ທຸກຂະ​ແຫນງ​ການ​ໄດ້​ສຸມ​ໃສ່​​ແກ້​ໄຂ​ໄພ​ນ້ຳຖ້ວມ

- DPM sonexay - ທຸກຂະ​ແຫນງ​ການ​ໄດ້​ສຸມ​ໃສ່​​ແກ້​ໄຂ​ໄພ​ນ້ຳຖ້ວມ
- Untitled design - ທຸກຂະ​ແຫນງ​ການ​ໄດ້​ສຸມ​ໃສ່​​ແກ້​ໄຂ​ໄພ​ນ້ຳຖ້ວມ

ທ່ານຮອງນາຍົກລັດຖະມົນຕີ ສອນໄຊ ສີພັນດອນ ປະທານຄະນະກໍາມະການສະເພາະກິດແກ້ໄຂ​ໄພພິບັດລະດັບຊາດໃຫ້ຮູ້ວ່າ: ປີນີ້, ປະເທດເຮົາໄດ້ຮັບຜົນກະທົບຈາກໄພທໍາມະຊາດຫນັກຫນ່ວງ, ໂດຍສະເພາະເຫດການສັນເຂື່ອນເຊປຽນ-ເຊນໍ້ານ້ອຍຢູ່ເມືອງສະຫນາມໄຊແຂວງອັດຕະປືແຕກເມື່ອວັນທີ 23 ກໍລະກົດ, ໄດ້ສ້າງຄວາມເສຍຫາຍໃຫ້ແກ່ຊີວິດ ແລະ ຊັບສີນຂອງປະຊາຊົນເປັນຈໍານວນຫລາຍ. ແຕ່ດ້ວຍການຊີ້ນໍາ-ນໍາພາຢ່າງໃກ້ຊິດຂອງພັກ-ລັດຖະບານ ແລະ ການເອົາໃຈໃສ່ຢ່າງແຂງແຮງຂອງຂະແຫນງການຕ່າງໆ ໄດ້ເຮັດໃຫ້ການຟື້ນຟູຊ່ວຍເຫລືອເຂດທີ່ປະສົບໄພ ແລະ ວຽກງານບັນເທົາທຸກຜູ້ໄດ້ຮັບຜົນກະທົບໄດ້ດໍາເນີນໄປຢ່າງທັນການ, ຊຶ່ງສະແດງອອກຄື: ການນໍາພັກ-ລັດທຸກຂັ້ນໄດ້ລົງຢ້ຽມຢາມປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມໃນທົ່ວປະເທດ, ພ້ອມທັງໄດ້ຊີ້ນໍາໃຫ້ແຕ່ລະກະຊວງເອົາໃຈໃສ່ວຽກງານຂອງຕົນດ້ວຍຄວາມຮັບຜິດຊອບສູງເປັນຕົ້ນ: ກະຊວງແຮງງານ ແລະ ສະຫວັດດີການສັງຄົມເອົາໃຈໃສ່ຄຸ້ມຄອງ ແລະ ຈັດສັນການຊ່ວຍເຫລືອບັນເທົາທຸກສຸກເສີນນັບທັງເງິນ ແລະ ວັດຖຸຕ່າງໆທັງຈາກພາຍໃນ ແລະ ຕ່າງປະເທດ, ກະຊວງປ້ອງກັນຊາດ-ປ້ອງກັນຄວາມສະຫງົບ ໄດ້ນໍາໃຊ້ກໍາລັງພົນ, ພາຫະນະ ແລະ ເຄື່ອງມືອຸປະກອນຕ່າງໆ ສຸມໃສ່ການຊ່ວຍເຫລືອຍົກຍ້າຍວັດຖຸສິ່ງຂອງປະຊາຊົນໄປບ່ອນປອດໄພ ແລະ ເພີ່ມທະວີປ້ອງກັນເວນຍາມວັດຖຸຊັບສີນຂອງປະຊາຊົນບໍ່ໃຫ້ຕົກເຮ່ຍເສຍຫາຍ ແລະ ມີຄວາມເປັນລະບຽບປອດໄພ, ກະຊວງສາທາລະນະສຸກ ກໍໄດ້ເອົາໃຈໃສ່ການຕິດຕາມ, ກວດສຸຂະພາບ ແລະ ປີ່ນປົວຜູ້ປະສົບໄພເພື່ອປ້ອງກັນບໍ່ໃຫ້ເກີດພະຍາດລະບາດຮຸ້ນແຮງ, ພ້ອມທັງສະຫນອງນໍ້າສະອາດ ແລະ ສ້າງລະບົບສຸຂາພິບານທີ່ດີໄວ້ບໍລິການປະຊາຊົນ, ກະຊວງການຕ່າງປະເທດ ກໍໄດ້ເຮັດຫນ້າທີ່ອອກຫນັງສືທາງການເພື່ອລະດົມທຶນຈາກສາກົນ ແລະ ໄດ້ຮັບການຊ່ວຍເຫຼືອສອງຝ່າຍຈາກ 20 ປະເທດ, ຈາກອົງການເຄືອຂ່າຍສະຫະປະຊາຊາດ 6 ອົງການ, ອົງການຈັດຕັ້ງສາກົນລະຫວ່າງປະເທດ14 ອົງການ, ອົງການຈັດຕັ້ງທີ່ບໍ່ສັງກັດລັດຖະບານ 23 ອົງການ, ສະມາຄົມ-ມູນນິທິ 20 ພາກສ່ວນ, ຈາກຄົນເຊື້ອຊາດລາວຢູ່ຕ່າງປະເທດ 23 ປະເທດແລະ ບໍລິສັດຫ້າງຮ້ານຕ່າງໆຈາກ 14 ປະເທດນໍາອີກ, ເຊິ່ງລວມເປັນເງິນກວ່າ 17 ລ້ານໂດລາສະຫະລັດ ແລະ ວັດຖຸຕ່າງໆອີກ 5,9 ລ້ານກວ່າໂດລາສະຫະລັດ. ກະຊວງກະສິກໍາ-ປ່າໄມ້ໄດ້ສຸມໃສ່ວຽກງານສໍາຫລວດ, ປະເມີນຜົນເສຍຫາຍແຕ່ລະດ້ານ,ພ້ອມທັງສະຫນອງຢາປົວພະຍາດ, ວັກຊີນ, ອາຫານສັດ, ແນວພັນພືດ-ສັດ ແລະ ອຸປະກອນການຜະລິດກະສິກໍາ, ລວມເຖິງການຟື້ນຟູລະບົບຊົນລະປະທານເພື່ອໃຫ້ສາມາດທ່ວງທັນກັບການຜະລິດລະແລ້ງ, ກະຊວງພະລັງງານ-ບໍ່ແຮ່ ກໍໄດ້ສຸມໃສ່ແກ້ໄຂຜົນເສຍຫາຍ ແລະ ປະເມີນຜົນກະທົບເສົາໄຟຟ້າ, ຕາຂ່າຍໄຟຟ້າ, ຫມໍ້ແປງເພື່ອຮັບປະກັນໃຫ້ເຂດທີ່ປະສົບໄພໄດ້ມີກະແສໄຟຟ້າຊົມໃຊ້ໂດຍໄວ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ກໍໄດ້ສຸມໃສ່ການລາຍງານສະພາບໄພພິບັດໃນແຕ່ລະທ້ອງຖິ່ນຢ່າງຮີບດ່ວນ, ໄປຄຽງຄູ່ການໂຄສະນາປະຊາສໍາພັນການຊ່ວຍເຫລືອຕ່າງໆຈາກພາຍໃນ ແລະ ຕ່າງປະເທດ, ພ້ອມທັງໄດ້ຕິດຕັ້ງໂທລະໂຄ່ງ ແລະ ໂທລະພາບ ໃນຈຸດພັກເຊົາຊົ່ວຄາວຂອງຜູ້ປະສົບໄພ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມກໍໄດ້ເອົາໃຈໃສ່ຕິດຕາມສະພາບດິນຟ້າອາກາດ ແລະ ລາຍງານພະຍາກອນອາກາດ ແລະ ລະດັບນໍ້າຢ່າງໃກ້ຊິດ ແລະ ອອກແຈ້ງເຕືອນໃຫ້ປະຊາຊົນໄດ້ກຽມພ້ອມຮັບມື, ກະຊວງໂຍທາທິການແລະ ຂົນສົ່ງ ກໍໄດ້ເອົາໃຈໃສ່ສ້ອມແປງເສັ້ນທາງ ແລະ ຂົວ ທີ່ເປເພ່ເພື່ອໃຫ້ການສັນຈອນໄດ້ເປັນປົກກະຕິ, ສ່ວນກະຊວງສຶກສາທິການ ແລະ ກິລາ ກໍໄດ້ສະຫນອງປື້ມແບບຮຽນ, ປື້ມຄູ່ມືຄູ, ອຸປະກອນການຮຽນ, ຊຸດນັກຮຽນແລະ ອື່ນໆ ໃຫ້ແກ່ນັກຮຽນທີ່ໄດ້ຮັບຜົນກະທົບ ເພື່ອຮັບປະກັນການເປີດສົກຮຽນໃຫມ່, ສ່ວນສູນກາງຊາວຫນຸ່ມປະຊາຊົນປະຕິວັດລາວ ກໍໄດ້ຈັດກໍາລັງຊາວຫນຸ່ມຕະລຸມບອນຫລາຍກວ່າ 31 ພັນຄົນ ລົງຊ່ວຍເຫລືອຜູ້ປະສົບໄພໃນທົ່ວປະເທດ ແລະ ຂະແຫນງການອື່ນໆ ກໍເຫັນວ່າໄດ້ປະກອບສ່ວນດ້ານວັດຖຸເງິນຄໍາຕ່າງໆເພື່ອຊ່ວຍເຫລືອຟື້ນຟູ ແລະ ບັນເທົາທຸກຜູ້ໄດ້ຮັບຜົນກະທົບຈາກໄພນໍ້າຖ້ວມໃນປີນີ້ໃຫ້ກັບຄືນສູ່ສະພາບປົກກະຕິໂດຍໄວ.

- Wave100S AD to Website 2020 0 - ທຸກຂະ​ແຫນງ​ການ​ໄດ້​ສຸມ​ໃສ່​​ແກ້​ໄຂ​ໄພ​ນ້ຳຖ້ວມ
- WhatsApp Image 2020 05 27 at 5 - ທຸກຂະ​ແຫນງ​ການ​ໄດ້​ສຸມ​ໃສ່​​ແກ້​ໄຂ​ໄພ​ນ້ຳຖ້ວມ
- WhatsApp Image 2020 05 27 at 5 - ທຸກຂະ​ແຫນງ​ການ​ໄດ້​ສຸມ​ໃສ່​​ແກ້​ໄຂ​ໄພ​ນ້ຳຖ້ວມ
error: Alert: ເນື້ອຫາຂ່າວມີລິຂະສິດ !!