ປີ​ນີ້ເສດຖະກິດລາວຂະຫຍາຍຕົວຊ້າລົງ

ປີ​ນີ້ເສດຖະກິດລາວຂະຫຍາຍຕົວຊ້າລົງ - 21994058 1927744530884367 919949076391729326 o - ປີ​ນີ້ເສດຖະກິດລາວຂະຫຍາຍຕົວຊ້າລົງ
ປີ​ນີ້ເສດຖະກິດລາວຂະຫຍາຍຕົວຊ້າລົງ - AGL banner - ປີ​ນີ້ເສດຖະກິດລາວຂະຫຍາຍຕົວຊ້າລົງ

ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ, ລັດຖະມົນຕີ​ກະຊວງ​ການ​ເງິນ ​ໄດ້​ລາຍ​ງານ​ສະພາບ​ການຈັດຕັ້ງ​ແຜນ​ພັດທະນາ​ເສດຖະກິດ-ສັງຄົມ, ​ແຜນ​ງົບປະມານ-​ເງິນຕາ ປີ 2018 ຕໍ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດ ຊຸດ​ທີ VIII ທີ່​ພວມ​ດຳ​ເນີນ​ໃນ​ປັດຈຸບັນ​ນີ້​ວ່າ: ​ເສດຖະກິດ​ມະຫາ​ພາກ​ຍັງ​ມີ​ຄວາມ​ໝັ້ນທ່ຽງ ​ແລະ ສືບ​ຕໍ່​ຂະຫຍາຍຕົວ​ຕໍ່​ເນື່ອງ ​​ແຕ່​ໃນ​ຈັງຫວະ​ທີ່​ຊ້າ​ລົງ ​ເນື່ອງ​ຈາກ​ປັດ​ໄຈ​ພາຍ​ໃນ ​ແລະ ພາຍ​ນອກ ​ໂດຍ​ສະ​ເພາະ​ຜົນ​ກະທົບ​ຈາກ​ຕົ້ນທຶນ​ການ​ຜະລິດ, ການ​ອ່ອນ​ຄ່າ​ຂອງ​ເງິນ​ກີບ​ທຽບ​ໃສ່​ເງິນຕາ​ສະກຸນ​ຫລັກ, ການ​ເຂັ້ມງວດ​ຂອງ​ລະບົບ​ສິນ​ເຊື່ອ​ທະນາຄານ, ​ໄພ​ທຳ​ມະ​ຊາດ ​ແລະ ອື່ນໆ ​ເຊິ່ງຄາດ​ຄະ​ເນ​ໝົດ​ປີ 2018 ລວມຍອດ​ຜະລິດ​ຕະພັນ​ພາຍ​ໃນ (GDP) ຈະ​ບັນລຸ​ພຽງ 6,5% (ສະພາ​ແຫ່ງ​ຊາດ​ຮັບຮອງ 7%) ຫລື ​ເທົ່າ​ກັບ 152.425 ຕື້ກີບ ​ໃນ​ນີ້​ຂະ​ແໜງ​ກະສິກຳ​ຂະຫຍາຍຕົວ 2,5% (​ແຜນການ 2,8%), ອຸດສາຫະກຳ​ຂະຫຍາຍຕົວ 7,7% (​ແຜນການ 9,1%) ​ແລະ ບໍລິການ​ຂະຫຍາຍຕົວ 7,6% (​ແຜນການ 6,4%). ສຳລັບ​ການຈັດຕັ້ງປະຕິບັດ​ແຜນ​ງົບປະມານ​ລັດ​ໃນ​ໄລຍະ 9 ​ເດືອນ​ມາ​ນີ້ ​ເຫັນ​ວ່າ​ມີ​ທ່ວງທ່າ​ດີ​ສົມຄວນ​ເມື່ອ​ທຽບ​ໃສ່​ໃນ​ໄລຍະ​ດຽວ​ກັນ​ຂອງ​ປີຜ່ານມາ ​ເຊິ່ງສາມາດ​ປະຕິບັດ​ໄດ້ 67,04% ຂອງ​ແຜນການ​ປີ (​ເພີ່ມ​ຂຶ້ນ 15,5%), ​ໃນ​ນັ້ນ ລາຍ​ຮັບ​ພາຍ​ໃນ​ປະຕິບັດ​ໄດ້ 69,69%, ​ແຕ່​ລາຍ​ຮັບ​ຈາກ​ການ​ຊ່ວຍ​ເຫລືອ​ລ້າ​ມີ​ທ່າ​ອ່ຽງຫລຸດ​ລົງ. ສ່ວນ​ລາຍ​ຈ່າຍ​ປະຕິບັດ​ໄດ້ 68,16% (​ເພີ່ມ​ຂຶ້ນ 14,8%) ສ່ວນ​ໃຫຍ່​ແມ່ນ​ລາຍ​ຈ່າຍ​ເງິນ​ເດືອນ, ​ເງິນ​ນະ​ໂຍບາຍ​ຕ່າງໆ, ຊຳລະ​ໜີ້​ອື່ນໆ. ນອກ​ນັ້ນ ຍັງ​ໄດ້​ແກ້​ໄຂ​ໜີ້​ສິນ​ໂຄງການ​ລົງທຶນ​ຂອງ​ລັດ ດ້ວຍ​ຫລາຍ​ຮູບ​ການ​ເຊັ່ນ: ຊຳລະ​ໜີ້​ດ້ວຍ​ແຫ​ລ່ງທຶນ​ປົກກະຕິ, ອວ່າຍ​ໜີ້ 3 ​ແຈ ​ແລະ ຊຳລະ​ຄືນ​ຕົ້ນທຶນ​ພັນທະບັດ​ລົງທຶນ. ສຳລັບ​ອັດຕາ​ເງິນ​ເຟີ້​ເພີ່ມ​ຂຶ້ນ​ເລັກ​ໜ້ອຍ ​ແຕ່​ຢູ່​ໃນ​ເກນ​ທີ່​ກຳນົດ​ໄວ້, ສ່ວນ​ອັດຕາ​ແລກປ່ຽນ​ກໍ​ອ່ອນ​ຄ່າ​ລົງ​ເລັກ​ໜ້ອຍ ​ເມື່ອ​ທຽບ​ໃສ່​ເງິນຕາ​ສະກຸນ​ຫລັກ​ເຊັ່ນ: ບາດ​ໄທ ​ແລະ ​ໂດ​ລາ​ສະຫະລັດ.

