ເລື່ອງເສັ້ນທາງ ຍັງບໍ່ຈາງຈາກຄວາມຄິດ

ເລື່ອງເສັ້ນທາງ ຍັງບໍ່ຈາງຈາກຄວາມຄິດ - Untitled design - ເລື່ອງເສັ້ນທາງ ຍັງບໍ່ຈາງຈາກຄວາມຄິດ

ໂດຍ : ມຶກບໍ່ແຫ້ງ

ໃນໄລຍະ 2-3 ເດືອນທີ່ຜ່ານມາ ທ່ານຜູ້ອ່ານໄດ້ຕິດຕາມ ຂ່າວ ແລະບົດກ່ຽວກັບເລື່ອງຖະນົນຫົນທາງ ຫຼາຍສົມຄວນ ແລະຜູ້ຂຽນກໍຍັງຢາກຂໍແລກປ່ຽນນຳທ່ານຜູ້ອ່ານອີກເທື່ອໜຶ່ງກ່ຽວກັບເລື່ອງນີ້.

ພວກເຮົາປຽບເສັ້ນທາງ ຄືດັ່ງສາຍເລືອດ ທີ່ຫຼໍ່ລ້ຽງຮ່າງກາຍພວກເຮົາ, ຖ້າການລຳລຽງເລືອດດີ ສຸຂະພາບຂອງພວກເຮົາກໍຈະດີ ດັ່ງດຽວກັບເສັ້ນທາງ ທີ່ມີບົດບາດໃນການປະກອບສ່ວນ ຕໍ່ການພັດທະນາເສດຖະກິດ-ສັງຄົມຢ່າງໃຫຍ່ຫຼວງ, ເພາະສະນັ້ນ ຖ້າເສັ້ນທາງດີ, ການໄປມາສະດວກ, ການຂົນສົ່ງສິນຄ້າ ການພັດທະນາດ້ານຕ່າງໆ ກໍຫາກເດີນແມ່ນແລ່ນສະດວກດີແທ້ ໂດຍບໍ່ຕ້ອງສົງໄສ.

ອີງຕາມ ດັດສະນີ ຄຸນນະພາບຂອງເສັ້ນທາງຂອງໂລກ, ສປປລາວຈັດຢູ່ ລຳດັບທີ 83 ຂອງທັງໝົດ 140 ປະເທດທີ່ໄດ້ຮັບການສຳຫຼວດ (ຂໍ້ມູນຈາກ ເວທີເສດຖະກິດໂລກ 2015, ເວບໄຊ໌: https://www.theglobaleconomy.com/rankings/roads_quality/) ແລະເມື່ອເບິ່ງ ດັດສະນີ ເລື່ອງໂລຈິດສະຕິກ (logistic) ທີ່ລະບົບເສັ້ນທາງມີສ່ວນສຳຄັນ ກໍເຫັນວ່າ ສປປລາວ ຈັດຢູ່ລຳດັບທີ 82​ ຂອງທັງໝົດ 160 ປະເທດທີ່ໄດ້ຮັບການສຳຫຼວດ (ຂໍ້ມູນທະນາຄານໂລກ, 2012-2018, ເວບໄຊ໌: https://lpi.worldbank.org/), ຕາມຂໍ້ມູນຂ້າງເທິງນັ້ນ ຄວາມຈິງແລ້ວ ສປປລາວເຮົາກໍບໍ່ເຖິງຂັ້ນຂີ້ຮ້າຍພິລຶກ ແຕ່ກໍແນ່ນອນຍັງຮຽກຮ້ອງການປັບປຸງ ແລະລົງທຶນໃສ່ເສັ້ນທາງຢ່າງຫຼວງຫຼາຍ.

ເມື່ອລະດູຝົນທີ່ຜ່ານມາ ເຮັດໃຫ້ເສັ້ນທາງຫຼາຍສາຍຂອງປະເທດທີ່ຕັດຂາດຈົນທຽວບໍ່ໄດ້, ພ້ອມນັ້ນກໍມີຫຼາຍສາຍ ທີ່ສຳຄັນເປ່ເພຂ້ອນຂ້າງໜັກ ໂດຍສະເພາະ ເສັ້ນທາງຫຼວງແຫ່ງຊາດເລກທີ 13 ທັງເໜືອ ແລະໃຕ້.

ເມື່ອອາທິດກ່ອນ ແລະ ຫຼັງ ຜູ້ຂຽນໄດ້ເດີນທາງທັງຂຶ້ນເໜືອ ແລະລົງໃຕ້, ສັງເກດເຫັນວ່າ ດັ່ງກ່າວແຕ່ເໜືອ ຮອດໃຕ້ ແມ່ນເປ່ເພຫຼາຍສົມຄວນ ເປັນຂຸມ, ເປັນບວກ ຫຼາຍບ່ອນ ແກ່ຍາວມາຫຼາຍເດືອນ.

