ກຽມສ້າງເມືອງວຽງໄຊ ຖານທີ່ໝັ້ນຂອງການປະຕິວັດເປັນເມືອງທ່ອງທ່ຽວສະອາດຂອງອາຊຽນ

- Untitled design - ກຽມສ້າງເມືອງວຽງໄຊ ຖານທີ່ໝັ້ນຂອງການປະຕິວັດເປັນເມືອງທ່ອງທ່ຽວສະອາດຂອງອາຊຽນ

ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກຽມສ້າງເມືອງວຽງໄຊ ແຂວງຫົວພັນ ຖານທີ່ໝັ້ນຂອງການປະຕິວັດລາວ ໃຫ້ກາຍເປັນເມືອງທ່ອງທ່ຽວສະອາດຂອງອາຊຽນ ແນໃສດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປທ່ອງທ່ຽວເມືອງວຽງໄຊນັບມື້ຫລາຍຂຶ້ນ.

ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ສໍາພາດວ່າ: ວຽງໄຊເປັນເມືອງໜຶ່ງທີ່ຍັງບໍ່ທັນໄດ້ຮັບຜົນກະທົບຈາກສິ່ງແວດລ້ອມຫລາຍ ຈຶ່ງເໝາະສົມກັບການສ້າງເປັນ ເມືອງທ່ອງທ່ຽວສະອາດຂອງອາຊຽນຕາມມາດຕະຖານອາຊຽນທີ່ກະຊວງ ຖະ ແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໄປໂຄສະນາຢູ່ຕ່າງປະເທດ. ປັດຈຸບັນໄດ້ວາງແຜນຈັດຕັ້ງປະຕິບັດແລ້ວ ຄາດວ່າໃນເດືອນມັງກອນປີ 2019 ຈະເລີ່ມໄປໂຄສະນາເຜີຍແຜ່ ແລະ ປູກຈິດສຳນຶກໃຫ້ປະຊາຊົນຊາວເມືອງວຽງໄຊຮັບຮູ້ ແລະ ເຂົ້າໃຈກ່ຽວກັບມາດຕະຖານການສ້າງເປັນເມືອງທ່ອງທ່ຽວສະ ອາດອາຊຽນ ແລະ ໃຫ້ການຮ່ວມມືຈັດຕັ້ງປະຕິບັດໃນວຽກງານນີ້. ປັດຈຸບັນ ລາວເຮົາມີພຽງເມືອງຫລວງພະບາງ (ນະຄອນຫລວງພະບາງ) ທີ່ໄດ້ຖືກຮັບຮອງໃຫ້ເປັນເມືອງທ່ອງທ່ຽວສະອາດຂອງອາຊຽນ.

ເມືອງວຽງໄຊຕັ້ງຢູ່ທາງທິດຕາເວັນອອກຂອງແຂວງຫົວພັນ, ຫ່າງຈາກເທສະບານແຂວງ 28 ກິໂລແມັດ, ມີເນື້ອທີ່ທັງໝົດ 1.624 ກິໂລຕາແມັດ, ມີພົນລະເມືອງທັງໝົດ 32.697 ຄົນ, ຍິງ 15.988 ຄົນ, ມີ 5 ເຜົ່າທີ່ດໍາລົງຊີ ວິດຢູ່ຮ່ວມກັນຄື: ເຜົ່າລາວ, ໄຕ, ມົ້ງ, ກຶມມຸ ແລະ ອີວມຽນ.

ວຽງໄຊ ແຕ່ກ່ອນມີຊື່ວ່າ ທົ່ງນາໄກ່ ເປັນເຂດທີ່ມີພູຜາປ່າດົງຕຶບໜາ, ມີສັດສາວາສິ່ງນາໆຊະນິດ ແລະ ເປັນທີ່ຢູ່ອາໄສຂອງໄກ່ປ່າເປັນຈຳນວນຫຼວງ ຫຼາຍ. ເປັນເຂດມີພູຫີນປູນສະລັບຊັບຊ້ອນກັນຫຼາຍໜ່ວຍແຕ່ເໜືອເຖິງໃຕ້ ເຊິ່ງບັນດາພູຫີນປູນດັ່ງກ່າວລ້ວນແຕ່ມີຖໍ້າທຳມະຊາດໃຫຍ່-ນ້ອຍຫຼາຍຖໍ້າ, ເປັນເມືອງຍ່າງທ່ຽວຊົມໄດ້ ແລະ ເປັນເມືອງສີຂຽວສະອາດງາມຕາ, ມີຫລາຍແຫຼ່ງທ່ອງທ່ຽວທີ່ສຳຄັນ ເປັນຕົ້ນບັນດາຖໍ້າທ່ານຜູ້ນຳ, ນໍ້ຕົກຕາດນໍ້ານົ່ວ ແລະ ອື່ນໆ.

ວຽງໄຊ ເປັນເມືອງທີ່ມີປະຫວັດຄວາມເປັນມາຕິດພັນກັບມູນເຊື້ອຂອງການປະຕິວັດລາວ, ເມືອງວຽງໄຊໄດ້ກໍານົດເອົາ 5 ທ່າແຮງໃນການພັດທະນາເສດຖະກິດ-ສັງຄົມຂອງເມືອງຄື: ການປູກເຂົ້ານາ, ປູກໄມ້ອຸດສາຫະກຳ-ໄມ້ປ່ອງ, ລ້ຽງສັດໃຫຍ່-ລ້ຽງປາໃສ່ນາ, ຫັດຖະກຳຈັກສານ ແລະ ບໍລິ ການທາງຜ່ານ-ການທ່ອງທ່ຽວ. ປັດຈຸບັນອັດຕາການເພີ່ມຂຶ້ນຂອງເສດຖະກິດປະມານ 11%, ລວມຍອດຜະລິດຕະພັນພາຍໃນ (GDP) ບັນລຸໄດ້ 133,73 ຕື້ກີບ, ສະເລ່ຍໃສ່ຫົວຄົນໄດ້ປະມານ 4,7 ກີບ/ຄົນ/ປີ.

- Wave100S AD to Website 2020 0 - ກຽມສ້າງເມືອງວຽງໄຊ ຖານທີ່ໝັ້ນຂອງການປະຕິວັດເປັນເມືອງທ່ອງທ່ຽວສະອາດຂອງອາຊຽນ

ໃນວັນທີ 30 ພະຈິກຜ່ານມານີ້, ພັກ ແລະ ລັດຖະບານ ໄດ້ຈັດພິທີສະເຫລີມສະຫລອງວັນສ້າງຕັ້ງເມືອງວຽງໄຊ ຖານທີ່ໝັ້ນຂອງການປະຕິວັດລາວ ຄົບຮອບ 50 ປີ ຢ່າງຍິ່ງໃຫຍ່ທີ່ສະຫນາມຫລວງຂອງເມືອງ ອັນ​ຈະ​ເປັນ​ຈຸດ​ເລີ່​ມຕົ້ນ​ໃຫ້​ແກ່​ການ​ພັດທະນາ​ເມືອງ​ປະຫວັດສາດ​ນີ້​ເປັນ​ເມືອງ​ທ່ອງ​ທ່ຽວ​ສະອາດ​ຢ່າງ​ສົມ​ຊື່.

- WhatsApp Image 2020 05 27 at 5 - ກຽມສ້າງເມືອງວຽງໄຊ ຖານທີ່ໝັ້ນຂອງການປະຕິວັດເປັນເມືອງທ່ອງທ່ຽວສະອາດຂອງອາຊຽນ
- WhatsApp Image 2020 05 27 at 5 - ກຽມສ້າງເມືອງວຽງໄຊ ຖານທີ່ໝັ້ນຂອງການປະຕິວັດເປັນເມືອງທ່ອງທ່ຽວສະອາດຂອງອາຊຽນ
error: Alert: ເນື້ອຫາຂ່າວມີລິຂະສິດ !!