ຄວາມ​ຈິງ​ຂອງ​ກໍລະນີ​ເກີດ​ຂໍ້​ຂັດ​ແຍ່ງ​ທີ່​ດິນ​ຢູ່​ບ້ານ​ດ່ານ​ຊ້າງ

- Untitled design - ຄວາມ​ຈິງ​ຂອງ​ກໍລະນີ​ເກີດ​ຂໍ້​ຂັດ​ແຍ່ງ​ທີ່​ດິນ​ຢູ່​ບ້ານ​ດ່ານ​ຊ້າງ

     ພາຍຫລັງຄລິບ​ວີ​ດີ​ໂອ​ການ​ຖົກ​ຖຽງ​ກັນ​ລະຫວ່າງ​ເຈົ້າໜ້າ​ທີ່ ທີ່​ລົງ​ໄປ​ປະຕິບັດ​ໜ້າ​ທີ່​ຕາມ​ຄຳ​ສັ່ງ​ຂອງ​ສານ​ກັບ​ກຸ່ມ​ຄົນ​ຈຳນວນ​ໜຶ່ງ ຢູ່​ບ້ານ​ດ່ານ​ຊ້າງ ​ເມື່ອ​ສອງ​ສາມ​ວັນ​ຜ່ານ​ມາ​ນີ້ ​ໄດ້​ຖືກ​ເຜີຍ​ແຜ່​ໃນ​ສື່​ສັງຄົມ​ອອນ​ລາຍ (Facebook) ປາກົດ​ວ່າ​ມີ​ຜູ້​ໃຊ້​ສື່​ອອນ​ລາຍ​ດັ່ງກ່າວ​ເປັນ​ຈຳນວນ​ຫລາຍ​ຕ່າງ​ສະ​ແດງ​ຄຳ​ຄິດ​ເຫັນ​ໄປ​ຕ່າງໆ​ນາໆ ​ໂດຍ​ທີ່​ຍັງ​ບໍ່​ທັນ​ຮູ້​ກົກຮູ້ປາຍສາ​ເຫດ​ຂອງ​ເລື່ອງ​ລາວ​ທີ່​ເກີດຂຶ້ນ.

