ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້

ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້ - 010102 2019 - ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້
ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້ - Untitled design - ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້

   ການເລີ່ມຕົ້ນຈົດບັນທຶກເຖິງສິ່ງທີ່ຕ້ອງເຮັດ ຫລື ເປົ້າໝາຍຂອງປີນີ້ໄວ້ເປັນແນວທາງນັ້ນ ຈະເປັນດັ່ງການວາງແຜນ ຫລື ການເຕືອນຄວາມຈື່ຈຳໃຫ້ທ່ານ ເຊິ່ງຈະຊ່ວຍປ່ຽນແປງຊີວິດໄປໃນທາງທີ່ດີຂຶ້ນໄດ້.

     1. ຊ່ວຍປ່ອຍຄວາມຄິດເປັນອິດສະຫລະ : ການຂຽນລາຍການບໍ່ໄດ້ເຮັດໃຫ້ຊິວິດທ່ານມີລະບຽບພຽງຢ່າງດຽວ ການຂຽນພາລະກິດຕ່າງໆທີ່ທ່ານຕ້ອງເຮັດ ມັນຈະຊ່ວຍໃຫ້ທ່ານສາມາດຈັດລຽງລຳດັບຄວາມສຳຄັນ, ຄິດວາງແຜນ, ຈັດການກັບເວລາ ແລະ ແບ່ງວຽກໃຫຍ່ໆໃຫ້ເປັນອັນຍ່ອຍໆລົງໄດ້. ນອກຈາກນັ້ນ ການຈົດຄວາມຄິດທີ່ວົນວຽນຢູ່ໃນຫົວກໍຈະເຮັດໃຫ້ທ່ານຮູ້ສຶກສະຫງົບຂຶ້ນນຳ ແລະ ການຂີດຂ້າພາລະກິດທີ່ທ່ານເຮັດສຳເລັດກໍຈະເຮັດໃຫ້ທ່ານຮູ້ສຶກພໍໃຈໃນໂຕເອງໄດ້. ທ່ານ ແດນຽວ ເລວິທິນ ນັກປະສາດວິທະຍາບອກວ່າ ມະນຸດເຮົາສາມາດເກັບສິ່ງຕ່າງໆໄວ້ໃນຫົວພ້ອມໆກັນພຽງ 4 ຢ່າງເທົ່ານັ້ນ ສະນັ້ນ ເຮົາຈຶ່ງຕ້ອງຈົດລາຍການທີ່ຈະຊ່ວຍເພີ່ມພື້ນທີ່ໃນຫົວ ແລະ ກຳຈັດຄວາມຮູ້ສຶກລຳຄານໃຈວ່າເຮົາອາດຈະລືມຫຍັງບາງຢ່າງໄປ.

     2. ຊ່ວຍໃຫ້ທ່ານປະສົບຄວາມສຳເລັດ : ການຂຽນລາຍການຈະຊ່ວຍໃຫ້ທ່ານປະສົບຄວາມສຳເລັດ ແລະ ມີປະສິດທິພາບໃນການເຮັດສິ່ງຕ່າງໆຫລາຍຂຶ້ນ. ທ່ານ ຈໍແດນ ປີເຕີສັນ ນັກຈິດຕະວິທະຍາ ຜູ້ສຶກສາວິໄຈເລື່ອງການຕັ້ງເປົ້າໝາຍ ບອກວ່າ : ນັກສຶກສາເຮັດຜົນງານໄດ້ດີຫລາຍຂຶ້ນຢ່າງເຫັນໄດ້ແຈ້ງ ພວກເຂົາໃຊ້ຂະບວນການໃນການທົບທວນພຶດຕິກຳຂອງຕົນໃນອະດີດ ແລະ ຂຽນລາຍການສຳລັບເປົ້າໝາຍໃນອະນາຄົດ. ຄືກັນກັບການສຶກສາວິໄຈຈາກປີ 2013 ບໍລິສັດດ້ານວິສະວະກຳ ລະບຸວ່າ : ພະນັກງານມີປະສິດທິພາບໃນການຜະລິດວຽກເພີ່ມຂຶ້ນ 10% ຫາກພວກເຂົາກຳໜົດເປົ້າໝາຍທີ່ທ້າທາຍ ແລະ ສາມາດເຮັດໄດ້ແທ້ຢ່າງເຈາະຈົງລົງໄປ, ແຕ່ການເຮັດແບບນີ້ກໍບໍ່ໄດ້ໝາຍຄວາມວ່າຈະເປັນປະໂຫຍດຕໍ່ຫົວໜ້າຂອງທ່ານຢ່າງດຽວ ມີໂຕຢ່າງໃຫ້ເຫັນແລ້ວວ່າການຕັ້ງເປົ້າໝາຍຢ່າງຕໍ່ເນື່ອງກໍຊ່ວຍໃຫ້ຄົນສາມາດເຮັດຄວາມໄຝ່ຝັນສ່ວນໂຕສຳເລັດມາແລ້ວຄືກັນ.

