ເຜີຍແຜ່ວຽກງານຕ້ານການຄ້າມະນຸດໃຫ້ເຈົ້າໜ້າທີ່ 6 ແຂວງພາກເໜືອ

- jooo - ເຜີຍແຜ່ວຽກງານຕ້ານການຄ້າມະນຸດໃຫ້ເຈົ້າໜ້າທີ່ 6 ແຂວງພາກເໜືອ
- AGL banner - ເຜີຍແຜ່ວຽກງານຕ້ານການຄ້າມະນຸດໃຫ້ເຈົ້າໜ້າທີ່ 6 ແຂວງພາກເໜືອ

ກອງປະຊຸມເຜີຍແຜ່ຄໍາສັ່ງແນະນໍາຂອງຄະນະກໍາມະການຕ້ານການຄ້າມະນຸດລະດັບຊາດ ເພື່ອເພີ່ມທະວີໂຄສະນາການເຄື່ອນຍ້າຍທີ່ປອດໄພ, ການປົກປ້ອງສິດ ແລະ ຜົນປະໂຫຍດຂອງຜູ້ຖືກເຄາະຮ້າຍຈາກການຄ້າມະນຸດໃຫ້ພະນັກງານ ແລະ ເຈົ້າໜ້າທີ່ກ່ຽວຂ້ອງ 6 ແຂວງພາກເໜືອ, ໄດ້ຈັດຂຶ້ນເມື່ອທ້າຍອາທິດຜ່ານມານີ້ທີ່ແຂວງຫລວງນໍ້າທາ, ໂດຍການເປັນປະທານຂອງທ່ານຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ພ້ອມດ້ວຍຜູ້ຕາງໜ້າອົງການສາກົນກ່ຽວຂ້ອງຕ່າງໆເຂົ້າຮ່ວມນໍາດ້ວຍ.

ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ມີຄໍາ ເຫັນວ່າ: ປັດຈຸບັນ, ໃນທົ່ວພາກພື້ນ ແລະ ສາກົນຍັງສືບຕໍ່ຜະເຊີນກັບບັນຫາຕ່າງໆ ເປັນຕົ້ນ: ບັນຫາດ້ານການເມືອງ ແລະ ຄວາມໝັ້ນຄົງ, ບັນຫາເສດຖະກິດ, ພະຍາດລະບາດ, ໄພວ່າງງານ, ຄວາມອຶດຫີວ, ການເຄື່ອນຍ້າຍແຮງງານ ແລະ ຖິ່ນຖານຂອງພົນລະເມືອງ ແລະ ອື່ນໆ ໄດ້ພາໃຫ້ເກີດມີອາຊະຍາກໍາຕ່າງໆຫລາຍຮູບແບບທີ່ເປັນອັນຕະລາຍຕໍ່ຊີວິດຂອງມວນມະນຸດ, ໃນນັ້ນ ບັນຫາການຄ້າມະນຸດແມ່ນອາຊະຍາກໍາໜຶ່ງທີ່ເກີດຂື້ນໃນສັງຄົມ ແລະ ແຜ່ລາມຂ້າມຊາດ. ບັນຫາດັ່ງກ່າວເປັນການລະເມີດສິດທິພື້ນຖານຂອງມະນຸດທີ່ກໍານົດໄວ້ໃນລັດຖະທໍາມະນູນ ແລະ ລະບຽບກົດໝາຍຂອງ ສປປ ລາວ ກໍຄືສົນທິສັນຍາສາກົນຕ່າງໆ, ທັງກະທົບຕໍ່ການພັດທະນາເສດຖະກິດ-ສັງຄົມ ແລະ ຄວາມໝັ້ນຄົງຂອງຊາດ.

