ຊຸກຍູ້​ທຸກຂະ​ແໜງ​ການ​ລົງ​ຊ່ວຍ​ເຫລືອ​ແກ້​ໄຂ​ໄພພິບັດ​ຢູ່​ເມືອງ​ສະໜາມ​ໄຊ

- Sanamxay - ຊຸກຍູ້​ທຸກຂະ​ແໜງ​ການ​ລົງ​ຊ່ວຍ​ເຫລືອ​ແກ້​ໄຂ​ໄພພິບັດ​ຢູ່​ເມືອງ​ສະໜາມ​ໄຊ
- Untitled design - ຊຸກຍູ້​ທຸກຂະ​ແໜງ​ການ​ລົງ​ຊ່ວຍ​ເຫລືອ​ແກ້​ໄຂ​ໄພພິບັດ​ຢູ່​ເມືອງ​ສະໜາມ​ໄຊ

ຄະນະ​ກຳມະການ​ປ້ອງ​ກັນ ​ແລະ ຄວບ​ຄຸມ​ໄພພິບັດ​ແຫ່ງ​ຊາດ ​ໄດ້​ສະ​ເໜີ​ຕໍ່​ກອງ​ປະຊຸມ​ລັດຖະບານ​ເປີດ​ກວ້າງ ຄັ້ງທີ II ທີ່​ສຳ​ເລັດ​ເມື່ອ​ບໍ່​ດົນ​ນີ້​ວ່າ: ສະ​ເໜີ​ໃຫ້​ແຕ່ລະ​ຂະ​ແໜງ​ການ​ຂອງ​ສູນ​ກາງ​ສົ່ງ​ພະນັກງານ​ລົງ​ໄປ​ປະຈຳ ​ເພື່ອ​ສົມທົບ​ເຮັດ​ວຽກ​ກັບ​ພາກສ່ວນ​ກ່ຽວຂ້ອງ​ຂອງ​ແຂວງ​ໃນ​ການ​ສຳ​ຫລວດ ​ແລະ ປະ​ເມີນ​ຜົນ​ກະທົບ, ພ້ອມ​ທັງຊອກ​ຫາ​ວິທີ​ແກ້​ໄຂ​ໄພພິບັດ​ຢູ່​ເມືອງ​ສະໜາມ​ໄຊ​ກັບ​ສູ່​ສະພາບ​ປົກກະຕິ. ມາ​ຮອດ​ປັດຈຸບັນ​ເຫັນ​ວ່າ​ຍັງ​ມີ​ສິ່ງ​ທ້າ​ທາຍ​ຫລາຍ​ດ້ານ​ຕໍ່​ວຽກ​ງານ​ຟື້ນຟູ ​ແລະ ​ແກ້​ໄຂ​ຜົນ​ກະທົບ​ຢູ່​ເມືອງ​ດັ່ງກ່າວ ​ເປັນຕົ້ນການ​ບໍລິຫານ​ຄຸ້ມ​ຄອງ​ສູນ​ພັກ​ເຊົ່າ​ຊົ່ວຄາວ​ຍັງ​ບໍ່​ທັນ​ເປັນ​ລະບົບ ຍ້ອນ​ບໍ່​ສາມາດ​ເກັບ​ກຳ​ສະຖິຕິ ​ແລະ ອອກ​ບັດ​ໃຫ້​ຜູ້​ປະສົບ​ໄພ​ໄດ້​ທັງ​ໝົດ ອັນ​ໄດ້​ສ້າງ​ຄວາມ​ຫຍຸ້ງຍາກ​ໃຫ້​ແກ່​ການ​ປະຕິບັດ​ວຽກ​ງານ​ຊ່ວຍ​ເຫລືອ​ບັນ​ເທົາ​ທຸກ​ ທັງ​ໄລຍະ​ສັ້ນ ​ແລະ​ ຍາວ​ນານ, ການ​ຊ່ວຍ​ເຫລືອ​ເຄື່ອງ​ບາງ​ປະ​ເພດ ​ເປັນຕົ້ນ​ເຄື່ອງນຸ່ງ​ຫົ່ມ​ມື​ສອງ​ຈຳນວນ​ຫລາຍ​ບໍ່​ສະອາດ ​ເຊິ່ງອາດ​ນຳ​ເຊື້ອພະຍາດ​ມາສູ່​ປະຊາຊົນ. ພ້ອມ​ນີ້ ຍັງ​ມີ​ເຄື່ອງ​ດື່ມ​ປະ​ເພດ​ນົມ, ນ້ຳອັດ​ລົມ, ​ເຂົ້າໜົມ ​ແລະ ອື່ນໆ​ໝົດ​ອາຍຸ ​ແລະ ​ເສຍ​ຄຸນ. ນອກ​ນີ້ ຍັງ​ມີ​ບາງ​ບັນຫາ​ທີ່​ເປັນຄວາມ​ສ່ຽງ​ທີ່​ຕ້ອງ​ໄດ້​ຮີບ​ຮ້ອນ​ເອົາ​ໃຈ​ໃສ່​ແກ້​ໄຂ​ຢູ່​ສູນ​ພັກ​ເຊົາ ​ເປັນຕົ້ນບ່ອນ​ພັກ​ເຊົາ​ແອ​ອັດ, ປຽກ​ຊຸ່ມ, ຫ້ອງ​ນ້ຳ-ວິດຖ່າຍ ​ແລະ ນ້ຳ​ໃຊ້​ບໍ່​ພຽງພໍ, ມີ​ເດັກນ້ອຍ​ລຸ່ມ 5 ປີ​ຈຳນວນ​ຫລາຍ, ​ແມ່ລູກອ່ອນ, ​ແມ່ຍິງ​ຖືພາ, ຜູ້​ພິການ, ຜູ້​ຊຶມ​ເສົ້າ ​ແລະ ອື່ນໆ ຍັງ​ຕ້ອງການ​ການ​ເບິ່ງ​ແຍງ​ເປັນ​ພິ​ເສດ. ພ້ອມ​ນີ້ ການ​ປະ​ເມີນ ​ແລະ ​ເກັບ​ກຳ​ຂໍ້​ມູນ​ຄວາມ​ຕ້ອງການ​ຊ່ວຍ​ເຫລືອ​ສຸກ​ເສີນ​ຍັງ​ບໍ່​ທັນ​ໄດ້​ເຮັດ​ເປັນ​ລະບົບ ​ແລະ ​ເອກະ​ພາບ, ມີ​ລັກສະນະ​ຕ່າງ​ຄົນ​ຕ່າງ​ເຮັດ ທັງ​ພາກ​ລັດ ​ແລະ ​ເອກະ​ຊົນ.

