ອົດສະຕຣາລີ ຊະນະຈຸດໂທດ ເຂົ້າຮອບ 8 ທີມ ປະທະເຈົ້າພາບ
ເຕະບານຊາຍຊີງແຊ້ມອາຊີ ຫລື ເອຊຽນຄັບ 2019 ທີ່ສະຫະລັດອາຣັບເອມິເຣສ ໃນວັນທີ 21 ມັງກອນຜ່ານມາ ຮອບ 16 ທີມ ອົດສະຕຣາລີ ແຊ້ມເກົ່າ ຊະນະຈຸດໂທດ ອຸດເບກິດສະຖານ 4-2 ໃນເວລາ 90 ນາທີ ແລະ ໄລຍະຕໍ່ເວລາພິເສດ 30 ນາທີ ສະເໝີກັນ 0-0. ອົດສະຕຣາລີ ເຂົ້າຮອບ 8 ທີມໄປພົບເຈົ້າພາບ ສະຫະລັດອາຣັບເອມິເຣສ ທີ່ເອົາຊະນະ ກີກິດສະຖານ 3-2. ເຈົ້າພາບໄດ້ປະຕູຂຶ້ນນຳກ່ອນຈາກ ຄາມິດ ເອສມາອິລ ນາທີ 14, ເມີແລນ ເມີຊາເອບ ຍິງໃຫ້ ກີກິດສະຖານ ຕີສະເໝີ ນາທີ 26, ເຈົ້າພາບໄດ້ປະຕູນຳອີກຄັ້ງຈາກ ອາລີ ມາບຄຸດ ນາທີ 64 ແຕ່ ກີກິດສະຖານ ຍິງຕີສະເໝີອີກຄັ້ງຈາກ ເຕີກສຸນາລີ ຣັດຕາມອບ ນາທີ 90+1 ຕ້ອງໄປຫລິ້ນໃນໄລຍະຕໍ່ເວລາພິເສດ 30 ນາທີ ແລະ ເປັນເຈົ້າພາບທີ່ໄດ້ຈຸດໂທດ ໃນນາທີ 103 ແບບຄ້ານສາຍຕານັກເຕະ ກີກິດສະຖານ ແລະ ແຟນບານທົ່ວອາຊີ ໂດຍ ອາເມັດ ຄາລິລ ຮັບໜ້າທີ່ສັງຫານບໍ່ພາດ. ຮອບ 8 ທີມຄູ່ນີ້ຈະແຂ່ງຂັນໃນວັນທີ 25 ມັງກອນ 2019 ເວລາ 23:00 ໂມງ.
ຂະນະທີ່ ຍີ່ປຸ່ນ ອະດີດແຊ້ມ 4 ສະໄໝ ທີ່ເອົາຊະນະ ຊາອຸດິ ອາຣັບບີ ອະດີດແຊ້ມ 3 ສະໄໝ 1-0 ໄດ້ປະຕູໄຊຈາກ ທາເກະຮິໂຣ ໂທມິຢາສຸ ນາທີ 20. ຍີ່ປຸ່ນ ເຂົ້າຮອບ 8 ທີມ ໄປພົບກັບ ຫວຽດນາມ ຈະແຂ່ງຂັນໃນວັນທີ 24 ມັງກອນ 2019 ເວລາ 20:00 ໂມງ.
