ວຽງໄຊ ໃນ​ຄວາມ​ຊົງ​ຈຳ

- Untitled 1 copy 5 -  ວຽງໄຊ ໃນ​ຄວາມ​ຊົງ​ຈຳ
- Untitled design -  ວຽງໄຊ ໃນ​ຄວາມ​ຊົງ​ຈຳ

 ເຖິງການເວລາຈະຜ່ານໄປ​ເກືອບ 4 ທົດສະວັດທີ່ຜູ້ຂຽນໄດ້ດໍາລົງຊີວິດຢູ່ພາຍໃຕ້ສາຍຄາໂຮງຮຽນວັດທະນະທໍາ ກອງທັບ ວຽງໄຊ;​ ແຕ່ພາບແຫ່ງການເຄື່ອນໄຫວທຸກຢ່າງ ຍັງຄົງສະ​ຖິດຢູ່ໃນດວງໃຈສະເໝີມາ ເປັນຕົ້ນກໍ່ຄືການຄົ້ນຄ້ວາຮໍ່າຮຽນ,​ ການອອກ ແຮງງານ-ກິດຈະກໍາຕ່າງໆ, ການຢູ່ຮ່ວມກັບເພື່ອນມິດ-ສະຫາຍ, ອ້າຍ-ເອື້ອຍ, ທີ່​ເປັນ​ນັກ​ຮຽນ-ນັກ​ສຶກ​ສາ, ເປັນ​ຄູ​ອາຈານ, ເປັນ​ພະ​ນັກ​ງານ​ຂັ້ນ​ນຳ-ຂັ້ນ​ບັນ​ຊາທີ່​ໄດ້ໃກ້​​​ສິດ​ຕິດ​ແທດ, ມີຄວາມສາມັກຄີຮັກແພງ, ເບິ່ງ​ແຍງ​ຊ່ວຍ​ເຫຼືອ​ກັນ​ຢ່າງ​ໝົດ​ຈິດ​ໝົດ​ໃຈ; ພິ ເສດທີ່ສຸດ ກໍ່​ຄື ອໍ້-ເອັມ (ພໍ່-ແມ່) ວຽງໄຊ ເຊິ່ງ​ຍາມ​ໃດກໍ່​ເປັນ​ຫ່ວງເປັນ​ໃຍ ຖື​ພວກ​ເຮົາ​ປຽບ​​ເໝືອນ​ລູກ​ຮັກ ແສນ​ແພງ​ຂອງພວກ ​ເພິ່ນ ເຊິ່ງໃນ​ເວ​ລານັ້ນ ​ເຖິງ​ວ່າ​ພວກ​ເພິ່ນ​ຈະ​ຢູ່ໃນສະພາບທີ່ມີຄວາມທຸກ​ຍາກ​ພຽງ​ໃດ​ກໍ່​ຕາມ ແຕ່​ຍັງ​ຢິບຍື່ນ​ບິ​ແບ່ງ​ນ້ຳ​ໃຈ, ເຂົ້າ, ປາ, ອາຫານ, ພືດພັນທັນຍະຫານ… ໃຫ້ແກ່​ລູກຫຼານ​ທະ​ຫານທີ່ມາຈາກ​ບັນ​ດາ​ກົມ​ກອງ, ເຂດແຂວງອື່ນໆ ແຕ່ເໜືອເຖິງໃຕ້.

