ສ້າງເຂື່ອນ ຈະບໍ່ໃຫ້ເຄື່ອນ (ອີກ)

- 38246132 701852953495267 209187709296574464 n - ສ້າງເຂື່ອນ ຈະບໍ່ໃຫ້ເຄື່ອນ (ອີກ)
- Untitled design - ສ້າງເຂື່ອນ ຈະບໍ່ໃຫ້ເຄື່ອນ (ອີກ)

​ໂດຍ : ມຶກ​ບໍ່​ແຫ້ງ

ການພັດທະນາ ພະລັງໄຟຟ້ານໍ້າຕົກ ຫຼື ເຂື່ອນເປັນວຽກງານສຳຄັນຂອງການສ້າງລາຍຮັບແກ່ປະເທດ ແຕ່ເນື່ອງ ຈາກ ອຸບັດເຫດ ກ່ຽວກັບ ເຂື່ອນໃນໄລຍະຜ່ານມາ ລັດຖະບານຈະເຄັ່ງຄັດເລື່ອງນີ້ຫຼາຍຂຶ້ນ.

ເປັນທີ່ຮັບຮູ້ຢ່າງກວ້າງຂວາງວ່າ ສປປ ລາວ ມີທ່າແຮງໃນການພັດທະນາ ພະລັງໄຟຟ້ານໍ້າຕົກຢ່າງຫຼວງຫຼາຍ ຍ້ອນມີສາຍນໍ້າທີ່ອຸດົມສົມບູນ ແລະພູມສັນຖານທີ່ເອື້ອຍອຳນວຍ, ຈຶ່ງເຮັດໃຫ້ລັດຖະບານເຮົາຖືເອົາວຽກງານ ນີ້ເປັນບູລິມະສິດ ໜຶ່ງ ຂອງການພັດທະນາເສດຖະກິດ-ສັງຄົມ.

ແຕ່ເນື່ອງຈາກ ອຸບັດເຫດ ສອງຄັ້ງໃນໄລຍະສອງປີຜ່ານມາ ຄື ເຂື່ອນ ນໍ້າອ້າວ ແລະສັນເຂື່ອນ ເຊປຽນ ເຊນໍ້ານ້ອຍ ແຕກນັ້ນໄດ້ສ້າງຄວາມເສຍຫາຍ ທາງດ້ານຊີວິດ ແລະຊັບສິນເປັນຈຳນວນຫຼວງຫຼາຍ ທີ່ບໍ່ສາມາດປະເມີນຄ່າໄດ້ເລີຍ, ສ້າງພາບພົດທີ່ໜ້າເປັນຫ່ວງ ແລະກັງວົນແກ່ປວງຊົນຊາວລາວຢ່າງຫຼວງຫຼາຍ.

ເມື່ອເປັນເຊັ່ນນັ້ນ, ລັດຖະບານເຮົາຈຶ່ງມີຄວາມສະດຸ້ງໄວໃນການແກ້ໄຂບັນຫານີ້ຢ່າງເຄັ່ງຮ້ອນ, ກະຊວງພະລັງງານ ແລະບໍ່ແຮ່ ໄດ້ແຈ້ງໃຫ້ພວກເຮົາຮັບຮູ້ຜ່ານ ກອງປະຊຸມ ສະໄໝສາມັນເທື່ອທີ VI ສະພາແຫ່ງຊາດຊຸດທີ VIII ວ່າ “ລັດຖະບານຈະເຮັດວຽກກັບຊ່ຽວຊານຕ່າງປະເທດ ເພື່ອກວດສອບ ເຂື່ອນທັງໝົດ ໃນລາວ”.  

ນອກນັ້ນ ການກວດສອບຂອງລັດຖະບານໃນຄັ້ງນີ້ ຍັງຈະແນໃສ່ວ່າ ບັນດານິຕິກຳທີ່ມີຢູ່ ໄດ້ຮັບການຈັດຕັ້ງປະຕິບັດ ຢ່າງຖືກຕ້ອງແລ້ວບໍ່ ໂດຍສະເພາະ ຂັ້ນຕອນໃນການອະນຸຍາດໃຫ້ສຳປະທານລົງທຶນ​ພັດທະນາ​ເຂື່ອນ​ດັ່ງກ່າວ.

ໃນ​ກອງ​ປະ­ຊຸມ​ເຜີຍ­ແຜ່ ແລະ ປຶກ­ສາ​ຫາ­ລື​ກ່ຽວ​ກັບ​ແຜນ​ດຳ­ເນີນ​ການ​ກວດ­ກາ​ຄວາມ​ປອດ​ໄພ​ຂອງ​ເຂື່ອນ​ໄຟ­ຟ້າ ທີ່​ມີ​ກຳ­ລັງ​ຕິດ​ຕັ້ງ​ຫຼາຍ​ກວ່າ 15 ເມ​ກາ​ວັດ​ຂຶ້ນ​ໄປ​ ຈັດ​ຂຶ້ນ​​ໃນວັນ​ທີ 29 ພະ­ຈິກ 2018 ​ໂດຍກະ­ຊວງ​ພະ­ລັງ­ງານ ແລະ ບໍ່​ແຮ່ (ພບ) ທ່ານ ສີ​ນາ­ວາ ສຸ​ພາ­ນຸ​ວົງ ຮອງ​ລັດ­ຖະ­ມົນ­ຕີ​ກະ­ຊວງ ພະລັງງານ ແລະບໍ່ແຮ່ ກ່າວ​ວ່າ “ເພື່ອ​ຫຼີກ­ເວັ້ນ ແລະ ຫຼຸດ­ຜ່ອນ​ບັນ­ຫາ​ຜົນ​ກະ­ທົບ​ຈາກ​ເຂື່ອນ​ໄຟ­ຟ້າ ເປັນ­ຕົ້ນ ບັນ­ຫາ​ເຂື່ອນ​ແຕກ ກະ­ຊວງ ພະລັງງານ ແລະບໍ່ແຮ່ ໄດ້​ອອກ​ແຈ້ງ​ການ​ເຖິງ​ເຈົ້າ​ຂອງ​ເຂື່ອນ​ໄຟ­ຟ້າ​ທົ່ວ​ປະ­ເທດ ໃຫ້​ດຳ­ເນີນ​ການ​ກວດ­ກາ​ຄວາມ​ປອດ​ໄພ​ຂອງ​ເຂື່ອນ​ຕົນ​ເອງ ແລ້ວ​ສົ່ງ​ບົດ​ລາຍ​ງານ​ໃຫ້​ກະ­ຊວງ ໂດຍ​ສົມ­ທົບ​ກັບ​ຊ່ຽວ­ຊານ​ຕ່າງ­ປະ­ເທດ ເພື່ອ​ດຳ­ເນີນ​ການ​ທົບ​ທວນ ແລະ ມີ​ມາດ​ຕະ­ການ​ໃນ​ຂັ້ນ​ຕໍ່​ໄປ”

- Wave100S AD to Website 2020 0 - ສ້າງເຂື່ອນ ຈະບໍ່ໃຫ້ເຄື່ອນ (ອີກ)

 ທ່ານ ກ່າວຕຶ່ມວ່າ “ເຊິ່ງ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ກວດ­ກາ​ດັ່ງ­ກ່າວ ໄດ້​ເນັ້ນ​ໃຫ້​ເຂື່ອນ​ໄຟ­ຟ້າ​ພະ­ລັງ­ງານ​ນໍ້າ ເນັ້ນ​ກວດ­ກາ​ຄືນ​ການ​ອອກ​ແບບ​ກໍ່­ສ້າງ ແລະ ການ​ບໍ­ລິ­ຫານ​ຄຸ້ມ​ຄອງ​ນໍ້າ​ໃນ​ເຂື່ອນ​ເປັນ​ຫຼັກ”.

