ລັດຖະສະພາມຽນມາເຫັນພ້ອມຕັ້ງຄະນະ ກຳມະການຫາລືແກ້ໄຂລັດຖະທຳມະນູນ
ລັດຖະສະພາມຽນມາລົງມະຕິເຫັນພ້ອມໃຫ້ຈັດຕັ້ງຄະນະກຳມະການ ເພື່ອຫາລືການແກ້ໄຂລັດຖະທຳມະນູນ ທັງທີ່ມີສຽງຄັດຄ້ານຈາກສະມາຊິກສາຍທະຫານທີ່ຄັດຄ້ານການກະທຳໃດໆທີ່ອາດເປັນການທ້າທາຍອຳນາດກອງທັບ.
ພັກສັນນິບາດແຫ່ງຊາດເພື່ອປະຊາທິປະໄຕ ຫລື NLD ພາຍໃຕ້ການນຳຂອງທ່ານ ນາງ ອອງຊານ ຊູຈີ ທີ່ປຶກສາແຫ່ງລັດ ຍື່ນຂໍ້ສະເໜີສຸກເສີນໃນອາທິດຜ່ານມາ ເພື່ອໃຫ້ແກ້ໄຂລັດຖະທຳມະນູນໃນບ່ອນທີ່ພັກເຫັນວ່າຂັດຕໍ່ຫລັກປະຊາທິປະໄຕ. ຖືເປັນການທ້າທາຍອຳນາດກອງທັບຄັ້ງໃຫຍ່ທີ່ສຸດໃນຮອບເກືອບ 3 ປີ ແລະ ກໍ່ໃຫ້ເກີດການປະທ້ວງຈາກສະມາຊິກທີ່ໄດ້ຮັບການແຕ່ງຕັ້ງຈາກກອງທັບ ໂດຍການຢືນສະຫງົບເປັນເວລາຫລາຍນາທີ. ການເຄື່ອນໄຫວດັ່ງກ່າວມີຂຶ້ນຂະນະທີ່ຜູ້ນຳພົນລະເຮືອນ ແລະ ກອງທັບກຳລັງຜະເຊີນກະແສກົດດັນຈາກບັນດາປະເທດກໍລະນີການກວາດລ້າງຊາວມຸດສະລິມໂຣຮິງຢາໃນປີ 2017 ເຊິ່ງເຮັດໃຫ້ມີຊາວໂຣຮິງຢາ 730.000 ຄົນຫລົບໜີໄປບັງກະລາເທດ. ມະຕິຈັດຕັ້ງຄະນະກຳມະການແກ້ໄຂລັດຖະທຳມະນູນຜ່ານຄວາມເຫັນພ້ອມຈາກກອງປະຊຸມສະພາດ້ວຍຄະແນນ 414 ຕໍ່ 611 ຄະແນນ ໂດຍພັກຂອງທ່ານ ນາງ ຊູຈີ ຄອງສຽງສ່ວນຫລາຍໃນສະພາ.