ກ່ອນ​ຈະ​ເຂົ້າ​ສູ່​ຄວາມເປັນມາຂອງໂຮງຮຽນວຽງ​ໄຊ;  ຜູ້​ຂຽນ ຈະ​ຂໍ​ນຳ​ເອົາ​ບົດ​ເພງ​​ອຳ​ມະ​ຕະທີ່​ຮ້ອງ​ໂດຍ​ອາ​ຈານ ຄຳ​ເຕີມ ຊາ​ນຸ​ບານ ສິ​ລະ​ປິນ​ແຫ່ງ​ຊາດ ເຊິ່ງ​ເປັນ​ອີກ​ເພງ​ໜຶ່ງ​ທີ່​​ຍັງ​ຢູ່​ໃນດ​ວງ​ໃຈ​ຂອງ​ຄົນ​ວຽງ​ໄຊ​ ດັ່ງມີບາງ​ທ່ອນ​ຄື: “ທີ່ອ່າງວຽງໄຊ ຖ້ຳແມ່ໝ້າຍຈຳໄດ້ບໍ່ນໍ  ພວກເຮົາຈຶ່ງໄດ້ມາພໍ້ສ້າງພື້ນຖານເສດຖະກິດຮ່ວມກັນ ເຕົ້າໂຮມທຸກກຸ່ມປຸ້ມລຸ້ມອອກແຮງແຂ່ງຂັນ  ສ້າງເໝືອງຝາຍຊົນ ລະປະທານສ້າງສະຫວັນວຽງໄຊແດນນີ້  ນໍ້າລົ້ນຫຼັ່ງໄຫຼອ່າງວຽງໄຊສວຍງາມເດັ່ນຕາ ນໍ້າໃສແລເຫັນໝູ່ປາລ່ອງລອຍງາມຕາອີຫຼີ ອາລຸນໃສສ່ອງທ້ອງຟ້າວຽງໄຊເດັ່ນສີ… ” ສຽງເພງດັ່ງກ່າວ ໄດ້ສ່ອງແສງໃຫ້ເຫັນຂະບວນການສຶກສາ, ການສ້າງສາພັດທະນາ ແລະ ຄວາມສວຍງາມຂອງດິນແດນວຽງໄຊ ວິລະຊົນ.

ໃນ​ໂອ​ກາດ​ວັນ​ສ້າງ​ຕັ້ງ​ເມືອງວຽງ​ໄຊ ແຂວງ​ຫົວ​ພັນ ເຊິ່ງໃນ​ເມື່ອ​ກ່ອນ​ເປັນ​ສູນ​ກາງ​ການ​ປະ​ຕິ​ວັດ​ຊາດ ປະ​ຊາ​ທິ​ປ​ະ​ໄຕ, ເປັນ​ສູນ​ກາງ​ການ​ນຳ​ພາ​ຂອງ​ພັກ​ ໃນ​ການ​ສ້າງ​ກຳ​ລັງ​ປະ​ກອບ​ອາ​ວຸດ​ ຕາມ​ແນວ​ທາງ​ສົງ​ຄາມ​ປະ​ຊາ​ຊົນ ເພື່ອ​ພາ​ລະ​ກິດ​ປົດ​ປ່ອຍ​ຊາດ ແລະ ທັງ​ເປັນ​ຕົ້ນ​ກຳ​ເນີດ​ສາ​ທາ​ລະ​ນະ​ລັດ ​ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ຄົບ​ຮອບ 50 ປີ (30/11/1968-30/11/2018); ໃນ​ນາມ​ອະ​ດີດ​ນັກ​ຮຽນ-ນັກ​ສຶກ​ສາ​ຈາກ​ເບົ້າຫຼໍ່​ໂຮງ​ຮຽນ​ກອງ​ທັບ ວຽງ​ໄຊ ຈະ​ຂໍ​ທົບ​ທວນ​ຄວາມ​ຊົງ​ຈຳບຸນຄຸນ​ຂອງ​ແຜ່ນ​ດິນ ແລະ ຂອງຄົນ​ວຽງ​ໄຊ​ທີ່​ໃຫ້​ມີ​ຕໍ່ພວກ​ເຮົາ​ຈົນມາ​ເຖິງ​ທຸກວັນ​ນີ້.

