ໄຈ້ແຍກໃຫ້ອອກລະ ຫວ່າງຄົນຈິງໃຈກັບຄົນບໍ່ຈິງໃຈ

- 031012 2018 - ໄຈ້ແຍກໃຫ້ອອກລະ ຫວ່າງຄົນຈິງໃຈກັບຄົນບໍ່ຈິງໃຈ
- AGL - ໄຈ້ແຍກໃຫ້ອອກລະ ຫວ່າງຄົນຈິງໃຈກັບຄົນບໍ່ຈິງໃຈ


      ວິທີໄຈ້ແຍກໃຫ້ອອກລະຫວ່າງຄົນຈິງໃຈກັບຄົນບໍ່ຈິງໃຈຕ່າງກັນໜ້ອຍດຽວ. ໃນຊີວິດຄົນເຮົານັ້ນລ້ວນແຕ່ຕ້ອງພົບກັບຜູ້ຄົນ ຫລວງຫລາຍ ທັງໃນສັງຄົມ, ໝູ່, ເພື່ອນຮ່ວມງານ, ຫົວໜ້າ, ລູກນ້ອງ ທຸກຄົນລ້ວນແຕ່ມີນິໄສແຕກຕ່າງກັນຕາມສະພາບແວດລ້ອມທີ່ເຕີບໃຫຍ່ມາ ເຊິ່ງໃຜໆກໍຢາກພົບຄົນທີ່ຈິງໃຈຄືກັນໝົດ, ແຕ່ເຮົາຈະໄຈ້ແຍກໄດ້ແນວໃດວ່າຄົນໃດຈິງໃຈກັບເຮົາ, ຄົນໃດບໍ່ຈິງໃຈ ມື້ນີ້ຈຶ່ງມີວິທີສັງເກດງ່າຍໆ 8 ຂໍ້ຕໍ່ໄປນີ້ມາແນະນຳທ່ານ :

     1. ຄົນຈິງໃຈເຂົາເວົ້າກັນຕໍ່ໜ້າ ບໍ່ປາກເກັ່ງລັບຫລັງ : ຄົນຈິງໃຈສະແດງຄວາມຄິດເຫັນຢ່າງເປີດເຜີຍ ກົງໄປກົງມາ, ແຕ່ຮູ້ກາລະເທສະ, ຍ້ອງແດ່ ຕິແດ່ຕາມຄວາມເໝາະສົມ. ສ່ວນຄົນບໍ່ຈິງໃຈ ຕໍ່ໜ້າເວົ້າດີ ຍ້ອງອັນນັ້ນຍ້ອງອັນນີ້ ແຕ່ມັກລັກໄປນິນທາລັບຫລັງ.

2. ຄົນຈິງໃຈບໍ່ໃສ່ຮ້າຍຄົນອື່ນ: ຮູ້ຈັກຍ້ອງຍໍຊົມເຊີຍຄົນອື່ນ ແລະ ກໍມັກຈະໄດ້ຮັບການຍ້ອງຍໍຈາກຄົນອື່ນສະເໝີ ເພາະເຂົາບໍ່ໃສ່ຮ້າຍ ຫລື ເວົ້າໃຫ້ຄົນອື່ນເສຍໆຫາຍໆ. ສ່ວນຄົນບໍ່ຈິງໃຈຈະວິພາກວິຈານຄົນອື່ນເພື່ອເຮັດໃຫ້ພວກເຂົາເບິ່ງເປັນຄົນດີ ເພາະພວກເຂົາເບິ່ງວ່າການຂົ່ມຄົນອື່ນໃຫ້ຕໍ່າລົງ ເປັນການເຮັດໃຫ້ໂຕເອງເບິ່ງສູງຂຶ້ນ.

     3. ຄົນຈິງໃຈຈະບໍ່ໜ້າຫວ້າຍຫລັງຫລອກ ບໍ່ເຫັນເງິນເປັນໃຫຍ່: ໃຫ້ຄວາມເຄົາລົບກັບທຸກຄົນຢ່າງເທົ່າທຽມກັນ ເຖິງວ່າຄົນຜູ້ນັ້ນຈະມີຖານະຫຍັງ ຫລື ມີໜ້າທີ່ວຽກງານຫຍັງ. ສ່ວນຄົນບໍ່ຈິງໃຈຈະໃຫ້ຄວາມເຄົາລົບຕໍ່ຄົນທີ່ມີອຳນາດຫລາຍກ່ວາ, ແຕ່ຈະບໍ່ເຫັນຄ່າຄົນທີ່ມີອຳນາດດ້ອຍກ່ວາຕົນ.

