ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ສໍາເລັດດ້ວຍຜົນຈົບງາມ

- 19861   2490900   KETH1801 - ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ສໍາເລັດດ້ວຍຜົນຈົບງາມ
- Untitled design - ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ສໍາເລັດດ້ວຍຜົນຈົບງາມ

            ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII, ໄດ້ອັດລົງດ້ວຍຜົນສໍາເລັດຈົບງາມ ໃນວັນທີ 21 ທັນວານີ້, ພາຍຫຼັງໄດ້ດໍາເນີນມາເປັນເວລາ 23 ວັນ, ໂດຍປະທານ​ຂອງທ່ານນາງປານີ​ ຢາ​ທໍ່​ຕູ້ປະທານ​ສະພາ​ແຫ່ງ​ຊາດ, ໃຫ້ກຽດເຂົ້າຮ່ວມ​ໂດຍທ່ານ  ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ​ ປະຕິວັດລາວ  ປະທານປະເທດ​ແຫ່ງ ສປປ ລາວ, ມີທ່ານ ທອງ​ລຸນ ສີ​ສຸ​ລິດ​ນາຍົກລັດຖະມົນຕີແຫ່ງ ສປປ ລາວ, ມີບັນດາການນຳ ພັກ-ລັດ,  ສະມາຊິກສະພາແຫ່ງຊາດ (ສສຊ)  ແລະ ແຂກຖືກເຊີນເຂົ້າຮ່ວມ.

ທ່ານປະທານສະພາແຫ່ງຊາດ ໄດ້ກ່າວບົດສູນທອນພົດປິດກອງປະຊຸມວ່າ: ຕະຫຼອດໄລຍະເວລາດັ່ງກ່າວ ສະມາຊິກສະພາແຫ່ງຊາດໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ໄດ້ສຸມສະຕິປັນຍາຂອງຕົນ ເຂົ້າໃນການຄົ້ນຄວ້າ, ປະກອບຄໍາຄິດເຫັນຢ່າງມີເຫດຜົນ, ມີເນື້ອໃນເລິກເຊິ່ງ ແລະ ກວ້າງຂວາງ, ພ້ອມທັງມີຄວາມເປັນເອກະພາບສູງ ໃນການພິຈາລະນາ ແລະ ຮັບຮອງເອົາບັນດາເນື້ອໃນຕ່າງໆເຊັ່ນ: ບົດລາຍງານຂອງລັດຖະບານ ກ່ຽວກັບແຜນພັດທະນາເສດຖະກິດ-ສັງຄົມ, ແຜນເງິນຕາ, ແຜນງົບປະມານ, ບົດລາຍງານອົງການກວດສອບ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ ກາງສະໄໝ ແລະ ປະຈຳປີ 2018 ແລະ ທິດທາງປີ 2019. ໄດ້ຕີລາສູງຕໍ່ຄວາມພະຍາຍາມຊີ້ນຳ-ນຳພາ ຂອງລັດຖະບານ ແລະ ບັນດາອົງການທີ່ກ່ຽວຂ້ອງດັັ່ງກ່າວ ທີ່ໄດ້ຜ່ານຂໍ້ຫຍຸ້ງຍາກ, ສິ່ງທ້າທາຍ, ສູ້ຊົນຈັດຕັ້ງປະຕິບັດມະຕິກອງປະຊຸມສະໄໝສາມັນແຕ່ລະຄັ້ງ ຂອງສະພາແຫ່ງຊາດ ຕາມຂອບສິດ ແລະ ພາລະບົດບາດຂອງຕົນ ແລະ ສາມາດຍາດໄດ້ຜົນສຳເລັດໃນຫລາຍດ້ານ ອັນໄດ້ປະກອບສ່ວນເຂົ້າໃນການສືບຕໍ່ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ມີຄວາມຍຸຕິທໍາ, ເສດຖະກິດ ແລະ ສັງຄົມສືບຕໍ່ການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ ແລະ ຍົກສູງດີຂຶ້ນເປັນກ້າວໆ. ກອງປະຊຸມຍັງໄດ້ວິເຄາະວິໄຈ ຕໍ່ບັນດາຈຸດອ່ອນ, ຂໍ້ຄົງຄ້າງ ແລະ ສະເໜີຫລາຍມາດຕະການທີ່ເປັນຮູບປະທໍາ ແລະ ແທດຕົວຈິງ ເພື່ອແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ, ການເງິນ, ເງິນຕາ, ການຜະລິດທຸລະກິດ, ແກ້ໄຂຜົນຂອງການກວດສອບ, ຜົນການກວດກາຕາມການກວດສອບ ແລະ ແກ້ໄຂປະກົດການຫຍໍ້ທໍ້ ຢູ່ໃນຂົງເຂດວຽກງານສານປະຊາຊົນ ແລະ ໄອຍະການປະຊາຊົນ ໃນແຕ່ລະຄັ້ງ ໃນປີຕໍ່ປີ ໃຫ້ມີຄຸນນະພາບ ແລະ ຫັນປ່ຽນຢ່າງຕັ້ງໜ້າ.

