ກຳປູເຈຍຢືນຢັນບໍ່ໄດ້ຮັບຜົນກະທົບ ຈາກບັນຫາຝຸ່ນລະອອງໃນໄທ
ກະຊວງສິ່ງແວດລ້ອມກຳປູເຈຍຖະແຫລງຜ່ານເຟສບຸກໃນວັນທີ 4 ກຸມພາວ່າ: ຄຸນນະພາບອາກາດຢູ່ກຳປູເຈຍບໍ່ໄດ້ຮັບຜົນກະທົບຈາກບັນຫາຝຸ່ນລະອອງໃນປະເທດໄທແຕ່ຢ່າງໃດ.
ໂຄສົກກະຊວງສິ່ງແວດລ້ອມກຳປູເຈຍລະບຸວ່າ: ຄຸນນະພາບອາກາດໃນກຳປູເຈຍຢູ່ໃນເກນດີ ແລະ ຄ່າຝຸ່ນລະອອງໃນອາກາດກໍຢູ່ໃນລະດັບປົກກະຕິ ບໍ່ໜ້າກັງວົນແຕ່ຢ່າງໃດ. ຖະແຫລງການຍັງລະບຸຂໍບໍ່ໃຫ້ປະຊາຊົນກັງວົນຕໍ່ຄຸນນະພາບອາກາດ ໂດຍທາງກະຊວງສິ່ງແວດລ້ອມກຳລັງເຝົ້າຕິດຕາມ ແລະ ຕີລາຄາສະຖານະການຕະຫລອດ 24 ຊົ່ວໂມງ.
ຖະແຫລງການຂອງກະຊວງສິ່ງແວດລ້ອມກຳປູເຈຍມີຂຶ້ນ ຫລັງຈາກມີເຟສບຸກປອມໃນອາທິດຜ່ານມາອ້າງວ່າ: ສະພາບອາກາດຢູ່ນະຄອນຫລວງພະນົມເປັນໄດ້ຮັບຜົນກະທົບຈາກບັນຫາສະພາບອາກາດຢູ່ໄທ ແລະ ເຕືອນໃຫ້ປະຊາຊົນໃສ່ຜ້າອັດດັງ. ໃນອາທິດຜ່ານມາ ສະຖານເອກອັກຄະລັດຖະທູດກຳປູເຈຍປະຈຳປະເທດໄທໄດ້ອອກຄຳເຕືອນໃຫ້ບັນດາແຮງງານກຳປູເຈຍຢູ່ໄທເບິ່ງແຍງສຸຂະພາບ ແລະ ໃສ່ຜ້າອັດດັງ ເພື່ອເປັນການປ້ອງກັນບັນຫາຝຸ່ນລະອອງຂະໜາດນ້ອຍ PM2,5.