ຄະນະ​ດັ່ງກ່າວ​ໃຫ້​ຮູ້​ວ່າ: ມາ​ຮອດ​ປັດຈຸບັນ, ການ​ບໍລິຈາກ​ຊ່ວຍ​ເຫລືອ​ຈາກ​ສັງຄົມ​ມີ​ຍອດ​ລວມທັງ​ໝົດ 70 ຕື້ກວ່າ​ກີບ, 85 ລ້ານ​ກວ່າ​ບາດ (ສະກຸນ​ເງິນ​ໄທ) ​ແລະ 13 ລ້ານ​ກວ່າ​ໂດ​ລາ​ສະຫະລັດ. ນອກ​ນີ້ ຍັງ​ມີ​ວັດຖຸ-ອຸປະກອນ, ​ເຄື່ອງ​ອຸປະ​ໂພ​ກ-ບໍລິ​ໂພ​ກ​ເປັນ​ຈຳນວນ​ຫລາຍ​ທີ່​ຍັງ​ເກັບ​ມ້ຽນ​ໄວ້​ຢູ່​ສາງ​ຫລັກ 17 ຂອງ​ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ. ສ່ວນ​ວຽກ​ງານ​ທີ່​ຕ້ອງ​ໄດ້​ເລັ່ງປະຕິບັດ​ຄື: ສືບ​ຕໍ່​ເບີກ​ຈ່າຍ​ເງິນ​ແຮ່​ໃຫ້​ຜູ້​ລະ 1 ​ແສນ​ກີບ​ຕໍ່​ເດືອນ ​ເຊິ່ງມີ​ທັງ​ໝົດ 7.095 ຄົນ, ສືບ​ຕໍ່​ບຸກ​ເບີກພື້ນທີ່, ດຳ​ເນີນ​ການ​ສຳ​ຫລວດ​ແຜນ​ຜັງ ​ແລະ ປຸກ​ສ້າງ​ທີ່ຢູ່​ອາ​ໄສ​ຊົ່ວຄາວ 5 ຈຸດ, ສືບ​ຕໍ່​ຊອກ​ຄົ້ນ ​ແລະ ​ເກັບ​ກູ້​ຜູ້​ສູນຫາຍ ​ແລະ ​ເລັ່ງ​ເປີດ​ການ​ຮຽນ-ການ​ສອນ​ຂອງ​ໂຮງຮຽນ​ໃນ​ເມືອງ​ສະໜາມ​ໄຊ ​ເຊິ່ງວຽກ​ງານ​ທັງ​ໝົດ​ນີ້​ແມ່ນ​ຕ້ອງການ​ພະນັກງານ​ພາກສ່ວນ​ກ່ຽວຂ້ອງ​ຈາກ​ສູນ​ກາງ​ລົງ​ມາ​ຊ່ວຍ​ເຫລືອ​ຕື່ມ.

- Wave100S AD to Website 2020 0 - ຊຸກຍູ້​ທຸກຂະ​ແໜງ​ການ​ລົງ​ຊ່ວຍ​ເຫລືອ​ແກ້​ໄຂ​ໄພພິບັດ​ຢູ່​ເມືອງ​ສະໜາມ​ໄຊ
- WhatsApp Image 2020 05 27 at 5 - ຊຸກຍູ້​ທຸກຂະ​ແໜງ​ການ​ລົງ​ຊ່ວຍ​ເຫລືອ​ແກ້​ໄຂ​ໄພພິບັດ​ຢູ່​ເມືອງ​ສະໜາມ​ໄຊ
- WhatsApp Image 2020 05 27 at 5 - ຊຸກຍູ້​ທຸກຂະ​ແໜງ​ການ​ລົງ​ຊ່ວຍ​ເຫລືອ​ແກ້​ໄຂ​ໄພພິບັດ​ຢູ່​ເມືອງ​ສະໜາມ​ໄຊ
error: Alert: ເນື້ອຫາຂ່າວມີລິຂະສິດ !!