ກະຊວງສຶກສາຫວນຄືນມູນເຊື້ອວັນຄູແຫ່ງຊາດ 7 ຕຸລາ

- Teacher day - ກະຊວງສຶກສາຫວນຄືນມູນເຊື້ອວັນຄູແຫ່ງຊາດ 7 ຕຸລາ
- Untitled design - ກະຊວງສຶກສາຫວນຄືນມູນເຊື້ອວັນຄູແຫ່ງຊາດ 7 ຕຸລາ

ໃນວັນທີ 5 ຕຸລານີ້, ກະຊວງ​ສຶກສາ​ທິການ ​ແລະ ກິລາ, ໄດ້ຈັດງານສະເຫຼີມສະຫຼອງວັນຄູແຫ່ງຊາດ ຄົບຮອບ 24 ປີ (7/10/1994-7/10/2018) ຂຶ້ນທີ່ມະຫາວິທະຍາໄລແຫ່ງຊາດ, ເພື່ອຫວນຄືນມູນເຊື້ອອັນສໍາຄັນຂອງຄູອາຈານ, ​ໂດຍ​ການເຂົ້າ​ຮ່ວມ​ຂອງ​ທ່ານ ນາງ​ ​ແສງ​ເດືອນ​ ຫຼ້າ​ຈັນທະ​ບູນ ລັດຖະມົນຕີ​ກະຊວງ​ສຶກສຶກສາ​ທິການ ​ແລ​ະ ກິ​ລາ, ມີພະນັກ​ງານ​ຄູ-ອາຈານ​ເຂົ້າ​ຮ່ວມ​ຢ່າງ​​ຫຼວງຫຼາຍ.

- DSC 1384 - ກະຊວງສຶກສາຫວນຄືນມູນເຊື້ອວັນຄູແຫ່ງຊາດ 7 ຕຸລາ

​    ໃນໂອກາດ​ດັ່ງກ່າວ, ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ​ໄດ້ມີຄໍາເຫັນ​ວ່າ: ຍາມໃດພັກ-ລັດຖະບານເຮົາກໍໄດ້ເອົາໃຈໃສ່ ແລະ ຖືສໍາຄັນຕໍ່ພະນັກງານຄູ-ອາຈານ, ຊຶ່ງສະແດງອອກຜ່ານການປະຕິບັດນະໂຍບາຍຕ່າງໆຕໍ່ຄູ-ອາຈານເລົ່ານັ້ນ, ພ້ອມທັງໄດ້ເອົາໃຈໃສ່ກໍ່ສ້າງຍົກສູງລະດົມຄວາມອາດສາມາດໃຫ້ເຂົ້າເຈົ້າໄດ້ຕະຫຼອດມາ ແລະ ຍົກສູງຖານະຕໍາແໜ່ງນັບມື້ພົ້ນເດັ່ນຂຶ້ນໃນສັງຄົມ.

