ນາຍົກລັດຖະມົນຕີ ພົບປະໂອ້ລົມການນຳຫລັກແຫລ່ງແຂວງເຊກອງ

- PM to sekong - ນາຍົກລັດຖະມົນຕີ ພົບປະໂອ້ລົມການນຳຫລັກແຫລ່ງແຂວງເຊກອງ
- Untitled design - ນາຍົກລັດຖະມົນຕີ ພົບປະໂອ້ລົມການນຳຫລັກແຫລ່ງແຂວງເຊກອງ


      ໃນວັນທີ 18 ທັນວານີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດພົບປະໂອ້ລົມການນຳ ແລະ ພະນັກງານຫລັກແຫລ່ງຂອງແຂວງເຊກອງ, ໂດຍມີທ່ານເຈົ້າແຂວງ ຄໍາເຜີຍ ບຸດດາວຽງ ພ້ອມດ້ວຍພະນັກງານຫລັກແຫລ່ງຂະແໜງການຕ່າງໆໃຫ້ການຕ້ອນຮັບຢ່າງອົບອຸ່ນ.

      ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ຮັບຟັງລາຍງານຫຍໍ້ສະພາບການພັດທະນາເສດຖະກິດ-ສັງຄົມຂອງແຂວງປະຈຳປີ 2018 ເຫັນວ່າທົ່ວແຂວງສືບຕໍ່ມີຄວາມສະຫງົບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວ 8,3%, ລາຍຮັບສະ ເລ່ຍຕໍ່ຫົວຄົນບັນລຸໄດ້ 1.623 ໂດລາ/ຄົນ/ປີ; ການເກັບລາຍຮັບເຂົ້າງົບປະມານຮອດປັດຈຸບັນປະຕິບັດໄດ້ 93% ຂອງແຜນການ; ຄອບຄົວທຸກຍາກຍັງເຫລືອ 8,7%; ອັດຕາເຂົ້າຮຽນສຸດທິຊັ້ນປະຖົມກວມ 97%, ມັດທະຍົມຕົ້ນກວມ 84,7%, ມັດທະຍົມຕອນປາຍກວມ 56,8% ແລະ ອື່ນໆ.

       ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມໂດຍໄດ້ຍົກໃຫ້ເຫັນສະພາບການພັດທະນາເສດຖະກິດ-ສັງຄົມຂອງຊາດ, ສະພາບການ ທີ່ເກີດຂຶ້ນຢູ່ໃນພາກພື້ນ ແລະ ສາກົນທີ່ພົ້ນເດັ່ນ ແລະ ອື່ນໆ. ແຕ່ອັນສຳຄັນທ່ານໄດ້ມີຄຳເຫັນຊີ້ນຳໃຫ້ແຂວງເອົາໃຈໃສ່ຕໍ່ວຽກງານກໍ່ສ້າງຮາກຖານການ ເມືອງໃຫ້ເລິກເຊິ່ງເຖິງຖອງ ແລະ ເປັນປົກກະຕິຕໍ່ເນື່ອງ; ສຸມໃສ່ປະຕິບັດວຽກງານແກ້ໄຂຄວາມທຸກຍາກຂອງປະຊາຊົນໃຫ້ນັບມື້ດີຂຶ້ນ, ເຮັດໃຫ້ປະຊາຊົນຮູ້ຈັກວິທີທຳມາຫາກິນ, ມີຢູ່ມີກິນ, ຮູ້ຄ້າ-ຮູ້ຂາຍ, ຮູ້ລົງທຶນ, ຮູ້ທຳການຜະລິດແບບໃໝ່ທີ່ທັນສະໄໝ ເຊິ່ງການແກ້ໄຂຄວາມທຸກຍາກນັ້ນແມ່ນໃຫ້ເນັ້ນໃສ່ຄຸນນະພາບ ແລະ ຄວາມຍືນຍົງເປັນສິ່ງສຳຄັນ (ບໍ່ໃຫ້ແລ່ນນຳຕົວເລກພຽງດ້ານດຽວ); ເອົາໃຈໃສ່ດຶງດູດການລົງທຶນໃຫ້ຫລາຍ ໄປຄຽງຄູ່ກັບຄຸນນະພາບ ແລະ ມີປະສິດທິຜົນສູງ (ຕ່າງຝ່າຍຕ່າງມີຜົນປະໂຫຍດ ຕະ ຫລອດຮອດປະຊາຊົນກໍ່ໃຫ້ມີຜົນປະໂຫຍດ); ສືບຕໍ່ຮັກສາມູນເຊື້ອອັນດີງາມຂອງຊາດ, ຂອງເຜົ່າ ກໍຄືມູນເຊື້ອພິລະອາດຫານ, ດຸໝັ່ນຂະຫຍັນພຽນ, ສາມັກ ຄີຊ່ວຍເຫລືອເຊິ່ງກັນ ແລະ ກັນຂອງປະຊາຊົນຊາວແຂວງເຊກອງໃຫ້ກວ້າງ ຂວາງ ແລະ ຍືນຍົງຕະຫລອດໄປ. ເພື່ອສ້າງເງື່ອນໄຂເອື້ອອຳ ນວຍໃຫ້ແກ່ການປົກປັກຮັກສາ ແລະ ສ້າງສາພັດທະນາແຂວງເຊກອງມີຄວາມໜັກແໜ້ນ, ເຂັ້ມແຂງ ແລະ ກ້າວໜ້າຢ່າງບໍ່ຢຸດຢັ້ງ.