ກອງປະຊຸມ ສະເໜີມາຍັງບັນດາຂະແໜງການສູນກາງ, ທ້ອງຖິ່ນ ຈົ່ງໄດ້ເຊີດຊູຄວາມຮັບຜິດຊອບຂອງອົງການຕົນ ສູ້ຊົນຈັດຕັ້ງປະຕິບັດຄາດໝາຍໃຫຍ່ທີ່ໄດ້ກຳນົດໄວ້ໃນມະຕິຕ່າງໆຂອງກອງປະຊຸມຄັ້ງນີ້ດ້ວຍບັນດານະໂຍບາຍ ມາດຕະການທີ່ບຸກທະລຸຢ່າງແຂງແຮງ, ແທດເໝາະກັບຕົວຈິງຫລາຍຂຶ້ນກວ່າເກົ່າ ແນໃສ່ກະຕຸ້ນເສດຖະກິດ-ສັງຄົມ ໃນການພັດທະນາປະເທດຊາດໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ເປັນຮູບປະທຳ. ພ້ອມທັງໄດ້ຕິດຕາມກວດກາການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດໃນຄັ້ງຜ່ານມາເຊັ່ນ: ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ຮັບຟັງການຊີ້ແຈງອະທິບາຍຈາກ 10 ກະຊວງ, ອົງການ ໃນບາງດ້ານທີ່ພົ້ນເດັ່ນ ແລະ ຮີບດ່ວນ ພົວພັນເຖິງຜົນປະໂຫຍດລວມຂອງຊາດ ແລະ ປະຊາຊົນສ່ວນຫລາຍເປັນຕົ້ນ: ຄຸນນະພາບໃນການກໍ່ສ້າງ ແລະ ສ້ອມແປງຖະໜົນຫົນທາງ, ຄຸນນະພາບການບໍລິການ ການປິ່ນປົວຢູ່ໂຮງໝໍ ແລະ ສຸກສາລາ ແລະ ການແກ້ໄຂປະກົດການຫຍໍ້ທໍ້ ໃນການລະເມີດສັນຍາກູ້ຢືມ. ກອງປະຊຸມໄດ້ຮັບຮອງເອົາການສະເໜີແຕ່ງຕັ້ງສະມາຊິກລັດຖະບານຈຳນວນ 2 ທ່ານ ຕາມການສະເໜີຂອງນາຍົກລັດຖະມົນຕີຄື: ແຕ່ງຕັ້ງທ່ານ ພົນໂທ ວິໄລ ຫຼ້ຄຳຟອງ ເປັນລັດຖະມົນຕີກະຊວງປ້ອງກັນຄວາມສະຫງົບ ແລະ ແຕ່ງຕັ້ງ ທ່ານ ສອນໄຊ ສິດພະໄຊ ເປັນຜູ້ວ່າການທະນາຄານ ແຫ່ງ ສປປ ລາວ, ພ້ອມທັງໄດ້ຮັບຮອງເອົາຊົນເຜົ່າບຣູ ຈາກ 49 ຊົນເຜົ່າ ມາເປັນ 50 ຊົນເຜົ່າ. ນອກນີ້, ກອງປະຊຸມໄດ້ພິຈາລະນາຮັບເອົາບົດລາຍງານການເຄື່ອນໄຫວວຽກງານກາງສະໄໝ ແລະ ປະຈຳປີ 2018 ແລະ ທິດທາງແຜນການຮອດປີ 2020 ແລະ ວຽກງານຈຸດສຸມປີ 2019 ຂອງສະພາແຫ່ງຊາດ. ກອງປະຊຸມຄັ້ງນີ້, ຍັງໄດ້ພິຈາລະນາ ແລະ ຮັບຮອງເອົາໝາຍຈຳນວນ 8 ສະບັບ ຄື: ປະມວນກົດໝາຍແພ່ງ, ກົດໝາຍວ່າດ້ວຍທະນາຄານທຸລະກິດ (ສະບັບປັງປຸງ), ກົດໝາຍວ່າດ້ວຍຄວາມປອດໄພຈາກລັງສີ, ກົດໝາຍວ່າດ້ວຍລາຍເຊັນເອເລັກໂຕຣນິກ, ກົດໝາຍວ່າດ້ວຍການລົດໄຟ, ກົດໝາຍວ່າດ້ວຍການປະກັນສຸຂະພາບ, ກົດໝາຍວ່າດ້ວຍຄົນພິການ ແລະ ກົດໝາຍວ່າດ້ວຍສຳນັກງານຜູ້ຕາງໜ້າ ສປປ ລາວ ປະຈຳຢູ່ຕ່າງປະເທດ. ນອກນີ້, ກອງປະຊຸມຍັງໄດ້ປະກອບຄຳຄິດຄຳເຫັນໃສ່ຮ່າງກົດໝາຍວ່າດ້ວຍທີ່ດິນ ເພື່ອແນໃສ່ຮັບປະກັນຈັດຕັ້ງຜັນຂະຫຍາຍທິດຊີ້ນຳຂອງສູນກາງພັກ ກ່ຽວກັບວຽກງານທີ່ດິນໃນໄລຍະໃໝ່, ເພີ່ມທະວີການຄຸ້ມຄອງຂອງລັດ, ການນໍາໃຊ້ທີ່ດິນທີ່ເປັນຊັບພະຍາກອນອັນລ້ຳຄ່າ ແລະ ເປັນທ່າແຮງຂອງຊາດໃຫ້ມີປະສິດທິຜົນ, ມີຄວາມຍືນຍົງ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມກໍຄືປັບປູງຊີວິດການເປັນຢູ່ຂອງປະຊາຊົນລາວບັນດາເຜົ່າໃຫ້ນັບມື້ນັບດີຂຶ້ນ.

