ໃຫ້ລູກເບິ່ງຈໍໂທລະສັບຫລາຍສົ່ງຜົນຮ້າຍຕໍ່ສະໝອງ

- advert banner 728 90 728x90 - ໃຫ້ລູກເບິ່ງຈໍໂທລະສັບຫລາຍສົ່ງຜົນຮ້າຍຕໍ່ສະໝອງ


     ການເບິ່ງໜ້າຈໍໂທລະສັບ ຫລື ແທັບເລັດມີຜົນເສຍຕໍ່ພັດທະນາການ ແລະ ການຮຽນຮູ້ຂອງເດັກນ້ອຍ ແລະ ຍັງມີຜົນຮ້າຍຕ່າງໆຕາມມາອີກຫລວງຫລາຍ ສົ່ງຜົນໃຫ້ເດັກນ້ອຍນອນຫລັບຍາກ ແລະ ມີໂອກາດແຍກໂຕອອກຈາກສັງຄົມ, ມີສະມາທິສັ້ນ, ອາລົມປ່ຽນແປງງ່າຍ, ມີບັນຫາດ້ານພຶດຕິກຳ ແລະ ລະບົບປະສາດ. ຜູ້ປົກຄອງ ແລະ ຄູ ຄວນສັງເກດຈະພົບວ່າ ເດັກນ້ອຍທີ່ເບິ່ງໂທລະສັບຫລາຍເກີນໄປຈະເບື່ອງ່າຍ, ເຮັດວຽກ ຫລື ຮຽນໜັງສືຊ້າ ແລະ ເມື່ອຍງ່າຍ. ນັກວິໄຈເຕືອນວ່າ ພັດທະນາການຂອງສະໝອງພາກສ່ວນໜ້າຈະເຮັດວຽກຊ້າລົງ ເຊິ່ງສະໝອງພາກສ່ວນນີ້ເປັນພາກສ່ວນທີ່ຄວບຄຸມອາລົມ, ທັກສະ ແລະ ການຈົດຈໍ່ ເຊິ່ງອາດຈະສົ່ງຜົນຮ້າຍຕໍ່ການດຳລົງຊີວິດຂອງເດັກໄປຕະຫລອດ.

     – ການເບິ່ງໂທລະສັບດົນໆຂັດຂວາງການພັດທະນາຂອງສະໝອງ : ສະໝອງທີ່ພັດທະນາຊ້າເປັນເລື່ອງທີ່ໜ້າຢ້ານກ່ວາທີ່ທ່ານຄິດ ເພາະເດັກນ້ອຍໃນຍຸກປະຈຸບັນມີອັດຕາການຈະເລີນເຕີບໃຫຍ່ກາຍເປັນຜູ້ໃຫຍ່ໃນຈຳນວນມະຫາສານ ແລະ ໃນໄລຍະປິທຳອິດຂອງຊີວິດເປັນໄລຍະທີ່ມີພັດທະນາການການເຕີບໃຫຍ່ສູງຂຶ້ນເຖິງ 300% ໃນໄລຍະທຳອິດຂອງຊີວິດນີ້ ຖ້າຫາກເດັກນ້ອຍຢູ່ກັບຈໍໂທລະສັບຫລາຍເກີນໄປຈະເຮັດໃຫ້ເດັກນ້ອຍຄົນນັ້ນມີພັດທະນາການທີ່ຊ້າກ່ວາເດັກນ້ອຍໃນໄວດຽວກັນຫລາຍ. ການທີ່ໃຫ້ເດັກນ້ອຍໄດ້ຮຽນຮູ້ ແລະ ສຳຜັດຂອງແທ້ ເດັກນ້ອຍຈະໄດ້ປະສົບການແທ້ທີ່ບໍ່ສາມາດແທນກັນໄດ້ໂດຍການສຳຜັດທີ່ເກີດຂຶ້ນເທິງໜ້າຈໍ.

     – ການຢູ່ກັບໜ້າຈໍໂທລະສັບຫລາຍເກີນໄປເຮັດໃຫ້ເດັກຮຽນຮູ້ຊ້າ, ເວົ້າຊ້າ ແລະ ຄິດຊ້າ : ວິທີທີ່ດີສຸດແມ່ນການລົມກັບເດັກນ້ອຍ ເພາະເດັກນ້ອຍສາມາດເບິ່ງເຫັນການສະແດງສີໜ້າ ແລະ ອາລົມ, ໂທນສຽງ ແລະ ສັງເກດພາສາກາຍ ທັງໝົດນີ້ເປັນຂະບວນການສຳຄັນທີ່ສັບຊ້ອນໃນການຮຽນຮູ້ການເວົ້າ ແລະ ການຄິດຂອງເດັກ ບໍ່ມີໜ້າຈໍເກມໃດ ຫລື ວິດີໂອໃດທີ່ຈະສາມາດແທນບ່ອນຄວາມສຸກໃນການຮຽນຮູ້ຈາກປະຕິກິລິຍາຂອງມະນຸດຕໍ່ມະນຸດ ຫລື ມະນຸດຕໍ່ສັດໄດ້.

