ປີທ່ອງທ່ຽວ ຂຸ້ນຂ້ຽວປັບປຸງຫ້ອງນໍ້າ 

- AGL banner - ປີທ່ອງທ່ຽວ ຂຸ້ນຂ້ຽວປັບປຸງຫ້ອງນໍ້າ 

ໂດຍ​ : ມຶກບໍ່ແຫ້ງ

ການບໍລິການທີ່ສຳຄັນໜຶ່ງຂອງສະຖານທີ່ທ່ອງທ່ຽວກໍແມ່ນຫ້ອງນໍ້ານັ້ນລະ ແຕ່ຍັງມີຫຼາຍສະຖານທີ່ ຊຶ່ງພວກເຮົາຍັງ ເຮັດບໍ່ໄດ້ດີ ທີ່ຮຽກຮ້ອງການປັບປຸງໂດຍດ່ວນ!

ພວກເຮົາອາດສັງເກດໄດ້ດີວ່າ ສະຖານທີ່ສາທາລະນະສ່ວນຫຼາຍຂອງພວກເຮົາຍັງບໍ່ມີຫ້ອງນໍ້າ ສາທາລະນະ ຫຼື ບ່ອນມີແຕ່ຍັງປະຮ້າງ, ຫຼືບໍ່ເປີດໃຫ້ຊົມໃຊ້ຢູ່.

ສະຖານທີ່ທ່ອງທ່ຽວ, ສວນສາທາລະນະ ເປັນບ່ອນພັກຜ່ອນ ຫຼືແມ່ນແຕ່ ແລ່ນອອກກຳລັງກາຍແກ່ ຜູ້ຄົນທັງພາຍໃນ ແລະຕ່າງປະເທດນັ້ນ ຍັງມີຫຼາຍສະຖານທີ່ ທີ່ພວກເຮົາຍັງບໍ່ມີຫ້ອງນໍ້າສາທາລະນະ ຊົມໃຊ້ຢ່າງພຽງພໍ.

ເວົ້າເລື່ອງສະຖານທີ່ທ່ອງທ່ຽວແລ້ວໃນນະຄອນຫຼວງວຽງຈັນ ເຫັນວ່າ ວັດຊຽງຄວນແມ່ນເພິ່ນເຮັດໄດ້ດີສົມຄວນເພາະເພິ່ນສ້າງຫ້ອງນໍ້າ ທີ່ກວ້າງຂວາງ, ສະອາດ ທ່າມກາງຕົ້ນໄມ້ຮົ່ມເຢັນນັ້ນ ຈັ່ງແມ່ນດີໃຈນຳ ເມື່ອເຫັນນັກທ່ອງທ່ຽວຫຼາຍຄົນທີ່ກຳລັງເລາະທ່ຽວຢ່າງເພິດເພີນ ແລະສາມາດປົດທຸກໄດ້ໂດຍບໍ່ຕ້ອງເສຍເງິນ ພຽບພ້ອມກັບຄວາມສະດວກດີຂອງຫ້ອງນໍ້ານັ້ນ.

ແຕ່ມາເບິ່ງສະຖານທີທ່ອງທ່ຽວ ພຣະທາດຫຼວງ, ໃນໄລຍະນີ້ ຍິ່ງແມ່ນເພິ່ນກຳລັງກະກຽມງານບຸນ ແລະກໍເປັນຍາມ ທີ່ນັກທ່ອງທ່ຽວມາທ່ຽວ ທັງພາຍໃນ ແລະຕ່າງປະເທດ ມາທ່ຽວຊົມ ຢ່າງຫຼວງຫຼາຍ, ແຕ່ເມື່ອຜູ້ຄົນຈຳນວນຫຼາຍເຫຼົ່ານັ້ນ ຕ້ອງການເຂົ້າຫ້ອງນໍ້າແລ້ວ ເພິ່ນຈະມີປ້າຍບອກດ້ານຂ້າງ ຊ້າຍມືຖ້າຫາກເຂົ້າທາງດ້ານໜ້າຂອງພຣະທາດຫຼວງ, ເມື່ອຍ່າງຕາມປ້າຍ ທັນໃດນັ້ນ ຈະເຫັນສອງປ້າຍ, ປ້າຍໜຶ່ງບອກວ່າ “ຫ້ອງນໍ້າສາທາລະນະ” ແລະ ອີກປ້າຍໜຶ່ງບອກວ່າ “ຫ້ອງນໍ້າ” ໂດຍຊີ້ເຂົ້າໄປຫາ ສິມວັດພຣະທາດຫຼວງເໜືອ.

