ຢ່າໃຫ້ບັນຍາກາດການທ່ອງທ່ຽວປະເທດເຮົາທົດຖອຍ

- Untitled design - ຢ່າໃຫ້ບັນຍາກາດການທ່ອງທ່ຽວປະເທດເຮົາທົດຖອຍ

- Untitled 1 1 275x300 - ຢ່າໃຫ້ບັນຍາກາດການທ່ອງທ່ຽວປະເທດເຮົາທົດຖອຍ      ​ເພື່ອນ​ຜູ້​ອ່ານ​ທີ່​ຮັກ​ແພງ, ດັ່ງ​ພວກ​ເຮົາ​ຮັບ​ຮູ້​ນຳ​ກັນ​ແລ້ວ​ວ່າ: ການທ່ອງທ່ຽວ​ຢູ່​ປະ​ເທດ​ເຮົາ​ແມ່ນ​ມີ 3 ປະ​ເພດ​ຫລັກ ຄື​ການທ່ອງທ່ຽວ​ທຳ​ມະ​ຊາດ, ປະຫວັດສາດ ​ແລະ ວັດທະນະທຳ ​ແລະ ກໍ​ເປັນ​ທ່າ​ແຮງ​ຕົ້ນຕໍ​ໜຶ່ງ​ໃນ​ການ​ດຶງ​ດູດ ​ແລະ ນຳ​ລາຍ​ຮັບ​ເຂົ້າປະ​ເທດ, ​ແຕ່​ພວກ​ເຮົາ​ຈະ​ພັດທະນາ​ມັນ​ແນວ​ໃດ ​ເພື່ອ​ຄວາມ​ຍືນ​ຍົງ​ຂອງ​ມັນ ​ໂດຍ​ສະ​ເພາະ​ແມ່ນ​ແຫ​ລ່ງທ່ອງ​ທ່ຽວ​ທຳ​ມະ​ຊາດ ​ແລະ ວັດທະນະທຳ, ​ເບິ່ງ​ລວມ​ແລ້ວ​ໃນ​ຜ່ານ​ມາ​ນີ້ ​ແມ່ນ​ພວກ​ເຮົາ​ກໍ​ເຮັດ​ໄດ້​ດີ​ຫລາຍ ​ເມື່ອ​ທຽບ​ໃສ່ 10 ປີ​ກ່ອນ​ຄືນ​ຫລັງ ຄື​ປີ 2011 ມີ​ນັກ​ທ່ອງ​ທ່ຽວ​ເຂົ້າມາລາ​ວຫລາຍ​ກວ່າ 2,7 ລ້ານ​ຄົນ, ປີ 2014 ​ເພີ່ມ​ຂຶ້ນ​ເປັນ 4,1 ລ້ານ​ຄົນ ​ແລະ ປີ 2015 ​ເພີ່ມ​ຂຶ້ນ​ເປັນ 4,3 ລ້ານ​ກວ່າ​ຄົນ ​ແລະ ລາຍ​ຮັບ​ກໍ​ເພີ່ມ​ເປັນ​ລຳດັບ ຄື​ປີ 2011 ບັນລຸ​ໄດ້​ຫລາຍ​ກວ່າ 400 ລ້ານ​ໂດ​ລາ​ສະຫະລັດ, ປີ 2014 ​ເພີ່ມ​ເປັນ 560 ລ້ານ​ໂດ​ລາ ​ແລະ ປີ 2015 ກໍ​ບັນລຸ​ໄດ້​ເກືອບ 700 ລ້ານ​ໂດ​ລາ. ນີ້​ກໍ​ເນື່ອງ​ມາ​ຈາກ​ວຽກ​ງານ​ດັ່ງກ່າວ​ໄດ້​ຮັບ​ການ​ປັບປຸງ ​ແລະ ​ເສີມ​ຂະຫຍາຍ​ຢ່າງ​ກວ້າງຂວາງ, ການ​ພັດທະນາ​ພື້ນຖານ​ໂຄງ​ລ່າງ ​ແລະ ສິ່ງ​ອຳນວຍ​ຄວາມ​ສະດວກ​ຕ່າງໆ​ໄດ້​ຮັບ​ການ​ເອົາ​ໃຈ​ໃສ່​ຊຸກຍູ້​ປັບປຸງ​ໃຫ້​ໄດ້​ມາດຕະຖານ​ດີ​ຂຶ້ນ. ນີ້​ແມ່ນ​ຄວາມ​ພາກພູມ​ໃຈ ​ແລະ ​ເອກອ້າງ​ຂອງ​ປະ​ເທດ​ເຮົາ.

