ດີໃຈ ໄຟຟ້າ ລາຄາຕໍ່າລົງ

ດີໃຈ ໄຟຟ້າ ລາຄາຕໍ່າລົງ - Untitled 1 copy 4 - ດີໃຈ ໄຟຟ້າ ລາຄາຕໍ່າລົງ
ດີໃຈ ໄຟຟ້າ ລາຄາຕໍ່າລົງ - Untitled design - ດີໃຈ ໄຟຟ້າ ລາຄາຕໍ່າລົງ

ໂດຍ : ມຶກບໍ່ແຫ້ງ

ເລື່ອງລາຄາໄຟຟ້າ ໃນໄລຍະຜ່ານມາ ໃຜໆກໍຈົ່ມກໍເວົ້າວ່າ ມັນແພງ ແຕ່ຊາວລາວຫາກໍໄດ້ຮັບຂ່າວດີ ທີ່ລັດຖະບານເຮົາ ເພິ່ນໄດ້ປະກາດຈະແຈ້ງວ່າ ຈະຫຼຸດລາຄາໄຟຟ້າລົງ ໂດຍສະເພາະຂະແໜງ ຊົນລະປະທານ.

ເລື່ອງລາຄາໄຟຟ້າ ແມ່ນຫົວຂໍ້ການສົນທະນາຂອງມວນຊົນຫຼາຍສົມຄວນ ໂດຍສະເພາະ ເມື່ອໃດ ທີ່ມີການປຽບທຽບໃສ່ແນວທາງການພັດທະນາ ສປປລາວ ໃຫ້ເປັນໝໍ້ໄຟ ຂອງອາຊຽນ, ເລີ່ມຈາກ ຄ່າໄຟຟ້າ ທີ່ສູງຂຶ້ນກວ່າປົກກະຕິ ຢ່າງໜ້າຕົກໃຈ ໃນກາງປີ 2016 ທີ່ມວນຊົນ ພາກັນແຕກຕື່ນ ແລະ ສົນໃຈລາຄາ ໄຟຟ້າຫຼາຍຂຶ້ນ.

ໃນ ສອງສາມ ເດືອນກ່ອນ ຂອງປີນີ້ ການເປັນໜີ້ຄ່າໄຟຟ້າເຍືອງທາງ ຂອງນະຄອນຫຼວງວຽງຈັນ ຕໍ່ລັດວິສາຫະກິດ ໄຟຟ້າລາວ ຈຳນວນ 40 ກວ່າຕື້ນັ້ນ ໄດ້ເຮັດໃຫ້ເລື່ອງໄຟຟ້າ ກັບມາເປັນເລື່ອງ ທີ່ດຶງດູດຄວາມສົນໃຈຈາກມວນຊົນຕຶ່ມອີກ ເຊິ່ງສະແດງໃຫ້ເຫັນວ່າ ບັນຫາທີ່ພົວພັນກັບໄຟຟ້າ ທີ່ເປັນປັດໄຈສຳຄັນຢ່າງຍິ່ງຕໍ່ການພັດທະນາປະເທດຊາດນັ້ນ ຍັງມີຫຼາຍຂອດຮຽກຮ້ອງການແກ້ໄຂ.

ເມື່ອເປັນເຊັ່ນນັ້ນ, ທ່າມກາງບັນດາບັນຫາ ແລະເລື່ອງລາວທີ່ໜ້າສົນໃຈ ໃນການດຳເນີນກອງປະຊຸມສະພາ ສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII, ກະຊວງພະລັງແຮງງານ ແລະບໍ່ແຮ່ ໄດ້ ແຈ້ງນະໂຍບາຍ ການຫລຸດລາຄາໄຟຟ້າ ສຳລັບຂະແໜງຊົນລະປະທານ 50% ແລະ ຂະແໜງລ້ຽງສັດ 30% ແລະ ຈະໄດ້ປັບປຸງຫົວໜ່ວຍລາຄາ ໄຟຟ້າຂອງ ຂະແໜງລ້ຽງສັດ ຈາກອັດຕາຫົວໜ່ວຍອຸດສາຫະກຳ ມາເປັນກະສິກຳ.

ເຊິ່ງຈຸດປະສົງຕົ້ນຕໍກໍແມ່ນແກ້ໄຂບັນຫາການເປັນໜີ້ຄ່າໄຟຟ້າຂອງຂະແໜງດັ່ງກ່າວໃນໄລຍະຫຼາຍປີຜ່ານມາ ເຊິ່ງປັດຈຸບັນ ມີເຖິງ 200 ຕື້ກີບ ແລະພ້ອມດຽວກັນນັ້ນ ຍັງແນໃສ່ການກະຕຸ້ນການຜະລິດກະສິກຳໃຫ້ເພີ່ມຂຶ້ນ ຕຶ່ມ.