ຜູ້ຂຽນທີ່ພາພວກໝູ່ຄົນຕ່າງປະເທດ ທີ່ມາທ່ຽວເມືອງລາວເທື່ອທຳອິດ ເລືອກໄປຫ້ອງນໍ້າສາທາລະນະ ແຕ່ຄິດເປັນຫ່ວງໃນໃຈຢູ່ວ່າ “ຈະສະອາດຄືຢູ່ວັດຊຽງຄວນຢູ່ບໍ່ນໍ” ແຕ່ພໍໄປຮອດ ກໍເຫັນເພິ່ນລ໋ອກກອນໄວ້ໝົດ ຫຼື ເພິ່ນໃຫ້ບໍລິການຍາມບຸນເທົ່ານັ້ນບໍ່? ບໍ່ພໍເທົ່າໃດ ມີຄົນຮ້ອງມາໃສ່ວ່າ “ຫ້ອງນໍ້າເພິ່ນໃຫ້ບໍລິການຢູ່ເທິງຫັ້ນ, ຂ້າງວັດນັ້ນເດ”.

- Wave100S AD to Website 2020 0 - ປີທ່ອງທ່ຽວ ຂຸ້ນຂ້ຽວປັບປຸງຫ້ອງນໍ້າ 

ຄິດໃນໃຈຢູ່ວ່າ ຊິບໍ່ບາບຍ້ອນບໍ່ ຄືຊິມີຄົນມາເຂົ້າຫ້ອງນໍ້າວັດຫຼາຍແທ້ ແຕ່ບໍ່ແມ່ນແນວນັ້ນດອກ ແມ່ນຫ້ອງນໍ້າທີ່ເພິ່ນເກັບເງິນ, ເຖິງປານນັ້ນ ຫ້ອງນໍ້າກໍບໍ່ແມ່ນວ່າຈະສະອາດພິລຶກເລີຍ ແລະ ຍັງຕົກສະເງີ້ຢູ່ບ່ອນ ຄຳຖາມໝູ່ວ່າ “ບໍ່ວ່າສະຖານທີທ່ອງທ່ຽວລະດັບຊາດແບບນີ້ ເຂົ້າຫ້ອງນໍ້າຍັງໄດ້ເສຍເງິນ? ແພງຫຼາຍບໍ່?” ເລີຍຟ້າວບອກເພິ່ນວ່າ “ບໍ່ແພງດອກ ເປັນເງິນຈຳນວນໜ້ອຍໆ ເພິ່ນອາດປະກອບສ່ວນອັນໃດອັນໜຶ່ງໃຫ້ວັດ”.

ແຕ່ຄິດລະອາຍຢູ່ໃນໃຈບໍ່ໜ້ອຍວ່າ ແທນທີຈະເອກອ້າງຫ້ອງນໍ້າສາທາລະນະເຮົາ ແຕ່ພັດຖືກຖາມແນວນີ້!​

ນອກຈາກສະຖານທີ່ທ່ອງທ່ຽວແລ້ວ, ສະຖານທີ່ບໍລິການສາທາລະນະ ເຊັ່ນ ຄິວລົດເມ ພວກເຮົາກໍຄວນມີ ຫ້ອງນໍ້າທີ່ສະອາດ ແລະບໍ່ໄດ້ເສຍເງິນ ແກ່ຜູ້ໂດຍສານ ເພາະນັກທ່ອງທ່ຽວກໍໃຊ້ການບໍລິການ ການໄປມາ ຜ່ານຄິວລົດພວກເຮົາຫຼາຍສົມຄວນ.

ການສົ່ງເສີມ ວຽກງານທ່ອງທ່ຽວອາດບໍ່ຫົວຊາແຕ່ເລື່ອງກະໂຕສະຖານທີ່ ທີ່ພວກເຮົາຢາກໃຫ້ເພິ່ນເຫັນ ແຕ່ຂໍໃຫ້ ພຽບພ້ອມກັບການບໍລິການປິ່ນອ້ອມ ໂດຍສະເພາະຫ້ອງນໍ້ານີ້ ຂໍໃຫ້ສະອາດ, ພຽງພໍ ແລະບໍລິການຟຣີ ເຊິ່ງອາດເປັນການສ້າງຄວາມປະທັບໃຈອີກອັນໜຶ່ງແລ້ວແລ.

- lattana 1 - ປີທ່ອງທ່ຽວ ຂຸ້ນຂ້ຽວປັບປຸງຫ້ອງນໍ້າ 
error: Alert: Content is protected !!