     4. ຄົນຈິງໃຈເຂົາບໍ່ສະເໜີໜ້າ: ບໍ່ເວົ້າໂມ້ໂອ້ອວດ, ບໍ່ມັກສະເໜີໜ້າເອົາຜົນງານ, ແຕ່ຈະເປັນຄົນທ່ີລົງມືເຮັດແທ້ໆ. ສ່ວນຄົນບໍ່ຈິງໃຈມັກໂອ້ອວດທໍລະນົງໂຕຢູ່ຕະຫລອດເວລາ ຄືກັບໝາກປຸມເປົ້າທີ່ໜ່ວຍໃຫຍ່ຂຶ້ນ ເບິ່ງງາມໂດດເດັ່ນ ແຕ່ພາຍໃນມີແຕ່ຄວາມວ່າງເປົ່າ.

     5. ຄົນຈິງໃຈມັກຊ່ວຍເຫລືອ: ໂດຍບໍ່ຫວັງຜົນຕອບແທນ, ເຮັດດີ ແລະ ຊ່ວຍເຫລືອຜູ້ອື່ນສະເໝີໂດຍບໍ່ຫວັງສິ່ງໃດກັບຄືນ, ເປັນຜູ້ໃຫ້ຫລາຍກ່ວາຜູ້ຮັບ. ສ່ວນຄົນບໍ່ຈິງໃຈເຮັດດີສະເພາະຍາມທີ່ມີຜົນປະໂຫຍດແອບແຝງ, ເປັນຜູ້ຮັບ ແລະ ຮ້ອງຂໍຢູ່ສະເໝີ ເຫັນຜົນປະໂຫຍດແລ້ວຮີບຍາດເອົາເລີຍ.

     6. ຄົນຈິງໃຈຮັກສາຄຳເວົ້າ : ພະຍາຍາມຢ່າງເຕັມທີ່ທຸກເທື່ອເພື່ອຮັກສາສັນຍາທີ່ໃຫ້ໄວ້, ເປັນຄົນຮັກສາຄຳເວົ້າ, ເວົ້າແທ້ເຮັດ ແທ້. ສ່ວນຄົນບໍ່ຈິງໃຈມັກຮັບປາກຫຍັງງ່າຍໆ ແຕ່ເກືອບຈະບໍ່ເຄີຍຮັກສາຄຳເວົ້າ, ຮັບປາກເອົາໜ້າ ເມື່ອເຖິງເວລາແທ້ໆຫົດຫົວຢູ່ຄືເຕົ່າຢູ່ໃນກະດອງ.

     7. ຄົນຈິງໃຈຈະບໍ່ເອົາໃຈຄົນອື່ນ : ບໍ່ພະຍາຍາມເຮັດໃຫ້ຄົນອື່ນມາມັກຕົນເອງ ເພາະພວກເຂົາຮູ້ວ່າໂຕເອງມີດີພໍທີ່ຈະເຮັດໃຫ້ຄົນອື່ນຍອມຮັບໃນໂຕຕົນຂອງພວກເຂົາ, ບໍ່ຍິ່ງທໍລະນົງ, ແຕ່ກໍບໍ່ປະຈົບປະແຈງຈົນເກີນງາມ. ສ່ວນຄົນບໍ່ຈິງໃຈພະຍາຍາມຢ່າງໜັກທີ່ຈະເຮັດໃຫ້ຄົນອື່ນມັກຕົນເອງ ເພາະເລິກໆໃນໃຈເຂົາຮູ້ວ່າເຂົາມີໝູ່ບໍ່ຫລາຍ ຈຶ່ງຢາກເປັນທີ່ຍອມຮັບຂອງຄົນອື່ນຢູ່ສະເໝີ.

     8. ຄົນຈິງໃຈເຂົາບໍ່ມັກຮຽກຮ້ອງ : ບໍ່ແມ່ນຄົນຮຽກຮ້ອງຄວາມສົນໃຈ. ສ່ວນຄົນບໍ່ຈິງໃຈຈະພະຍາຍາມຮຽກຮ້ອງຄວາມ ສົນໃຈຢູ່ຕະຫລອດເວລາ.

     ຫລັກການງ່າຍໆ 8 ຂໍ້ນີ້ຈະຊ່ວຍໃຫ້ທ່ານໃຊ້ຊີວິດໄດ້ງ່າຍຂຶ້ນ ເພາະທ່ານຈະຮູ້ວ່າຄວນຈະທຸ້ມເທໃຫ້ກັບໃຜ ແລະ ຄວນຖອຍຫ່າງອອກຈາກໃຜ.

-    AD conten website - ໄຈ້ແຍກໃຫ້ອອກລະ ຫວ່າງຄົນຈິງໃຈກັບຄົນບໍ່ຈິງໃຈ
- lattana banner - ໄຈ້ແຍກໃຫ້ອອກລະ ຫວ່າງຄົນຈິງໃຈກັບຄົນບໍ່ຈິງໃຈ
- lattana banner 1 - ໄຈ້ແຍກໃຫ້ອອກລະ ຫວ່າງຄົນຈິງໃຈກັບຄົນບໍ່ຈິງໃຈ
error: Alert: ເນື້ອຫາຂ່າວມີລິຂະສິດ !!