ຄະນະຜູ້ແທນຂັ້ນສູງຂອງ ສ ກູບາ ຢ້ຽມຢາມ ສປປ ລາວ

- Laos Cuba - ຄະນະຜູ້ແທນຂັ້ນສູງຂອງ ສ ກູບາ ຢ້ຽມຢາມ ສປປ ລາວ
- AGL banner - ຄະນະຜູ້ແທນຂັ້ນສູງຂອງ ສ ກູບາ ຢ້ຽມຢາມ ສປປ ລາວ

ຕອບສະໜອງຕາມການເຊື່ອເຊີນຂອງ ສະຫາຍ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ສະຫາຍ ມີເກັນ ດີເອັສ-ກາແນນ ແບຣມູເດັສ ປະທານສະພາແຫ່ງລັດ ແລະ ປະທານສະພາລັດຖະມົນຕີ ແຫ່ງ ສາທາລະນະລັດ ກູບາ ໄດ້ມາຢ້ຽມຢາມ ລັດຖະກິດ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ ແຕ່ວັນທີ 10-11 ພະຈິກນີ້ ເຊິ່ງໃນຕອນເຊົ້າຂອງວັນທີ 11 ສະຫາຍ ມີເກັນ ດີເອັດສ-ກາແນນ ແບຣມູເດັດສ ພ້ອມດ້ວຍພັນລະຍາ ແລະ ຄະນະໄດ້ຮັບການຮັບຕ້ອນຢ່າງອົບອຸ່ນ, ສະໜິດສະໜົມ ແລະ ສົມກຽດຈາກ ສະຫາຍ ບຸນຍັງ ວໍລະຈິດປະທານປະເທດ ແຫ່ງ ສປປ ລາວ ທີ່ທໍານຽບປະທານປະເທດ ແລະ ໄດ້ພົບປະຢ່າງເປັນທາງການກັບລະຫວ່າງສອງຝ່າຍ ຊຶ່ງສອງຝ່າຍລາວນຳໂດຍ ສະຫາຍ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ; ສະຫາຍ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ນາງ ປານີ ຢາທໍ່ຕູ້ ປະທານສະພາແຫ່ງຊາດເຂົ້າຮ່ວມນຳດ້ວຍ.

ໃນການພົບປະປຶກສາຫາລືສອງຝ່າຍກໍ່ໄດ້ແຈ້ງໃຫ້ກັນ ສະພາບການທີ່ພົ້ນເດັ່ນຂອງຕົນພ້ອມ ຕີລາຄາກ່ຽວກັບການຮ່ວມມືສອງຝ່າຍໃນໄລຍະຜ່ານມາ ແລະ ປຶກສາຫາລືທິດທາງການຮ່ວມມືໃນຕໍ່ໜ້າລະຫວ່າງ ສອງປະເທດ; ແລກປ່ຽນທັດສະນະຕ່າງໆກ່ຽວກັບບັນຫາພາກພື້ນ ແລະ ສາກົນ ທີ່ຕ່າງຝ່າຍຕ່າງມີຄວາມສົນໃຈ. ໃນໂອກາດດັ່ງກ່າວນັ້ນ, ບັນດາສະຫາຍການນໍາຂອງລາວ ໄດ້ຢືນຢັນຄືນເຖິງແນວທາງສະເໝີຕົ້ນສະເໝີປາຍຂອງພັກ ລັດຖະບານລາວ ໃນການສືບຕໍ່ເພີ່ມທະວີການພົວພັນ, ຮ່ວມມືລະຫວ່າງສອງປະເທດໃນອນາຄົດ ເພື່ອເຮັດໃຫ້ສາຍພົວພັນມິດຕະພາບທີ່ເປັນມູນເຊື້ອອັນດີງາມ ລະຫວ່າງ ສອງປະເທດໄດ້ສືບຕໍ່ຮັບການເສີມຂະຫຍາຍ ແລະ ຈະເລີນງອກງາມຂຶ້ນເລື້ອຍໆ. ພ້ອມກັນນັ້ນ ກໍໄດ້ສະແດງຄວາມຂອບໃຈຢ່າງສູງຕໍ່ພັກ, ລັດຖະບານ ແລະ ປະຊາຊົນກູບາ ອ້າຍນ້ອງທີ່ໄດ້ໃຫ້ການສະໜັບສະໜູນ ແລະ  ຊ່ວຍເຫລືອອັນລໍ້າຄ່າແກ່ພາລະກິດຕໍ່ສູ້ກູ້ຊາດຂອງປະຊາຊົນລາວໃນເມື່ອກ່ອນ ກໍ່ຄືພາລະກິດປົກປັກຮັກສາ ແລະ ພັດທະນາປະເທດຊາດໃນປະຈຸບັນ.

