ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ

ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ - Untitled design - ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ

ວ່າ​ໄປ​ແລ້ວ​ຄົນ​ສິງ​ກະ​ໂປ​ເປັນ​ຄົນ​ຮຽນ​ໜັງ​ສື​ຢ່າງ​ເຂັ້ມ​ຂຸ້ນ​ທີ່​ສຸດ​ໃນຫຼາຍ​ທົດ​ສະ​ຫວັດ​ຜ່ານ​ມາ​ ເພື່ອ​ຈະ​ເປັນ​ອັນ​ດັບ​ໜຶ່ງ​ໃນ​ຫ້ອງ​ຮຽນ ແຕ່​ມາ​ຮອດ​ປັດ​ຈຸ​ບັນ​ສິ່ງ​ດັ່ງ​ກ່າວ​ຈະ​ກາຍ​ເປັນ​ອາ​ດີດ​ໄປ​ແລ້ວ.

ສິງ​ກະ​ໂປ​ກຳ​ລັງ​ຄິດ​ຄຳ​ນວນ​ຄືນ​ວ່າ ຈຳ​ເປັນຫຼືບໍ່ ທີ່​ຈະ​ພັກ​ດັນ ຫຼື​ ເຖິງ​ຂັ້ນ​ບັງ​ຄັບ​ໃຫ້​ລູກຫຼານ​ເຮົາ​ໃນ​ຂັ້​ນ​ປະ​ຖົມ ແລະ​ມັດ​ທະ​ຍົມ ຈົມ​ປັກ​ຢູ່​ກັບ​ຄວາມ​ຄິດ​ທີ່​ວ່າ ຂ້ອຍ​ຕ້ອງ​ເປັນ​ທີ​ໜຶ່ງ​ຂອງ​ຫ້ອງ ຈາກ​ຄະ​ແນນ​ການ​ສອ​ບ​ເສັງ​ເພາະ​ວ່າ ສິ່ງ​ທັງ​ໝົດ ທີ່​ປະ​ຕິ​ບັດ​ຜ່ານ​ມານັ້ນ​ມັນ​ອາດ​ເປັນ​ທີ່​ສູນ​ເປົ່າ​ທີ່​ຈະ​ສ້າງ​ໃຫ້ ເດັກ​ນ້ອຍ ມີ​ຄວາມ​ເປັນ​ອິດ​ສະຫຼະ ປາ​ສະ​ຈາກ​ຄວາມ​ກົດ​ດັນ ຫັນ​ມາ​ເປັນ​ຄົນ​ຜູ້​ເຊິ່ງ​ມີ​ຫົວ​ຄິດ​ປະ​ດິດ​ສ້າງ ຫຼາຍກວ່າ​ມຸ່ງ​ໜ້າ​ເອົາ​ແຕ່​ຄະ​ແນນ.

ເພາະ​ສະ​ນັ້ນ, ນັບ​ແຕ່ ປີ 2019 ເປັນ​ຕົ້ນ​ໄປ ລັດ​ຖະ​ບານ​ສິງ​ກະ​ໂປ ປະ​ກາດ​ເລີຍ​ວ່າ ນັກ​ຮຽນ​ປະ​ຖົ​ມ ປີ ທີ ໑ ແລະ ໒ ຈະ​ບໍ່​ມີ​ການ​ສອບ​ເສັງ​ອີກ​ຕໍ່​ໄປ ແລະ ຫ້ອງ​ໃຫຍ່ກວ່ານັ້ນ ກໍ​ຈະ​ໄດ້​ຮຽນ​ໃນ​ສະ​ພາບ​ແວດ​ລ້ອມ​ທີ່​ການ​ແຂ່ງ​ຂັນ​ເອົາ​ຄະ​ແນນຫຼຸດ​ລົງ, ທ່ານ ອົງ ເຢ ກຸງ (Ong Ye Kung) ລັດ​ຖະ​ມົນ​ຕີ ກະ​ຊວງ​ສຶກ​ສາ ຂອງ​ສິງ​ກະ​ໂປ​ເວົ້າ​ຢ່າງ​ຈະ​ແຈ້ງ​ເລີຍ​ວ່າ “ການ​ຮຽນ​ຮູ້ ບໍ​ແມ່ນ​ການ​ແຂ່ງ​ຂັນ” , ພ້ອມນັ້ນ ກະ​ຊວງ​ສຶກ​ສາ​ຂອງ ສິງ​ກະ​ໂປ ຍັງ​ມີ​ແຜນຫຼາຍ​ຢ່າງ​ທີ່​ຈະ​ປ່ຽນ​ແປງ ເພື່ອ​ຊຸກ​ຍູ້​ໃຫ້ຫຼຸດ​ຜ່ອນ ການ​ແຂ່ງ​ຂັນ​ຂອງ​ນັກ​ຮຽນ​ຕຶ່ມ​ອີກ.

