ວຽງ​ໄຊ ຖິ່ນ​ກຳ​ເນີ​ດ ສປປ ລາວ

ວຽງ​ໄຊ ຖິ່ນ​ກຳ​ເນີ​ດ ສປປ ລາວ - Untitled design - ວຽງ​ໄຊ ຖິ່ນ​ກຳ​ເນີ​ດ ສປປ ລາວ

​ເມືອງ​ວຽງ​ໄຊ ​ແຂວງ​ຫົວພັນ ​ເປັນ​ສູນ​ກາງ​ຖານ​ທີ່ໝັ້ນຂອງການ​ປະຕິວັດ​ລາວ, ​ເປັນ​ບ່ອນ​ປະຊາຊົນ, ພະນັກງານ, ທະຫານ, ຕຳຫລວດ ​ແລະ ບັນດາ​ການ​ນຳ​ປະຕິວັດ​ພັກ​ພາ​ອາ​ໄສ​ໃນ​ໄລຍະ​ຕໍ່ສູ້​ກູ້​ຊາດ, ​ເປັນ​ສູນ​ກາງ​ບັນຊາ​ຊີ້​ນຳ​ຂະ​ບວນການ​ຕໍ່ສູ້​ປົດ​ປ່ອຍ​ຊາດ​ ຈົນ​ສາມາດຍາດ​ໄດ້​ໄຊຊະນະ​ຢ່າງ​ສົມບູນ ​ແລະ ສະຖາປະນາ ສປປ ລາວ ຂຶ້ນຢ່າງ​ເປັນທາງ​ການ ​ໃນ​ວັນ​ທີ 2 ທັນວາ 1975 ​ເມືອງ​ວຽງ​ໄຊ ຈຶ່ງ​ສົມ​ນາມ​ວ່າ: ​ເປັນຖິ່ນ​ກຳ​ເນີ​ດຂອງ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ.

ການ​ກໍ່ສ້າງ​ຖານ​ທີ່​ໝັ້ນ ​ເພື່ອ​ເປັນ​ບ່ອນ​ອີງ​ອັນ​ແໜ້ນ​ແກ່ນ​ຂອງ​ການ​ປະຕິວັດ​ລາວ​ແມ່ນ​ແນວທາງ​ນະ​ໂຍບາຍ​ອັນ​ຖືກຕ້ອງ​ສະຫລາດ​ສ່ອງ​ໃສ​ຂອງ​ພັກ​ປະຊາຊົນ​ປະຕິວັດ​ລາວ​ທີ່​ມີ​ປະທານ ​ໄກສອນ ພົມວິຫານ ຜູ້ນຳ​ທີ່​ດີ​ເດັ່ນ ​ແລະ ​ແສນ​ເຄົາລົບ​ຮັກ​ຂອງ​ປະຊາຊົນ​ລາວ​ບັນດາ​ເຜົ່າ​ເປັນ​ຜູ້ນຳ​ໜ້າ.