     – ການຢູ່ກັບໜ້າຈໍໂທລະສັບຫລາຍເກີນໄປ ສາມາດຫລຸດຈຳນວນຄຳທີ່ເດັກຈະຮຽນຮູ້ໄດ້ : ປົກກະຕິຜູ້ປົກຄອງສ່ວນຫລາຍຈະໃຊ້ຄຳເວົ້າປະມານ 940 ຄຳຕໍ່ຊົ່ວໂມງເມື່ອລົມກັບເດັກນ້ອຍເວລາແອບຍ່າງ, ແຕ່ຖ້າຢູ່ໜ້າຈໍໂທລະສັບ ຄຳທີ່ຜູ້ປົກຄອງຈະໃຊ້ນັ້ນຈະເຫລືອພຽງ 770 ຄຳ ຫລື ໜ້ອຍກ່ວານັ້ນ ເຊິ່ງໝາຍຄວາມວ່າເດັກໃນໄວແອບຍ່າງຈະຮຽນຮູ້ຄຳໄດ້ໜ້ອຍລົງເລື້ອຍໆເມື່ອເວລາຜ່ານໄປ.

- lattana 1 - ໃຫ້ລູກເບິ່ງຈໍໂທລະສັບຫລາຍສົ່ງຜົນຮ້າຍຕໍ່ສະໝອງ
- 1 1 - ໃຫ້ລູກເບິ່ງຈໍໂທລະສັບຫລາຍສົ່ງຜົນຮ້າຍຕໍ່ສະໝອງ

     – ການຢູ່ກັບໜ້າຈໍໂທລະສັບຫລາຍເກີນໄປອາດສົ່ງຜົນຕໍ່ສຸຂະພາບຮ່າງກາຍ ແລະ ຈິດໃຈຂອງເດັກ : ມີການສຶກສາຈຳນວນ  ຫລາຍທີ່ສະແດງໃຫ້ເຫັນວ່າວິຖີຊີວິດປະຈຳວັນທີ່ບໍ່ດີຕໍ່ສຸຂະພາບຮ່າງກາຍຂອງເດັກ ຫລື ໄວໜຸ່ມ ແມ່ນການເບິ່ງໜ້າຈໍໂທລະສັບຫລື ໂທລະພາບຫລາຍກ່ວາ 2 ຊົ່ວໂມງຕໍ່ມື້ ສົ່ງຜົນໃຫ້ເດັກມີການເຄື່ອນໄຫວຮ່າງກາຍໜ້ອຍລົງ  ເປັນຜົນໃຫ້ຄວາມນັບຖືຕໍ່ໂຕເອງ ແລະ ຜົນການຮຽນອ່ອນລົງ ເຊິ່ງຈະສົ່ງຜົນກະທົບຕໍ່ຈິດໃຈຂອງເດັກໃນອີກຫລາຍໆດ້ານໃນເວລາຕໍ່ມາ.

     – ໃນຖານະຜູ້ປົກຄອງຄວນເຮັດແນວໃດ ?

     ມີປັດໄຈຫລາຍຢ່າງ ເຊັ່ນ: ສະພາບແວດລ້ອມຢູ່ເຮືອນ, ສະຖານະທາງສັງຄົມ, ເສດຖະກິດ ແລະ ໂຮງຮຽນ ເຊິ່ງອາດສົ່ງຜົນກະທົບໃນທາງລົບຕໍ່ພັດທະນາການຂອງເດັກ, ແຕ່ຄວາມຈິງທີ່ບໍ່ອາດຫລີກເວັ້ນໄດ້ກໍແມ່ນການໃຊ້ເວລາເບິ່ງໜ້າຈໍທີ່ຫລາຍເກີນໄປຈະເຮັດໃຫ້ເດັກບໍ່ສາມາດຫລິ້ນກິລາ, ອ່ານໜັງສື, ຫລິ້ນກາງແຈ້ງ ແລະ ໂອ້ລົມກັບອ້າຍນ້ອງ ຫລື ໝູ່ເພື່ອນ. ການຫລຸດເວລາຂອງການເບິ່ງແຕ່ໜ້າຈໍຈຶ່ງເປັນທາງອອກທີ່ດີ ແລະ ງ່າຍ. ທ່ານອາດຫາປື້ມດີໆມາອ່ານກັບລູກຈະເປັນການຊ່ວຍດັດແກ້ສະໝອງຂອງເດັກໄດ້ ດັ່ງນັ້ນ ສິ່ງທີ່ພໍ່ແມ່ຄວນເຮັດກໍຄືຈຳກັດເວລາການເບິ່ງໜ້າຈໍໂທລະສັບຂອງລູກ ລວມເຖິງຂອງຜູ້ປົກຄອງນຳ ແລ້ວມາເພີ່ມເວລາຂອງການເຮັດກິດຈະກຳຮ່ວມກັນ, ອາດຈະຫລິ້ນເກມ, ອ່ານໜັງສື, ອອກກຳລັງກາຍ, ທ່ອງທ່ຽວ, ໄປກິນອາຫານ ນອກເຮືອນ ສິ່ງເຫລົ່ານີ້ຈະຊ່ວຍປັບປຸງພັດທະນາການ ແລະ ພຶດຕິກຳຂອງເດັກໃຫ້ດີຂຶ້ນໄດ້.

error: Content is protected !!