ປີ​ທ່ອງ​ທ່ຽວ​ລາວ ຟ້າວ​ແປງ​ທາງ

- Untitled design - ປີ​ທ່ອງ​ທ່ຽວ​ລາວ ຟ້າວ​ແປງ​ທາງ

ໂດຍ : ມຶກບໍ່ແຫ້ງ

2018 ເປັນ​ປີ​ທີ່​ລັດ​ຖະ​ບານ​ເຮົາ​ປະ​ກາດ​ໃຫ້​ເປັນ ປີ​ທ່ອງ​ທ່ຽວ​ລາວ ແຕ່​ເພື່ອ ສາ​ມາດ​ດຶງ​ດູດ​ຄວາມ​ສົນ​ໃຈ ຕໍ່​ນັກ​ທ່ອງ​ທ່ຽວ​ນັ້ນ​ບໍ່​ສະ​ເພາະ​ແຕ່ ແຫຼ່ງ​ທ່ອງ​ທ່ຽວ​ງາມໆ ແຕ່​ຍັງ​ຮວມ​ເອົາ​ໂຄ່ງ​ຮ່າງ​ພື້ນ​ຖານ ໂດຍ​ສະ​ເພາະ ເສັ້ນ​ທາງນຳ​ອີກ.

​ທຸກ​ເຂດ​ແຂວງ​ຂອງ ສ​ປ​ປ​ລາວ ​ໄດ້ຈັດ​ພິ​ທີ ​ເປີດ​ປີ​ທ່ອງ​ທ່ຽວ​ລາວ ຢ່າງ​ເປັນ​ທາງ​ການເມື່ອ​ຕົ້ນ​ປີແລ້ວ ແຕ່​​ເມື່ອ​ເວ​ລາ​ຜ່ານ​ໄປ 6 ເດືອນ ພວກ​ເຮົາ ເຫັນ​ຈຳ​ນວນ​ນັກ​ທ່ອງ​ທ່ຽວ​ ທີ່​ເຂົ້າ​ມາ​ທ່ຽວ​ລາວ ຍັງ​ຕ່ຳ​ກວ່າ​ຄາດ​ໝາຍ​ໄວ້ ຫຼາຍ, ຜູ້​ປະ​ກອບ​ການ ທຸ​ລະ​ກິດການ​ທ່ອງ​ທ່ຽວ​ບາງ​ທ່ານ ​ເວົ້າ​ວ່າ “ແທນ​ທີ່​ນັກ​ທ່ອງ​ທ່ຽວຈະ​ເພີ່ມ​ຂຶ້ນ ແຕ່​ພັດ​ຫຼຸດ​ລົງ​ຊ້ຳ” ເຊິ່ງ​ສິ່ງ​ດັ່ງ​ກ່າວ​ລັດ​ຖະ​ບານ​ກໍ​ຮັບ​ຮູ້ ແລະ​ພະ​ຍາ​ຍາມ​ແກ້​ໄຂ, ແຕ່​​ກໍ​ຂໍ​ໃຫ້​ບາງ​ອັນ​ທີ່​ພວກ​ເຮົາ​ເຫັນ​ໂອ​ກາດ ແລະ ສາ​ມາດ​ແກ້​ໄຂ​ໄດ້​ກໍ​ຟ້າວ​ຮີບ​ຮ້ອນ.

ເມື່ອ​ອາ​ທິດ​ຜ່ານ​ມາ ຜູ້​ຂຽນ​ໄດ້​ມີ​ໂອ​ກາດ​ໄປ​ເຮັດວຽກ​ຢູ່​ເມືອງ​ໂຂງ ແຂວງ​ຈຳ​ປາ​ສັກ ເຊິ່ງ​ເປັນ​ເມືອງ​ທີ່​ຮັບ​ຕ້ອນ​ນັກ​ທ່ອງ​ທ່ຽວ ຫຼາຍ​ທີ່​ສຸດ​ແຫ່ງ​ໜຶ່ງ​ຂອງ​ລາວ ເພາະ​ມີ​ສະ​ຖານ​ທີ່​ທ່ອງ​ທ່ຽວ​ທີ່​ໜ້າ​ສົນ​ໃ​ຈຫຼາຍ​ແຫ່ງ ເຊັ່ນ ຄອນ​ພະ​ເພັງ, ໄປ​ເບິ່ງ​ປາ​ຂ່າ, ໄປ​ຕາກ​ແດດ ຢູ່​ຫາດ​ຊາຍ ດອນ​ເດດ ດອນ​ຄອນ ແລະ​ອື່ນໆ.