ເລື່ອງເສັ້ນທາງ ຍັງບໍ່ຈາງຈາກຄວາມຄິດ - Wave100S AD to Website 2020 0 - ເລື່ອງເສັ້ນທາງ ຍັງບໍ່ຈາງຈາກຄວາມຄິດ

ເພາະສະນັ້ນ, ການເດີນທາງແມ່ນມີຄວາມຫຍຸ້ງຍາກຫຼາຍ ໂດຍາສະເພາະບັນດາລົດຕໍ່າໆ ຖ້າຂີ່ເພີນໆ ອາດຕົກໃຈທັນໃດ ເມື່ອລົດຕົກຂຸມອັນບໍ່ຄາດຄິດ ທີ່ຢັ່ງຢາຍຕະຫຼອດເສັ້ນທາງ, ເຮັດໃຫ້ເກີດມີຄວາມສ່ຽງ ຕໍ່ການເກີດອຸບັດຕິເຫດ, ລົດເປ່ເພ່ ເສຍຫາຍ ແລະການເດີນທາງມີຄວາມລ້າຊ້າກວ່າປົກກະຕິ. ຍົກຕົວຢ່າງ ແຕ່ນະຄອນຫຼວງວຽງຈັນ ຫາ ໂພນໂຮງ ໃນໄລຍະທາງ 80 ຫຼັກ ເຊິ່ງອາດໃຊ້ເວລາປະມານ 1 ຊົ່ວໂມງກວ່າໆ ແຕ່ອາດຮອດ 2 ຊົ່ວໂມງເຄິ່ງ, ແລະແຕ່ນະຄອນຫຼວງວຽງຈັນ ຫາ ປາກຊັນ ທີ່ໄລຍະທາງປະມານ 145​ ຫຼັກ ແທນທີ່ຈະໃຊ້ເວລາປະມານ 2 ຊົ່ວໂມງປາຍ   ແຕ່ອາດຈະເປັນ 3 ຊົ່ວໂມງກໍເປັນໄດ້ ໂດຍສະເພາະລົດຕໍ່ານັ້ນລະ.

ແຕ່ແນວໃດກໍຕາມ, ພາຍຫຼັງວິດລະດູຝົນແລ້ວ ເຊື່ອໝັ້ນວ່າ ພາກສ່ວນກ່ຽວຂ້ອງເພິ່ນກໍອາດກຳລັງກະກຽມ ໃນການສ້ອມແປງ ແລະຟື້ນຟູເສັ້ນທາງ ໂດຍສະເພາະ ເສັ້ນທາງເລກທີ 13 ທີ່ເປັນເສັ້ນທາງຫຼວງແຫ່ງຊາດ ເຊິ່ງມີການຄົມມະນາຄົມໄປມາຢ່າງບໍ່ຂາດສາຍແຕ່ເໜືອຮອດໃຕ້, ຖ້າປ່ອຍໃຫ້ເປັນຂຸມຢູ່ແບບນີ້ ລົດເມທີ່ເພິ່ນໃສ່ຊື່ວ່າ “ຕຽງນອນ” ນັ້ນ ຜູ້ໂດຍສານກໍອາດບໍ່ໄດ້ນອນ ທັງເດີນທາງກາງຄືນ ຜູ້ຂັບລົດກໍຄືຈະບໍ່ສາມາດແນມເຫັນຂຸມທີ່ເຊື່ອງຊ້ອນຕາມບ່ອນມືດໆຂອງເສັ້ນທາງນັ້ນໄດ້ໝົດດອກ.

ແລະອີກຢ່າງໜຶ່ງ ຖ້າເມື່ອກະເທີນລົງມືສ້ອມແປງແລ້ວ ກໍເຮັດໃຫ້ໄດ້ຄຸນນະພາບດີ ຈຶ່ງຫຼຸດຜ່ອນການເປັນບວກ ເປັນຂຸມ, ຍົກສູງ ການຄົມມະນາຄົມໃຫ້ມີປະສິດພາບ ແລະປອດໄພ ຫ່າງໄກຈາກຄວາມລະແວງເລື່ອງຂຸມອີກ!

ເລື່ອງເສັ້ນທາງ ຍັງບໍ່ຈາງຈາກຄວາມຄິດ - WhatsApp Image 2020 05 27 at 5 - ເລື່ອງເສັ້ນທາງ ຍັງບໍ່ຈາງຈາກຄວາມຄິດ
ເລື່ອງເສັ້ນທາງ ຍັງບໍ່ຈາງຈາກຄວາມຄິດ - WhatsApp Image 2020 05 27 at 5 - ເລື່ອງເສັ້ນທາງ ຍັງບໍ່ຈາງຈາກຄວາມຄິດ
error: Alert: ເນື້ອຫາຂ່າວມີລິຂະສິດ !!