ນັກວິໄຈອັງກິດປົດສະນວນມັລແວຣ໌ເອີ້ນຄ່າໄຖ່ ຢຸດການແຜ່ລະບາດທົ່ວໂລກ

- advert banner 728 90 728x90 - ນັກວິໄຈອັງກິດປົດສະນວນມັລແວຣ໌ເອີ້ນຄ່າໄຖ່ ຢຸດການແຜ່ລະບາດທົ່ວໂລກ
- 96045029 ec40cf1d 1593 48bb 9bd7 85106c41c04d 300x169 - ນັກວິໄຈອັງກິດປົດສະນວນມັລແວຣ໌ເອີ້ນຄ່າໄຖ່ ຢຸດການແຜ່ລະບາດທົ່ວໂລກ
ເມັດສີຂຽວສະແດງເຖິງເປົ້າໝາຍທີ່ມັລແວຣ໌ WannaCry ແຜ່ລະບາດເຂົ້າໂຈມຕີເຄືອຂ່າຍຄອມພິວ ເຕີຕ່າງໆທົ່ວໂລກ ໂດຍພົບການໂຈມຕີສ່ວນຫລາຍ ຢູ່ເອີຣົບ

ໜຸ່ມ​ນັກວິ​ໄຈ​ດ້ານ​ຄວາມ​ປອດ​ໄພ​ທາງ​ໄຊ​ເບີ​ຊາວ​ອັງກິດ ອາຍຸ 22 ປີ ​ເຊິ່ງ​ໃສ່​ຊື່​ປອມ​ໃນ​ການ​ຂຽນ​ບລ໊ອກ ​ແລະ ​ເປັນ​ຊື່​ບັນຊີ​ທະວິ​ດ​ເຕີ​ວ່າ: “ມັລ​ແວຣ໌​ເທ​ກ” (MalwareTech) ຄົ້ນພົບ​ຊ່ອງ​ທາງ​ເຕັກນິກ​ຂອງມັລ​ແວ​ຣ໌​ເອີ້ນ​ຄ່າ​ໄຖ່ WannaCry ທີ່​ເຂົ້າ​ໂຈມ​ຕີ​ເຄືອ​ຂ່າຍ​ຄອມ​ພິວ​ເຕີ​ທົ່ວ​ໂລກ​ໃນ​ວັນ​ທີ 13 ພຶດສະພາ ຈົນ​ເຮັດ​ໃຫ້​ລາວ​ສາມາດ​ເຂົ້າຢຸດ​ການ​ແຜ່​ລະບາດ​ຂອງ​ມັລ​ແວຣ໌ດັ່ງກ່າວ​ໄດ້.

- new3 - ນັກວິໄຈອັງກິດປົດສະນວນມັລແວຣ໌ເອີ້ນຄ່າໄຖ່ ຢຸດການແຜ່ລະບາດທົ່ວໂລກ

ນັກວິ​ໄຈ​ຄົນ​ດັ່ງກ່າວ​ເປີດ​ເຜີຍ​ກັບ BBC ວ່າ: ລາວ​ຢູ່​ລະຫວ່າງ​ລາ​ພັກ​ຮ້ອນ 1 ອາທິດ ຂະນະ​ທີ່​ໄດ້​ຍິນ​ຂ່າວ​ການ​ໂຈມ​ຕີ​ເທື່ອ​ໃຫຍ່​ຂອງ​ມັລ​ແວ໌ WannaCry ​ເຊິ່ງ​ເຮັດ​ໃຫ້​ລາວ​ຕັດສິນ​ໃຈ​ລົງມືຄົ້ນຫາ​ຕົ້ນຕໍ​ຂອງ​ມັລ​ແວຣ໌​ເອີ້ນ​ຄ່າ​ໄຖ່​ທັນທີ ​ໂດຍ​ລາວ​ຕ້ອງ​ອົດ​ຫລັບ​ອົດ​ນອນ​ຈົນ​ໄດ້​ພົບ​ລະຫັດ​ຢຸດ​ການ​ເຮັດ​ວຽກ​ຂອງ​ມັນ​ໂດຍ​ບັງ​ເອີນ.

“ມັລ​ແວຣ໌​ເທ​ກ” ​ໄດ້​ສັງ​ເກດ​ຮູບ​ແບບ​ການ​ເຮັດ​ວຽກ​ຂອງ WannaCry ​ແລະ ພົບ​ວ່າ​ມັລ​ແວຣ໌ນີ້​ຈະ​ຕິດຕໍ່​ເຂົ້າ​​ໄປ​ເວ​ບ​ແອດ​ເດຣສໜຶ່ງ​ທີ່​ຍັງ​ບໍ່​ໄດ້​ຈົດ​ທະບຽນ​ທຸກ​ຄັ້ງ ​ເມື່ອ​ກຽມ​ຈະ​ເຂົ້າ​ໂຈມ​ຕີ​ຄອມ​ພິວ​ເຕີ​ເຄື່ອງ​ໃໝ່ ​ເຮັດ​ໃຫ້​ລາວ​ຕັດສິນ​ໃຈ​ຈ່າຍ​ເງິນ 8 ປອນ ​ເພື່ອ​ຈົດ​ທະບຽນ ​ແລະ ຊື້​ໂດ​ເມນ​ເນມດັ່ງກ່າວ​ມາ​ເປັນ​ຂອງ​ຕົນ​ເອງ ​ໂດຍ​ຕັ້ງ​ໃຈ​ວ່າ​ຈະ​ໃຊ້​ເປັນ​ເຄື່ອງມືສຶກສາ​ເສັ້ນທາງ​ການ​ແຜ່​ລະບາດ​ຂອງ​ມັລ​ແວຣ໌ຕໍ່​ໄປ.

