ລະດົມຄວາມຄິດໃສ່ຮ່າງກົດໝາຍວ່າດ້ວຍການປ້ອງກັນ ແລະ ຄວບຄຸມໄພພິບັດ

- ladom - ລະດົມຄວາມຄິດໃສ່ຮ່າງກົດໝາຍວ່າດ້ວຍການປ້ອງກັນ ແລະ ຄວບຄຸມໄພພິບັດ
- AGL banner - ລະດົມຄວາມຄິດໃສ່ຮ່າງກົດໝາຍວ່າດ້ວຍການປ້ອງກັນ ແລະ ຄວບຄຸມໄພພິບັດ

ກອງປະຊຸມລະດົມຄວາມຄິດເຫັນໃສ່ຮ່າງກົດໝາຍວ່າດ້ວຍການປ້ອງກັນ ແລະ ຄວບຄຸມໄພພິບັດ, ໄດ້ຈັດຂຶ້ນໃນວັນທີ 9 ພະຈິກນີ້, ທີ່ແຂວງອຸດົມໄຊ, ໂດຍການເປັນປະທານຂອງທ່ານນາງ ໃບຄໍາ ຂັດຕິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຜູ້ຊີ້​ນຳຄະ​ນະ​ກຳ​ມະ​ການ​ສ້າງ​ກົດ​ໝາຍດັ່ງກ່າວ, ພ້ອມໄດ້ມີຄໍາເຫັນວ່າ: ປັດຈຸບັນ, ຄວາມຮ້າຍແຮງຂອງໄພທໍາມະຊາດ, ຊຶ່ງຈາກນໍ້າມືຂອງມະນຸດແມ່ນສືບຕໍ່ເພີ່ມຂື້ນ ແລະ ຖີ່ຂຶ້ນ ແລະ ເນື່ອງຈາກການປ່ຽນແປງຂອງສະພາບດິນຟ້າອາກາດ, ການເພີ່ມຂື້ນຂອງປະຊາກອນ, ການຊຸດໂຊມຂອງສະພາບແວດລ້ອມ ແລະ ບັນຫາໂລກຮ້ອນ, ໄດ້ເຮັດໃຫ້ບັນດາປະເທດໃນໂລກຕ້ອງຜະເຊີນກັບໄພພິບັດທໍາມະຊາດຕ່າງໆ ເປັນຕົ້ນ: ນໍ້າຖ້ວມ, ແຜ່ນດິນໄຫວ, ພູເຂົາໄຟລະເບີດ, ລົມພະຍຸ ແລະ ອື່ນໆ, ສົ່ງຜົນກະທົບຕໍ່ຊີວິດ ແລະ ຊັບສິນຂອງປະຊາຊົນ, ທັງເປັນການທ່ວງດຶງການພັດທະນາປະເທດ ແລະ ເຮັດໃຫ້ປະຊາຊົນມີຄວາມທຸກຍາກເພີ່ມຂື້ນ.

ສໍາລັບ, ສປປ ລາວເຮົາ ໃນຜ່ານມາໄດ້ມີໄພພິບັດເກີດຂື້ນຢ່າງລຽນຕິດ ເປັນຕົ້ນ: ນໍ້າຖ້ວມ, ລົມພະຍຸ, ໄຟໄໝ້, ສັດຕູພືດທໍາລາຍ ແລະ ອື່ນໆ ແລະ ຮ້າຍແຮງກວ່າໝູ່  ແມ່ນໄພນໍ້າຖ້ວມຈາກພາຍຸໃຕ້ຝຸ່ນເກດສະໜາໃນຊຸມປີ 2008 ແລະ ພະຍຸໃຕ້ຝຸ່ນໄຮມາ-ນົກເຕັນປີ 2011 ແລະ ໃນປີ 2018 ນີ້ ກໍໄດ້ເກີດໄພນໍ້າຖ້ວມໃນຂອບເຂດທົ່ວປະເທດ, ມີລວມ 17 ແຂວງ ແລະ ນະຄອນຫລວງ, ມີ124 ເມືອງ, 2.382 ບ້ານ, 126.736 ຄອບຄົວໄດ້ຮັບຜົນກະທົບ, ມີຜູ້ເສຍຊີວິດ 69 ຄົນ ແລະ ສູນຫາຍ 30 ຄົນ (ສະເພາະຢູ່ເມືອງສະໜາມໄຊມີຜູ້ເສຍຊີວິດ 44 ຄົນ ແລະ ສູນຫາຍອີກ 27 ຄົນ) ແລະ ຍັງມີຜູ້ໄດ້ຮັບຜົນກະທົບອີກ 4 ພັນກວ່າຄົນໄດ້ຢູ່ບ່ອນພັກຊົ່ວຄາວ, ພ້ອມນີ້ຍັງສ້າງຄວາມເສຍຫາຍຕໍ່ລະບົບພື້ນຖານໂຄງລ່າງ, ພື້ນຖານການຜະລິດ, ດ້ານເສດຖະກິດ-ສັງຄົມ ແລະ ສິ່ງແວດລ້ອມເປັນຈໍານວນຫລາຍ.

