ປູກໄມ້ຍັງມີປະສິດທິຜົນໜ້ອຍ

- Untitled design - ປູກໄມ້ຍັງມີປະສິດທິຜົນໜ້ອຍ

- Untitled 1 1 275x300 - ປູກໄມ້ຍັງມີປະສິດທິຜົນໜ້ອຍ​     ​ເພື່ອນ​ຜູ້​ອ່ານ​ທີ່​ຮັກ​ແພງ, ​ໂດຍ​ລິງ​ເຫັນ​ຄວາມ​ສຳຄັນ​ຂອງ​ປ່າ​ໄມ້, ນັບ​ແຕ່​ປີ 1980, ພັກ ​ແລະ ລັດຖະບານ​ເຮົາ​ໄດ້​ກຳນົດ​ເອົາ​ວັນ​ທີ 1 ມິຖຸນາ ຂອງ​ທຸກໆ​ປີ ​ເປັນ​ວັນ​ປູກ​ຕົ້ນ​ໄມ້​ແຫ່ງ​ຊາດ ​ແລະ ນັບ​ແຕ່​ນັ້ນມາ ຂະ​ບວນປູກ​ໄມ້​ຢູ່​ປະ​ເທດ​ເຮົາ​ກໍ​ນັບ​ມື້ຂະຫຍາຍຕົວ​ກວ້າງຂວາງ ​ແລະ ມາ​ຮອດ​ປັດຈຸບັນ ທົ່ວ​ປະ​ເທດ​ສາມາດ​ປູກ​ໄມ້​ໄດ້​ແລ້ວ​ປະມານ 4-5 ​ແສນ​ເຮັກຕາ ​ແລະ ສ່ວນ​ໃຫຍ່​ແມ່ນ​ຕົ້ນຢາງພາລາ​ມີ​ເນື້ອທີ່​ເກືອບ 3 ​ແສນ​ເຮັກຕາ ອັນ​ເປັນ​ການ​ລົງທຶນ​ຂອງ​ຕ່າງປະ​ເທດ​ຫລາຍ​ກວ່າ, ສ່ວນ​ການ​ປູກ​ໄມ້​ອຸດສາຫະກຳ​ອື່ນໆ​ແມ່ນ​ຍັງ​ຂະຫຍາຍຕົວ​ໜ້ອຍ​ເມື່ອ​ທຽບ​ໃສ່​ການ​ລົງທຶນ​ຢ່າງ​ມະຫາສານ​ຂອງ​ລັດຖະບານ​ໃນ​ແຕ່ລະ​ປີ. ມີ​ຫລາຍ​ຄົນ​ໃຫ້​ທັດສະນະ​ວ່າ: ຍ້ອນ​ຫຍັງ ກາ​ນປູກ​ໄມ້​ຢູ່​ປະ​ເທດ​ເຮົາ​ຈຶ່ງ​ມີ​ປະສິດ​ຜົນ​ໜ້ອຍ ? ຕົ້ນຕໍ​ແມ່ນ​ຂາດ​ການ​ບົວລະບັດ​ຮັກສາ​ຢ່າງ​ຈິງ​ຈັງ ​ເມື່ອ​ປູກ​ລົງ​ແລ້ວ​ກໍ​ປະປ່ອຍ​ໄປ​ຕາມ​ມີ​ຕາມ​ເກີດ ​ໂດຍ​ບໍ່​ໄດ້​​ແບ່ງ​ຄວາມ​ຮັບຜິດຊອບ​ໃຫ້​ບຸກຄົນ ຫລື ອົງການ​ຈັດຕັ້ງ​ໃດ​ຄຸ້ມ​ຄອງ​ຮັກສາ​ຢ່າງ​ລະອຽດ, ປະປ່ອຍ​ໃຫ້​ສັດ​ທຳລາຍ ຫລື ກໍ​ຫ່ຽວ​ແຫ້ງ​ແລ້ວ​ຕາຍ​ໄປ ​ເຮັດ​ໃຫ້ການ​ລອດ​ເຫລືອດ​ຂອງຕົ້ນ​ໄມ້​ປູກ​ໃໝ່​ມີ​ໜ້ອຍ ​ແລ້ວ​ຮອດ​ລະດູ​ປູກ​ໄມ້​ປີ​ໃໝ່​ມາ​ກໍ​ຕ້ອງ​ໄດ້​ມາ​ປູກ​ໃສ່​ແຕ່​ຂຸມ​ເກົ່າ​ຕິດ​ຕໍ່​ໄປ​ຢ່າງ​ບໍ່​ມີ​ມື້ຊິ້ນສຸດ, ຜູ້​ລົງທຶນ​ກໍ​ລົງທຶນ, ຜູ້​ຜະລິດ​ເບ້ຍ​ໄມ້​ຂາຍ​ກໍ​ບໍ່​ໄດ້​ເອົາ​ຫົວຊາ​ວ່າ​ຕົນ​ໄມ້​ເຫລົ່ານັ້ນຈະ​ໃຫຍ່​ໂຕ ຫລື ບໍ່​ ຂໍ​ຕົນ​ເອງ​ໄດ້​ຂາຍ​ເບ້ຍ​ໄມ້​ ​ແລະ ​ໄດ້​ເງິນ​ມາ​ກໍ​ພໍ​ແລ້ວ, ສ່ວນ​ຂະ​ແໜງ​ການ​ກ່ຽວຂ້ອງ​ຈຳນວນ​ໜຶ່ງ​ກໍ​ຍັງ​ບໍ່​ທັນ​ໄດ້​ຕັ້ງໜ້າ​ສຶກສາຄົ້ນຄວ້າ​ເຖິງ​ສະພາບ​ດິນ​ຟ້າ​ອາກາດ​ວ່າ​ໄມ້​ຊະນິດ​ໃດ​ເໝາະ​ສົມ​ປູກ​ຢູ່​ໃສ ພາກ​ໃຕ້ ຫລື ພາກ​​ເໜືອ, ​ໄມ້​ເຂດ​ຮ້ອນ ຫລື ​ເຂດ​ໜາວ. ​ເວົ້າລວມ​ແລ້ວ, ພວກ​ເຮົາ​ຍັງ​ຂາດ​ຂອດ​ການຈັດ​ສັນ​ທີ່​ດີ. ຈາກ​ນັ້ນຈຶ່ງ​ເຮັດ​ໃຫ້ການ​ປູກ​ໄມ້​ຢູ່​ປະ​ເທດ​ເຮົາ​ຍັງ​ມີ​ປະສິດທິ​ຜົນ​ໜ້ອຍ.