​ເຖິງ​ຢ່າງ​ໃດ​ກໍ​ຕາມ, ​ທັນທີ​ທີ່​ລາ​ວຈົດ​ທະບຽນ​ໂດ​ເມມ​ເນມດັ່ງກ່າວ ລະຫັດ​ທຳລາຍ​ຕົນ​ເອງ​ທີ່​ເອີ້ນ​ວ່າ​ຄິລສວິດ (Kill switch) ​ເຊິ່ງຢູ່​ໃນ​ລະຫັດ​ຂອງ​ມັລ​ແວຣ໌ດັ່ງກ່າວ​ກໍ​ເຮັດ​ວຽກ​ຂຶ້ນ ​ເຮັດ​ໃຫ້ WannaCry ຢຸດ​ການ​ແຜ່​ກະຈາຍ​ ​ໂດຍ​ອັດຕະ​ໂນ​ມັດ.

- 96037409 939c12ad 46a5 40c9 8914 7417cda1ab6c 300x169 - ນັກວິໄຈອັງກິດປົດສະນວນມັລແວຣ໌ເອີ້ນຄ່າໄຖ່ ຢຸດການແຜ່ລະບາດທົ່ວໂລກ
ມັລແວຣ໌ເອີ້ນຄ່າໄຖ່ຊື່ WannaCry ເຂົ້າປິດລ໊ອກລະບົບ ຄອມພິວເຕີໃນຫລາຍປະເທດ ແລະ ຮຽກຮ້ອງເງິນຄ່າ ໄຖ່ເພື່ອປົດລ໊ອກ

ນັກວິ​ໄຈ​ຜູ້​ນີ້​ບອກ​ວ່າ: ບັນດາ​ນັກ​ໂຈມ​ຕີ​ທາງ​ໄຊ​ເບີ​ມັກ​ຂຽນ​ລະຫັດ​ທຳລາຍ​ຕົນ​ເອງ​​ແບບ​ນີ້​ເຊື່ອງ​ໄວ້​ໃນ​ມັລ​ແວຣ໌ຂອງ​ຕົນ ​ເພື່ອ​ໃຫ້​ຢຸດ​ການ​ແຜ່​ລະບາດ​ໃນ​ກໍລະນີ​ເກີດ​ຄວາມ​ຜິດພາດ ຫລື ບໍ່​ສາມາດ​ຄວບ​ຄຸມ​ສະຖານະ​ການ​ໄດ້ ​ໂດຍ​ສະ​ເພາະ​ຖື​ເປັນ​ການ​ປ້ອງ​ກັນ​ກວດ​ສອບ​ຈາກ​ນັກວິ​ໄຈ​ທາງ​ໄຊ​ເບີ​ຄື​ລາວ, ​ແຕ່​ໃນ​ເທື່ອ​ນີ້ ​ແຜນການ​ດັ່ງກ່າວ​ພັດ​ຖືກ​ຫວນ​ກັບ​ໂດຍ​ບັງ​ເອີນ ​ເພາະ​​ເປີດ​ຊ່ອງ​ທາງ​ໃຫ້​ນັກວິ​ໄຈ​ເຂົ້າ​ໄປ​ຢຸດ​ການ​ແຜ່​ລະບາດ​ຂອງມັລ​ແວ໌​ໄດ້ຈາກ​ໄລຍະ​ໄກ.

- lattana 1 - ນັກວິໄຈອັງກິດປົດສະນວນມັລແວຣ໌ເອີ້ນຄ່າໄຖ່ ຢຸດການແຜ່ລະບາດທົ່ວໂລກ

ບັນດາ​ຜູ້​ໃຊ້​ຄອມ​ພິວ​ເຕີ​ທົ່ວ​ໂລກ​ຕ່າງ​ສະ​ແດງ​ຄວາມ​ຍ້ອງຍໍ “ມັລ​ແວຣ໌​ເທ​ກ” ວ່າ​ເປັນ​ວິລະ​ບູລຸດ​ແຫ່ງ​ຄວາມ​ບັງ​ເອີນ ​ແລະ ຫົວໜ້າ​ຂອງ​ລາວ​ໄດ້​ອະນຸມັດ​ມື້ລາ​ພັກ​ທົດ​ແທນ​ໃຫ້​ເພີ່ມ​ອີກ 1 ອາທິດ, ພາຍຫລັງ​ລາວ​ຕ້ອງ​ໃຊ້​ເວລາ​ໃນ​ມື້ພັກ​ແກ້​​ໄຂ​ບັນຫາ​ມັລ​ແວຣ໌.