ແຕ່​ອົດ​ເສຍ​ດາຍ​​ໂອ​ກາດບໍ່​ໜ້ອຍ ເມື່ອ​ມາ​ເຫັນ​ເສັ້ນ​ທາງແວ່​ ຈາກ​ທາງ​ໃຫຍ່ ໄປ​ຫາ ດ່ານ​ສາ​ກົນໜອງ​ນົກ​ຂຽນ (ຊາຍ​ແດນ​ລາວ-ກຳ​ປູ​ເຈຍ) ເຂົ້າ​ໄປ​ຫາ ​ບ້ານ ນາ​ກະ​ສັງ ນັ້ນ​ເປ​ເພ່​ຢ່າງຫຼວງຫຼາຍ ທັງທີ່​ເປັນເສັ້ນ​ທາງ​ທີ່​ສຳ​ຄັນຫຼາຍ​ ສຳ​ລັບ​ປະ​ຊາ​ຊົນ ​ທີ່​ມາ​ຊື້-​ຂາຍ​ປາ ຢ່າງຄຶກ​ຄື້ນ​ທຸກມື້, ເປັນ​ຈຸດ​ໝາຍ​ປາຍ​ທາງ​ຂອງ​ນັກ​ທ່ອງ​ທ່ຽວ​ຈຳ​ນວນຫຼາຍ ທີ່​ໄປ​ພັ​ກ​ຜ່ອນ​ຢ່ອນ​ໃຈ ຢູ່ດອນ​ເດດ ດອນ​ຄອນ.

ຕາມ​ການ​ສອບ​ຖາມ​ປະ​ຊາ​ຊົນ​ທ່ານ​ໜຶ່ງ ທີ່​ອາ​ໄສ​ຢູ່​ບ້ານ ນາ​ກະ​ສັງ ຜູ້​ທີ່​ມີ​ຮ້ານ​ຂາຍ​ເຄື່ອງ ກໍ່​ສ້າງ​ຢູ່​ແຄມ​ທາງນັ້ນ ເວົ້າ​​ສູ່​ຟັງ​ວ່າ  “ຄວາມ​ຈິງ​ແ​ລ້ວ​ໄດ້​ຍິນ​ເພິ່ນ​ວ່າ​ຈະ​ມາ​ແປງ​ແຕ່​ເດືອນ ມັງ​ກອນ 2017 ແຕ່ ມາ​ຮອດ ເດືອນ ຕຸ​ລາ 2018 ຍັງ​ບໍ່​ເຫັນ​ຫຍັງ​ເກີດ​ຂຶ້ນ, ປະ​ຊາ​ຊົນ​ມີ​ຄວາມ​ຫຍຸ້ງ​ຍາກຫຼາຍ ໃນ​ການ​ໄປ​ມາ ເພາະ​ເປັນ​ບ່ອນ ຄ້າ​ຂາຍ ທີ່​ສຳ​ຄັນ”.

- Wave100S AD to Website 2020 0 - ປີ​ທ່ອງ​ທ່ຽວ​ລາວ ຟ້າວ​ແປງ​ທາງ

ຊາຍ​ກາງ​ຄົນ​ດັ່ງ​ກ່າວ ເວົ້າ​ຕຶ່ມ​ວ່າ “ເມື່ອບໍ່​ດົນ​ຜ່ານ​ມາ ມີ​ລົດ​ເມ ນຳ​ທ່ຽວ ຂອງ​ປະ​ເທດ​ເພື່ອ​ບ້ານ ຖັງ​ນ້ຳ​ມັນ​ແຕ​ກ ໃກ້​ກັບ ຮ້ານ​ຂອງ​ລາວ ເນື່ອງ​ຈາກ ທາງ​ເປັນ​ບວກ​ເປັນ​ຂຸມ​ຢ່າງຫຼວງຫຼາຍ ເຮັດ​ໃຫ້​ນັກ​ທ່ອງຫຼາຍ​ຄົນ​ກໍ​ຈົ່ມ​ວ່າບໍ່​ແມ່ນ​ຂອງ​ງ່າຍ ວ່າ​ຊ້ານ!!!”

ຕາມ​ການ​ສອບ​ຖາມ ເຈົ້າ​ໜ້າ​ທີ່​ຂອງ​ເມືອງ​ໂຂງ ທ່ານ​ໜຶ່ງ ທີ່​ເຮັດ​ວຽກ​ຮ່ວມ​ກັນ ເພິ່ນ​ເວົ້າ​ສູ່​ຟັງ​ວ່າ “ຄວາມ​ຈິງ​ແລ້ວ​ທາງ​ເສັ້ນ​ນີ້ ມີ​ຄວາມ​ຍາວ ປະ​ມານ 3-4 ກິ​ໂລ​ແມັດ​ເທົ່າ​ນັ້ນ ແຕ່​ໃຊ້​ເວ​ລາ​ຮອດ 15 ນາ​ທີ ຫຼື ຫຼາຍກວ່ານັ້ນ ໃນ​ການ​ໄປ​ມາ”, ແລະ ເພິ່ນ​ເວົ້າ​ຕຶ່ມ​ວ່າ “ທາງ​ເສັ້ນ​ດັ່ງ​ກ່າວ ກໍ​ຖື​ວ່າ ເປ່​ເພຫຼາຍ ແຕ່ບໍ່​ເຫັນ​ພາກ​ສ່ວນ​ໃດ ມາ​ຮີບ​ຮ້ອນ​ສ້ອມ​ແປງ ເນື່ອງ​ຈາກ ເປັນ​ເສັ້ນ​ທາງ​ທຽວ ຂອງ​ນັກ​ທ່ຽວ​ຈຳ​ນວນຫຼາຍ​ແທ້ໆ”.

