ນະໂຍບາຍລັດຖະບານຕໍ່ເຂດປະສົບໄພພິບັດທໍາມະຊາດ

- 41518519 1817090575042061 2616599762983452672 n - ນະໂຍບາຍລັດຖະບານຕໍ່ເຂດປະສົບໄພພິບັດທໍາມະຊາດ
- Untitled design - ນະໂຍບາຍລັດຖະບານຕໍ່ເຂດປະສົບໄພພິບັດທໍາມະຊາດ

ກອງປະຊຸມຄະນະກໍາມະການສະເພາະກິດແກ້ໄຂໄພພິບັດລະດັບຊາດ ທີ່ຈັດຂຶ້ນໃນວັນທີ 15 ຕຸລານີ້, ໂດຍການເປັນປະທານຂອງທ່ານຮອງນາຍົກລັດຖະມົນຕີ ສອນໄຊ ສີພັນດອນ. ກອງປະຊຸມໄດ້ຕົກລົງເຫັນດີໃຫ້ແຕ່ລະພາກສ່ວນ​ຄົ້ນຄວ້າ ​ແລະ ພິຈາລະນາທິດທາງແກ້ໄຂໄພພິບັດໃນທົ່ວປະເທດຄື: ​ການ​ຜ່ອນຜັນ ຫລື ​ໂຈະ​ການ​ເກັບ​ພາສີ​ທີ່​ດິນ​ໃນ​ເຂດ​ທີ່​ເກີດ​ໄພພິບັດ, ​ການ​ນຳ​ໃຊ້​ງົບປະມານ​ສຸກ​ເສີນ ເພື່ອ​ແກ້​ໄຂ​ໄພພິບັດ​ໃຫ້​ມີ​ປະສິດທິ​ຜົນ ​ແລະ ທັນ​ກັບ​ສະພາບ​ການ, ພ້ອມ​ທັງຄົ້ນຄວ້າ​ນະ​ໂຍບາຍ​ຫລຸດ​ອັດຕາ​ພາສີ, ອາກອນ​ໃນ​ການ​ນຳ​ເຂົ້າປັດ​ໄຈ​ການ​ຜະລິດ​ເຊັ່ນ: ຝຸ່ນ, ປຸ໋ຍ, ​ແນວ​ພັນ​ພືດ ​ແລະ ສັດ, ຄົ້ນຄວ້ານະ​ໂຍບາຍ​ຫລຸດຜ່ອນ​ລາຄາ​ກະ​ແສ​ໄຟຟ້າ​ໃນ​ການ​ຜະລິດ​ລະດູ​ແລ້ງ ​ເພື່ອ​ທົດ​ແທນ​ຕົ້ນທຶນ​ຂອງ​ການ​ຜະລິດ​ສິນຄ້າ​ທົດ​ແທນ​ເຂດ​ຖືກ​ນ້ຳຖ້ວມ, ຄົ້ນຄວ້າ ​ແລະ ກຽມ​ສະໜັບສະໜູນ ​ແລະ ຊ່ວຍ​ເຫລືອ​ພິ​ເສດ​ໃນ​ເຂດ​ໄດ້​ຮັບ​ຜົນ​ກະທົບ​ຈາກ​ໄພພິບັດ ​ເປັນຕົ້ນ​ແມ່ນ​ການ​ສະໜອງ​ນ້ຳ​ໃຫ້​ແກ່​ເຂດ​ຜະລິດ​ໃນ​ລະດູ​ແລ້ງ, ການ​ສະໜັບສະໜູນ​ດ້ານ​ສັດຕະວະ​ແພດ, ປາບ​ປາມ​ສັດຕູ​ພືດ, ​ໃຫ້​ຄວາມ​ຮູ້​​ດ້ານ​ເຕັກນິກ​ວິຊາ​ການ, ພ້ອມຄົ້ນຄວ້າ​ງົບປະມານ​​ຈະ​ນຳ​ໃຊ້​ເຂົ້າ​ໃນ​​ວຽກ​ງານຕ່າງໆ ​ເພື່ອ​ສະ​ເໜີ​ຄວາມ​ຕ້ອງການ​​ຢ່າງລະອຽດ, ຮີບ​ຮ້ອນ​ກວດກາ, ປະ​ເມີນ ​ແລະ ​ແກ້​ໄຂ​ບັນຫາ​ການ​ຄົມມະນາຄົມ, ຂົນ​ສົ່ງ​ໃຫ້​ໄວ ແລະ ​ທັນ​ກັບ​ສະພາບ​ການ, ຮັບປະກັນ​ບໍ່​ໃຫ້​ເສັ້ນທາງ​ຫລວງ​ແຫ່ງ​ຊາດ​ຖືກ​ຕັດຂາດ. ການ​ແກ້​ໄຂ​ສຸກ​ເສີນ​ຕ້ອງ​ບົນ​ພື້ນຖານ​ການ​ປະຢັດ ​ແລະ ສົມ​ເຫດ​ສົມ​ຜົນ, ລະດົມ​ທຸກ​ກຳລັງ​ແຮງ​ຂອງ​ສັງຄົມ ​ແລະ ປະຊາຊົນ​ມີ​ສ່ວນ​ຮ່ວມ​ໃນ​ການ​ແກ້​ໄຂ​ໃຫ້​ສາມາດ​ສັນຈອນ​ໄປ-ມາ​ໄດ້ ຈົນ​ຮອດ​ທ້າຍ​ປີ 2018. ຈາກ​ນັ້ນຈຶ່ງ​ຄົ້ນຄວ້າ​​ການ​ສ້າງ​ແຜນ​ແກ້​ໄຂ​ຍາວ​ນານ​ໃຫ້​ສອດຄ່ອງ​ກັບ​ຄວາມ​ອາດ​ສາມາດ​ທາງ​ດ້ານ​ງົບປະມານ ​ແລະ ສະພາບຕົວ​ຈິງ, ປະສານ​ສົມທົບ​ວາງ​ແຜນ​ຈັດ​ສັນ​ງົບປະມານ​ບູລິ​ມະ​ສິດສຸມ​ໃສ່​ຊຳລະ​ໃຫ້​ບໍລິສັດ​ແກ້​ໄຂ​ສຸກ​ເສີນ​ບັນດາ​ເສັ້ນທາງ​ໃນ​ແຂວງ​ຕ່າງໆ​ທີ່​ເກີດ​ອຸ​ທົກ​ກະ​ໄພ​ໃນ​ປີ 2018-2019, ໃຫ້ມີການ​ປັບປຸງ​ກອງ​ທຶນ SMEs, ທະນາຄານ​ສົ່ງ​ເສີມ​ກະສິກຳ ​ແລະ ທະນາຄານ​ພັດທະນາ​ລາວ ​ເພື່ອ​ສ້າງ​ເງື່ອນ​ໄຂ​ໃຫ້​ກອງ​ທຶນ ​ແລະ ສະ​ຖາ​ບັນ​ການ​ເງິນ​ດັ່ງກ່າວ​​ມີ​ຄວາມ​ສາມາດ​ສະໜອງ​ສິນ​ເຊື່ອ​ໃນ​ໄລຍະ​ເກີດ ​ແລະ ການ​ຟື້ນຟູ​ອຸ​ທົກ​ກະ​ໄພ, ​ໂດຍ​ໃຫ້​ເຮັດ​ເປັນ​ແຜນ​ລະອຽດແລ້ວ​ສະ​ເໜີ​ລັດຖະບານ, ສືບຕໍ່​ເອົາ​ໃຈ​ໃສ່​ກວດກາ ​ແລະ ຊຸກຍູ້​ຊ່ວຍ​ເຫລືອ​ບັນດາ​ໂຮງຮຽນ​ທີ່​ໄດ້​ຮັບ​ຜົນ​ກະທົບ​ໃນ​ຊ່ວງ​ເວລາ​ນ້ຳຖ້ວມ​ໃຫ້​ສາມາດ​ສືບ​ຕໍ່​ການ​ຮຽນ-ການ​ສອນ​​ເປັນ​ປົກກະຕິ ​ແລະ ທັນ​ກັບ​ແຜນ​ສົກຮຽນ, ​ເອົາ​ໃຈ​ໃສ່​ກວດກາ​ການລະບາດ​ຂອງ​ພະຍາດທີ່​ອາດ​​ເກີດ​ຂຶ້ນຫລັງ​ນ້ຳຖ້ວມ, ​ເດັດຂາດ​ບໍ່​ໃຫ້​ເກີດ​ມີ​ພະຍາດ​ລະບາດ​ຮ້າຍ​ແຮງ ອັນ​ຈະ​ສົ່ງ​ຜົນ​ກະທົບ​ເພີ່ມ​ຕື່ມ​ຕໍ່​ການ​ພັດທະນາ​ເສດຖະກິດ-ສັງຄົມ, ການທ່ອງທ່ຽວ ​ແລະ ຄວາມ​ເຊື່ອ​ໝັ້ນຂອງ​ສາກົນ​ຕໍ່​ປະ​ເທດ​ເຮົາ. ພ້ອມທັງ​ເອົາ​ໃຈ​ໃສ່​ຕິດຕາມ​ການ​ບໍລິຫານ​ນ້ຳ, ຈັດການ​ນ້ຳຢູ່​ເຂື່ອນ​ຕ່າງໆ ​ໂດຍ​ໃຫ້​ຈັດ​ເວນຍາມ​ຕະຫລອດ 24 ຊົ່ວ​ໂມງ. ສຳລັບ​ບັນດາ​ເຂື່ອນ​ທີ່​ມີ​ຄວາມ​ຫລໍ່​​ແຫລມ​ແມ່ນ​ຕ້ອງ​ເຝົ້າລະວັງ​ ກໍລະນີ​ມີ​ສະພາບ​ພົ້ນ​ເດັ່ນ​ກໍ​ໃຫ້​ຮີບ​ຮ້ອນ​ລາຍ​ງານ ​ແລະ ​ແກ້​ໄຂ​ໃຫ້​ທັນ​ກັບ​ສະພາບ​ການ. ​ໃຫ້​ບັນດາ​ແຂວງ​ຢຸດຕິ​ການ​ອະນຸມັດ​ການ​ພັດທະນາ​ເຂື່ອນ​ໄຟຟ້າ​ຂະໜາດ​ນ້ອຍ​. ສ່ວນ​ໂຄງການ​ທີ່​ໄດ້​ຮັບ​ອະນຸຍາດ​ໃຫ້​ກໍ່ສ້າງ​ຜ່ານ​ມາ ກໍ​ໃຫ້​ກວດກາ​ຄືນ​ການ​ສຳ​ຫລວດ, ອອກ​ແບບ ​ແລະ ກໍ່ສ້າງ ​ເພື່ອ​ປ້ອງ​ກັນ​ບໍ່​ໃຫ້​ເກີດ​ໄພພິບັດ​ຂຶ້ນອີກ. ຫາກ​ໂຄງການ​ໃດ​ບໍ່​ຮັບປະກັນ​ທາງ​ດ້ານ​ເຕັກນິກ ກໍ​ໃຫ້​ໂຈະ​ການ​ກໍ່ສ້າງ​ທັນທີ.

- Wave100S AD to Website 2020 0 - ນະໂຍບາຍລັດຖະບານຕໍ່ເຂດປະສົບໄພພິບັດທໍາມະຊາດ
- WhatsApp Image 2020 05 27 at 5 - ນະໂຍບາຍລັດຖະບານຕໍ່ເຂດປະສົບໄພພິບັດທໍາມະຊາດ
- WhatsApp Image 2020 05 27 at 5 - ນະໂຍບາຍລັດຖະບານຕໍ່ເຂດປະສົບໄພພິບັດທໍາມະຊາດ
error: Alert: ເນື້ອຫາຂ່າວມີລິຂະສິດ !!