ພ້ອມກັນຫັນຄັນເລັ່ງ

- Untitled design - ພ້ອມກັນຫັນຄັນເລັ່ງ

ໂດຍ​: ທິດ​ກໍ່າ

ຕາມ​ເຮົາ​ວ່າມາ​ຮອດ​ປີ 2017 ພວກ​ເຮົາ​ທັງຫລາຍ​ຕ້ອງ​ພ້ອມ​ກັນ​ຫັນ​ຄັນ​ເລັ່ງ​ໃຫ້​ເດີນ​ໜ້າ​ຫລາຍ​ກວ່າ​ນີ້ ​ແລະ ໄວກວ່າ​ນີ້. ເປັນຫຍັງ​ຈຶ່ງ​ວ່າ​ແນວ​ນັ້ນ ? ຍ້ອນ​ວ່າຕ້ອງຫັນ​​ເອົາມະຕິ​ 10 ຂອງ​ພັກ​​ໃຫ້ເຂົ້າ​ສູ່​ລວງ​ເລິກຢ່າ​ງມີ​ໝາກ​ຜົນ. ການ​ປະຕິບັດ​ແຜນ​ພັດທະນາ​ເສດຖະກິດ​-ສັງຄົມ​ແຫ່ງລັດ​ 5 ປີ​ຄັ້ງ​ທີ 8 ພວກ​ເຮົາກໍ​ເດີນ​ມາ​ໄດ້ເຄິ່ງທາງ​ແລ້ວ ​ແລະ ​ຍັງຈະ​ສືບ​ຕໍ່​ໄປ​ອີກ 3 ປີ​ກວ່າ ​ກໍ​ຈະ​ໄປ​ເຖິງຫລັກ​ໄຊ​​ໃນປີ 2020. ​ເປົ້າ​ໝາຍສູ້​ຊົນ​ພວກ​ເຮົາແມ່ນນໍາພາ​ປະ​ເທດ​ຊາດຫ​ລຸດພົ້ນອອກຈາກ​ຄວາມທຸກ​ຍາກ ​ແລະ ​ດ້ອຍ​ພັດທະນາ.

