ຜູ້ຕິດເຊື້ອໄວຣັສ H1N1 ໃນນະຄອນຫລວງອິນເດຍ ເພີ່ມເປັນຫລາຍກວ່າ 1.000 ຄົນ
ທາງການນະຄອນຫລວງນິວເດລີຂອງອິນເດຍເປີດເຜີຍວ່າ: ຈຳນວນຜູ້ຕິດເຊື້ອໄວຣັສໄຂ້ຫວັດໃຫຍ່ H1N1 ໃນເຂດນະຄອນຫລວງນິວເດລີຍັງຄົງເພີ່ມສູງຂຶ້ນຢ່າງວ່ອງໄວ ໂດຍໃນປີນີ້ມີຜູ້ເສຍຊີວິດແລ້ວ 11 ຄົນ ແລະ ມີຜູ້ຕິດເຊື້ອຫລາຍກວ່າ 1.000 ຄົນ.
ລາຍງານຂອງທາງການນະຄອນຫລວງນິວເດລີ ລະບຸວ່າ: ນັບແຕ່ຕົ້ນປີຈົນເຖິງວັນທີ 3 ກຸມພາ, ມີຜູ້ຕິດເຊື້ອໄວຣັສໄຂ້ຫວັດໃຫຍ່ H1N1 ຈຳນວນ 1.011 ຄົນ, ແຕ່ລາຍງານບໍ່ໄດ້ເປີດເຜີຍຕົວເລກຜູ້ເສຍຊີວິດໃນປີນີ້. ຂະນະທີ່ໂຮງໝໍລັດ 3 ແຫ່ງ ຢືນຢັນພົບຜູ້ເສຍຊີວິດແລ້ວ 11 ຄົນ. ຖືໄດ້ວ່າປີນີ້ເປັນປີທີ່ພົບການລະບາດຢ່າງຮຸນແຮງ. ຂະນະທີ່ໃນປີຜ່ານມາພົບຜູ້ຕິດເຊື້ອພຽງ 205 ຄົນ ແລະ ມີຜູ້ເສຍຊີວິດ 2 ຄົນ.
ລາຍງານລະບຸວ່າ: ຮອດວັນທີ 29 ມັງກອນຜ່ານມາ ມີລາຍງານພົບຜູ້ຕິດເຊື້ອ 512 ຄົນ ແລະ ເພີ່ມຂຶ້ນເກືອບສອງເທົ່າໃນໄລຍະເວລາພຽງ 1 ອາທິດ. ເຖິງຢ່າງໃດກໍຕາມ, ທາງການນະຄອນຫລວງນິວເດລີໄດ້ສັ່ງໃຫ້ໂຮງໝໍທຸກແຫ່ງກຽມພ້ອມຮັບມືການລະບາດແລ້ວ.