ສະຫາຍ ມີເກັນ ດີເອັດສ-ກາແນນ ແບຣມູເດັດສ ໄດ້ສະແດງຄວາມພາກພູມໃຈ ທີ່ໄດ້ມີໂອກາດມາຢ້ຽມຢາມລາວອີກເທື່ອໜຶ່ງ ແລະ ສະແດງຄວາມຊົມເຊີຍຕໍ່ຜົນສໍາເລັດ ແລະ ຄວາມກ້າວໜ້າຂອງປະຊາຊົນລາວ ອ້າຍນ້ອງ ໃນພາລະກິດປົກປັກຮັກສາ ແລະ ສ້າງສາປະເທດຊາດໃຫ້ຈະເລີນຮຸ່ງເຮືອງຢ່າງບໍ່ຢຸດຢັ້ງ. ໃນຂະນະດຽວກັນນັ້ນ, ສະຫາຍ ຍັງໄດ້ຢືນຢັນຄືນແນວທາງນະໂຍບາຍຂອງພັກ ແລະ ລັດ ກູບາ ທີ່ຈະສືບຕໍ່ຮັດແໜ້ນ ແລະ ເສີມຂະຫຍາຍການພົວພັນ ແລະ ຮ່ວມມືອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ກູບາ-ລາວ ໃນສະເພາະໜ້າ ແລະ ຍາວນານ ກໍ່ຄືຄວາມມຸ່ງໝັ້ນທີ່ຈະສືບຕໍ່ໃຫ້ການຮ່ວມມື ແລະ ຊ່ວຍເຫລືອ ສປປ ລາວ ໃນດ້ານການກໍ່ສ້າງຊັບພະຍາກອນມະນຸດ, ກິລາ ແລະ ສາທາລະນະສຸກ. ໃນໂອກາດດຽວກັນນີ້, ສະຫາຍ ປະທານສະພາແຫ່ງລັດ ແລະ ປະທານສະພາລັດຖະມົນຕີ ກໍ່ໄດ້ເຊື່ອເຊີນ ສະຫາຍ ບຸນຍັງ ວໍລະຈິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄປຢ້ຽມຢາມ ສາທາລະນະລັດ ກູບາ ຢ່າງເປັນທາງການໃນເວລາອັນສະດວກໃນຕໍ່ໜ້າ.

ການຢ້ຽມຢາມຂອງ ສະຫາຍ ມີເກັນ ດີເອັດສ-ກາແນນ ແບຣມູເດັດສ ຄັ້ງນີ້ ເປັນເຫດການສໍາຄັນທາງດ້ານປະຫວັດສາດແຫ່ງການພົວພັນ ລະຫວ່າງ ສປປ ລາວ ແລະ ສ ກູບາ ເຊິ່ງໄດ້ເປັນການປະກອບສ່ວນສໍາຄັນໃນການຮັດແໜ້ນສາຍພົວພັນມິດຕະພາບ, ຄວາມສາມັກຄີຖານອ້າຍນ້ອງ ແລະ  ການຮ່ວມມືຮອບດ້ານ ລະຫວ່າງ ສອງປະເທດ ກໍ່ຄືປະຊາຊົນສອງຊາດ ລາວ-ກູບາ ທີ່ມີມາດົນນານນັ້ນ ໃຫ້ນັບມື້ນັບໄດ້ຮັບການເພີ່ມພູນຄູນສ້າງ ແລະ ພັດທະນາໄປສູ່ບາດກ້າວໃໝ່ເພື່ອຜົນປະໂຫຍດລວມຂອງທັງສອງປະເທດ. ຜົນສໍາເລັດອັນສໍາຄັນອີກອັນໜຶ່ງຂອງການຢ້ຽມຢາມດັ່ງກ່າວແມ່ນທັງສອງຝ່າຍ ລາວ-ກູບາ ໄດ້ເຊັນສັນຍາການຮ່ວມມື ລະຫວ່າງກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ສະຖາບັນກິລາພລະສຶກສາ ແລະ ສີລະປະແຫ່ງຊາດ ສ ກູບາ ແລະ ສັນຍາການຮ່ວມມື ລະຫວ່າງ ທະນາຄານ ແຫ່ງ ສປປ ລາວ ແລະ ທະນາຄານ ແຫ່ງ ສ ກູບາ.

- Wave100S AD to Website 2020 0 - ຄະນະຜູ້ແທນຂັ້ນສູງຂອງ ສ ກູບາ ຢ້ຽມຢາມ ສປປ ລາວ

ນອກຈາກນັ້ນ, ສະຫາຍ ປະທານສະພາແຫ່ງລັດ ແລະ ປະທານສະພາລັດຖະມົນຕີ ຍັງໄດ້ໄປວາງພວງມາລາຢູ່ອນຸສາວະລີນັກຮົບວິລະນາມ, ທ່ຽວຊົມສະຖານທີ່ປະຫວັດສາດ ແລະ ວັດທະນະທໍາບາງແຫ່ງຢູ່ພາຍໃນນະຄອນຫວງວຽງຈັນອີກດ້ວຍ ແລະ .

ຕອນທ່ຽງຄືນຂອງວັນທີ 11 ພະຈິກນີ້, ສະຫາຍ ມີເກັນ ດີເອັດສ-ກາແນນ ແບຣມູເດັດສ ພ້ອມດ້ວຍພັນລະຍາ ແລະ ຄະນະກໍ່ໄດ້ເດີນທາງກັບຄືນປະເທດດ້ວຍຄວາມຜາສຸກ.

- lattana 1 - ຄະນະຜູ້ແທນຂັ້ນສູງຂອງ ສ ກູບາ ຢ້ຽມຢາມ ສປປ ລາວ
error: Alert: Content is protected !!