ການຮ່ວມມືລາວ-ຍີ່ປຸ່ນ ນັບມື້ແຕກດອກອອກຜົນງອກງາມຍິ່ງຂຶ້ນ

- laos japan - ການຮ່ວມມືລາວ-ຍີ່ປຸ່ນ ນັບມື້ແຕກດອກອອກຜົນງອກງາມຍິ່ງຂຶ້ນ
- Untitled design - ການຮ່ວມມືລາວ-ຍີ່ປຸ່ນ ນັບມື້ແຕກດອກອອກຜົນງອກງາມຍິ່ງຂຶ້ນ

ໃນວັນທີ 8 ຕຸລານີ້, ທ່ານນາຍົກລັດຖະມົນຕີແຫ່ງ ສປປ ລາວ ທອງລຸນ ສີສຸລິດ ແລະ ທ່ານ ຊີນໂຊ ອາເບະ ນາຍົກລັດຖະມົນຕີແຫ່ງຍີປຸ່ນ, ໄດ້ຮ່ວມກັນຖະແຫລງຕໍ່ສື່ມວນຊົນກ່ຽວກັບຜົນການພົບປະສຸດຍອດສອງຝ່າຍລາວ-ຍີປຸ່ນ ທີ່ຫ້ອງວ່າການສໍານັກງານນາຍົກລັດຖະມົນຕີຍີ່ປຸ່ນ ແລະ ເປັນເອກະພາບກັນດັ່ງນີ້: (1) ສປປ ລາວ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດລາວ-ຍີ່ປຸ່ນ ແມ່ນໄດ້ຮັບການເສີມຂະຫຍາຍຢ່າງຕໍ່ເນື່ອງ, ເຊີ່ງໄດ້ສະແດງອອກໃນຜົນສຳເລັດຂອງການຮ່ວມມືໃນຂົງເຂດຕ່າງໆ ເປັນຕົ້ນ: ການແລກປ່ຽນຢ້ຽມຢາມຂອງການນຳຂັ້ນສູງເປັນປົກກະຕິ, ການຮ່ວມມືດ້ານເສດຖະກິດ, ວັດທະນະທຳ-ສັງຄົມ ແລະ ການທ່ອງທ່ຽວ ແມ່ນມີການຂະຫຍາຍຕົວດີຂື້ນ. (2) ສອງຝ່າຍຕີລາຄາສູງຕໍ່ການຮ່ວມມືໃນກອບການຮ່ວມມືແມ່ນໍ້າຂອງ-ຍີ່ປຸ່ນ, ໂດຍສະເພາະວຽກງານພາຍໃຕ້ຍຸດທະສາດໂຕກຽວ 2015 ແລະ ແຜນປະຕິບັດງານ 2016-2018 ທີ່ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະ ເຫັນດີສືບຕໍ່ຮ່ວມມືໃຫ້ກ້າວສູ່ລວງເລີກ, ໄປຄຽງຄູ່ກັບການຍົກລະດັບການພົວພັນລະຫວ່າງແມ່ນໍ້າຂອງ ແລະ ຍີ່ປຸ່ນ ຂື້ນເປັນຄູ່ຮ່ວມມືຍຸດທະສາດ. (3) ສອງຝ່າຍຕີລາຄາສູງຕໍ່ຄວາມຄືບໜ້າການປະຕິບັດແຜນການຮ່ວມມືລະຫວ່າງລາວ ແລະ ຍີ່ປຸ່ນ ເພື່ອແນໃສ່ຊ່ວຍເຫລືອ ສປປ ລາວ ປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ 8, ກໍຄືຍຸດທະສາດ 2025 ແລະ ວິໄສທັດ 2030 ຂອງ ສປປ ລາວ ໃຫ້ສໍາເລັດຕາມຄາດໝາຍວາງໄວ້. (4) ສປປ ລາວ ສະແດງຄວາມເຫັນໃຈຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ຮັບຜົນກະທົບຈາກໄພພິບັດທຳມະຊາດເປັນຕົ້ນ: ໄພນໍ້າຖ້ວມ, ດີນເຈື່ອນ, ພະຍຸ ແລະ ແຜ່ນດິນໄຫວ ທີ່ເກີດຂຶ້ນໃນຜ່ານມາ, ພ້ອມດຽວກັນນີ້, ສປປ ລາວ ກໍສະແດງຄວາມຂອບໃຈມາຍັງລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫລືອອັນລໍ້າຄ່າແກ່ ສປປ ລາວ ທີ່ໄດ້ຮັບຜົນກະທົບຈາກໄພພິບັດທີ່ເກີດຂື້ນຢູ່ເມືອງສະໜາມໄຊແຂວງອັດຕະປື, ເຊີ່ງເປັນການຊ່ວຍເຫລືອທີ່ທັນການ ແລະ ໄດ້ກາຍເປັນກຳລັງໃຈສຳຄັນເພື່ອບັນເທົາທຸກໃຫ້ແກ່ຜູ້ປະສົບໄພໄດ້ຄືນສູ່ສະພາບປົກກະຕິໂດຍໄວ. (5) ສປປ ລາວ ສະແດງຄວາມຂອບໃຈລັດຖະບານ ຍີ່ປຸ່ນ ທີ່ຈະສືບຕໍ່ໃຫ້ການຊ່ວຍເຫລືອໃນຂົງເຂດຕ່າງໆ ເຊັ່ນ: ການພັດທະນາພື້ນຖານໂຄງລ່າງ, ການແກ້ໄຂຜົນກະທົບຈາກລະເບີດບໍ່ທັນແຕກ, ການຊ່ວຍເຫລືອດ້ານການເງີນ ແລະ ວຽກງານອື່ນໆ. (6) ສອງນາຍົກລັດຖະມົນຕີ ໄດ້ເປັນສັກຂີພິຍານໃນການລົງນາມສັນຍາການຮ່ວມມືສອງຝ່າຍຄື: ເອກະສານແລກປ່ຽນໂຄງການເລັ່ງລັດການເກັບກູ້ລະເບີດບໍ່ທັນແຕກຢູ່ ສປປ ລາວ ໃນມູນຄ່າ 900 ລ້ານເຢນ ແລະ ສັນຍາຮ່ວມມືດ້ານວິຊາການລະຫວ່າງໂຮງໝໍມິດຕະພາບ ແລະ ສະຖາບັນຜ່າຕັດສະໝອງຄິຕາຮາຣະ (Kitahara) ຍີ່ປຸ່ນ, ໂດຍນາຍົກລັດຖະມົນຕີ ທອງລຸນ ສີສຸລິດ ແລະ ນາຍົກລັດຖະມົນຕີ ຊີນໂຊ ອາເບະ ຫວັງວ່າຜົນການພົບປະຄັ້ງນີ້ຈະນຳໄປສູ່ການຈັດຕັ້ງໃຫ້ເປັນຮູບປະທຳຢ່າງແທ້ຈີງ ແລະ ມີປະສິດທິຜົນ.

- WhatsApp Image 2020 05 27 at 5 - ການຮ່ວມມືລາວ-ຍີ່ປຸ່ນ ນັບມື້ແຕກດອກອອກຜົນງອກງາມຍິ່ງຂຶ້ນ
- WhatsApp Image 2020 05 27 at 5 - ການຮ່ວມມືລາວ-ຍີ່ປຸ່ນ ນັບມື້ແຕກດອກອອກຜົນງອກງາມຍິ່ງຂຶ້ນ
- Wave100S AD to Website 2020 0 - ການຮ່ວມມືລາວ-ຍີ່ປຸ່ນ ນັບມື້ແຕກດອກອອກຜົນງອກງາມຍິ່ງຂຶ້ນ
error: Alert: ເນື້ອຫາຂ່າວມີລິຂະສິດ !!