​ເອົາລະ​ວັນ​ປູກ​ໄມ້​ແຫ່ງ​ຊາດ​ ທີ 1 ມິຖຸນາ ກໍ​ຫຍັບ​ມາ​ໃກ້​ທຸກ​ທີ​ແລ້ວ, ພວກ​ເຮົາ​ຈະ​ຕ້ອງ​ໄດ້​ເປັນ​ເຈົ້າການ​ຮ່ວມ​ກັນ ​ເພື່ອ​ເຮັດ​ໃຫ້ການ​ປູກ​ໄມ້​ປີ​ນີ້​ມີ​ປະສິດທິ​ຜົນ, ປູກ​ແລ້ວ​ຕ້ອງ​ເອົາ​ໃຈ​ໃສ່​ເຖິງ​ຂອດ​ບົວລະບັດ ​ແລະ ຄຸ້ມ​ຄອງ​ຮັກສາ​​ໃຫ້​ດີ ​ເພື່ອ​ຄວາມ​ຈະ​ເລີ​ນ​ເຕີບ​ໃຫຍ່​ຂອງ​ມັນ ​ແນ​ໃສ່​ບັນລຸ​ຕົວ​ເລກ​ຄາດໝາຍ​ວາງ​ໄວ້ ​ແຕ່​ນີ້​ຮອດ​ປີ 2020 ​ໃຫ້​ເນື້ອທີ່​ປ່າ​ໄມ້​ຂອງ​ປະ​ເທດ​ເຮົາ​ກວມ​ເອົາ 70%. ດັ່ງນັ້ນ ການ​ປູກ​ໄມ້​ໃຫ້​ເປັນ​ປ່າ​ບໍ່​ແມ່ນ​ວ່າ​ພວກ​ເຮົາ​ຈະ​ປູກ​ສະ​ເພາະ​ແຕ່​ໃນ​ວັນ​ປູກ​ໄມ້​ແຫ່ງ​ຊາດ​ເທົ່າ​ນັ້ນ, ພວກ​ເຮົາ​ສາມາດ​ປູກ​ໄດ້​ທຸກ​ມື້ ​ແລະ ທຸກ​ສະຖານ​ທີ່​ຕາມ​ເງື່ອນ​ໄຂ ​ແລະ ຄວາມ​ເໝາະ​ສົມ​ຂອງ​ມັນ, ​ແຕ່​ສິ່ງ​ສຳຄັນ ພາຍຫລັງ​ປູກ​ແລ້ວ​ຕ້ອງ​ເອົາ​ໃຈ​ໃສ່​ບົວລະບັດ​ຮັກສາ ​ເພື່ອ​ໃຫ້​ເບ້ຍ​ໄມ້​ນ້ອຍ​ທີ່​ປູກ​ໃນ​ມື້ນີ້​ກາຍ​ເປັນຕົ້ນ​ໄມ້​ໃຫຍ່​ໃນ​ມື້ໜ້າ ນຳ​ເອົາ​ຄວາມ​ອຸດົມສົມບູນ​ທາງ​ດ້ານ​ສິ່ງ​ແວດ​ລ້ອມ ​ແລະ ຊີວະ​ນາໆ​ພັນ​ມາສູ່​ພວກ​ເຮົາ​ໃນ​ອະນາຄົດ.

- Wave100S AD to Website 2020 0 - ປູກໄມ້ຍັງມີປະສິດທິຜົນໜ້ອຍ
- WhatsApp Image 2020 05 27 at 5 - ປູກໄມ້ຍັງມີປະສິດທິຜົນໜ້ອຍ
- WhatsApp Image 2020 05 27 at 5 - ປູກໄມ້ຍັງມີປະສິດທິຜົນໜ້ອຍ
error: Alert: ເນື້ອຫາຂ່າວມີລິຂະສິດ !!