ຕໍ່ຜົນກະທົບ ແລະ ຄວາມເສຍຫາຍດັ່ງກ່າວ, ລັດຖະບານ ກໍຄືຄະນະກໍາມະການປ້ອງກັນ ແລະ ຄວບຄຸມໄພພິບັດແຕ່ລະຂັ້ນໄດ້ສົມທົບກັບບັນດາຂະແໜງການກ່ຽວຂ້ອງ ເພື່ອນໍາໃຊ້ທ່າແຮງທີ່ມີ, ການຊ່ວຍເຫລືອຂອງບຸກຄົນ, ນິຕິບຸກຄົນ, ອົງການຈັດຕັ້ງທາງສັງຄົມ ແລະ ສາກົນ ປະຕິບັດໃຫ້ການຊ່ວຍເຫລືອທັງໄລຍະສຸກເສີນ ແລະ ການຟຶ້ນຟູຫລັງໄພພິບັດ, ໂດຍເລັ່ງໃສ່ມາດຕະການກຽມພ້ອມຕອບໂຕ້ສຸກເສີນ, ການປ້ອງກັນ ແລະ ຫລຸດຜ່ອນຄວາມສ່ຽງໄພພິບັດ ໄປຄຽງຄູ່ກັບການຊ່ວຍເຫລືອບັນເທົາທຸກສຸກເສີນ ແລະ ການແກ້ໄຂຟື້ນຟູບູລະນະໃນໄລຍະຍາວ, ລັດຖະບານໄດ້ຖືເອົາວຽກງານຄຸ້ມຄອງຄວາມສ່ຽງໄພພິບັດເປັນບູລິມະສິດໃນການພັດທະນາປະເທດ ແລະ ໄດ້ເຊື່ອມສານວຽກງານຫລຸດຜ່ອນຄວາມສ່ຽງໄພພິບັດເຂົ້າໃນແຜນພັດທະນາເສດຖະກິດ-ສັງຄົມໃນແຕ່ລະໄລຍະ, ໂດຍສະເພາະໃນແຜນພັດທະນາເສດຖະກິດ-ສັງຄົມໄລຍະ 5 ປີຄັ້ງທີ 8 ແລະ ໜຶ່ງໃນນັ້ນແມ່ນການສ້າງກົດໝາຍວ່າດ້ວຍການປ້ອງກັນ ແລະ ຄວບຄຸມໄພພິບັດ ເພື່ອຮັບປະກັນໃຫ້ກົດໝາຍດັ່ງກ່າວ ສາມາດຊ່ວຍແກ້ບັນຫາ, ພ້ອມທັງເປັນບ່ອນອີງດ້ານນິຕິກໍາໃນການເຄື່ອນໄຫວວຽກງານປ້ອງກັນ ແລະ ຄວບຄຸມໄພພິບັດ, ເປັນການປັບປຸງກົນໄກປະສານວຽກງານທັງພາຍໃນ ແລະ ສາກົນໃຫ້ມີປະສິດທິຜົນ, ທັງປະກອບສ່ວນເຂົ້າໃນການສົ່ງເສີມການພັດທະນາເສດຖະກິດ-ສັງຄົມຕາມທິດສີຂຽວ, ຍືນຍົງ, ສາມາດຫລຸດຜ່ອນຄວາມທຸກຍາກ ແລະ ສ້າງຄວາມສາມາດໃນການຕອບໂຕ້ ແລະ ຮັບມືກັບໄພພິບັດໄດ້ຢ່າງມີປະສິດທິຜົນສູງ.

- Wave100S AD to Website 2020 0 - ລະດົມຄວາມຄິດໃສ່ຮ່າງກົດໝາຍວ່າດ້ວຍການປ້ອງກັນ ແລະ ຄວບຄຸມໄພພິບັດ
- lattana 1 - ລະດົມຄວາມຄິດໃສ່ຮ່າງກົດໝາຍວ່າດ້ວຍການປ້ອງກັນ ແລະ ຄວບຄຸມໄພພິບັດ
error: Alert: Content is protected !!