ເພື່ອຮັບປະກັນໃຫ້ການຄຸ້ມຄອງລັດ ແລະ ຄຸ້ມຄອງງົບປະມານຫັນເຂົ້າສູ່ກົດໝາຍຢ່າງເຂັ້ມງວດ, ລັດຖະບານໄດ້ອອກນະໂຍບາຍ ແລະ ນິຕິກຳຈຳນວນໜຶ່ງແລ້ວເຊັ່ນ: ຄຳສັ່ງນາຍົກລັດຖະມົນຕີເລກທີ 15/ນຍ ວ່າດ້ວຍການເພີ່ມທະວີການຄຸ້ມຄອງ, ກວດກາ, ການເຄື່ອນຍ້າຍ ແລະ ທຸລະກິດໄມ້, ແຈ້ງການຫ້ອງວ່າການສໍານັກງານນາຍົກລັດຖະມົນຕີກ່ຽວກັບການຢຸດເຊົາການຍົກເວັ້ນພາສີ-ອາກອນນຳເຂົ້ານ້ຳມັນເຊື້ອໄຟຂອງບັນດາໂຄງການຕ່າງໆ ແລະ ບັນດາຄໍາແນະນຳອື່ນໆອີກຈໍານວນໜຶ່ງ.

- Wave100S AD to Website 2020 0 - ລາວເລັ່ງສ້າງນິຕິກໍາຫລາຍສະບັບເພື່ອຄຸ້ມຄອງງົບປະມານ
- WhatsApp Image 2020 05 27 at 5 - ລາວເລັ່ງສ້າງນິຕິກໍາຫລາຍສະບັບເພື່ອຄຸ້ມຄອງງົບປະມານ
- WhatsApp Image 2020 05 27 at 5 - ລາວເລັ່ງສ້າງນິຕິກໍາຫລາຍສະບັບເພື່ອຄຸ້ມຄອງງົບປະມານ
error: Alert: ເນື້ອຫາຂ່າວມີລິຂະສິດ !!