ພາຍຫຼັງ​ປະ​ເທດ​ຊາດໄດ້​ຮັບ​ການ​ປົດ​ປ່ອຍ​ ພວກ​ເຮົາ​ຈາກຫຼາຍ​ແຂວງ-ຫຼາຍ​ກົມ​ກອງ ໂດຍ​ສະ​ເພາະໃນປີ 1980 ຜູ້​ຂຽນ ກໍ່​ຄືຫຼາຍ​ສິບ​ຊີ​ວິດ​ໄດ້​ຮັບ​ການມອບ​ໝາຍຈາກ​ເຫຼົ່າ​ຮົບ​ເສ​ນາ​ຮັກກອງ​ທັບໃຫ້​ມາ​ຮຽນ​ຢູ​ໂຮງ​ຮຽນ​ວຽງ​ໄຊ ເພື່ອ​ຍົກ​ລະ​ດັບ​ວັດ​ທະ​ນະ​ທຳ ເຊິ່ງ​​ເວ​ລານັ້ນ ຜູ້ຂຽນໄດ້​ເລີ່​ມ​ໄຕ່​ເຕົ້າ​ຈາກ​ຫ້ອງ 6 (ມ 2) ແລະ ​​ດຳ​ລົງ​ຊີ​ວິດ​ຢູ່​ພາຍ​ໃຕ້​ອ້ອມ​​ອົກ​ຂອງວຽງ​ໄຊ​ທີ່​​ມີ​​ອາ​ກາດ​ເຢັນ​ໃນ​ລະ​ດູ​ໜາວ​ບາງ​ປີກໍ່​ຕິດ​ລົບ ແລະ ​ຫຼໍ່ຫຼອມ​ຕົນ​ເອງເກືອບ 5 ປີທ່າມ​ກາງ​ການກໍ່​ສ້າງ​ຕົນ​ເອງ​ໃນ​ທຸກ​ດ້ານລວມ​ທັງການ​ປະ​ຕິ​ບັດ​ລະ​ບຽບ​ວິ​ໃນ​ ຢ່າງ​ເຂັ້ມ​ງວດ​, ​ອອກ​ແຮງ​​ງາ​ນ​ເພີ່ມ​ພູນ​ຜະ​ລິດ​ຜົນ-ກຸ້ມ​ຕົນ​ເອງເພິ່ງ​ຕົນ​ເອງ​ໃນ​ຫຼາຍ​ດ້ານ ​ເປັນຕົ້ນ​ເຮືອນນອນ, ຫ້ອງ​ຮຽນ, ເຮືອນ​ຄົວ, ອາ​ຫານ​ການ​ກິນ, ພືດ​ຜັກ, ຫຼົວຟືນ… ​ກຸ້ມ​ຕົນ​ເອງ​ທັງ​ນັ້ນ; ປັດ​ຈຸ​ບັນ ​ບັນ​ດາສະ​ຫາຍ​ທີ່​ຜ່ານ​ເບົ້າຫຼໍ່​ແຫ່ງນີ້ ລ້ວນ​ແຕ່​ເປັນ​ຄົນ​ທີ່ເຂັ້ມ​ແຂງ, ເປັນ​ກຳ​ລັງຫຼັກ​ແຫຼ່ງ​ໃຫ້​ແກ່​ທຸກວຽກ​ງານ ໂດຍ​ສະ​ເພາະ​ໃນ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ ແລະ ​ມີ​ຫຼາຍສະ​ຫາຍ ໄດ້​ກາຍ​ເປັນ​ການ​ນຳ​ຂັ້ນ​ສູງ​ຂອງ​ພັກ ແລະ ລັດ, ເປັນ​ນາຍ​ພັນ​-ນາຍ​ພົນ; ສຳ​ລັບ​ຜູ້​ທີ່​ເຮັດ​ວຽກ​ຢູ່​ຝ່າຍ​ພົນ​ລະ​ເຮືອນ ກໍ່​ໄດ້​ຕັ້ງ​ໜ້າ​ເຮັດ​ສຳ​ເລັດ​ໜ້າ​ທີ່​ທີ່​ຂັ້ນ​ເທິງມອບ​ໝາຍ​ໃຫ້.