​ເຂດ​ວຽງ​ໄຊ​ໃນ​ເມື່ອ​ກ່ອນ​ແມ່ນ​ສູນ​ບັນຊາ​ການ​ຂອງ​ຂະ​ບວນການ​ຕໍ່ສູ້​ຕ້ານ​ພວກ​ລ່າ​ເມືອງ​ຂຶ້ນ​ແບບ​ເກົ່າ ​ແລະ ​ແບບ​ໃໝ່​ຜູ້​ຮຸກ​ຮານ, ​ເປັນ​ບ່ອນ​ປະຕິບັດ​ແນວທາງ​ຕໍ່ສູ້​ຍືດ​ເຍື້ອຍາວ​ນານ, ອີງ​ໃສ່​ກຳລັງ​ແຮງ​ສັງ​ລວມຂອງ​ປະຊາຊົນ​ເປັນຕົ້ນຕໍ​ຂອງ​ພັກ ​ແລະ ປະຊາຊົນ​ລາວ​ບັນດາ​ເຜົ່າ​ໄດ້​ສຸມ​ໝົດ​ກຳລັງ​ຂອງ​ຕົນ​ເຂົ້າ​ໃນ​ການ​ກໍ່ສ້າງ ​ແລະ ປົກ​ປັກ​ຮັກສາ​ເຂດ​ທີ່​ໝັ້ນ “ຊຳ​ເໜືອ” ຈາກ​ບ່ອນ​ເບື້ອງຕົ້ນມີ​ພຽງ​ບາງ​ຮາກ​ຖານ​ຢູ່​ໃນ​ບາງ​ບ້ານ, ບາງ​ຕາ​ແສງ​ຈົນ​ຂະຫຍາຍ​ເຂດ​ທີ່​ໝັ້ນຊຳ​ເໜືອ​ເປັນ​ບ່ອນ​ອີງ​ອັນ​ແໜ້ນ​ແກ່ນ, ​ເປັນ​ແນວ​ຫລັງ​ທີ່​ໜັກ​ແໜ້ນ​ໃຫ້​ແກ່​ການ​ປະຕິວັດ​ໃນ​ທົ່ວ​ປະ​ເທດ, ​ເປັນ​ສູນ​ກາງ​ບັນຊາ​ການ​ສູງ​ສຸດ​ຂອງ​ຂະ​ບວນການ​ຕໍ່ສູ້, ​ເປັນ​ບ່ອນ​ກໍ່ສ້າງ ​ແລະ ຂະຫຍາຍ​ກຳລັງ, ​ເປັນ​ບ່ອນ​ສະໜອງ​ກຳລັງ​ແຮງ​ຄົນ ​ແລະ ​ແຮງ​ວັດຖຸ ທັງ​ເປັນ​ບ່ອນ​ປຸກລະດົມ​ນ້ຳ​ໃຈ​ພິລະ​ອາດ​ຫານ​ຕໍ່ສູ້​ບໍ່​ຍອມ​ຈຳນົນ​ຂອງ​ປະຊາຊົນ​ບັນດາ​ເຜົ່າ ​ເຊິ່ງ​ເປັນ​ປັດ​ໄຈ​ພື້ນຖານ​ໃນ​ການ​ຕັດສິນ​ໄຊຊະນະ​ຂອງ​ການ​ປະຕິວັດ.

​ໃນ​ໄລຍະ​ຈັກກະພັດ​ລ່າ​ເມືອງ​ຂຶ້ນ​ແບບ​ໃໝ່ ​ແລະ ລູກມື​ຂາຍ​ຊາດ​ເພີ່ມ​ທະວີ​ສົງຄາມ​ທຳລາຍ​ທາງ​ອາກາດ​ສຸມ​ໃສ່​ເຂດ​ປົດ​ປ່ອຍ​ດ້ວຍ​ຄຳ​ຂວັນ “ຈູດ​ກ້ຽງ, ທຳລາຍ​ກ້ຽງ ​ແລະ ຂ້າກ້ຽງ” ສູນ​ກາງ​ໄດ້​ນຳພາ​ພະນັກງານ ​ແລະ ປະຊາຊົນ​ເຂົ້າຢູ່​ໃນ​ຖ້ຳ ​ເພື່ອ​ປ້ອງ​ກັນ​ສົງຄາມ​ທາງ​ອາກາດ ​ແລະ ໜ້າດິນ​ຂອງ​ຈັກກະພັດ​ລ່າ​ເມືອງ​ຂຶ້ນ​ແບບ​ໃໝ່ ​ໂດຍ​ໄດ້​ກຳນົດ​ເອົາ​ເຂດ​ລ້ອງ​ກູ້-ນາ​ໄກ່​ເປັນ​ເຂດ​ຂອງ​ການ​ນຳ​ສູງ​ສຸດ; ​ເຂດ​ຊຽງ​ຊື້, ຊຽງ​ລວງ, ຊຽງ​ແມນ, ​ເມືອງ​ກ້າງ, ​ເມືອງ​ງາ, ນາ​ແທ່ນ ​ເປັນ​ເຂດ​ທີ່​ໝັ້ນພື້ນຖານ, ​ເຂດ​​ເມືອງ​ລຽດ, ນາ​ປຸ້ງ, ຫາງ​ລ້ອງ ​ເປັນ​ທີ່​ຕັ້ງສຳຄັນ​ຂອງ​ແຂວງ​ຫົວພັນ, ​ເຂດ​ນາ​ວິດ, ຜາ​ແດງ ​ເປັນ​ທີ່​ຕັ້ງຂອງ​ກຳລັງ​ອາສາ​ສະໝັກ​ຫວຽດນາມ​ທີ່​ເຂົ້າມາ​ຊ່ວຍ​ເຫລືອ​ລາວ ​ເພາະສະນັ້ນວຽງ​ໄຊ​ຈຶ່ງ​ຕິດ​ພັນ​ກັບ​ບັນດາ​ເຫດການ​ທີ່​ສຳຄັນຕ່າງໆ​ຂອງ​ປະຫວັດສາດ​ໃນ​ສະ​ໄໝ​ຕໍ່ສູ້​ກູ້​ຊາດ.