      ໃນມື້ດຽວກັນ, ທ່ານນາຍົກລັດຖະມົນຕີ ພ້ອມຄະນະ ຍັງໄດ້ໄປພົບປະໂອ້ລົມຄູອາຈານ ແລະ ນັກຮຽນ-ນັກສຶກສາ ໂຮງຮຽນເຕັກນິກວິຊາຊີບປະສົມຂອງແຂວງ ແລະ ໂຮງຮຽນສາມັນກິນ-ນອນຊົນເຜົ່າຂອງແຂວງ. ນອກຈາກນັ້ນໄດ້ໄປຢ້ຽມຢາມໂຄງການປູກອ້ອຍ ແລະ ຜະລິດນໍ້າຕານ ລວມທັງຟາມລ້ຽງງົວຂອງບໍລິສັດແມ່ນໍ້າຂອງຮ່ວມທຸລະກິດຈຳກັດ ທີ່ບ້ານຕິ້ວ ເມືອງລະມາມ, ຊຶ່ງການໄປຢ້ຽມຢາມໂຮງຮຽນແຕ່ລະບ່ອນ, ທ່ານນາຍົກລັດຖະມົນຕີ ໄດ້ມອບເຄື່ອງໃຊ້ຫ້ອງການ (ຄອມພິວເຕີ, ເຄື່ອງພິມເອກະສານ ແລະ ອື່ນໆ ຈຳນວນ 2 ຊຸດ) ພ້ອມດ້ວຍເງິນສົດ ຈໍານວນ 20 ລ້ານກີບ ເພື່ອສ້າງເງື່ອນໄຂໃຫ້ແກ່ການພັດທະນາການສຶກສາຂອງທ້ອງຖິ່ນມີຄຸນນະພາບສູງເດັ່ນຂຶ້ນ.

- Wave100S AD to Website 2020 0 - ນາຍົກລັດຖະມົນຕີ ພົບປະໂອ້ລົມການນຳຫລັກແຫລ່ງແຂວງເຊກອງ
- WhatsApp Image 2020 05 27 at 5 - ນາຍົກລັດຖະມົນຕີ ພົບປະໂອ້ລົມການນຳຫລັກແຫລ່ງແຂວງເຊກອງ
- WhatsApp Image 2020 05 27 at 5 - ນາຍົກລັດຖະມົນຕີ ພົບປະໂອ້ລົມການນຳຫລັກແຫລ່ງແຂວງເຊກອງ
error: Alert: ເນື້ອຫາຂ່າວມີລິຂະສິດ !!