ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ

ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ - Untitled design - ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ

ຄະນະຜູ້ແທນລາວນຳໂດຍທ່ານ ສະຫວັນຄອນ ລາຊມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍເຈົ້າຫນ້າທີອາວຸໂສຮັບຜິດຊອບວຽກງານວັດທະນະທຳ ແລະ ສິລະປະອາຊຽນລາວ ໄດ້ເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ແລະ ບັນດາກອງປະຊຸມປີ່ນອ້ອມອື່ນໆ ທີ່ໄດ້ຈັດຂື້ນໃນວັນທີ 24 ຕຸລານີ້, ທີ່ເມືອງຢອກຢາກາຕາ, ປະເທດອິນໂດເນເຊຍ ພາຍໃຕ້ຫົວຂໍ້: ຢຶດຖືເອົາວັດທະນະທຳປ້ອງກັນເຫດ ເພື່ອເຮັດໃຫ້ ເອກະລັກອາຊຽນມີຄວາມອຸດົມຮັ່ງມີ “Embracing the Culture of Prevention to Enrich the ASEAN Identity” ໂດຍມີບັນດາທ່ານລັດຖະມົນຕີ, ຮອງລັດຖະມົນຕີ, ເຈົ້າຫນ້າທີອາວຸໂສ ແລະ ບັນດາຜູ້ແທນຈາກພາກສ່ວນວັດທະນະທຳ ແລະ ສິລະປະຈາກບັນດາປະເທດສະມາຊິກອາຊຽນ ແລະ ທ່ານເລຂາທິການໃຫຍ່ອາຊຽນເຂົ້າຮ່ວມນໍາດ້ວຍ.

ກອງປະຊຸມດັ່ງກ່າວໄດ້ດຳເນີນພາຍໃຕ້ການເປັນປະທານຂອງ ທ່ານ Muhadjir Effendy, ລັດຖະມົນຕີກະຊວງສຶກສາທິການ ແລະ ວັດທະນະທຳ, ອິນໂດເນຍເຊຍ ຊຶ່ງໄດ້ປຶກສາຫາລືບັນຫາຕ່າງໆຢ່າງກວ້າງຂວາງ ແລະ ສ້າງສັນ ໃນນັ້ນໄດ້ພິຈາລະນາຮັບຮອງເອກະສານສຳຄັນ ເຊັ່ນ: ຖະແຫຼງການຢອກຢາກາຕາ ວ່າດ້ວຍການຢຶດຖືເອົາວັດທະນະທຳປ້ອງກັນເຫດ ເພື່ອເຮັດໃຫ້ ເອກະລັກອາຊຽນມີຄວາມອຸດົມຮັ່ງມີ  “Yogyakarta Declaration on Embracing the ASEAN Culture of Prevention to Enrich ASEAN Identity”. ຖະແຫຼງການນີ້ຈະໄດ້ນໍາສະເໜີໃຫ້ຜູ້ນໍາອາຊຽນຮັບຊາບ ໃນກອງປະຊຸມສຸດຍອດອາຊຽນ ຄັ້ງທີ 33 ເຊິ່ງຈະຈັດຂື້ນໃນເດືອນ ພະຈິກ 2018 ທີ່ ປະເທດສິງກະໂປ.