      ຕໍ່​ບັນຫາ​ດັ່ງກ່າວ, ນັກ​ຂ່າວ​ໜັງສືພິມ ລາວ​ພັດທະນາ ​ໄດ້​ສອບ​ຖາມ​ພະ​ແນ​ກຍຸຕິ​ທຳ​ນະຄອນຫລວງ​ວຽງ​ຈັນ ​ໂດຍ​ໄດ້​ຊີ້​ແຈງ​ວ່າ: ​ເຫດການ​ດັ່ງກ່າວ​ແມ່ນ​ເຈົ້າໜ້າ​ທີ່​ລົງ​ໄປ​ແກ້​ໄຂ​ຍົກຍ້າຍ​ສິ່ງ​ປຸກ​ສ້າງ​ຕາມ​ຄຳ​ສັ່ງ​ຂອງ​ສານ​ປະຊາຊົນ​ນະຄອນຫລວງ​ວຽງ​ຈັນ ​ເນື່ອງ​ຈາກ​ວ່າຄະດີ​ດັ່ງກ່າວ ສານ​ປະຊາຊົນ​ໄດ້​ລົງ​ຄຳ​ພິພາກສາ​ໃຫ້​ແບ່ງປັນ​ທີ່​ດິນ​ບ່ອນ​ຂັດ​ແຍ່ງ​ອອກ​ເປັນ 5 ພູດ​ສະ​ເໝີ​ກັນ ​ແລ້ວ​ມອບ​ໃຫ້​ນາງ ຮຽງ ຫລວງ​ພິນິດ (​ໂຈດ) ມີ​ສິດ​ຄຸ້ມ​ຄອງ ​ແລະ ນຳ​ໃຊ້​ທີ່​ດິນ​ຕອນ​ຂັດ​ແຍ່ງ​ນີ້​ຈຳນວນ 4 ພູດ, ສ່ວນ​ອີກ 1 ພູດ ​ໃຫ້​ທ້າວ ກຸມພັນ ສຸ​ລິ​ວົງ (ຈຳ​ເລີຍ) ມີ​ສິດ​ຄຸ້ມ​ຄອງ ​ແລະ ນຳ​ໃຊ້; ​ໃຫ້​ຈຳ​ເລີຍ​ເສຍ​ອາກອນ​ໃຫ້​ລັດ​ອັດຕາ 2% ຂອງ​ມູນ​ຄ່າ​ທີ່​ດິນ​ຈຳນວນ 4 ພູດ, ພ້ອມ​ທັງ​ຮັບຜິດຊອບ​ຄ່າ​ໃຊ້​ຈ່າຍ​ຕ່າງໆ​ໃນ​ເວລາ​ປະຕິບັດ​ຄຳ​ພິພາກສາ​ຂອງ​ສານ; ​ໃຫ້​ໂຈດ​ເສຍ​ອາກອນ​ໃຫ້​ລັດ 2% ຂອງ​ມູນ​ຄ່າ​ທີ່​ດິນ 1 ພູດ ​ແລະ ຄ່າ​ຂໍ​ອຸທອນ 30.000 ກີບ. ພາຍຫລັງ​ຄຳ​ພິພາກສາ​ຂອງ​ສານ​ໃຊ້​ໄດ້​ຢ່າງ​​ເດັດຂາດ​ແລ້ວ ພະນັກງານ​ຈັດຕັ້ງປະຕິບັດ​ຄຳ​ຕັດສິນ​ຂອງ​ສານ​ກໍ​ໄດ້​ດຳ​ເນີນ​ການ​ລົງ​ເກັບ​ກຳ​ຂໍ້​ມູນ, ກວດກາ​ເບິ່ງ​ທີ່​ດິນ​ຕົວ​ຈິງ ​ເຫັນ​ວ່າ​ທີ່​ດິນ​ທີ່​ຂັດ​ແຍ່ງ​ມີ​ເນື້ອທີ່ 38.776 ຕາ​ແມັດ ​ແມ່ນ​ທ້າວ ກຸມພັນ ສຸ​ລິ​ວົງ ​ໄດ້​ແບ່ງ​ຂາຍ​ໃຫ້​ບຸກຄົນ​ອື່ນ​ແລ້ວ​ຈຳນວນ 18.061 ຕາ​ແມັດ, ຍັງ​ເຫລືອ​ຕົວ​ຈິງ​ພຽງ​ແຕ່ 20.715 ຕາ​ແມັດ ​ເຊິ່ງຖ້າ​ແບ່ງ​ເປັນ 5 ພູດ​ ຕາມ​ຄຳ​ພິພາກສາ​ຂອງ​ສານ ທ້າວ ກຸມພັນ ສຸ​ລິ​ວົງ ຈະ​ໄດ້​ຮັບ​ຈຳນວນ 7.755 ຕາ​ແມັດ, ​ແຕ່​ຜູ້ກ່ຽວ​ໄດ້​ຂາຍ​ທີ່​ດິນ​ເກີນ​ພູດ​ທີ່​ຜູ້ກ່ຽວ​ຈະ​ໄດ້​ຮັບ ຈຳນວນ 10.306 ຕາ​ແມັດ. ສະນັ້ນ ຫ້ອງການ​ຈັດຕັ້ງປະຕິບັດ​ຄຳ​ຕັດສິນ​ຂອງ​ສານ​ຈຶ່ງ​ໄດ້​ນຳ​ເອົາ​ຄະດີ​ດັ່ງກ່າວ​ເຂົ້າຜ່ານ​ກອງ​ປະຊຸມ ​ເພື່ອ​ຂໍ​ທິດ​ຊີ້​ນຳ​ຈາກ​ຄະນະ​ນຳ​ກະຊວງ​ຍຸຕິ​ທຳ ​ແລະ ນະຄອນຫລວງ​ວຽງ​ຈັນ ຈຶ່ງ​ໄດ້​ຕົກລົງ “​ໃຫ້​ເອົາ​ທີ່​ດິນ​ທີ່​ທ້າວ ກຸມພັນ ສຸ​ລິ​ວົງ ຄຸ້ມ​ຄອງ​ຢູ່​ນັ້ນມອບ​ໃຫ້​ນາງ ຮຽງ ຫລວງ​ພິນິດ ​ເປັນ​ຜູ້​ຄຸ້ມ​ຄອງ ​ແລະ ນຳ​ໃຊ້, ຖ້າ​ບໍ່ພໍ​ເທົ່າ​ໃດ​ໃຫ້​ກວດກາ​ຊັບ​ຂອງ​ຈຳ​ເລີຍ ​ເພື່ອ​ມາ​ປະຕິບັດ​ໃຫ້​ສຳ​ເລັດ”.

