ເກີດເຫດໄຟໄໝ້ຫໍພັກພະນັກງານຢູ່ບ້ານຈອມມະນີເສຍຫາຍ 1 ຫລັງ
ເຈົ້າໜ້າທີ່ຕຳຫລວດສະກັດກັ້ນ ແລະ ມອດໄຟນະຄອນຫລວງວຽງຈັນ ໃຫ້ຮູ້ວ່າ: ໃນຄໍ່າຄືນຂອງວັນທີ 4 ກຸມພານີ້, ໄດ້ເກີດໄຟໄໝ້ຫໍພັກພະນັກງານຢູ່ບ້ານຈອມມະນີ, ເມືອງໄຊເສດຖານະຄອນຫລວງວຽງຈັນ, ເປັນຄານຫ້ອງແຖວຍາວ 2 ຊັ້ນໄດ້ຮັບຄວາມເສຍຫາຍໝົດຫລັງພ້ອມດ້ວຍລົດຈັກອີກ 2 ຄັນຖືກໄຟໃໝ້, ຊຶ່ງເຈົ້າໜ້າທີ່ໃຊ້ເວລາກວ່າ 2 ຊົ່ວໂມງ, ຈຶ່ງສາມາດຄວບຄຸມໄຟໄວ້ໄດ້ ແລະ ໂຊກດີເຫດການດັ່ງກ່າວນີ້ບໍ່ມີຜູ້ໄດ້ຮັບບາດເຈັບ ຫລື ເສຍຊີວິດ. ສ່ວນສາເຫດຂອງການເກີດອັກຄີໄພເຈົ້າໜ້າທີ່ກຳລັງເລັ່ງສືບສວນ-ສອບສວນ.
ເຈົ້າໜ້າທີ່ໃຫ້ຮູ້ວ່າ: ໃນໄລຍະນີ້ເຫັນວ່າບັນຫາອັກຄີໄພໄດ້ເກີດຂຶ້ນລຽນຕິດ, ສະເພາະຕົ້ນປີນີ້ມີອັກຄີໄພເກີດຂຶ້ນກ່ວາ 10 ຄັ້ງ, ສາເຫດສ່ວນໃຫຍ່ແມ່ນຍ້ອນຈູດປ່າ, ຈູດຂີ້ເຫຍື້ອ, ການໃຕ້ທູບທຽນບູຊາ, ໄຟຟ້າລັດວົງຈອນ ແລະ ສາເຫດອື່ນໆ, ຊຶ່ງຜົນເສຍຫາຍມີເຮືອນ 5 ຫລັງ, ຫ້ອງການ 1 ແຫ່ງ ແລະ ຊັບສີນອື່ນໆ.