ດີໃຈ ໄຟຟ້າ ລາຄາຕໍ່າລົງ - Wave100S AD to Website 2020 0 - ດີໃຈ ໄຟຟ້າ ລາຄາຕໍ່າລົງ

ນະໂຍບາຍດັ່ງກ່າວ ແມ່ນເໝາະສົມ ໃນການແກ້ໄຂບັນຫາ ທີ່ວ່າ ເມື່ອລັດຖະບານສ້າງຊົນລະປະທານຫຼາຍແຫ່ງ ໃນຂອບເຂດທົ່ວປະເທດ ແຕ່ບໍ່ໄດ້ຮັບການຊົມໃຊ້ຢ່າງມີປະສິດທິຜົນ, ອັນນີ້ ຜູ້ຂຽນພົບພໍ້ກັບບັນຫາ ທີ່ເກີດຂຶ້ນ ຢູ່ບ້ານ ເກີດເມືອງນອນ ທີ່ລັດຖະບານເພິ່ນໄດ້ສ້າງຊົນລະປະທານ ມູນຄ່າຫຼາຍສິບຕື້ກີບ ເພື່ອການຜະລິດເຂົ້າລະດູແລ້ງ (ນາແຊງ) ກວມເອົາເນື້ອທີ່ 500 ກວ່າເຮັກຕາ, ສອງສາມປີ ທຳອິດແມ່ນໃຜກໍຈູບຈ້າວຫ້າວຫັນເອົາແທ້ໆ, ເກືອບວ່າບໍ່ມີ ນາເຮື້ອ ແຕ່ຮອດປີທີ 4, 5 ແລ້ວ ປະຊາຊົນ ໃນບ້ານບໍ່ຮອດ 20% ເຮັດນາແຊງ.

ການບໍ່ເຮັດນາແຊງ ທັງທີມີ ຊົນລະປະທານ ສະດວກດີນັ້ນ ຍ້ອນວ່າ “ເສຍຄ່າໄຟຟ້າແພງ”, ບາງຄົນກໍເວົ້າວ່າ “ຊື້ເຂົ້າກິນຍັງດີກວ່າ” ແລະ ອັນສອງມາ ຂາຍເຂົ້າກໍບໍ່ໄດ້ລາຄາ ສົມເຫື່ອແຮງທີ່ປະຊາຊົນລົງທຶນໄປ, ດ້ວຍເຫດນີ້ ມາໄດ້ 7-8 ປີ ຜູ້ຂຽນໄປເລາະເບິ່ງຊົນລະປະທານດັ່ງກ່າວ ເກືອບບໍ່ເຫັນຮອດຄອງນໍ້າທີ່ສ້າງ ດ້ວຍຊີມັງນັ້ນຊໍ້າ ໜ້າເສົ້າໃຈແທ້ໆ.

ແຕ່ຖ້າລາຄາໄຟຟ້າຫຼຸດລົງຄືແນວນີ້ ກໍອາດເປັນປັດໄຈໜຶ່ງທີ່ຈະດຶງເອົາຄວາມກະຕືລືລົ້ນຂອງປະຊາຊົນ ໃນການເຮັດນາແຊງ ຫຼື ການຜະລິດພືດພັນ ທັນຍາຫານອື່ນໆ ໃນລະດູແລ້ງ, ເຂົາເຈົ້າກໍຈະຮັກຫອມ ລະບົບຊົນລະປະທານຫຼາຍຂຶ້ນ.

ພ້ອມນັ້ນ ຖ້າມີການຜະລິດຫຼາຍກໍຈະສາມາດສະໜອງຄວາມຕ້ອງການຊື້ຂອງຕ່າງປະເທດຕາມ ໂຄຕາ ດັ່ງເຊັ່ນ ຂ່າວການສົ່ງອອກເຂົ້າຂອງລາວ ໄປຈີນປີນີ້ ຈະບັນລຸຮອດ 20 ພັນໂຕນ ທີ່ ກະຊວງອຸດສາຫະກຳ ແລະການຄ້າ ເພິ່ນຫາກໍລາຍງານໃນວັນທີ 26 ພະຈິກ 2018 ທີ່ເປັນມື້ດຽວກັນກັບ ກະຊວງພະລັງງານ ແລະບໍ່ແຮ່ ເພິ່ນລາຍງານການຫຼຸດລາຄາໄຟຟ້າລົງ, ຖ້າລາຄາໄຟຟ້າຫຼຸດ ເຮົາອາດສາມາດສົ່ງອອກຫຼາຍກວ່ານີ້ໃນອະນາຄົດ.

ອັນນີ້ ເຫັນວ່າກົມກຽວກັນແທ້ ແຕ່ຂໍໃຫ້ ການຈັດຕັ້ງປະຕິບັດ ໃນຂັ້ນພື້ນຖານ ເປັນໄປຕາມເຈດຈຳນົງ ທີ່ພວກເຮົາວ່າໄວ້.

ດີໃຈ ໄຟຟ້າ ລາຄາຕໍ່າລົງ - WhatsApp Image 2020 05 27 at 5 - ດີໃຈ ໄຟຟ້າ ລາຄາຕໍ່າລົງ
ດີໃຈ ໄຟຟ້າ ລາຄາຕໍ່າລົງ - WhatsApp Image 2020 05 27 at 5 - ດີໃຈ ໄຟຟ້າ ລາຄາຕໍ່າລົງ
error: Alert: ເນື້ອຫາຂ່າວມີລິຂະສິດ !!