ປະທານປະເທດໂອ້ລົມກອງປະຊຸມພາກທຸລະກິດໃຫ້ເອົາໃຈໃສ່ຄົ້ນຄວ້າແກ້ໄຂບັນຫາທີ່ເກີດຂຶ້ນໃນພາກທຸລະກິດ

- President - ປະທານປະເທດໂອ້ລົມກອງປະຊຸມພາກທຸລະກິດໃຫ້ເອົາໃຈໃສ່ຄົ້ນຄວ້າແກ້ໄຂບັນຫາທີ່ເກີດຂຶ້ນໃນພາກທຸລະກິດ
- Untitled design - ປະທານປະເທດໂອ້ລົມກອງປະຊຸມພາກທຸລະກິດໃຫ້ເອົາໃຈໃສ່ຄົ້ນຄວ້າແກ້ໄຂບັນຫາທີ່ເກີດຂຶ້ນໃນພາກທຸລະກິດ

ໃນໂອກາດໃຫ້ກຽດເຂົ້າຮ່ວມ ແລະ ພົບປະໂອ້ລົມກອງປະຊຸມພາກທຸລະກິດ, ບັນຫາໃນປັດຈຸບັນ ແລະ ທາງອອກໃນຕໍ່ໜ້າ ທີ່ນະຄອນຫລວງວຽງຈັນໃນວັນທີ 4 ຕຸລານີ້, ທ່ານປະທານປະເທດ ບຸນຍັງ ວໍລະຈິດ ໄດ້ກ່າວວ່າ: ໃນຫລາຍປີຜ່ານມາເຖິງປັດຈຸບັນ, ເສດຖະກິດຂອງປະເທດເຮົາ, ໂດຍສະເພາະແມ່ນເສດຖະກິດມະຫາພາກ ແມ່ນພົບກັບຄວາມຫຍຸ້ງຍາກທີ່ໜັກໜ່ວງສົມຄວນ. ໃນນັ້ນ, ອັນສົດໆຮ້ອນໆທີ່ສຸດໃນປັດຈຸບັນແມ່ນບັນຫາການຂາດດຸນງົບປະມານ, ໜີ້ສິນຂອງລັດ ຕໍ່ພາຍໃນ ແລະ ຕ່າງປະເທດ (ໜີ້ສິນສາທາລະນະ), ການຂາດສະພາບຄ່ອງໃນລະບົບທະນາຄານຂອງລັດ, ເຊິ່ງໜຶ່ງໃນບັນດາສາເຫດສຳຄັນ ແມ່ນຈາກຄວາມອ່ອນແອໃນວຽກງານແຜນການ ແລະ ການເງິນ ກໍຄືຄວາມອ່ອນແອໃນພາກການຜະລິດຂອງປະເທດເຮົາ. ຕໍ່ກັບສະພາບການດັ່ງກ່າວ, ຕະຫລອດໄລຍະທີ່ຜ່ານມາ ສູນກາງພັກ, ລັດຖະບານ ໄດ້ພະຍາຍາມຄົ້ນຄວ້າ, ວາງບັນດາວິທີການ ​ແລະ ມາດຕະການເພື່ອແກ້ໄຂບັນຫາຢ່າງຈິງຈັງ ແລະ ບັນດາຜູ້ປະກອບການຂອງປະເທດເຮົາ, ກໍມີຈຳນວນບໍ່ໜ້ອຍ ພວມຕົກຢູ່ໃນສາຍພົວພັນຕ່ອງໂສ້ຂອງຄວາມທຸກຍາກທາງເສດຖະກິດໃນປັດຈຸບັນ. ​ແຕ່​ໂດ​ຍ​ເຊື່ອ​ໝັ້ນ​ຕໍ່​ບົດ​ບາດ​ສຳຄັນ​ ຂອງ​ບັນດາ​ຜູ້​ປະກອບ​ການ​ ໃນ​ຖານະ​ເປັນ​ຜູ້​ສ້າງ​ຄຸນຄ່າ​ໃໝ່​ຂອງ​ເສດຖະກິດ​ແຫ່ງ​ຊາດ ​ທີ່​ພວມ​ຊອກ​ຫາ​ທາງ​ອອກ ສຳລັບການພັດທະນາຂອງຕົນໃນຕໍ່ໜ້າ, ກົມການເມືອງສູນການພັກ ຈຶ່ງໄດ້ຊີ້ນຳຄະນະກຳມະການເນື້ອໃນກະກຽມກອງປະຊຸມໃຫຍ່ ຄັ້ງທີ XI ຂອງພັກ ທັງເປັນຄະນະຮັບຜິດຊອບກະກຽມກອງປະຊຸມສູນກາງຄັ້ງທີ 7 (ສະໄໝທີ X), ຈັດກອງປະຊຸມສຳມະນານີ້ຂຶ້ນ ເພື່ອລະດົມຄວາມຄິດເຫັນຂອງບັນດາຜູ້ປະກອບການໃນທຸກຂົງເຂດ ກໍຄື ຕົວແທນຈາກກະຊວງ, ອົງການ ທີ່ເຮັດໜ້າທີ່ຄົ້ນຄວ້າວິໃຈ ແລະ ມີບົດບາດຄຸ້ມຄອງມະຫາພາກຕໍ່ເສດຖະກິດ, ໂດຍສຸມໃສ່ຄົ້ນຄວ້າປະກອບຄວາມເຫັນ ກ່ຽວກັບບັນຫາ ກໍຄືທາງອອກການແກ້ໄຂຕໍ່ບັນຫາທີ່ເກີດຂຶ້ນໃນພາກທຸລະກິດຂອງປະເທດ.