ນັບ​ແຕ່​​ປະຕິບັດ​ມະຕິ​ຂອງ​ພັກ ກໍ​ຄື​​ແຜນ​ພັດ​ທະນາ​ເສດຖະກິດ-ສັງຄົມ​ແຫ່ງ​ລັດ​ໃນ​ຊຸມ​ປີ​ຜ່ານ​ມາ ​ຄື​ນັບ​ແຕ່​ມະຕິ 5, 6, 7 ​​ແລະ​ 8 ພວກ​ເຮົາ​ໄດ້​ມີ​ຜົນງານ ​ແລະ ໄຊ​ຊະນະຢ່າງ​ລົ້ນ​ພົ້ນຕໍ່​ປະ​ເທດ​ຊາດ ​ແລະ ​ປະຊາ​ຊົນ​ບັນດາ​ເຜົ່າ. ທິດ​ກໍ່າ​ຂໍ​ຍົກ​​ໂຕ​ທີ່ພົ້ນ​ເດັ່ນ​ກໍ​ແມ່ນ​ບັນຫາ​ການ​ປົກ​ປັກຮັກສາ ​ແລະ ​ສ້າງສາປະ​ເທດຊາ​ດອັນ​ແສນ​ຮັກ ​​ແລະ ​ຫວງ​ແຫນຂອງ​ພວກ​ເຮົາ​ໃຫ້​ເດີນ​ໜ້າ​ໄປ​ຕິກໆ ຫລື ​ຖ້າ​​ຈະ​ເບິ່ງ​ໃນ​ແຕ່​ລະ​ດ້ານ​ກໍ​​ໄດ້​ແກ່: ອັນ​ທີ​ໜຶ່ງ​​ການ​ເມືອງ​ມີ​ສະຖຽນລະ​ພາບ​ໜັກ​ແໜ້ນ ​ແລະ ​ໝັ້ນຄົງ, ດ້ານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບກໍນັບ​ມື້​ຫັນ​ເຂົ້າ​ສູ່​ຄວາມ​ສະຫງົບສຸກ ​ແລະ ​ຄວາມ​ເປັນ​ລະບຽບ​ຮຽບຮ້ອຍ​, ອັນ​ສອງ​ມາເບິ່ງ​ໃນ​ດ້ານ​ເສດຖະກິດກໍ​ນັບ​ມື້ຂະຫຍາຍຕົວ​ໃນ​ຈັງຫວະ​ທີ່​ໄວ​ສົມຄວນ​ ຕົວຢ່າງ​ລວມຍອດ​ຜະລິດ​ຕະພັນພາຍໃນ (GDP) ໃນແຕ່ລະປີໄດ້ເພີ່ມຂຶ້ນຈາກ 4% ມາເປັນ 5%, 6% ແລະ ມາຮອດປັດຈຸບັນແມ່ນຢູ່​ໃນ​ເກນອັດຕາສະເລ່ຍ 7% ຕໍ່ປີ. ການກໍ່ສ້າງພຶ້ນຖານໂຄງລ່າງເຊັ່ນ: ຖະໜົນຫົນທາງ, ​ເຂື່ອນ​ໄຟຟ້າ, ​ຕຶກ​ອາຄານ, ສໍານັກງານ​-ອົງການ, ​ໂຮງ​ຈັກ​-ໂຮງງານ, ​ເຮືອນ​ຊານ​ບ້ານ​ຊ່ອງ​ກໍພວມມີ​ການພັດທະນາ ​ແລະ ​ຂະຫຍາຍຕົວ​ໄປ​ໃນ​ທຸກທ້ອງ​ຖິ່ນ​ເຂດ​ແຂວງ ແລະ ອັນ​ທີ​ສາມ​ເວົ້າ​ເຖິງໃນ​ດ້ານ​ວັດທະນະ​ທໍາ-ສັງຄົມ​ກໍ​ນັບ​ມື້​ມີ​ຄວາມ​ຈະ​ເລີ​ນຮຸ່ງ​ເຮືອງ ​ແລະ ​ກ້າວໜ້າ​ໄປ​ເລື້ອຍໆ ​ຄື​ລະບົບ​ການ​ສຶກສາໄດ້​ຫັນເຂົ້າ​ສູ່​ຄຸນ​ນະພາ​ບ​ໃໝ່, ​ໂຮງຮຽນ​ສາມັນ​ວິຊາ​ຊີບ​ໄດ້​ຮັບ​ການປັບປຸງ​ກໍ່ສ້າງຢ່າງ​ກວ້າງ​ຂວາງ, ​ໂຮງໝໍ​​ໄດ້ຮັບການ​ປັບປຸງ​ປົວ​ແປງ ​ແລະ ​ກໍ່ສ້າງ​ໃໝ່​ນັບ​ແຕ່​ຂັ້ນ​ສູນ​ກາງ​ຮອດທ້ອງ​ຖິ່ນ.

ທັງ​ໝົດ​ທີ່​ທິດ​ກໍ່າ​ເວົ້າ​ມາ​ນີ້​ແມ່ນ​ຜົນງານ ​ແລະ ​ໄຊຊະນະ​ຂອງ​ພວກ​ເຮົາ​ທີ່​ໄດ້​ພ້ອມ​ກັນ​ເສຍສະຫລະທັງ​ເລືອດ​ເນື້ອ​ເຫື່ອ​ແຮງ​ຂອງ​ຕົນ​ພ້ອມ​ກັນ​ສ້າງ​ບ້ານ​ແປງ​ເມືອງ​ໃຫ້​ຈະ​ເລີ​ນຮຸ່ງເຮືອງ​ພາຍ​​ໃຕ້​ການ​ນໍາພາ​ຂອງພັກ​ ແລະ ​ລັດຖະບານ​ໃນ​ໄລຍະ 40 ກວ່າປີ​ຜ່ານ​ມາ. ສົມ​ທຽບ​ໃສ່​ຍຸກ​ປະຫວັດສາດສອງ​ສາມຮ້ອຍ​ປີມາ​ນີ້ ປະ​ເທດ​ລ້ານ​ຊ້າງ​ຂອງ​ພວກ​ເຮົາ​ຖືກ​ຕົກທຸກ​ໄດ້​ຍາກ, ​ເປັນ​ຫົວ​ເມືອງ​ຂຶ້ນ​ຂອງ​ສັກ​ດີ​ນາ​ຕ່າງ​ດ້າວ ​ແລະ ​ຈັກກະພັດ​ຜູ້​ຮຸກ​ຮານ.

- Wave100S AD to Website 2020 0 - ພ້ອມກັນຫັນຄັນເລັ່ງ

​ເຖິງ​ຢ່າງ​ໃດ​ກໍ​ດີ, ​ຕາມ​ທິດ​ກໍ່າ​ວ່າ​ໃນ​ຊຸມ​ປີຜ່ານມາ​ພວກ​ເຮົາ​​ທັງ​ມີ​ອັນ​​ໄດ້ ​ແລະ ​ທັງ​ມີ​ອັນ​ເສຍ. ໂຕ​ທີ່​ເຮົາ​ໄດ້​ນັ້ນແມ່ນ​ບັນດາ​ຜົນງານ ​ແລະ ​ໄຊຊະນະ​ທີ່​ໄດ້​ເວົ້າ​ມາ​ຂ້າງ​ເທິງ. ​ແຕ່​ໂຕ​ທີ່​ເສຍ​ໄປ​ນັ້ນ​ກໍ​ແມ່ນເລື່ອງ​ໄມ້,​ ເລື່ອງ​ເງິນ ​ແລະ ວັດຖຸ​ຊັບ​ສິນ​ຂອງ​ຊາດຈໍານວນ​ໜຶ່ງ​​ໄດ້​ຖືກ​ພວກ​ສວຍ​ໂອກາດ​ສໍ້​ລາດ​ບັງຫລວງຍັກ​ຍອກ​ເອົາ​ໄປ​ຢ່າງຫລວງຫລາຍສົມຄວນ. ຖ້າ​ຫາກ​ໄດ້​ຊັບ​ສິນ​ທີ່ເສຍ​ໄປເຫລົ່ານັ້ນຄືນ​ມາກໍອາດ​ເຮັດ​ໃຫ້​ປະ​ເທດ​ຊາດ​ມີ​ຢູ່​ມີ​ກິນ ​ແລະ ​ຈະ​ເລີ​ນ​ໄປ​ໄວ​ກວ່າ​ນີ້. ນີ້​ຄື​ບົດຮຽນ​ອັນ​ເຈັບ​ແສບ​ທີ່​ພວກ​ເຮົາ​ຄວນ​ພ້ອມ​ກັນ​ຄິດ.

ຕໍ່​ໄປ​ນີ້​ເພື່ອ​​ເຮັດ​ໃຫ້​ປະ​ເທດ​ຊາດ​ໄດ້ຫລຸດພົ້ນ​ອອກ​ຈາກ​ຄວາມທຸກ​ຍາກ ​ແລະ ​ດ້ອຍ​ພັດທະນາ​ ມີ​ແຕ່​ພ້ອມ​ກັນ​ຫັນ​ຄັນ​ເລັ່ງ, ເຮັດ​ໃຫ້​ໂສ້​ມັນ​ເຄັ່ງໆ​ແລ້ວ​ຈະ​ເຫັນໝາກຜົນ​ຕາມ​ມາ​ຢ່າງ​ບໍ່​ຕ້ອງ​ສົງ​​ໄສ.

- WhatsApp Image 2020 05 27 at 5 - ພ້ອມກັນຫັນຄັນເລັ່ງ
- WhatsApp Image 2020 05 27 at 5 - ພ້ອມກັນຫັນຄັນເລັ່ງ
error: Alert: ເນື້ອຫາຂ່າວມີລິຂະສິດ !!