- Wave100S AD to Website 2020 0 - ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ສໍາເລັດດ້ວຍຜົນຈົບງາມ

ກອງປະຊຸມ ຍັງໄດ້ຮຽກຮ້ອງມາຍັງອົງການຈັດຕັ້ງລັດທຸກພາກສ່ວນ, ທຸກຂັ້ນ ພ້ອມດ້ວຍປະຊາຊົນລາວບັນດາເຜົ່າ ແລະ ຜູ້ປະກອບການທັງພາຍໃນ ແລະ ຕ່າງປະເທດ ຈົ່ງພ້ອມກັນນຳເອົາຜົນສຳເລັດຂອງກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍຕາມຂອບເຂດ, ໜ້າທີ່ ແລະ ສິດຂອງຕົນ ດ້ວຍຄວາມເປັນເຈົ້າການ ເພື່ອແນໃສ່ຮັບປະກັນເຮັດໃຫ້ປະເທດຊາດສືບຕໍ່ມີກາພັດທະນາຢ່າງໜັກແໜ້ນ ໃນຊຸມປີຕໍ່ໜ້າ.

- WhatsApp Image 2020 05 27 at 5 - ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ສໍາເລັດດ້ວຍຜົນຈົບງາມ
- WhatsApp Image 2020 05 27 at 5 - ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ສໍາເລັດດ້ວຍຜົນຈົບງາມ
error: Alert: ເນື້ອຫາຂ່າວມີລິຂະສິດ !!