​ເຖິງ​ຢ່າງ​ໃດ​ກໍ​ຕາມ, ຜົນສຳ​​ເລັດ​ຂອງ “ມັລ​ແວຣ໌​ເທ​ກ” ພຽງ​ຢຸດ​ການ​ແຜ່​ລະບາດ​ຂອງ WannaCry ທົ່ວ​ໂລກ, ​ແຕ່​ບໍ່​ສາມາດ​ແກ້​ໄຂ​ຄວາມ​ເສຍ​ຫາຍ​ທີ່​ເກີດ​ຂຶ້ນຕໍ່​ລະບົບ​ຄອມ​ພິວ​ເຕີ​ທີ່​ຖືກ​ມັລ​ແວຣ໌​ເຂົ້າ​ໂຈມ​ຕີ​​ແລ້ວ​ໄດ້. ຜູ້​ຊ່ຽວຊານ​ຍັງ​ກ່າວ​ເຕືອນ​ວ່າ: ​ໃນ​ອະນາຄົດ​ຈະ​ມີ​ມັລ​ແວຣ໌​ເອີ້ນ​ຄ່າ​ໄຖ່​ໃນ​ລັກສະນະ​ດຽວ​ກັນ​ອອກ​ມາ​ໂຈມ​ຕີ​ອີກ​​ແນ່ນອນ ​ແລະ ບໍ່​ສາມາດ​ຢຸດ​ໄດ້​ໂດຍ​ວິທີ​​ເກົ່າ.

ທັງ​ນີ້, ມັລ​ແວຣ໌​ເອີ້ນ​ຄ່າ​ໄຖ່ WannaCry ​ໃຊ້​ເຄື່ອງມື​ໂຈມ​ຕີ​ຊ່ອງ​ຫວ່າງ​ຂອງ​ລະບົບ​ປະຕິບັດ​ການ​ວິນ​ໂດ​ສ໌ທີ່​ກຸ່ມ​ແຮກ​ເກີ​ລັກ​ມາ​ຈາກ​ສຳນັກງານ​ຄວາມ​ໝັ້ນຄົງ​ແຫ່ງ​ຊາດ​ອາ​ເມ​ລິ​ກາ (NSA) ​ໂດຍ​ໄດ້​ແຜ່​ກະຈາຍ​ເຂົ້າ​ໂຈມ​ຕີ​ລະບົບ​ຄອມ​ພິວ​ເຕີ​ 75.000 ກໍລະນີ​ໃນ 99 ປະ​ເທດ​ທົ່ວ​ໂລກ ​ໂດຍ​ຈະ​ເຂົ້າລະຫັດ​ລ໊ອກຂໍ້​ມູນ​ໃນ​ເຄື່ອງ​ບໍ່​ໃຫ້​ຜູ້​ໃຊ້​ເຂົ້າ​ເຖິງ​ໄດ້ ​ແລະ ຮຽກຮ້ອງ​ໃຫ້​ຈ່າຍ​ເງິນ​ຄ່າ​ໄຖ່​ເພື່ອ​ປົດ​ລ໊ອກ.

ອົງການ​ຕຳຫລວດ​ເອີຣົບລະບຸ​ວ່າ: ການ​ໂຈມ​ຕີ​ທາງ​ໄຊ​ເບີ​ເທື່ອ​ນີ້​ມີ​ຄວາມ​ຮຸນ​ແຮງ​ໃນ​ລະດັບ​ທີ່​ບ​ໍ່​ເຄີຍມີ​ມາ​ກ່ອນ ​ແລະ ຈະ​ຕ້ອງ​ມີ​ການ​ສືບສວນ-ສອບ​ສວນ​ຢ່າງ​ສັບ​ຊ້ອນ ພາຍ​ໃຕ້​ການ​ຮ່ວມ​ມື​ຂອງ​ເຈົ້າໜ້າ​ທີ່​ນາໆ​ຊາດ ​ເພື່ອ​ຫາຄົນ​ຮ້າຍ​ມາ​ລົງ​ໂທດ​ ​ໂດຍ​ທີ​ມ EC3 ​ເຊິ່ງຮັບຜິດຊອບ​ດ້ານ​ອາດຊະຍາ​ກຳ​ໄຊ​ເບີ​ຂອງ​ອົງການ​ດັ່ງກ່າວ​ໄດ້​ລົງມື​ເຮັດ​ວຽກ​ຮ່ວມ​ກັບ​ທາງ​ການ​ຂອງ​ປະ​ເທດ​ທີ່​ໄດ້​ຮັບ​ຜົນ​ກະທົບ​ໃນ​ເທື່ອ​ນີ້​ແລ້ວ.

error: Content is protected !!