ທ່ານ ຮອງລັດຖະມົນຕີ ຖວທ ລາວ ໄດ້ສະເໜີຕໍ່ກອງປະຊຸມຄັ້ງນີ້ວ່າ: ສປປ ລາວ ເຫັນໄດ້ຄວາມສຳຄັນຂອງວຽກງານວັດທະນະທຳ ແລະ ສິລະປະ ໂດຍສົ່ງເສີມໃຫ້ເຄົາລົບ, ຮັບຮູ້ ແລະ ເຂົ້າໃຈວັດທະນະທຳເຊິ່ງກັນ ແລະ ກັນ ເພື່ອມິດຕະພາບ ແລະ ການຮ່ວມມື ນຳມາໃຫ້ສັງຄົມມີຄວາມປອງດອງ, ມີການພັດທະນາຍືນຍົງ ແລະ ຈະເລີນຮຸ່ງເຮືອງ, ພ້ອມໄດ້ເນັ້ນຕື່ມວ່າ: ລາວເຮົາຍາມໃດກໍຊອກຫາທຸກວິທີທາງເພື່ອຮັກສາ ແລະ ພັດທະນາວັດທະນະທຳ ແລະ ຮີດຄອງປະເພນີທີ່ຫຼາກຫຼາຍຂອງປະຊາຊົນບັນດາເຜົ່າ, ເພື່ອປະກອບສ່ວນເພີ່ມທະວີໃນການພັດທະນາວັດທະນະທຳ ແລະ ທ່ອງທ່ຽວ ແລະ ສ້າງກາລະໂອກາດໃຫ້ປະຊາຊົນມີວຽກເຮັດງານທຳ ເພື່ອໃຫ້ບັນລຸເປົ້າຫມາຍຫຼຸດພົ້ນອອກຈາກຄວາມທຸກຍາກ. ພ້ອມໄດ້ກ່າວຊຸກຍູ້ໃຫ້ມີການຮ່ວມມືດ້ານປະກອບການຜະລິດຕະພັນວັດທະນະທຳຂະໜາດນ້ອຍ ແລະ ຂະໜາດກາງ (SMCEs).

ໃນໄລຍະທີ່ຜ່ານມາ, ພວກເຮົາກໍໄດ້ຮັບຜົນສຳເລັດຫຼາຍຢ່າງ ໃນການປົກປັກຮັກສາ ແລະ ສົ່ງເສີມວັດທະນະທໍາອັນດີງາມ ແລະ ວັດທະນະທຳອັນມີຄຸນຄ່າ. ປະຕິບັດຕາມນະໂຍບາຍຂອງລັດຖະບານ ວ່າດ້ວຍ ວັດທະນະທໍາແຫ່ງຊາດ, ປະຊາຊົນລາວ ແລະ ທຸກພາກສ່ວນທີ່ກ່ຽວຂ້ອງ ໄດ້ມີຄວາມພະຍາຍາມສູງໃນການເສີມຂະຫຍາຍ ແລະ ພັດທະນາວັດທະນະທໍາລາວໃຫ້ອຸດົມຮັ່ງມີຍິ່ງຂື້ນ.

ໃນລະດັບທ້ອງຖິ່ນ, ພວກເຮົາໄດ້ເອົາໃຈໃສ່ຊຸກຍູ້ໃຫ້ປະຊາຊົນເປັນເຈົ້າການໃນການສ້າງຄອບຄົວວັດທະນະທໍາ ແລະ ບ້ານວັດທະນະທໍາຕາມມາດຕະຖານທີ່ກຳນົດໄວ້. ສ່ວນວ່າໃນລະດັບພາກພື້ນ ແລະ ສາກົນ ພວກເຮົາກໍໄດ້ຈັດຕັ້ງປະຕິບັດຫຼາຍໂຄງການ ແລະ ກິດຈະກຳພາຍໃນອາຊຽນ ແລະ ຮ່ວມກັບປະເທດຄູ່ຮ່ວມເຈລະຈາອາຊຽນ.