ເປັນ​ຫຍັງ​ຄື​ເຮັດ​ແນວນັ້ນ? ລັດ​ຖະ​ບານ​ສິງ​ກະ​ໂປ​ກຳ​ລັງ​ຄິດ​ວ່າ​ຈະ​ເຮັດ​ແນວ​ໃດ ເພື່ອ​ກະ​ກຽມ​ໃຫ້​ເດັກ​ນ້ອຍ​ທີ່​ເປັນ​ອະ​ນາ​ຄົດ​ຂອງ​ປະ​ເທດ​ເຂົາ​ເຈົ້າ ສາ​ມາດ​ຮັບ​ມື​ກັບ​ການ​ປ່ຽນ​ແປງ ທາງ​ດ້ານ​ຕະຫຼາດ​ແຮງ​ງານ​ໃນ​ອະ​ນາ​ຄົດ​ນັ້ນ​ເອງ. ລັດ​ຖະ​ບານ ສິງ​ກະ​ໂປ ກຳ​ລັງ​ສຸມ​ໃສ່ ການ​ສ້າງ​ທັກ​ສະ (soft skills) ທີ່​ຜູ້​ຂຽນ​ແປ​ແບບ​ກົງໆ​ວ່າ “ທັກ​ສະ​ທີ່​ນຸ່ມນວນ” ເຊິ່ງ​ໃນ​ນີ້ ຮວມ​ມີ ​ຄວາມ​ສາ​ມາດ ໃນການ​ຕັດ​ສິນ​ໃຈ, ການ​ເປັນ​ຜູ້​ນຳ, ການ​ແກ້​ໄຂ​ບັນ​ຫາ ຕ່າງໆ ເຊິ່ງ​ອັນ​ນີ້ ແມ່ນ​ສອດ​ຄ່ອງ​ກັບ ການ​ວິ​ເຄາະ ຂອງ ເວ​ທີ​ເສດ​ຖະ​ກິດ​ໂລກ (Worl Economic Forum) ທີ່​ເພິ່ນ​ໄດ້​ແນະ​ນຳ ທັກ​ສະ​ທີ່​ຈຳ​ເປັນ ເພື່ອ​ຕອບ​ສະ​ໜອງວຽກ​ງາ​ນ​ໃນ​ອະ​ນາ​ຄົດ ໂດຍ​ເພິ່ນ​ລະ​ບຸ​ຈະ​ແຈ້ງ​ໃນ​ບົດ​ລາຍ​ງານ ວ່າ​ດ້ວຍ ວຽກ​ໃນ​ອະ​ນາ​ຄົດ ທີ່​ຕີ​ພິມ​ໃນ​ປີ 2018.

ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ - Wave100S AD to Website 2020 0 - ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ

ທັກ​ສະ​ທີ່​ວ່ານີ້​ຮວມ​ມີ ການ​ວິ​ເຄາະ​ບັນ​ຫາ ແລະ​ມີ​ຫົວ​ຄິດ​ປະ​ດິດ​ສ້າງ, ການ​ຮຽນ​ຮູ້​ສິ່ງ​ໃໝ່ ຢ່າງ​ສະ​ໝ່ຳ​ສະ​ເໝີ, ມີ​ແນວ​ຄິດ​ສ້າງ​ສັນ ແລະ​ລິ​ເລີ່ມ​ສິ່ງ​ໃໝ່, ສາ​ມາດ​ຄົ້ນ​ຄິດ​ຢ່າງ​ເລິກ​ເຊິ່ງ ແລະ​​ແກ້​ໄຂ​ບັນ​ຫາ ທີ່​ສັບ​ສົນ​ໄດ້, ການ​ເປັນ​ຜູ້​ນຳ​ພາ​ທີ່​ດີ ແລະ​ມີ​ຄວາມ​ສາ​ມາດ​ສົ່ງ​ເສີມ​ສັງ​ຄົມ​ໄປ​ໃນ​ທາງ​ທີ່​ດີ, ມີ​ຄວາມ​ສະຫຼາດ​ທາງ​ດ້ານ​ອາ​ລົມ ດັ່ງ​ນີ້​ເປັນ​ຕົ້ນ.

ໃນ​ປັດ​ຈຸ​ບັນ ກະ​ຊວງ​ສຶກ​ສາ ສິງ​ກະ​ໂປ​ໄດ້​ມີ​ທິມ​ງານ​ສະ​ເພາະ​ກິດ​ເພື່ອ​ການ​ປ່ຽນ​ແປງ ທັດ​ສະ​ນະ​ຄະ​ຕິ ຈາກ​ການ​ຮຽນ​ເກັ່ງໆ ເສັງ​ໄດ້​ຄະ​ແນນ​ດີ ມີ​ລຳ​ດັບ​ທີ​ຕົ້ນໆ​ຂອງ​ຫ້ອງ, ຈາກ​ການ​ທີ່​ຢາກ​ເຮັດ​ວຽກ​ນຳ​ລັດ, ທະ​ນາ​ຄານ ແລະ​ເປັນ​ແພດ​ໝໍ ຫັນ​ມາ​ຮຽນ​ຮູ້ ບົດ​ຮຽນ​ຕົວ​ຈິງ​ທີ່​ສາ​ມາດ​ໃຊ້​ໄດ້ ກັບ​ສະ​ພາບ​ການ​ປ່ຽນ​ແປງ​ໃໝ່ ໂດຍ​ນຳໃຊ້​ທັກ​ສະ​ທີ່​ນຸ່ມນວນ​ດັ່ງ​ກ່າວ ເພື່ອ​ປ່ຽນ​ແປງ ໂສມ​ໜ້າ​ເສດ​ຖະ​ກິດ, ຫັນ​ທິດ​ເປັນ​ຜູ້​ນຳຫຼາຍ​ຂຶ້ນ.

ເພາະ​ສະ​ນັ້ນ, ມັນ​ກໍ​ຫາກ​ເປັນ​ປະ​ໂຫຍດບໍ່​ໜ້ອຍ​ທີ່​ພວກ​ເຮົາ​ຈະ​ຄິດ​ທົບ​ທວນ​ຄືນ​ໃນ​ລະ​ບົບ​ກ​ານ​ສຶກ​ສາ​ພວກ​ເຮົາ ເຊິ່ງ​ອາດ​ຈະ​ບໍ່ສະ​ເພາະ​ແຕ່ ​ແກ້​ໄຂ​ບັນ​ຫາ ການ​ອ່ານ​ອອກ ຂຽນ​ໄດ້​ຢ່າງ​ຄ່ອງ​ແຄ່ວ ຫຼື ການ​ສ້າງ​ສີ​ມື​ແຮງ​ງານ​ໃຫ້​ແກ່​ເດັກ​ນ້ອຍ ໄວ​ໜຸ່ມ​ພວກ​ເຮົາ ແລ້ວ​ລະ, ການ​ສ້າງ​ທັກ​ສະ ໃນ​ການ​ແກ້​ໄຂ​ບັນ​ຫາ, ການ​ເປັນ​ຜູ້​ນຳ​ພາ ແລ​ະ​ລິ​ເລີ່ມ, ມີ​ຫົວ​ຄິດ​ປະ​ດິດ​ສ້າງ ເພື່ອ​ການ​ປ່ຽນ​ແປງ​ຂອງ​ໂລກນັ້ນ ພວກ​ເຮົາ​ບໍ່​ອາດ​ພູມ​ໃຈ​ຢ່າງ​ເຕັມ​ປ່ຽມ​ວ່າ ລູກຫຼານ​ພວກ​ເຮົາ​ເສັງ​ໄດ້ ທີ​ໜຶ່ງ ຫຼື ໄດ້​ຄະ​ແນນ​ສູງໆ ແຕ່​ການ​ຮຽນ​ຮູ້​ທັກ​ສະ​ຊີ​ວິດ ທີ່​ສາ​ມາດ​ນຳ​ໃຊ້​ໄດ້​ກັບ​ສະ​ພາບ​ຕົວ​ຈິງ​ ແມ່ນ​ມີ​ຄວາມ​ຈຳ​ເປັນ​ຂຶ້ນ​ນັບ​ມື້.

ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ - WhatsApp Image 2020 05 27 at 5 - ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ
ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ - WhatsApp Image 2020 05 27 at 5 - ການ​ສຶກ​ສາ​ເພື່ອ​ອະ​ນາ​ຄົດ: ຂໍ້​ຄິດ​ຈາກສິງ​ກະ​ໂປ
error: Alert: ເນື້ອຫາຂ່າວມີລິຂະສິດ !!