ລັດຖະບານຈະມີນະໂຍບາຍຫລາຍດ້ານຕໍ່ເຂດທີ່ປະສົບໄພພິບັດທໍາມະຊາດ

- advert banner 728 90 728x90 - ລັດຖະບານຈະມີນະໂຍບາຍຫລາຍດ້ານຕໍ່ເຂດທີ່ປະສົບໄພພິບັດທໍາມະຊາດ

ກອງປະຊຸມລັດຖະບານເປີດກວ້າງໄດ້ປິດລົງໃນແລງວັນທີ 18 ກັນຍານີ້, ພາຍຫລັງດໍາເນີນມາເປັນເວລາ 2 ວັນ, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ, ກອງປະຊຸມໄດ້ຕົກລົງເຫັນດີສ້າງເງື່ອນໄຂອໍານວຍເພື່ອກຽມຜະລິດລະດູແລ້ງທົດແທນຜົນເສຍຫາຍຈາກໄພນໍ້າຖ້ວມ, ໂດຍມອບໃຫ້ກະຊວງການເງິນສົມທົບກັບກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມຄົ້ນຄວ້ານະໂຍບາຍຜ່ອນຜັນ ຫລື ໂຈະການເກັບພາສີທີ່ດິນໃນເຂດເກີດໄພພິບັດ, ມອບໃຫ້ກະຊວງພະລັງງານ ແລະ ບໍ່ແຮ່ ຄົ້ນຄວ້ານະໂຍບາຍຫລຸດຜ່ອນລາຄາຄ່າກະແສໄຟຟ້າໃນການຜະລິດລະດູແລ້ງ, ພ້ອມທັງໃຫ້ກະຊວງການເງິນຄົ້ນຄວ້າການນໍາໃຊ້ງົບປະມານສຸກເສີນ ເພື່ອແກ້ໄຂໄພພິບັດຢ່າງມີປະສິດທິຜົນ ແລະ ທັນສະພາບການ, ພ້ອມທັງຄົ້ນຄວ້ານະໂຍບາຍຫລຸດອັດຕາພາສີ, ອາກອນ ໃນການນໍາເຂົ້າປັດໃຈການຜະລິດຕ່າງໆ ເຊັ່ນ: ຝຸ່ນ, ປຸຍ, ແນວພັນພືດ ແລະ ສັດ, ມອບໃຫ້ກະຊວງກະສິກໍາ ແລະ ປ່າໄມ້ ກະກຽມການສະໜອງນໍ້າໃຫ້ແກ່ເຂດຜະລິດລະດູແລ້ງ, ສັດຕະວະແພດ, ການປາບສັດຕູພືດ,​ ສະໜອງຄວາມຮູ້ດ້ານເຕັກນິກ ແລະ ອື່ນໆ ເພື່ອຊຸກຍູ້ການເຮັດນາແຊງ,​ປູກພືດ ແລະ ລ້ຽງສັດຂອງເຂົາເຈົ້າໄດ້ຮັບຜົນ ແລະ ມອບໃຫ້ກະຊວງໂຍທາທິການ ແລະ ຂົນສົ່ງ ຮີບຮ້ອນກວດກາ ແລະ ແກ້ໄຂການຄົມມະນາຄົມ-ຂົນສົ່ງ ໃຫ້ໄວ ແລະ ທັນສະພາບການ ເພື່ອຮັບປະກັນບໍ່ໃຫ້ການສັນຈອນໃນເສັ້ນທາງຫລວງຖືກຕັດຂາດ,​ ການແກ້ໄຂສຸກເສີນຕ້ອງບົນພື້ນຖານປະຢັດ ແລະ ສົມເຫດສົມຜົນ, ມອບໃຫ້ກະຊວງແຜນການ ແລະ ການລົງທຶນ, ກະຊວງການເງິນ ແລະ ກະຊວງໂຍທາທິການ ແລະ ຂົນສົ່ງ ປະສານສົມທົບກັນວາງແຜນຈັດສັນງົບປະມານບູລິມະສິດສຸມໃສ່ຊໍາລະໃຫ້ບໍລິສັດແກ້ໄຂສຸກເສີນບັນດາເສັ້ນທາງໃນແຂວງຕ່າງໆທີ່ເກີດອຸທົກກະໄພໃນປີ 2018-2019 ພ້ອມທັງກວດຄືນການໄລ່ລຽງມູນຄ່າໂຄງການຕ່າງໆທີ່ໄດ້ຮັບການຈັດຕັ້ງປະຕິບັດໃຫ້ຖືກຕ້ອງກັບຄວາມເປັນຈິງ, ຮັບປະກັນໄດ້ທາງດ້ານມາດຕະຖານເຕັກ-ນິກ ແລະ ຄຸນນະພາບ ທັງປ້ອງກັນບໍ່ໃຫ້ມີໂຄງການນອກແຜນເດັດຂາດ, ມອບໃຫ້ກະຊວງສຶກສາທິການ ແລະ ກິລາ ກວດກາຊ່ວຍເຫລືອບັນດາໂຮງຮຽນທີ່ໄດ້ຮັບຜົນກະທົບຈາກນໍ້າຖ້ວມ ເພື່ອໃຫ້ສາມາດສືບຕໍ່ການຮຽນ-ການສອນ ໃຫ້ເປັນປົກກະຕິທັນກັບແຜນສົກຮຽນ, ໃຫ້ກະຊວງສາທາລະນະສຸກເອົາໃຈໃສ່ກວດກາປ້ອງກັນການລະບາດຂອງພະຍາດທີ່ອາດຈະເກີດຂຶ້ນຫລັງນໍ້າຖ້ວມ,​ ເດັດຂາດບໍ່ໃຫ້ເກີດມີພະຍາດລະບາດຮ້າຍແຮງເກີດຂຶ້ນ,​ອັນຈະສົ່ງຜົນກະທົບເພີ່ມຕື່ມຕໍ່ການພັດທະນາເສດຖະກິດ-ສັງຄົມ, ການທ່ອງທ່ຽວ ແລະ ຄວາມເຊື່ອໝັ້ນຂອງສາກົນຕໍ່ປະເທດເຮົາ. ນອກນີ້,​ ກອງປະຊຸມ ໄດ້ເນັ້ນໃຫ້ກະຊວງພະລັງງານ ແລະ ບໍ່ແຮ່ ເພີ່ມທະວີຄວາມເອົາໃຈໃສ່ການບໍລິຫານຈັດການນໍ້າຢູ່ເຂື່ອນຕ່າງໆ ໂດຍໃຫ້ມີການເວນຍາມຕະຫລອດ 24 ຊົ່ວໂມງ ແລະ ເມື່ອເກີດກໍລະນີສຸກເສີນແມ່ນໃຫ້ຮີບຮ້ອນລາຍງານ ແລະ ແກ້ໄຂໃຫ້ທັນສະພາບການ, ພ້ອມທັງເນັ້ນໃຫ້ບັນດາແຂວງຕ່າງໆຢຸດຕິການອະນຸມັດການພັດທະນາເຂື່ອນໄຟຟ້າຂະໜາດນ້ອຍໄວ້ກ່ອນ. ສ່ວນໂຄງການທີ່ໄດ້ຮັບອະນຸຍາດໃນຜ່ານມາ ແມ່ນໃຫ້ກວດກາຄືນການສໍາຫລວດ, ອອກແບບ ແລະ ກໍ່ສ້າງ ເພື່ອປ້ອງກັນບໍ່ໃຫ້ເກີດໄພພິບັດຂຶ້ນອີກ, ຖ້າຫາກໂຄງການໃດບໍ່ຮັບປະກັນດ້ານເຕັກນິກແມ່ນໃຫ້ໂຈະການກໍ່ສ້າງທັນທີ.

- Tiger Head 728x90 - ລັດຖະບານຈະມີນະໂຍບາຍຫລາຍດ້ານຕໍ່ເຂດທີ່ປະສົບໄພພິບັດທໍາມະຊາດ
- 1 1 - ລັດຖະບານຈະມີນະໂຍບາຍຫລາຍດ້ານຕໍ່ເຂດທີ່ປະສົບໄພພິບັດທໍາມະຊາດ
error: Content is protected !!