​ແນວ​ໃດ​ກໍ​ຕາມ, ຄາດ​ຄະ​ເນ​ການ​ເກັບ​ລາຍ​ຮັບ​ໝົດ​ປີ​ຈະ​ບັນລຸ​ໄດ້ 25.496 ກວ່າ​ຕື້ກີບ ​ແລະ ລາຍ​ຈ່າຍ​ຈະ​ຢູ່​ໃນ​ລະດັບ 32.692 ຕື້ກວ່າ​ກີບ, ຂາດ​ດຸນ​ປະມານ 7.357 ຕື້ກວ່າ​ກີບ ​ເຊິ່ງລັດຖະບານ​ຈະ​ເລັ່ງລະດົມ​ແຫ​ລ່ງທຶນ​ຈາກ​ຕ່າງປະ​ເທດ ​ແລະ ສະ​ຖາ​ບັນ​ການ​ເງິນ​ຕ່າງໆ ​ເພື່ອ​ໃຫ້​ພຽງພໍ​ກັບ​ລາຍ​ຈ່າຍ​ດັ່ງກ່າວ.

ປີ​ນີ້ເສດຖະກິດລາວຂະຫຍາຍຕົວຊ້າລົງ - Wave100S AD to Website 2020 0 - ປີ​ນີ້ເສດຖະກິດລາວຂະຫຍາຍຕົວຊ້າລົງ
ປີ​ນີ້ເສດຖະກິດລາວຂະຫຍາຍຕົວຊ້າລົງ - lattana 1 - ປີ​ນີ້ເສດຖະກິດລາວຂະຫຍາຍຕົວຊ້າລົງ
error: Alert: Content is protected !!