​ແຕ່​ຄຽງ​ຄູ່​ກັນນັ້ນ ກໍ​ຍັງ​ມີ​ຫລາຍ​ອັນ​ທີ່​ພວກ​ເຮົາ​ຈະ​ໄດ້​ເອົາ​ໃຈ​ໃສ່ ​ໂດຍ​ສະ​ເພາະ​ແມ່ນ​ຂອດ​ການ​ພັດທະນາ ​ແລະ ສ້າງ​ສິ່ງ​ອຳນວຍ​ຄວາມ​ສະດວກ​ດ້ານ​ການທ່ອງທ່ຽວ​ນັ້ນຍັງ​ບໍ່​ໄດ້​ມາດຕະຖານ ​ແລະ ສາມາດ​ຕອບ​ສະໜອງ​ຄວາມ​ຕ້ອງການ​ຂອງ​ຜູ້​ມາ​ທ່ຽວ​ໄດ້​ຢ່າງ​ທົ່ວ​ເຖິງ, ຂອດ​ບໍລິຫານ​ຄຸ້ມ​ຄອງ​ບໍ່​ທັນ​ເຂົ້າສູ່​ລະບຽບ​ກົດໝາຍ​ຢ່າງ​ເຂັ້ມງວດ ຍັງ​ມີ​ປາກົດການ​ຫຍໍ້​ທໍ້​ຕ່າງໆ​ເກີດ​ຂຶ້ນ​ ​ເປັນຕົ້ນການ​ບໍລິການ​ນຳ​ທ່ຽວ, ການບັນ​ເທີ​ງ, ອາຫານ​ເຄື່ອງ​ດື່ມ​ບໍ່​ໄດ້​ມາດຕະຖານ ​ແລະ ມີ​ລາຄາ​ສູງ​ກວ່າ​ສະພາບ​ຄວາມ​ເປັນ​ຈິງ ຫລື ຢູ່​ບາງ​ແຫ່ງ​ມີ​ການ​ສວຍ​ໂອກາດ​ຫາ​ຜົນ​ກຳ​ໄລ​ຈາກ​ນັກ​ທ່ອງ​ທ່ຽວ​ຫລາຍ​ເກີນ​ຂອບ​ເຂດ ​ແລະ ຈຸດ​ສຳຄັນ​ທີ່​ສຸດ​ຕໍ່​ການ​ພັດທະນາ ​ແລະ ສ້າງ​ສະຖານ​ທີ່​ທ່ອງ​ທ່ຽວ​ມີ​ຜົນ​ກະທົບ​ຕໍ່​ສະພາບ​ແວດ​ລ້ອມ ​ແລະ ວັດທະນະທຳ, ສັງຄົມ ​ແລະ ທຳ​ມະ​ຊາດ ​ເຊິ່ງ​ເປັນ​ຈຸດ​ທີ່​ພວກ​ເຮົາ​ຈະ​ຕ້ອງ​ໄດ້​ເອົາ​ໃຈ​ໃສ່, ຖ້າ​ຫາກ​ປະປ່ອຍ​ໄປ​ຫລາຍ​ກໍອາດ​ຈະ​ເຮັດ​ໃຫ້ການ​ທ່ອງ​ທ່ຽວ​ຂອງ​ປະ​ເທດ​ເຮົາ​ເບົາບາງ​ລົງ​ກໍ​ດັ່ງ​ສອງ​ປີ​ມາ​ນີ້ ​ໂດຍ​ລວມ​ແລ້ວ​​ແມ່ນ​ຈຳນວນ​ນັກ​ທ່ອງ​ທ່ຽວ​ເຂົ້າມາ​ປະ​ເທດ​ເຮົາ​ຫລຸດ​ລົງ. ​ໃນ​ຈຸດ​ນີ້​ຜູ້​ຂຽນ​ຂໍ​ແລກປ່ຽນ​ນຳ​ຂະ​ແໜງ​ຮັບຜິດຊອບ​ວ່າ: ການທ່ອງທ່ຽວ​ຂອງ​ປະ​ເທດ​ເຮົາ​ອັນ​ໂດດ​ເດັ່ນ​ທີ່​ສຸດ​ແມ່ນ​ການທ່ອງທ່ຽວ​ທຳ​ມະ​ຊາດ ​ແລະ ວັດທະນະທຳ ​ເຊິ່ງຜ່ານ​ມາ​ສິ່ງ​ນັ້ນ​ແມ່ນ​ພວກ​ເຮົາ​ຮັກສາ​ໄດ້, ພູຜາ​ປ່າ​ໄມ້​ຍັງ​ຂຽວ​ສົດ​ງົດ​ງາມ, ​ແມ່ນ້ຳລຳ​ເຊ​ຍັງ​ສົດ​ໃສ​ໄຫລ​ເຢັນ ​ແລະ ຖ້າ​ເວົ້າ​ໃນ​ດ້ານ​ວັດທະນະທຳ​ກໍ​ອາດ​ມີ​ໜ້ອຍ​ປະ​ເທດ​ທີ່​ສາມາດ​ມາ​ປຽບທຽບ​ໄດ້​ຍາກ. ​ແຕ່​ດຽວ​ນີ້ ​ເບິ່ງ​ຄື​ວ່າ​ກໍ​ມີ​ຫລາຍ​ອັນ​ປ່ຽນ​ໄປ, ຫລາຍ​ແຫ​ລ່ງທ່ອງ​ທ່ຽວ​ທຳ​ມະ​ຊາດ​ໄດ້​ຮັບ​ຜົນ​ກະທົບ​ຈາກ​ການ​ພັດທະນາ, ດ້ານ​ວັດທະນະທຳ​ບາງ​ອັນ​ກໍ​ໄດ້​ຮັບ​ຜົນ​ກະທົບ​ຈາກ​ພາຍ​ນອກ. ດັ່ງນັ້ນ ມາ​ຮອດ​ດຽວ​ນີ້ ຂະ​ແໜງ​ການ​ກ່ຽວຂ້ອງ​ພວກ​ເຮົາ​ອາດ​ຈະ​ມີ​ມາດ​ຕະການ​​ເຂັ້ມງວດ​ຕື່ມ​ໃນ​ການ​ປົກ​ປັກ​ຮັກສາ​ແຫ​ລ່ງທ່ອງ​ທ່ຽວ​ທຳ​ມະ​ຊາດ ​ແລະ ວັດທະນະທຳ​ອັນ​ດີງາມ​ຂອງ​ຊາດ​ເຮົາ​ໄວ້​ໃຫ້​ຍືນ​ຍົງ​ຄົງ​ຕົວ​ຕະຫລອດ​ໄປ.

- Wave100S AD to Website 2020 0 - ຢ່າໃຫ້ບັນຍາກາດການທ່ອງທ່ຽວປະເທດເຮົາທົດຖອຍ
- WhatsApp Image 2020 05 27 at 5 - ຢ່າໃຫ້ບັນຍາກາດການທ່ອງທ່ຽວປະເທດເຮົາທົດຖອຍ
- WhatsApp Image 2020 05 27 at 5 - ຢ່າໃຫ້ບັນຍາກາດການທ່ອງທ່ຽວປະເທດເຮົາທົດຖອຍ
error: Alert: ເນື້ອຫາຂ່າວມີລິຂະສິດ !!