ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ໄຂຂຶ້ນຢ່າງເປັນທາງການໃນວັນທີ 20 ພະຈິກນີ້
ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ໄດ້ໄຂຂຶ້ນຢ່າງເປັນທາງການ ໃນວັນທີ 20 ພະຈິກນີ້, ທີ່ຫ້ອງປະຊຸມສະພາແຫ່ງຊາດ (ຫຼັກ 6) ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ ປະທານສະພາແຫ່ງຊາດ, ເປັນກຽດເຂົ້າຮ່ວມຂອງພະນະທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ, ມີຜູ້ນໍາ, ອາດີດການນໍາຂັ້ນສູງຂອງພັກ-ລັດ ແລະ ບັນດາສະມາຊິກສະພາແຫ່ງຊາດເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້, ໂດຍຈະໄດ້ສຸມໃສ່ພິຈາລະນາ, ຕົກລົງ ບັນຫາສໍາຄັນທີ່ເປັນພື້ນຖານຂອງປະເທດຊາດຄື: ຮັບຟັງບົດລາຍງານຂອງທ່ານ ນາຍົກລັດຖະມົນຕີ ກ່ຽວກັບການເຄື່ອນໄຫວວຽກງານພົ້ນເດັ່ນຂອງລັດຖະບານ ໃນໄລຍະຜ່ານມາ ແລະ ທິດທາງຈຸດສຸມໃນປີຕໍ່ໜ້າ; ພິຈາລະນາ, ຮັບຮອງເອົາບົດລາຍງານ ສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາປີ 2018 ແລະ ທິດທາງແຜນການ ປະຈໍາປີ 2019 ຂອງລັດຖະບານ; ພິຈາລະນາ, ຮັບຮອງເອົາການຊີ້ແຈງຂອງລັດຖະບານກ່ຽວກັບຄຸນນະພາບການກໍ່ສ້າງ ແລະ ການສ້ອມແປງຖະໜົນຫົນທາງ, ຄຸນນະພາບການບໍລິການ ການປິ່ນປົວຢູ່ໂຮງໝໍເມືອງ ແລະ ສຸກສາລາ, ການຊີ້ແຈງອະທິບາຍຂອງອົງການໄອຍາການຂອງປະຊາຊົນສູງສຸດ ກ່ຽວກັບການປະຕິບັດກົດໝາຍວ່າດ້ວຍຂໍ້ຜູກພັນໃນສັນຍາ ແລະ ນອກສັນຍາ ກ່ຽວກັບການຫັນການລະເມີດສັນຍາ ກູ້ຢືມມາດໍາເນີນເປັນຄະດີອາຍາ ແລະ ທິດທາງແກ້ໄຂໃນຕໍ່ໜ້າ. ນອກນັ້ນ, ໃນກອງປະຊຸມ, ຍັງຈະໄດ້ຮັບຟັງການຊີ້ແຈງອະທິບາຍເພີ່ມເຕີມຈາກທ່ານນາຍົກລັດຖະມົນຕີ, ບັນດາທ່ານລັດຖະມົນຕີ ຈາກກະຊວງ, ອົງການກ່ຽວຂ້ອງຈໍານວນໜຶ່ງທີ່ພົວພັນເຖິງບັນຫາທີ່ພົ້ນເດັ່ນ ໃນການຄຸ້ມຄອງບໍລິຫານ ທາງດ້ານເສດຖະກິດ-ສັງຄົມ, ເຊິ່ງສະມາຊິກສະພາແຫ່ງຊາດນໍາມາສະເໜີໃນກອງປະຊຸມຄັ້ງນີ້; ຮັບຟັງ ແລະ ພິຈາລະນາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດມະຕິຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ 8 ສະບັບເລກທີ 079/ສພຊ, ລົງວັນທີ 17 ພະຈິກ 2017 ວ່າດ້ວຍການພັດທະນາຊົນນະບົດ ແລະ ລຶບລ້າງຄວາມທຸກຍາກ ຕີດພັນກັບເປົ້າໝາຍການພັດທະນາແບບຍືນຍົງ. ພ້ອມທັງ, ຈະໄດ້ພິຈາລະນາ, ຮັບຮອງເອົາບົດລາຍງານຂອງອົງການກວດສອບແຫ່ງລັດ ກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2018 ແລະ ທິດທາງແຜນການປະຈໍາປີ 2019, ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2017; ພິຈາລະນາ, ຮັບຮອງເອົາບົດລາຍງານຂອງອົງການກວດກາລັດຖະບານກ່ຽວກັບ ການກວດກາ ຕາມຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານສົກປີ 2013-2014, 2014-2015 ແລະ 2015-2016; ພິຈາລະນາ, ຮັບຮອງເອົາບົດສະເໜີຂອງລັດຖະບານກ່ຽວກັບຊົນເຜົ່າບຣູ; ພິຈາລະນາ, ຮັບຮອງເອົາ ບົດລາຍງານຂອງອົງການໄອຍາການປະຊາຊົນສູງສຸດ ແລະ ສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດ ແຜນການເຄື່ອນໄຫວວຽກງານກາງສະໄໝ (2016-2018), ປະຈໍາປີ 2018, ທິດທາງແຜນການ ຮອດປີ 2020 ແລະ ວຽກງານຈຸດສຸມ ປະຈໍາປີ 2019; ພິຈາລະນາ, ຮັບຮອງເອົາບົດລາຍງານກ່ຽວກັບການເຄື່ອນໄຫວວຽກງານ ກາງສະໄໝຂອງສະພາແຫ່ງຊາດ ຊຸດທີ 8 (2016-2018) ປະຈໍາປີ 2018 ທິດທາງແຜນການຮອດກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ 9 ແລະ ແຜນວຽກຈຸດສຸມປະຈໍາປີ 2019; ພິຈາລະນາ, ຮັບຮອງເອົາແຜນການສ້າງ ແລະ ປັບປຸງກົດໝາຍ, ແຜນການຕິດຕາມກວດກາ ປະຈໍາປີ 2019 ຂອງສະພາແຫ່ງຊາດ; ພິຈາລະນາ ແລະ ຮັບຮອງການສ້າງ ແລະ ປັບປຸງຮ່າງກົດໝາຍ ຈໍານວນ 8 ສະບັບຄື: ໃນຂົງເຂດເສດຖະກິດ 4 ສະບັບ, ຂົງເຂດວັດທະນະທໍາ-ສັງຄົມ 2 ສະບັບ, ຂົງເຂດປົກຄອງ ແລະ ຍຸຕິທໍາ 1 ສະບັບ ແລະ ໃນຂົງເຂດຕ່າງປະເທດ 1 ສະບັບ.
ກອງປະຊຸມຍັງຈະໄດ້ປະກອບຄວາມເຫັນໃສ່ຮ່າງກົດໝາຍວ່າດ້ວຍ ທີ່ດິນ (ສະບັບປັບປຸງ), ເຊິ່ງເປັນຮ່າງກົດໝາຍທີ່ສໍາຄັນໃນການຈັດຕັ້ງຜັນຂະຫຍາຍມະຕິ ຂອງຄະນະນໍາບໍລິຫານງານສູນກາງພັກ ວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນອໃນໄລຍະໃໝ່ອສະບັບເລກທີ 026/ຄບສພ, ລົງວັນທີ 3/8/2017 ໃຫ້ເປັນອັນລະອຽດ ເພື່ອເພີ່ມທະວີການຄຸ້ມຄອງທີ່ດິນ ແລະ ສົ່ງເສີມການນໍາໃຊ້ທີ່ດິນ, ເຊິ່ງເປັນທ່າແຮງທາງດ້ານຊັບພະຍາກອນ ໃຫ້ມີປະສິດທິຜົນ ແກ່ການພັດທະນາເສດຖະກິດແຫ່ງຊາດ ກໍ່ຄື ການສົ່ງເສີມການຜະລິດ ແລະ ປັບປຸງຊີວິດການເປັນຢູ່ຂອງປະຊາຊົນລາວບັນດາເຜົ່າໃຫ້ນັບມື້ນັບດີຂຶ້ນ.