ນອກນັ້ນ, ກະຊວງພະລັງງານ ຍັງຢັ້ງຢືນ ອີກວ່າ ໃນຕໍ່ໜ້ານີ້ ກ່ອນຈະເລືອກຜູ້ລົງທຶນ ແລະຜູ້ພັດທະນາໂຄງການ, ລັດຖະບານ ຈະຕ້ອງໄດ້ມີການຄັດເລືອກ ຄັດຈ້ອນຢ່າງລະອຽດ ແລະລະມັດລະວັງຫຼາຍຂຶ້ນ ເພື່ອໃຫ້ແນ່ໃຈວ່າ ຜູ້ລົງທຶນ ແລະຜູ້ພັດທະນາ ຈະສາມາດປະຕິບັດຕາມມາດຕະຖານ ແລະລະບຽບການຂອງສປປລາວ ເພື່ອຮັບປະກັນຄວາມປອດໄພ ຫຼາຍຂຶ້ນ.

ຄວາມຈິງແລ້ວພວກເຮົາມີ ບັນດານິຕິກຳທີ່ຂ້ອນຂ້າງຮັດກຸມ ແລະຊັດເຈນ ສົມຄວນ ເຊັ່ນ ນະໂຍບາຍ ການພັດທະນາ ໄຟຟ້ານໍ້າ​ຕົກແບບ​ຍືນ​ຍົງ ຂອງສປປລາວ ໃນປີ 2015 ແລະຫຼັງຈາກນັ້ນ ກໍໄດ້ມີ “ບົດແນະນຳການຈັດຕັ້ງປະຕິບັດ” ໃນ ປີ 2016 ເຊິ່ງນຳໃຊ້ກັບໂຄງການໄຟຟ້າພະລັງງານນໍ້າ ທີ່ມີກຳລັງການຜະລິດ ຕັ້ງແຕ່ 15 ເມກາວັດ ຂຶ້ນໄປ.

ນະໂຍບາຍ ແລະບົດແນະນຳ ດັ່ງກ່າວ ໄດ້ມີເນື້ອໃນທີ່ສຳຄັນຫຼາຍຢ່າງ ເປັນຕົ້ນ ການຮັບປະກັນ ຄວາມໂປ່ງໄສ, ການປຶກສາຫາລື ນຳຜູ້ໄດ້ຮັບຜົນກະທົບ, ການເປີດເຜີຍຂໍ້ມູນ, ການແບ່ງປັນ ຜົນປະໂຫຍດ ແລະອື່ນໆ. ຍິ່ງກວ່ານັ້ນ, ໃນນະໂຍບາຍ ແລະບົດແນະນຳດັ່ງກ່າວ ຍັງຮຽກຮ້ອງໃຫ້ ຜູ້ພັດທະນາ ໂຄງການຕ້ອງຮັບປະກັນຄວາມປອດໄພ ແຕ່ລະໄລຍະ ນັບຕັ້ງແຕ່ ການອອກແບບ, ການກໍ່ສ້າງ ແລະໄລຍະການດຳເນີນການຜະລິດ.

ສິ່ງສຳຄັນ ພວກເຮົາຈະສາມາດເຮັດໃຫ້ ນັກລົງທຶນ ແລະຜູ້ພັດທະນາ ທຸກໂຄງການ ສາມາດປະຕິບັດໄດ້ເປັນເອກະພາບ ຕາມ ນິຕິກຳເຮົາແນວໃດ ເພື່ອເຮັດ ເຂື່ອນຂອງພວກເຮົາ ຈະບໍ່ເຄື່ອນອີກ. Bottom of Form

- WhatsApp Image 2020 05 27 at 5 - ສ້າງເຂື່ອນ ຈະບໍ່ໃຫ້ເຄື່ອນ (ອີກ)
- WhatsApp Image 2020 05 27 at 5 - ສ້າງເຂື່ອນ ຈະບໍ່ໃຫ້ເຄື່ອນ (ອີກ)
error: Alert: ເນື້ອຫາຂ່າວມີລິຂະສິດ !!