     3. ຊ່ວຍໃຫ້ທ້ອນເງິນໄດ້ : ການຈົດລາຍການເວລາໄປເລາະຫ້າງສັບພະສິນຄ້າບໍ່ໄດ້ພຽງແຕ່ເພື່ອກັນລືມຢ່າງດຽວ ການຈົດ ລາຍການທຸກຢ່າງທີ່ທ່ານຕ້ອງຊື້ເປັນການຊ່ວຍໃຫ້ທ່ານບໍ່ເຜີໄປຊື້ສິ່ງຂອງຟູມເຟືອຍອື່ນໆໂດຍບໍ່ຈຳເປັນ ແນ່ນອນວ່ານີ້ອາດຈະຕ້ອງອາໄສຄວາມອົດທົນອົດກັ້ນ ສະນັ້ນທ່ານອາດຈະຜ່ອນສັ້ນຜ່ອນຍາວໃຫ້ໂຕເອງຊື້ສິ່ງຂອງທີ່ບໍ່ໄດ້ຢູ່ໃນລາຍການຈັກອັນໜຶ່ງກໍໄດ້.

     4. ຊ່ວຍໃຫ້ໝັ້ນໃຈໃນໂຕເອງຫລາຍຂຶ້ນ : ຫາກທ່ານເຄີຍຮູ້ສຶກວ່າໂຕເອງດີບໍ່ພໍ ຫລືວ່າໂຕເອງກຳລັງປ່ອຍຊີວິດໃຫ້ຜ່ານໄປລ້າໆ ການຂຽນລາຍການອາດຈະຊ່ວຍທ່ານໄດ້ ການຂຽນລາຍການພາລະກິດທີ່ທ່ານເຮັດສຳເລັດ ບໍ່ວ່າໃຫຍ່ ຫລື ນ້ອຍປານໃດ ເປັນວິທີທີ່ຈະຊ່ວຍເຕືອນໃຈທ່ານວ່າທ່ານກໍບໍ່ໄດ້ຂີ້ຮ້າຍດັ່ງທີ່ຄິດ ຄວາມສຳເລັດເຫລົ່ານັ້ນອາດຈະເປັນເລື່ອງຮຽນ, ການເຮັດວຽກ ຫລື ເລື່ອງສ່ວນໂຕກໍໄດ້ ຈົດບັນທຶກທຸຸກຢ່າງໄວ້ ບໍ່ວ່າທ່ານຈະໄປທ່ອງທ່ຽວໃສມາ, ສອບເສັງໄດ້ຄະແນນດີ ຫລື ອ່ານໜັງສືຍາກໆຈົນຈົບເຫລັ້ມ ຫລື ພຽງແຕ່ບໍ່ລືມທີ່ຈະຂຽນຈົດໝາຍອວຍພອນວັນເກີດສົ່ງໃຫ້ໝູ່.

ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້ - Wave100S AD to Website 2020 0 - ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້

     5. ຊ່ວຍໃຫ້ທ່ານບໍ່ເຮັດຫຍັງຜິດພາດ : ເຊັກລິສ Checklist ເປັນສິ່ງທີ່ຊ່ວຍໃຫ້ທ່ານຫລີກເວັ້ນຫາຍະນະໄດ້ ບໍ່ວ່າທ່ານຈະກຳລັງກຽມຈັດງານແຕ່ງດອງ, ຍ້າຍເຮືອນ ຫລື ກຽມໄປທ່ອງທ່ຽວ ເປັນເລື່ອງສຳຄັນທີ່ທ່ານຈະຕ້ອງຂຽນສິ່ງທີ່ຕ້ອງເຮັດໄວ້ກັນລືມ ຈະໄດ້ບໍ່ລືມຈ້າງລົດຍ້າຍເຄື່ອງ ຫລື ບໍ່ໍລືມເອົາໜັງສືເດີນທາງໄປນຳ. ຢູ່ໂຮງໝໍ ຄວາມຜິດພາດນ້ອຍໆສາມາດນຳໄປສູ່ຄວາມເສຍຫາຍຮ້າຍແຮງໄດ້, ຢູ່ສະຫະລັດອາເມລິກາ ມີການໃຊ້ Checklist ໃນທາງການແພດຢ່າງເປັນທາງການເທື່ອທຳອິດເພື່ອໃຫ້ໝັ້ນໃຈວ່າການສັກເຂົ້າຫລອດເລືອດດຳຢູ່ໜ້າເອິກຄົນເຈັບເປັນໄປຢ່າງຖືກຕ້ອງຕາມວິທີການ 5 ຂັ້ນຕອນງ່າຍໆດ້ວຍກັນ ຜົນກໍຄື ເກີດການຕິດເຊື້ອຫລຸດລົງຈາກ 4% ເປັນ 0% ພາຍໃນເວລາ 15 ເດືອນ ເຊິ່ງຊ່ວຍຊີວິດຄົນໄປໄດ້ 1.500 ຄົນ ແລະ ປະຢັດຄ່າໃຊ້ຈ່າຍໄປໄດ້ 200 ລ້ານໂດລາສະຫະລັດ.

     6. ຊ່ວຍໃຫ້ມີສະມາທິ : ຊິການິກ ເອັບເຟັກ Zeigarnik Effect  ແມ່ນຫລັກການທາງຈິດຕະວິທະຍາທີ່ສະເໜີຄວາມຄິດວ່າສະໝອງຄົນເຮົາຈື່ຈຳພາລະກິດທີ່ເຮົາຍັງເຮັດບໍ່ສຳເລັດຫລາຍກ່ວາສິ່ງທີ່ເຮົາເຮັດສຳເລັດໄປແລ້ວ ດັ່ງນັ້ນ ເມື່ອທ່ານພະຍາຍາມຈະຕັ້ງສະມາທິໄປໃສ່ເລື່ອງສຳຄັນໆ ທ່ານມັກຈະເສຍສະມາທິໄປກັບວຽກນ້ອຍອື່ນໆທີ່ທ່ານຍັງເຮັດບໍ່ສຳເລັດ.

     ນັກຈິດຕະວິທະຍາແນະນຳໃຫ້ທ່ານຂຽນເປົ້າໝາຍນ້ອຍໆທີ່ກວນໃຈລົງໃນເຈ້ຍໃຫ້ໝົດ ບໍ່ວ່າຈະແມ່ນການຕອບອີເມວທີ່ເລື່ອນມື້ເລື່ອນວັນມາດົນ ຫລື ໂທໄປຖາມໄຖ່ທຸກສຸກຍາດພີ່ນ້ອງ ເມື່ອສະໝອງທ່ານຮູ້ແລ້ວວ່າກຳລັງຮັບມືຢູ່ກັບຫຍັງແດ່ ທ່ານກໍຈະສາມາດຈັດການກັບພາລະກິດຢູ່ຕໍ່ໜ້າໄດ້ດີຂຶ້ນ ເມື່ອທ່ານໄດ້ຂີດຂ້າພາລະກິດຍ່ອຍໆອອກໄປ ສິ່ງທີ່ເຫລືອຕໍ່ໄປກໍບໍ່ຍາກ.

ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້ - WhatsApp Image 2020 05 27 at 5 - ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້
ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້ - WhatsApp Image 2020 05 27 at 5 - ປະໂຫຍດຈາກການຈົດບັນທຶກສິ່ງທີ່ຕ້ອງເຮັດຊ່ວຍປ່ຽນແປງຊີວິດໃຫ້ດີຂື້ນໄດ້
error: Alert: ເນື້ອຫາຂ່າວມີລິຂະສິດ !!