ມາດຣິດ ເສີມທັບຄົນທຳອິດ ຄວ້າກາງດາວຮຸ່ງຈາກ ແມນຊິຕີ້
ຣີລ ມາດຣິດ ແຊ້ມຢູຟາແຊມປ້ຽນ ແລະ ສະໂມສອນໂລກ 3 ສະໄໝຊ້ອນ ຄວ້າ ບຣາຮິມ ດີອາສ (Brahim Diaz) ກອງກາງອະນາຄົດໄກຊາວສະເປນ ໄວ 19 ປີ ຈາກແມນເຊັສເຕີ ຊິຕີ້ ດ້ວຍຄ່າຕົວປະມານ 15 ລ້ານປອນ ເຊັນສັນຍາ 6 ປີເຄິ່ງ ກາຍເປັນນັກເຕະຄົນທຳອິດທີ່ ມາດຣິດ ເສີມທັບໃນເດືອນມັງກອນ ຕະຫລາດຊື້-ຂາຍນັກເຕະຮອບສອງ.
ລາຍງານຈາກຫລາຍສື່ໃນສະເປນລະບຸວ່າ: ມາດຣິດ ຈະເພີ່ມຄ່າຕົວໃຫ້ອີກ 6 ລ້ານ 5 ແສນປອນ ຖ້າ ບຣາຮິມ ດີອາສ ຜົນງານດີ ຈະໄດ້ຮັບຄ່າເມື່ອຍປະມານ 60.000 ປອນຕໍ່ອາທິດ, ໃນເງື່ອນໄຂສັນຍາ ແມນຊິຕີ້ ຈະໄດ້ສ່ວນແບ່ງ 15% ຖ້າ ມາດຣິດ ຂາຍ ບຣາຮິມ ດີອາສ ແລະ ຈະໄດ້ເພີ່ມເປັນ 40% ຖ້າຂາຍໃຫ້ ແມນຢູ.
ສຳລັບ ບຣາຮິມ ດີອາສ ມີຄວາມສູງ 170 ຊັງຕີແມັດ, ເກີດທີ່ເມືອງມາລາກ້າ ປະເທດສະເປນ ແລະ ເຕີບໃຫຍ່ຈາກອາຄາເດມີ້ ສະໂມສອນ ມາລາກ້າ ປີ 2010-2013 ກ່ອນຍ້າຍໄປ ແມນຊິຕີ້ ໃນປີ 2013-2016 ແລະ ສາມາດກ້າວສູ່ທີມຊຸດໃຫຍ່ ລົງຫລິ້ນ 15 ນັດ ຍິງໄດ້ 2 ປະຕູ.