​    ທ່ານລັດຖະມົນຕີກ່າວວ່າ: ພາລະກິດ​ການ​ສຶກສາ​ເປັນ​ພາລະກິດ​ຂອງທົ່ວ​ປວງ​ຊົນ ຖ້າມີ​ແຕ່​ຂະ​ແໜງ​ການ​ສຶກສາ ​ແລະ ກິລາ ກໍ​ຄືພະນັກງານ, ຄູ​ອາຈານ ​ຈະ​ເຮັດ​ແຕ່​ຝ່າຍ​ດຽວກໍ​ບໍ່​​ໄດ້, ຕ້ອງ​ໄດ້​ຮັບ​ການ​ສະໜັບ​ສະ​ໜູນ, ການປະກອບສ່ວນຊ່ວຍເຫຼືອຂອງ​​ສັງຄົມ, ຈຶ່ງ​ເຮັດ​ໃຫ້ການ​ສຶກສາມີ​ການ​ພັດທະນາ ​ແລະ ມີ​ຄຸນ​ນະພາ​ບສູງ​ຂຶ້ນໄດ້ ແລະ ໃນ​ໄລຍະ​ຜ່ານ​ມາ ອໍານາດ​ການ​ປົກຄອງ​ທ້ອງ​ຖິ່ນ, ຂະ​ແໜງ​ການ​ຕ່າງ​ໆ, ນັບທັງນັກ​ທຸລະ​ກິດF ພໍ່ຄ້າ​ຊາວ​ຂາຍ ຕະຫຼອດ​ຮອດ​ປະຊາຊົນ, ຜູ້​ປົກຄອງ​ນັກຮຽນ ກໍ​ໄດ້​ປະກອບ​ສ່ວນ​ຢ່າງ​ຫ້າວຫັນ ​ແລະ ​​ເປັນ​ເຈົ້າ​ການເຂົ້າ​ໃນ​ການ​ພັດທະນາ​ການ​ສຶກສາ ​ແລະ ກິລາ, ​ເຮັດ​ໃຫ້​ວຽກ​ງານ​ດັ່ງກ່າວມີ​ບາ​ດກ້າວ​ຂະຫຍາຍ​ຕົວ​ດີ​ຂຶ້ນ​ເລື້ອຍໆ. ​ແຕ່​ເຖິງ​ຢ່າງ​ໃດ​ກໍຕາມ ​ເພື່ອ​ເຮັດ​​ໃຫ້ການ​ສຶກສາ​ຂອງ​ປະ​ເທດ​ເຮົາ​ໄດ້ຮັບການ​ພັດທະນາ​ໄປ​ສູ່​ຄຸນ​ນະພາ​ບໃໝ່, ສາມາດ​ເຊື່ອມ​​ໂຍງ​ກັບ​ພາກ​ພື້ນ ​ແລະ ສາກົນ​ໄດ້​ນັ້ນ, ພວກ​​ເຮົາ​ຍິ່ງ​ຕ້ອງໄດ້​ເພີ່ມ​ທະວີ​ຄວາມ​ເອົາ​ໃຈ​ໃສ່​ພັດທະນາ​ການ​ສຶກສາ​ໃຫ້​ນັບ​ມື້​ນັບ​ຫຼາຍ​ຂຶ້ນ, ​ເຊິ່ງການ​ພັດທະນາ​ນັ້ນ​ກໍ​ປຽບ​ເໝືອນ​ການ​ພັດທະນາ​ຊັບ​ພະ​ຍາ​ກອນ​ມະນຸ​ດ ກໍ່ຄື​ພັດທະນາ​ອະນາຄົດ​ຂອງ​ລູກ​ຫຼານ ​ໃຫ້​ເຂົາ​ເຈົ້າ​ມີ​ຄວາມ​ຮູ້, ຄວາມ​ສາມາດ ທັກ​ສະ​ວິຊາ​ຊີບ ​ແລະ ການດໍ​າລົງ​ຊີວິດ​ຢູ່​ໃນ​ສະພາບ​​ແວດລ້ອມ​ການ​ປ່ຽນ​ແປງ​ຂອງ​ສັງຄົມ​​ດີ​ຂຶ້ນ. ໃນໂອກາດນີ້, ທ່ານ ລັດຖະມົນຕີ ຍັ​ງ​ໄດ້​ຮຽກຮ້ອງ​​ຜູ້​ຮັບຜິດຊອບ​ວຽກ​ງານ​ການ​ສຶກສາ ​ໄດ້​ເອົາ​ໃຈ​ໃສ່​ຍົກ​ສູງ​ຄວາມ​ຮັບ​ຜິ​ດຊອບ​ຕໍ່​ການ​ປະຕິບັດ​ໜ້າ​ທີ່​ສິດສອນ​ຂອງຕົນ ແລະ ຜູ້​ບໍລິຫານ​ການ​ສຶກສາ​ທຸກ​ຂັ້ນ ຈົ່ງ​ໄດ້​ເພີ່ມທະວີ​ຄວາມ​ຮັບ​ຜິດ​ຊອບ​ຊີ້​ນໍາ-ນໍາພາ​ວຽກ​ງານ​ສຶກສາ ​ແລະ ກິລາ ​ໃຫ້​ແທດ​ເຖິງ​ກວ່າ​ເກົ່າ, ສະກັດ​ກັນ​ປະກົດ​ການ​ຫຍໍ້​ທໍ້​ໃນ​ຂະ​ແໜງ​ການ​ສຶກສາ ​ແລະ ກິລາ; ສ່ວນພະນັກງານ​ບໍານານ, ຜູ້​ຊົງ​ຄຸນ​ວຸດ​ທິ ຈົ່ງ​ໄດ້​ເອົາ​​ໃຈ​ໃສ່​​ໃຫ້ຄໍາ​ຄິດ​ຄໍາ​ເຫັນ​ໃນ​ການ​ພັດທະນາ​ການ​ສຶກສາ, ປຸກລະດົມ​ຊຸມ​ຊົນ​ປະກອບສ່ວນ​ເຂົ້າ​ໃນ​ວຽກ​ງານ​ການ​ສຶກສາ​ໃຫ້​ນັບ​ມື້​ນັບ​ຫຼາຍ​ຂຶ້ນ; ສໍາລັບ​ນັກຮຽນ​ນັກ​ສຶກສາ ຕ້ອງ​ເຄົາລົບ​ນັບຖື​ຄູ​ອາຈານ, ​ເອົາ​ໃຈ​ໃສ່​ຄົ້ນຄວ້າ​ສຶກສາ​ຮໍ່າຮຽນ​ໃນ​ຫ້ອງ​ຮຽນ ​ແລະ ນອກ​ຫ້​ອງຮຽນ​ໃຫ້​ຫຼາຍ​ຂຶ້ນ, ​ເສີ​ມສ້າງ​ຄວາ​ມຮູ້​ຄວາມ​ສາມາດ ​ເພື່ອ​ສ້າງ​​ໂອກາດ​ໃຫ້​ຕົນ​ເອງ ​ໃນ​ການ​ມີ​ວຽກ​ເຮັດ​ງານ​ທໍາ, ປະກອບ​ອາຊີບ​ທີ່​ໝັ້ນຄົງ; ພາກ​ສ່ວນ​ທຸລະ​ກິດ, ອົງການ​ຈັດ​ຕັ້ງ​ສັງຄົມ, ຄູ່​ຮ່ວມ​ພັດທະນາ ຈົ່ງ​ສືບ​ຕໍ່​ປະກອບສ່ວນ ​ແລະ ຊ່ວຍ​ເຫຼືອທາງ​ດ້ານ​ທຶນຮອນ ​ແລະ ວິຊາ​ການ​ໃນ​ການ​ພັດທະນາ​ວຽກ​ງານ​ການ​ສຶກສາ; ຊ່ວຍ​ເບິ່ງ​ແຍງ​ຊີວິດ​ການ​ເປັນຢູ່ຂອງຄູ-ອາຈານໃຫ້ດີຂຶ້ນ, ສືບຕໍ່​ພັດທະນາ​ພື້ນຖານ​ໂຄງ​ລ່າງ ​ແລະ ປະກອບສ່ວນວັດ​ຖຸອຸປະກອນ​​ຮັບ​ໃຊ້​ການ​ຮຽນ​ການ​ສອນ​ ​ແລະ ອື່ນໆ​ໃຫ້ພຽງພໍ ສໍາລັບ​ພໍ່​ແມ່​ຜູ້​ປົກຄອງ​ນັກຮຽນ​ນັກ​ສຶກສາ ​ແມ່ນ​ມີ​ຄວາມ​ສໍາຄັນ​ຫຼາຍ ​ໃນ​ການ​ຊ່ວຍ​ເຫຼືອ​ຕັກ​ເຕືອນ, ບອກສອນ, ສຶກສາ​ອົບຮົມ ​ແລະ ສົ່ງ​ເສີມ​ລູກ​ຫຼານ​ຂ​​ອງຕົນ​ໃຫ້​ໄດ້​ເຂົ້າ​ໂຮງຮຽນ ແລະ ສົ່ງ​ເສີມ​ໃຫ້​ລູກ​ຫຼານ​ເຂົ້າ​ຮຽນ​ຕໍ່​ໃນ​ສາຂາ​ວິຊາ​ຊີບ​ຕ່າງໆ ຕາມ​ຄວາມ​ສາມາດ​ຂອງ​ເຂົາ​​ເຈົ້າ ​ເພື່ອ​ ​ມີ​ວຽກ​ເຮັດ​ງານ​ທໍາ, ມີ​ລາຍ​ຮັບ​ລ້ຽງ​ກຸ້ມ​ຕົນ​​ເອງ ​ແລະ ຄອບ​ຄົວໄດ້.