ແຜ່ນ​ດິນ​ວຽງ​ໄຊ ເຊິ່ງໄດ້ຫຸ້ມລ້ອມໄປດ້ວຍພູຜາທີ່ສູງຊັນ, ອາກາດເຢັນ, ມີສາຍນໍ້າສິມ-ນໍ້ານົວ… ທີ່ໄຫຼຫຼໍ່ລ້ຽງຊີວິດຊາວເມືອງໃນຮ່ອມພູ, ທົ່ງພຽງ ແລະ ເປັນ​ທີ່​ເພິ່ງ​ອັນ​ດີ​ເລີດ​ຂອງ​ພວກ​ເຮົາ, ແຜ່ນ​ດິນນີ້ ​​ເຖິງຈະ​ຫວ່ານ​ພືດ​ພັນຫຼາຍ​ຊະ​ນິດກໍ່​ເກີດ​ຜົນ​ງອກ​ງາມ, ຫວ່ານຢູ່​ເທິງ​ຮ່ອມ​ຜາ ຫຼົກ​ຫຍ້າ​ຈັກ 2-3 ເທື່ອ ກໍ່​ສາ​ມາດ​ນຳ​ເອົາ​ຜັກ​ປອດ​ສານ​ພິດ​ມາ​ກິນ, ນອກນີ້ ຍັງ​ມີ​ນ້ຳ​ສະ​ອາດ​ໄຫຼ​ລິນ, ມີ​ໜໍ່​ໄມ້ຫຼາກຫຼາຍ​ປະ​ເພດລ້ຽງດູ​ພວກ​ເຮົາ, ການກໍ່​ສ້າງ​ໃນ​ໂຮງ​ຮຽນ​ແຫ່ງນີ້​ ​ສາ​ມາດ​ສ້າງ​ໄດ້ບຸກຄະລາ​ກອນ​ທີ່​ຊົງ​ຄຸນ​ຄ່າ, ມີ​ຄວາມ​ຮອບ​ຮູ້ຫຼາຍ​ດ້ານ, ເປັນ​ຕົ້ນ​​ເປັນ​ແຫຼ່ງ​ຜະ​ລິດ ແລະ ສ້າງ​ຄົນ​ດີ-ຄົນ​ເກັ່ງ​ແທ້ໆ ບໍ່​ຕ່າງ​ຫຍັງ​ກັບ​ຫວ່ານ​ພືດກໍ່​ງາມ, ສ້າງ​ຄົນ​ກໍ່​ດີ-ກໍ່​ເກັ່ງ ນີ້​ລະ​ຄືບຸນ​ຄຸນ​ຂອງ​ແຜ່​ນ​ດິນ “ວຽງ​ໄຊ” ​ທີ່​ເປັນ​ຊື່​ລັບ​ຂອງ​ປະ​ທານ ໄກ​ສອນ ພົມ​ວິ​ຫານ ລູກ​ຜູ້​ປະ​ເສີດ​ຂອງ​ປະ​ຊາ​ຊົນ, ຜູ້​ນຳ​ທີ່​ແສນ​ເຄົາ​ລົບ​ຮັກ​ຂອງ​ພວກ​ເຮົາ; ໃນ​ໂອ​ກາດ​ທີ່​ສະ​ຫງ່າ​ລາ​ສີນີ້, ​ຂໍ​ເຊີນ​ຊວນ​ບັນ​ດາ​ທ່ານ-ບັນດາສະຫາຍ​ທີ່​ເຄີຍ​ສຶກ​ສາ​ຮ່ຳ​ຮຽນ​ໃນ​ສະ​ຖາ​ບັນ​ແຫ່ງນີ້ ຂໍ​ຈົ່ງ​ອ່ວຍ​ໜ້າ​ກັບ​ຄືນ​ມາ​ສ້າງວຽງ​ໄຊ ເພື່ອທົດແທນບຸນຄຸນແຜ່ນດິນຖິ່ນກໍາເນີີດ ສປປ ລາວຂອງພວກເຮົາ; ພິ​ເສດ ຂໍ​ສົ່ງ​ຄວາມເຄົາ​ລົບ, ​ຮັກ​ແພງ ແລະ ຄຳ​ຂອບ​ໃຈ​ອັນ​ລົ້ນ​ເຫຼືອ​ມາ​ຍັງ ອໍ້-ເອັມທີ່​ໄດ້​ໃຫ້​ຄວາມ​ສຸກ ຄວາມ​ອົບ​ອຸ່ນ​ໃນ​ອະ​ດີດ ແລະ ຂໍ​ອ່ວຍ​ພອນ​ໄຊອັນ​ປະ​ເສີດ​ມາ​ຍັງ​ບັນ​ດາ​ການ​ນຳ​ຂອງ​ພັກ ແລະ ລັດ ທັງ​ຮຸ້ນ​ກ່ອນ ແລະ ປັດ​ຈຸ​ບັນ ​ຂໍ​ໃຫ້​ມີ​ອາ​ຍຸ​ໝັ້ນ​​ຂັວນຍືນ ສືບ​ຕໍ່​ເປັນ​ຮົ່ມ​ໂພ​ໄຊ ເພື່ອນຳ​ເອົາ​ປະ​ເທດ​ຊາດ ແລະ ປະ​ຊາ​ຊົນ​ລາວ​ສູ່​ຄວາມ​ມັ່ງ​ຄັ່ງ, ເຂັ້ມ​ແຂງ, ​ຄວາມ​ວັດ​ທະ​ນາ​ຖາ​ວອນ ແລະ ​ຄວາມສົມ​ບູນ​ພູນ​ສຸກ.