ທ່ານຮອງລັດຖະມົນຕີດັ່ງກ່າວ ໃຫ້ຮູ້ວ່າ: ໃນໄລຍະ 2-3 ປີມານີ້, ການຄ້າມະນຸດໃນຮູບແບບແຕ່ງດອງ ຫລື ການເຄື່ອນຍ້າຍຮູບແບບການແຕ່ງດອງໄດ້ມີລັກສະນະພົ້ນເດັ່ນ ເກືອບວ່າເກີດຂຶ້ນຢູ່ທຸກແຂວງໃນປະເທດເຮົາ ແລະ ຫລາຍກວ່າໝູ່ແມ່ນບັນດາແຂວງພາກເໜືອ ຍ້ອນມີຄົນຈີນໄດ້ເຂົ້າມາລາວຫລາຍຂຶ້ນ ແລະ ມີຈໍານວນໜຶ່ງໄດ້ສົມຮູ້ຮ່ວມຄິດກັບຄົນບໍ່ດີທີ່ເປັນຄົນທ້ອງຖິ່ນ ເພື່ອຕົວະຍົວະຫລອກລວງເອົາລູກຫລານປະຊາຊົນໃນທ້ອງຖິ່ນຕ່າງໆ ດ້ວຍການໃຫ້ຄ່າດອງທີ່ສູງ ສົມທົບກັບຄວາມຮູ້ເທົ້າບໍ່ເຖິງການຂອງຜູ້ປົກຄອງ, ຄວາມທຸກຍາກ ລວມໄປເຖິງການຂາດສະຕິລະວັງຕົວ, ການລະເຫລິງຂອງອໍານາດການປົກຄອງ ແລະ ເຈົ້າໜ້າທີ່ລະດັບຕ່າງໆໃນທ້ອງຖິ່ນ ເຮັດໃຫ້ການເອົາແມ່ຍິງລາວອອກໄປນອກປະເທດໄດ້ງ່າຍດາຍ ແລະ ກຸ່ມຄົນທີ່ຕົກເປັນເຫຍື່ອສ່ວນຫລາຍຖືກບັງຄັບໃຊ້ແຮງງານ, ບັງຄັບທາງເພດ ແລະ ບໍ່ສາມາດຂໍການຊ່ວຍເຫລືອຈາກເຈົ້າໜ້າທີ່ໄດ້,​ ເຊິ່ງຍັງມີຈໍານວນຫລາຍບໍ່ສາມາດກັບຄືນປະເທດ ແລະ ຖ້າກັບຄືນປະເທດໄດ້ກໍຕ້ອງໃຊ້ເວລາດົນ, ເສຍຄ່າໃຊ້ຈ່າຍສູງ ແລະ ສ້າງຄວາມຫຍຸ້ງຍາກໃຫ້ລັດຖະບານສອງປະເທດໃນການປະສານງານເພື່ອກອບກູ້ຊ່ວຍເຫລືອເອົາຜູ້ຖືກເຄາະຮ້າຍກັບຄືນປະເທດໄດ້ຢ່າງປອດໄພ, ສະນັ້ນ ຖ້າຫາກຂາດມາດຕະການຢ່າງຈິງຈັງ ບັນຫາດັ່ງກ່າວຍັງຈະມີທ່າອ່ຽງນັບມື້ເພີ່ມຂຶ້ນ ແລະ ໃນຜ່ານມາ, ເຖິງວ່າລັດຖະບານໄດ້ໃຊ້ຄວາມພະຍາຍາມສູງໃນການຕ້ານ ແລະ ສະກັດກັ້ນບັນຫາດັ່ງກ່າວ, ແຕ່ກໍເຫັນວ່າຍັງບໍ່ເປັນທີ່ພໍໃຈຂອງອົງການສາກົນ, ໂດຍສະເພາະສະຫະລັດອາເມລິການໄດ້ຈັດຖານະຄວາມພະຍາຍາມຂອງ ສປປ ລາວ ຕໍ່ວຽກງານຕ້ານການຄ້າມະນຸດຈາກລະດັບ 2,5 ຂຶ້ນມາເປັນ 3 ຖືເປັນລະດັບທີ່ບໍ່ດີ ແລະ ພ້ອມທັງມີຂໍ້ແນະນໍາໃຫ້ລາວເຮົາເພີ່ມຄວາມພະຍາຍາມໃນການແກ້ໄຂບັນຫາດັ່ງກ່າວຢ່າງຈິງຈັງ.

- Wave100S AD to Website 2020 0 - ເຜີຍແຜ່ວຽກງານຕ້ານການຄ້າມະນຸດໃຫ້ເຈົ້າໜ້າທີ່ 6 ແຂວງພາກເໜືອ

 

- lattana 1 - ເຜີຍແຜ່ວຽກງານຕ້ານການຄ້າມະນຸດໃຫ້ເຈົ້າໜ້າທີ່ 6 ແຂວງພາກເໜືອ
error: Alert: Content is protected !!