ມານະໂອກາດນີ້, ທ່ານ ຮອງລັດຖະມົນຕີກໍໄດ້ແຈ້ງຕໍ່ກອງປະຊຸມຕື່ມອີກວ່າ: ໃນວັນທີ 7 ທັນວາ 2017 ອົງການສະຫະປະຊາຊາດເພື່ອການສຶກສາ, ວິທະຍາສາດ ແລະ ວັດທະນະທໍາ (UNESCO) ໄດ້ບັນທຶກສຽງແຄນຂອງປະຊາຊົນລາວ ເຂົ້າໃນບັນຊີມໍລະດົກນາມມະທຳທາງວັດທະນະທໍາ, ເຊິ່ງເປັນມໍລະດົກໂລກທຳອິດຂອງລາວ ກ່ຽວກັບ ວັດທະນະທຳນາມມະທຳ. ດັ່ງທີ່ບັນດາທ່ານຊາບດີແລ້ວວ່າ ສປປ ລາວ ມີ 2 ສະຖານທີ່ມໍລະດົກໂລກ ຄື: ເມືອງຫຼວງພະບາງ ແລະ ວັດພູຈຳປາສັກ. ຄຽງຄູ່ກັນນັ້ນ, ລາວກໍກຳລັງເຮັດວຽກກັບຜູ້ຊ່ຽວຊານ ແລະ ອົງການປົກຄອງທ້ອງຖີ່ນຢ່າງໃກ້ຊິດຕິດແທດ ໃນການສະເໜີຊື່ທົ່ງໄຫຫີນຊຽງຂວາງ, ປ່າສະຫງວນທາງທຳມະຊາດຫີນໜາມໜໍ່ ແຂວງຄຳມ່ວນ ແລະ ລຳວົງລາວ ເຂົ້າເປັນມໍລະດົກໂລກຕື່ມອີກ.

ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ - Wave100S AD to Website 2020 0 - ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ

ໃນວັນດຽວກັນ, ກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນ ກັບບັນດາປະເທດຄູ່ຮ່ວມເຈລະຈາອາຊຽນ ບວກສາມ ກໍໄດ້ຮັບຮອງເອົາບັນດາແຜນວຽກໃນຂອບການຮ່ວມມືອາຊຽນບວກສາມ ເຊັ່ນ: ແຜນວຽກໃນຂອບການຮ່ວມມືວັດທະນະທຳ ແລະ ສິລະປະອາຊຽນ-ຈີນ 2019-2021, ແຜນວຽກໃນຂອບການຮ່ວມມືວັດທະນະທຳ ແລະ ສິລະປະອາຊຽນ-ຍີ່ປຸ່ນ 2019-2021, ແຜນວຽກໃນຂອບການຮ່ວມມືວັດທະນະທໍາ ແລະ ສິລະປະອາຊຽນ-ສ.ເກົາຫຼີ 2019-2021 ແລະ ແຜນວຽກໃນຂອບການຮ່ວມມືວັດທະນະທໍາ ແລະ ສິລະປະອາຊຽນບວກສາມ 2019-2021. ໃນຫຼາຍປີຜ່ານມາ, ການຮ່ວມມືອາຊຽນບວກສາມໃນດ້ານວັດທະນະທໍາ ແລະ ສິລະປະ ໄດ້ມີການຂະຫຍາຍຕົວໃນຫຼາຍດ້ານ ໂດຍໄດ້ຮ່ວມກັນຈັດຕັ້ງປະຕິບັດບັນດາໂຄງການ ແລະ ກິດຈະກຳ ທີ່ໄດ້ຮັບການສະໜັບສະໜູນ ດ້ານທຶນຮອນ ແລະ ວິຊາການ ຈາກ ສປ ຈີນ, ຍີ່ປຸ່ນ ແລະ ສ.ເກົາຫຼີ.

 

 

ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ - WhatsApp Image 2020 05 27 at 5 - ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ
ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ - WhatsApp Image 2020 05 27 at 5 - ຄະນະຜູ້ແທນລາວເຂົ້າຮ່ວມກອງປະຊຸມລັດຖະມົນຕີຮັບຜິດຊອບວຽກງານວັດທະນະທຳ ແລະ ສິລະປະອາຊຽນຄັ້ງທີ 8 ທີ່ອິນໂດເນເຊຍ
error: Alert: ເນື້ອຫາຂ່າວມີລິຂະສິດ !!