      ມາ​ຮອດ​ວັນ​ທີ 9 ພະຈິກ 2016 ຫ້ອງການ​ຈັດຕັ້ງປະຕິບັດ​ຄຳ​ຕັດສິນ​ຂອງ​ສານ ​ໄດ້​ອອກ​ຄຳ​ສັ່ງ​ເລກທີ 135/ພຍທ.ຫຈສ ​ໃຫ້​ທ້າວ ກຸມພັນ ສຸ​ລິ​ວົງ ຍົກຍ້າຍ​ອອກ​ຈາກ​ທີ່​ດິນ​ພາຍ​ໃນ 45 ວັນ ​ແຕ່​ຜູ້ກ່ຽວ​ບໍ່​ຍົກຍ້າຍ​ອອກ. ມາ​ຮອດ​ວັນ​ທີ 22 ຕຸລາ 2018 ​ໄດ້​ອອກ​ແຈ້ງ​ການ​ເລກທີ 092/ພຍທ.ຫຈສ ​ໃຫ້​ທ້າວ ກຸມພັນ ສຸ​ລິ​ວົງ ຍົກຍ້າຍ​ອອກ​ຈາກ​ທີ່​ດິນ ​ແລະ ມ້າງ​ສິ່ງ​ປຸກ​ສ້າງ​ອອກ​ພາຍ​ໃນ 15 ວັນ, ຖ້າ​ກາຍ​ກຳນົດ​ເວລາ ຫ້ອງການ​ຈັດຕັ້ງປະຕິບັດ​ຄຳ​ຕັດສິນ​ຂອງ​ສານ​ຈະ​ໄດ້​ສົມທົບ​ກັບ​ພາກສ່ວນ​ກ່ຽວຂ້ອງ​ລົງ​ຍົກຍ້າຍ​ໃຫ້​ສຳ​ເລັດ, ​ແຕ່​ທ້າວ ກຸມພັນ ສຸ​ລິ​ວົງ ບໍ່​ຍອມ​ປະຕິບັດ ​ເຊິ່ງຜ່ານ​ມາ​ຜູ້ກ່ຽວ​ກໍ​ໄດ້​ຂຽນ​ຄຳ​ຮ້ອງ​ຂໍ​ຮື້ຟື້ນຄະດີ​ຫາ​ອົງການ​ໄອ​ຍະ​ການ​ປະຊາຊົນ​ສູງ​ສຸດ ​ແລະ ອົງການ​ໄອ​ຍະ​ການ​ປະຊາຊົນ​ສູງ​ສຸດ ກໍ​ໄດ້​ອອກ​ຄຳ​ຕົກລົງ​ບໍ່​ຮື້ຟື້ນຄະດີ ​ແລະ ຂຽນ​ຄຳ​ຮ້ອງ​ຂໍ​ຄວາມ​ເປັນ​ທຳ​ໄປ​ຫາ​ສະພາ​ແຫ່ງ​ຊາດ, ສະພາ​ແຫ່ງ​ຊາດ​ຈຶ່ງ​ໄດ້​ແຈ້ງ​ຕອບ​ທ້າວ ກຸມພັນ ສຸ​ລິ​ວົງ ວ່າ​ຄຳ​ພິພາກສາ​ຂອງ​ສານ​ຖືກຕ້ອງ​ແລ້ວ. ສະນັ້ນ ຫ້ອງການ​ຈັດຕັ້ງປະຕິບັດ​ຄຳ​ຕັດສິນ​ຂອງ​ສານ ຈຶ່ງ​ໄດ້​ລົງ​ຍົກຍ້າຍ ​ແລະ ມ້າງ​ສິ່ງ​ປຸກ​ສ້າງ​ຂອງ​ຜູ້ກ່ຽວ​ອອກ​ຈາກ​ທີ່​ດິນ ​ແລ້ວ​ມອບ​ທີ່​ດິນ​ຈຳນວນ​ເນື້ອທີ່ 20.715 ຕາ​ແມັດ ທີ່​ຜູ້ກ່ຽວ​ຄຸ້ມ​ຄອງ ​ແລະ ນຳ​ໃຊ້​ຢູ່​ນັ້ນ​ໃຫ້​ເປັນ​ກຳມະສິດ​ຂອງ​ຝ່າຍ​ໂຈດ ຈຶ່ງ​ເກີດ​ມີ​ເຫດການ​ດັ່ງກ່າວ ຊຶ່ງ​ເຈົ້າໜ້າ​ທີ່​ແມ່ນ​ປະຕິບັດ​ຕາມ​ລະບຽບ​ກົດໝາຍ.

- Wave100S AD to Website 2020 0 - ຄວາມ​ຈິງ​ຂອງ​ກໍລະນີ​ເກີດ​ຂໍ້​ຂັດ​ແຍ່ງ​ທີ່​ດິນ​ຢູ່​ບ້ານ​ດ່ານ​ຊ້າງ
- WhatsApp Image 2020 05 27 at 5 - ຄວາມ​ຈິງ​ຂອງ​ກໍລະນີ​ເກີດ​ຂໍ້​ຂັດ​ແຍ່ງ​ທີ່​ດິນ​ຢູ່​ບ້ານ​ດ່ານ​ຊ້າງ
- WhatsApp Image 2020 05 27 at 5 - ຄວາມ​ຈິງ​ຂອງ​ກໍລະນີ​ເກີດ​ຂໍ້​ຂັດ​ແຍ່ງ​ທີ່​ດິນ​ຢູ່​ບ້ານ​ດ່ານ​ຊ້າງ
error: Alert: ເນື້ອຫາຂ່າວມີລິຂະສິດ !!