ເພື່ອເຮັດໃຫ້ກອງປະຊຸມຄັ້ງນີ້, ບັນລຸຕາມຈຸດປະສົງລະດັບຄາດໝາຍທີ່ວາງອອກ, ທ່ານປະ ທານປະເທດ ກໍໄດ້ແນະນໍາໃຫ້ບັນດາຜູ້ເຂົ້າຮ່ວມກອງປະຊຸມຄົ້ນຄວ້າ ປະກອບຄວາມເຫັນໂດຍສຸມໃສ່ລົງເລິກ 5 ປະເດັນ ຄື: ບັນຫາຫຍັງແດ່ທີ່ພາກທຸລະກິດ ກໍຄື ຂົງເຂດທຸລະກິດຂອງຕົນກຳລັງປະເຊີນຢູ່, ຈຸດເລັ່ງໃນການຂະຫຍາຍກິດຈະການຂອງຕົນ (ສ້າງຜະລິດຕະພັນອອກສູ່ຕະຫລາດ) ໃນຕໍ່ໜ້າ ອັນຫລັກໆແມ່ນອັນໃດ, ສິ່ງທີ່ພາກທຸລະກິດ ແລະ ຂົງເຂດຂອງຕົນເອງຕ້ອງປັບປຸງແກ້ໄຂ ເພື່ອສ້າງປັດໄຈຄ້ຳປະກັນ ແກ່ການແຂ່ງຂັນຢູ່ຕະຫລາດພາຍໃນ ແລະ ຕ່າງປະເທດມີຫຍັງແດ່, ຕ້ອງມີການກຳນົດນະໂຍບາຍສົ່ງເສີມ ແລະ ສ້າງ ຫລື ປັບປຸງບັນດານິຕິກຳຕົ້ນຕໍຫຍັງແດ່ ​ເພື່ອ​ສະໜັບສະໜູນ ​ແລະ ສ້າງ​ເງື່ອນ​ໄຂ​ອັນ​ຈຳ​ເປັນ​ໃຫ້​​ແກ່​ພາກ​ທຸລະ​ກິດ​ແກ້​ໄຂ​ຄວາມ​ຫຍຸ້ງຍາກ ແລະ ສິ່ງທີ່ເປັນອຸປະສັກກົດໜ່ວງ, ຖ່ວງດຶງຕົ້ນຕໍໃນການສ້າງທຸລະກິໃໝ່, ການດຳເນີນທຸລະກິດຢູ່ລາວປັດຈຸບັນ ທີ່ເກີດຈາກບັນດາອົງການພາກລັດ ເຊິ່ງຕ້ອງໄດ້ແກ້ໄຂມີຫຍັງແດ່.

ທ່ານປະທານປະເທດ ໄດ້ເນັ້ນໃຫ້ບັນດາຜູ້ແທນກອງປະຊຸມຈົ່ງຖືວ່າ: ການປະກອບຄວາມເຫັນດ້ວຍຄວາມຈິງໃຈ, ສ່ອງແສງບັນຫາຕົວຈິງຂອງພາກສ່ວນທຸລະກິດລວມ ກໍຄື ບັນຫາໃນສ່ວນທີ່ຕົນປະກອບການຢ່າງກົງໄປກົງມານັ້ນ ເປັນການເຊີດຊູຄວາມຮັບຜິດຊອບສູງສົ່ງຕໍ່ປະເທດຊາດ, ສະໜັບສະໜູນ ແລະ ປະກອບສ່ວນໂດຍກົງ ໃນການບູລະນະແຜນນະໂຍບາຍ ກໍຄື ການນຳພາ-ຊີ້​ນຳ ຂອງພັກ, ລັດ ຕໍ່ພາກທຸລະກິດໃຫ້ຖືກຕ້ອງ, ເຂັ້ມແຂງ, ມີປະສິດທິຜົນເພື່ອສ້າງບັນຍາກາດ, ເງື່ອນໄຂ ແລະ ສິ່ງແວດລ້ອມທີ່ດີຍິ່ງໆຂຶ້ນ ໃຫ້ແກ່ການເຄື່ອນໄຫວທຸລະກິດຂອງພາກສ່ວນເສດຖະກິດຕ່າງໆ ນັບທັງຕໍ່ຂະແໜງທຸລະກິດທີ່ຕົນເອງເປັນຜູ້ປະກອບການ, ທັງເປັນພື້ນຖານອັນສຳຄັນແກ່ການແກ້ໄຂຜ່ານຜ່າຄວາມຫຍຸ້ງຍາກຂອງເສດຖະກິດຂອງຊາດ.

- Wave100S AD to Website 2020 0 - ປະທານປະເທດໂອ້ລົມກອງປະຊຸມພາກທຸລະກິດໃຫ້ເອົາໃຈໃສ່ຄົ້ນຄວ້າແກ້ໄຂບັນຫາທີ່ເກີດຂຶ້ນໃນພາກທຸລະກິດ
- WhatsApp Image 2020 05 27 at 5 - ປະທານປະເທດໂອ້ລົມກອງປະຊຸມພາກທຸລະກິດໃຫ້ເອົາໃຈໃສ່ຄົ້ນຄວ້າແກ້ໄຂບັນຫາທີ່ເກີດຂຶ້ນໃນພາກທຸລະກິດ
- WhatsApp Image 2020 05 27 at 5 - ປະທານປະເທດໂອ້ລົມກອງປະຊຸມພາກທຸລະກິດໃຫ້ເອົາໃຈໃສ່ຄົ້ນຄວ້າແກ້ໄຂບັນຫາທີ່ເກີດຂຶ້ນໃນພາກທຸລະກິດ
error: Alert: ເນື້ອຫາຂ່າວມີລິຂະສິດ !!