ສະ​ຫາຍ ສີ​ທະ​ວົງ ບຸນ​ປ​ຣະ​ສົງ ຮອງ​ຫົວ​ໜ້າ​ກົມ​ເສ​ນາ​ຮັກ ກອງ​ທັບ ໄດ້ປ່ອຍຄວາມຮູ້ສຶກຂອງຕົນອອກມາວ່າ: ຍ້ອນ ຮັບການເອົາໃຈໃສ່ຊີ້ນໍານໍາພາ ແລະ ຮັບອົບຮົມບົ່ມເພາະຈາກຄູ-ອາຈານການຈັດຕັ້ງຂັ້ນເທິງຂອງໂຮງຮຽນແຫ່ງນີ້ ຈຶ່ງເຮັດໃຫ້ຂ້າພະ ເຈົ້າໄດ້ມີອະນາຄົດທີ່ດີ ມີຄວາມສາມາດສໍາເລັດການສຶກສາການແພດຂັ້ນສູງຈາກອະດີດສະຫະພາບໂຊວຽດ ຈາກເມືອງບັອກໂດ (ຝະຣັ່ງ) ແລະ ຫຼັງມະຫາຢູ່ປະເທດເຮົາ; ໃນປັດຈຸບັນ ເຮັດໜ້າທີ່ເປັນຄະນະກົມ ທັງໝົດນີ້ກໍ່ຍ້ອນໄດ້ຮັບການເຝິກຝົນ, ຫຼໍ່ຫຼອມຈາກຄະນະພັກ-ການນໍາຂອງໂຮງຮຽນວຽງໄຊ ແລະ ຂັ້ນເທິງ ຈຶ່ງເຮັດໃຫ້ຊີວິດຂອງຂ້າພະເຈົ້າດີຂຶ້ນ, ມີຄວາມຮູ້-ຄວາມສາມາດ ເພື່ອເຮັດສໍາເລັດໜ້າທີ່ການເມືອງທີ່ທີ່ການຈັດຕັ້ງມອບໝາຍໃຫ້ໄດ້ເປັນຢ່າງດີ.

- Wave100S AD to Website 2020 0 -  ວຽງໄຊ ໃນ​ຄວາມ​ຊົງ​ຈຳ

ສະຫາຍ ສິດທິໄຊ ລິດທິເດດ ພະນັກງານຈາກກະຊວງໂຍທາ ແລະ ຂົນສົ່ງ ໄດ້ເປີດໃຈວ່າ: ເຖິງຈະຢູ່ໃສ, ເຮັດຫຍັງ… ກໍ່ຍັງບໍ່ຫຼົງລືມເມືອງວຽງໄຊ ເພາະສະຖານທີ່ນີ້ເຄີຍໃຫ້ທຸກຢ່າງແກ່ການປະຕິວັດ ລວມເຖິງໂຕເອງ, ຜ່ານການສຶກສາຮໍ່າຮຽນໃນຊຸມປີ 80 ຜ່ານມາ ໄດ້ເຮັດໃຫ້ຕົນເອງມີຄວາມເຕີບໃຫຍ່ ແຂງແຮງ ແລະ ສາມາດຜ່ານຜ່າວຽກງານຢ່າງມີຜົນສໍາເລັດ; ຂໍຖືໂອກາດນີ້ ຝາກຄວາມຢ້ຽມຢາມຖາມຂ່າວ, ຄວາມຮູ້ບຸນຄຸນອັນຈິງໃຈມາຍັງ ອໍ້-ເອັມ ແລະ ຂໍໃຫ້ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ການງານ ແລະ ຊີວິດສ່ວນຕົວທຸກຄົນ; ພວກເຮົາ ຍັງບໍ່ລືມ ອໍ້-ເອັມ ແລະ ແຜ່ນດິນວຽງໄຊ ອັນພິລະອາດຫານແຫ່ງນີ້.

 

#  ຂຽນໂດຍ: ຣັດສະໝີ ດວງສັດຈະ

- WhatsApp Image 2020 05 27 at 5 -  ວຽງໄຊ ໃນ​ຄວາມ​ຊົງ​ຈຳ
- WhatsApp Image 2020 05 27 at 5 -  ວຽງໄຊ ໃນ​ຄວາມ​ຊົງ​ຈຳ
error: Alert: ເນື້ອຫາຂ່າວມີລິຂະສິດ !!