- Wave100S AD to Website 2020 0 - ກະຊວງສຶກສາຫວນຄືນມູນເຊື້ອວັນຄູແຫ່ງຊາດ 7 ຕຸລາ

​ໃນ​ພິທີ​ ທ່ານ ພິມ​ມະ​ສອນ ​ເລືອ​ງຄໍາ​ມາ ອະດີ​ດລັດຖະມົນຕີ​ກະຊວງສຶກສາ​ທິການ ​ແລະ ກິລາ ກໍໄດ້​ອ່ານ​ບົດ​ກອນ​ອວຍພອນ​ວັນ​ຄູ ທີ່​ມີ​ຄວາມ​ໝາຍ​ຄວາມ​ສໍາຄັນ ​ໂດຍ​ສະ​ເພາະ​ແມ່ນ​ຄູ​ເປັນ​ແມ່ພິມ​ຂອງ​ຊາດ ​ແລະ ​ເປັນ​ວິ​ສະ​ກອນ​ແຫ່ງ​ດວງ​ວິນ​ຍານ, ພ້ອມ​ນັ້ນກໍໄດ້​ມອບ​ຂອງຂວັນ​ໃຫ້​​​ແກ່​ພະນັກງານ​​ອາວຸ​ໂສ​ບໍານານ ​ເພື່ອຈາລຶກຄຸນງາມຄວາມດີຂອງຄູ-ອາຈານດັ່ງກ່າວ.

- WhatsApp Image 2020 05 27 at 5 - ກະຊວງສຶກສາຫວນຄືນມູນເຊື້ອວັນຄູແຫ່ງຊາດ 7 ຕຸລາ
- WhatsApp Image 2020 05 27 at 5 - ກະຊວງສຶກສາຫວນຄືນມູນເຊື້ອວັນຄູແຫ່ງຊາດ 7 ຕຸລາ
error: Alert: ເນື້ອຫາຂ່າວມີລິຂະສິດ !!