ເອຊີ ມິລານ ຍື່ນອຸທອນຕໍ່ສານກິລາໂລກ ເລື່ອງຖືກ ຢູຟາ ລົງໂທດເຮັດຜິດກົດການເງິນ
ໃນຕົ້ນອາທິດນີ້ ສະໂມສອນບານເຕະ ເອຊີ ມິລານ ທີມຊັ້ນນຳໃນລີກສູງສຸດອີຕາລີ ແລະ ລະດັບໂລກ ໄດ້ຍື່ນອຸທອນຕໍ່ສານກິລາໂລກ ຫລື Court Arbitration of Sport (CAS) ເພື່ອສູ້ຄະດີເລື່ອງຖືກສະຫະພັນບານເຕະເອີຣົບ ຫລື ຢູຟາ ລົງໂທດວ່າ: ເຮັດຜິດກົດລະບຽບການບໍລິຫານດ້ານການເງິນ ຫລື Financial Fair Play (FFP).
ກ່ອນອື່ນຕ້ອງເຂົ້າໃຈວ່າ: ກົດລະບຽບການບໍລິຫານດ້ານການເງິນ ຫລື Financial Fair Play (FFP) ຂອງ ຢູຟາ ແມ່ນຫຍັງ ? ໝາຍເຖິງຂໍ້ບັງຄັບລັກສະນະຕັກເຕືອນການໃຊ້ຈ່າຍເງິນຂອງສະໂມສອນບໍ່ໃຫ້ຂາດດຸນເຊັ່ນ: ລາຍຮັບກັບລາຍຈ່າຍຂອງສະໂມສອນ, ຢູຟາ ຢືນຢັນກວດພົບວ່າ: ສະໂມສອນ ເອຊີ ມີລານ ໃຊ້ຈ່າຍເງິນເກີນລາຍຮັບຂອງຕົນເອງ ແຕ່ບໍ່ເປີດເຜີຍຂາດດຸນຫລາຍປານໃດ ? ຊຶ່ງ ຢູຟາ ໄດ້ລົງໂທດບໍ່ໃຫ້ ເອຊີ ມີລານ ລົງທະບຽນນັກເຕະໃນການແຂ່ງຂັນລະດັບທະວີບຈາກ 25 ຄົນເຫລືອ 21 ຄົນ ໃນ 2 ລະດູການຕໍ່ໄປ, ຢຶດເງິນລາຍຮັບຈາກການແຂ່ງຂັນ ຢູໂຣປາ ໃນລະດູການນີ້ 12 ລ້ານປອນ.
ກົດລະບຽບການບໍລິຫານດ້ານການເງິນຂອງ ຢູຟາ ຫລື UEFA Financial Fair Play (FFP) ເລີ່ມປະຕິບັດມາແຕ່ປີ 2009 ໃນຍຸກປະທານ ມິເຊວ ປາຕີນີ້ ຊຶ່ງໄດ້ຮັບການຍ້ອງຍໍເປັນແນວຄິດ ແລະ ກົດລະບຽບທີ່ດີ ເພື່ອບໍ່ໃຫ້ສະໂມສອນບານເຕະເກີດບັນຫາຂາດງົບປະມານບໍລິຫານ ຈົນເປັນສາເຫດເຮັດໃຫ້ທີມລົ້ມລະລາຍ.
ການລົງໂທດ-ປັບໄຫມຂອງ ຢູຟາ ຫລັກໆຄືການຕັດສິດອອກຈາກການແຂ່ງຂັນລາຍການລະດັບທະວີບເຊັ່ນ: ຢູຟາ ແຊມປ້ຽລີກ ແລະ ຢູໂຣປາລີກ, ການປັບໄຫມເງິນ, ການຢຶດເງິນລາງວັນຈາກການແຂ່ງຂັນລາຍການລະດັບທະວີບ ແລະ ຈຳກັດການລົງທະບຽນນັກເຕະໃນການແຂ່ງຂັນລະດັບທະວີບຈາກ 25 ຄົນເຫລືອ 21 ຄົນ (ໝາຍວ່າເສຍໂກຕ້າ ແລະ ລາຍໄດ້ໄປໃນໂຕ).
ກ່ອນໜ້ານີ້ ມີຫລາຍສະໂມສອນພົບກັບຂໍ້ຫາດຽວກັນກັບ ເອຊີ ມິລານ ຂຶ້ນກັບກໍລະນີຫລາຍໜ້ອຍໜັກເບົາຕ່າງກັນ ເປັນຕົ້ນສະໂມສອນ ແມນເຊັສເຕີ ຊິຕີ້, ປາຣີ ແຊງແຊກແມັງ, ເຊນິດ ເຊັນປີເຕີສະເບີກ ແລະ ເຟເນບາເຊ້.