ວຽງ​ໄຊ ຖິ່ນ​ກຳ​ເນີ​ດ ສປປ ລາວ - Wave100S AD to Website 2020 0 - ວຽງ​ໄຊ ຖິ່ນ​ກຳ​ເນີ​ດ ສປປ ລາວ

​ເມືອງ​ວຽງ​ໄຊ​ກຳ​ເນີ​ດຈາກ​ຂະ​ບວນການ​ຕໍ່ສູ້​ປະຕິວັດ​ຂອງ​ປະຊາຊົນ​ລາວ​ບັນດາ​ເຜົ່າ ພາຍ​ໃຕ້​ການ​ນຳພາ​ຂອງ​ພັກ​ປະຊາຊົນ​ປະຕິວັດ​ລາວ ​ເຊິ່ງປະກອບ​ຈາກ 2 ​ເມືອງ​ຄື: ​ເມືອງ​ຊຳ​ເໜືອ 10 ຕາ​ແສງ ​ແລະ 1 ຕາ​ແສງ​ຂອງ​ເມືອງ​ ໂສ​ຍ ​ໃນ​ເມື່ອ​ກ່ອນ​ລວມ​ເຂົ້າກັນ​ເປັນ​ເຂດ​ໜຶ່ງ ​ເຊິ່ງມີ​ຖານະ​ບົດບາດ​ເທົ່າ​ກັບ​ເມືອງ​ໜຶ່ງ ​ແລະ ຂຶ້ນກັບ​ການ​ຊີ້​ນຳ​ໂດຍ​ກົງ​ຮອບດ້ານ​ຈາກ​ສູນ​ກາງ​ແນວ​ລາວ​ຮັກ​ຊາດ ​ເອີ້ນ​ວ່າ: “​ເຂດ​ພິ​ເສດ”, ສ້າງຕັ້ງຂຶ້ນ​ໃນ​ວັນ​ທີ 30 ພະຈິກ 1968 ທີ່​ລຸ້ງນາ​ກຽງ ຕາ​ແສງ​ບົວ ​ແລະ ກຳນົດ​ເອົາ​ຖ້ຳຮາງ ບ້ານ​ຊຽງ​ລວ​ງ ​ເປັນ​ສຳນັກງານ, ຈຶ່ງ​ຖື​ເອົາ​ວັນ​ດັ່ງກ່າວ​ເປັນ​ວັນ​ສ້າງຕັ້ງ​ເມືອງ​ວຽງ​ໄຊ. ​ໃນ​ປີ 1972 ສູນ​ກາງ​ໄດ້​ໂອນ​ການ​ປົກຄອງ​ໄປ​ທົ່ວ​ແຂວງ​ຫົວພັນ ​ເຊິ່ງ​ເອີ້ນ​ວ່າ: “ສຳພັນ” ຫລັງ​ຈາກ​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ​ຢ່າງ​ສົມບູນ​ໃນ​ປີ 1975.

ສູນ​ກາງ​ພັກ​ໄດ້​ໂຮມ​ເມືອງ​ສຳພັນ​ກັບ​ເມືອງ​ໂສ​ຍ​ເປັນ​ເມືອງ “ວຽງ​ໄຊ” ມາ​ຈົນ​ເຖິງ​ທຸກ​ວັນ​ນີ້ “ວຽງ​ໄຊ” ​ແມ່ນ​ນາມ​ປາກກາ ຫລື ຊື່​ລັບ​ຂອງ​ທ່ານ ​ໄກສອນ ພົມວິຫານ ​ໃນ​ຍາມ​ຕໍ່ສູ້​ກູ້​ຊາດ.

ວຽງ​ໄຊ ຖິ່ນ​ກຳ​ເນີ​ດ ສປປ ລາວ - WhatsApp Image 2020 05 27 at 5 - ວຽງ​ໄຊ ຖິ່ນ​ກຳ​ເນີ​ດ ສປປ ລາວ
ວຽງ​ໄຊ ຖິ່ນ​ກຳ​ເນີ​ດ ສປປ ລາວ - WhatsApp Image 2020 05 27 at 5 - ວຽງ​ໄຊ ຖິ່ນ​ກຳ​ເນີ​ດ ສປປ ລາວ
error: Alert: ເນື້ອຫາຂ່າວມີລິຂະສິດ !!