ນີ້​ອາດ​ເປັ​ນ​ຕົວ​ຢ່າງ​ສ່ວນ​ໜຶ່ງ​ເທົ່າ​ນັ້ນ ແຕ່​ອາດ​ຍັງ​ມີ​ສະ​ຖານ​ທີ່​ທ່ອງ​ທ່ຽວຫຼາຍ​ແຫ່ງ​ທີ​ເສັ້ນ​ທາງ ຄວນ​ໄດ້ຮັບ​ການ​ສ້ອມ​ແປງ ເພື່ອ​ອຳ​ນວຍ​ຄວາມ​ສະ​ດວກ​ແກ່​ນັກ​ທ່ອງ​ທ່ຽວ ຈຶ່ງ​ຈະ​ເຮັດ​ໃຫ້​ເຂົາ​ເຈົ້າ​ຢາກ​ມາ​ທ່ຽວ​ຊົມ​ແຫຼ່ງ​ທ່ອງ​ທ່ຽວ​ບ້ານ​ເຮົາຫຼາຍ​ຂຶ້ນ ໂດຍ​ສະ​ເພາະ​ນັກ​ທ່ອງ​ທ່ຽວ ທີ່​ອາ​ວຸ​ໂສ ໄປ​ມາບໍ່​ຄ່ອຍ​ສະ​ດວກ ແຕ່​ກະ​ເປົ໋າ​ເພິ່ນ​ໜັກ​ເດີ, ເອົາ​ໃຈ​ເພິ່ນ​ແດ່​ກໍ​ດີ.

ການ​ສົ່ງ​ເສີມ​ການ​ທ່ອງ​ທ່ຽວ​ຂອງ​ລາວ​ທີ່​ມີ​ທ່າ​ແຮງ​ແລ້ວນັ້ນ ໂດຍ​ການ​ປະ​ກາດ​ເປັນ​ປີ​ທ່ອງ​ທ່ຽວ ກໍ​ຖື​ວ່າ​ສຳ​ຄັນ ແຕ່​ສຳ​ຄັນກວ່ານັ້ນ ກໍ​ອາດ​ແມ່ນ​ການ​ກຽມ​ຄວາມ​ພ້ອມ​ຂອງ​ພວກ​ເຮົາ​ທີ່​ຈະ ອຳ​ນວຍ​ຄວາມ​ສະ​ດວກ​ແກ່​ນັກ​ທ່ອງ​ທ່ຽວ, ຄຽງ​ຄູ່​ກັບ​ການ ປັບ​ປຸງ​ເລື່ອງ​ນະ​ໂຍ​ບາຍ, ການ​ບໍ​ລິ​ການ​ແລ້ວ ເສັ້ນ​ທາງ​ກໍ​ແມ່ນ​ປັດ​ໄຈ​ສຳ​ຄັນ​ ທີ່​ຈະ​ຕ້ອງ​ຂົນ​ຂວາຍ​ແຫຼ່ງ​ທຶນ​ໃນ​ການ​ສ້ອມ​ແປງ ໃຫ້​ມີ​ຄຸນ​ນະ​ພາບ​ດີ (ໃຊ້​ໄດ້ຫຼາຍ​ປີ​ແດ່).

ຖ້າ​ເຮົາ​ກຽມ​ພ້ອມ​ດີ​ແລ້ວ ເຖິງບໍ່​ມີ​ການ​ປະ​ກາດ ເພິ່ນ​ກໍ​ມາ ກົງ​ກັນ​ຂ້າມ ເຖິງວ່າ ຈະ​ໂຄ​ສະ​ນາຫຼາຍ​ປານ​ໃດ​ກໍ​ດີ ເມື່ອ​ສິ່ງ​ອຳ​ນວຍ​ຄວາມ​ສະ​ດວກ​ແກ່​ນັກ​ທ່ອງ​ທ່ຽວ​ຍັງ​ຂາດ​ຢູ່ ເພິ່ນ​ກໍ​ອາດ​ລັງ​ເລ​ໃຈ ທີ່​ຈະ​ມາ​ຢ້ຽມ​ຢາມ​ປະ​ເທດເຮົາ​, ສະ​ນັ້ນ ມາ​ພ້ອມ​ກັນ ສ້ອມ​ແປງ​ເສັ້ນ​ທາງ​ພວກ​ເຮົາ​ໃຫ້​ດີ​ຂຶ້ນກວ່ານີ້​ໄວໆ​ແດ່​ເທາະ!!

- WhatsApp Image 2020 05 27 at 5 - ປີ​ທ່ອງ​ທ່ຽວ​ລາວ ຟ້າວ​ແປງ​ທາງ
- WhatsApp Image 2020 05 27 at 5 - ປີ​ທ່ອງ​ທ່ຽວ​ລາວ ຟ້າວ​ແປງ​ທາງ
error: Alert: ເນື້ອຫາຂ່າວມີລິຂະສິດ !!