ສູ້ຊົນແກ້ໄຂບັນຫາເສດຖະກິດ; ເດັດດ່ຽວຕ້ານການຫັນປ່ຽນຂອງສັດຕູ
ຄືດັ່ງທີ່ຮູ້ແລ້ວວ່າ: ກອງປະຊຸມລັດຖະບານສະໄໝສາມັນ ປະຈໍາເດືອນ ມັງກອນ 2019 ໄດ້ຈັດຂຶ້ນໃນທ້າຍເດືອນມັງກອນ ຜ່ານມາ ຊຶ່ງໄດ້ສຸມໃສ່ພິຈາລະນາ, ປະກອບຄໍາເຫັນເຂົ້າໃສ່ 5 ເອກະສານສໍາຄັນ; ການຜັນຂະຫຍາຍວຽກຈຸດສຸມຕົ້ນຕໍຂອງລັດຖະບານ
ແລະ ກອງປະຊຸມ ຍັງຮຽກຮ້ອງມາຍັງພະນັກງານ, ສະມາຊິກພັກ, ລັດຖະກອນ, ກໍາມະກອນ, ນັກຮຽນຮູ້ປັນຍາຊົນ, ປະຊາຊົນບັນດາເຜົ່າ, ຊັ້ນຄົນຕ່າງໆ, ຊາວຕ່າງດ້າວຜູ້ບໍ່ມີສັນຊາດທີ່ດຳລົງຊີວິດຢູ່ລາວ, ນັກທຸລະກິດພາກລັດ ແລະ ເອກະຊົນ ລວມທັງນັກທຸລະກິດຕ່າງປະເທດທີ່ມາລົງທຶນຢູ່ລາວ ຈົ່ງພ້ອມກັນເຊີດຊູນໍ້າໃຈຮັກຊາດ, ສາມັກຄີເປັນຈິດໜຶ່ງໃຈດຽວ, ເດັດດ່ຽວຜ່ານຜ່າອຸປະສັກຕ່າງໆ ແລະ ສູ້ຊົນຈັດຕັ້ງປະຕິບັດວຽກງານສໍາຄັນຕ່າງໆທີ່ລັດຖະບານວາງອອກໃຫ້ປະກົດຜົນເປັນຈິງ ເພື່ອຜົນປະໂຫຍດຂອງຊາດ, ຂອງປະຊາຊົນ; ພ້ອມດຽວກັນນີ້, ກໍ່ຕ້ອງຍົກສູງສະຕິລະວັງຕົວຕໍ່ການເຄື່ອນໄຫວຂອງຜູ້ບໍ່ຫວັງດີ, ເດັດດ່ຽວຕ້ານທຸກກົນອຸບາຍຫັນປ່ຽນໂດຍສັນຕິຂອງອິດທິກໍາລັງປໍລະປັກໃນທຸກຮູບແບບ ແລະ ເດັດຂາດບໍ່ໃຫ້ຕົກຖືກກົນອຸບາຍທໍາລາຍມ້າງເພ, ຍຸແຍ່ໃສ່ຮ້າຍປ້າຍສີຂອງພວກຄົນບໍ່ດີຢູ່ພາຍໃນ ແລະ ຕ່າງປະເທດ.
ໃນໂອກາດດັ່ງກ່າວ; ທ່ານ ທອງລຸນ ສີສຸລິດ ນາຍົກລັດຖະມົນຕີ ກໍ່ໄດ້ຊີ້ນໍາໃຫ້ບັນດາສະມາຊິກລັດຖະບານ ຕ້ອງເອົາໃຈໃສ່ເປັນພິເສດໃນການກະກຽມ ແລະ ຈັດຕັ້ງປະຕິບັດບັນດາວຽກງານຈຸດສຸມຂອງລັດຖະບານ ຊຶ່ງໄດ້ກໍານົດວຽກຈຸດສຸມຕົ້ນຕໍ ຕາມດໍາລັດເລກທີ 560/ນຍ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ສໍາລັບປີ 2019 ໃນ 7 ຂົງເຂດ ຊຶ່ງໃນຂົງເຂດເສດ ຖະກິດຈະສຸມໃສ່ 5 ວຽກໃຫຍ່ ໂດຍຈັດຕັ້ງປະຕິບັດມະຕິ 057 ຂອງຄະນະບໍລິຫານງານສູນກາງພັກ ໃນນີ້ ສຸມໃສ່ຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ; ປັບປຸງລັດວິສາຫະກິດໃຫ້ເປັນຮູບປະທໍາ; ປະຕິບັດຄໍາສັ່ງ ເລກທີ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດໍາເນີນທຸລະກິດຢູ່ ສປປ ລາວ; ປັບປຸງການສົ່ງເສີມ ແລະ ຄຸ້ມຄອງການລົງທຶນຜ່ານປະ ຕູດຽວ (ຄລທສ-ຄລທຂ); ສົ່ງເສີມການທ່ອງທ່ຽວ ແລະ ປີທ່ອງທ່ຽວ ລາວ-ຈີນ 2019 ໃຫ້ມີປະສິດທິຜົນສູງ.
ຂົງເຂດວັດທະນະທໍາ-ສັງຄົມ ສຸມໃສ່ສຶກສາອົບຮົມວຽກງານການເມືອງແນວຄິດ ແລະ ແກ້ໄຂປະກົດການຫຍໍ້ທໍ້ຕ່າງໆໃນສັງ ຄົມ ແລະ ພັດທະນາການສຶກສາໃຫ້ມີຄຸນນະພາບ ແລະ ໄປສູ່ປະຊາຊົນເຂດຫ່າງໄກສອກຫຼີກທຸລະກັນດານ; ຍົກລະດັບ ແລະ ຄຸນນະພາບຂອງການບໍລິການດ້ານສາທາລະນະສຸກ ເປັນຕົ້ນແຜນຍົກສູງຄຸນນະພາບໃນການບໍລິການຂອງໂຮງໝໍ-ສຸກສາລາ; ພັດທະນາ ແລະ ຍົກຄຸນນະພາບຂອງສີມືແຮງງານພາຍໃນໃຫ້ພັດທະນາດີຂຶ້ນ ແລະ ສາມາດຕອບສະໜອງແຮງງານໃຫ້ພຽງພໍ ແລະ ຄຸ້ມຄອງແຮງງານຕ່າງປະເທດໃຫ້ເຂົ້າສູ່ລະບຽບການ; ສືບຕໍ່ພັດທະນາຊົນນະບົດ ແລະ ລຶບລ້າງຄວາມທຸກຍາກ (ຕິດພັນກັບການປຸກລະດົມຂະບວນການຮັກຊາດ ແລະ ພັດທະນາ) ສະເໜີໃຫ້ກະຊວງພາຍໃນສົມທົບກັບຄະນະແຂ່ງຂັນຍ້ອງຍໍລະດັບຊາດ ປຶກສາຫາລືປຸກລະດົມທົ່ວສັງຄົມ, ພາກທຸລະກິດເຂົ້າຮ່ວມເພື່ອຊ່ວຍປະຊາຊົນທີ່ໄດ້ຮັບຜົນກະທົບ; ຊ່ວຍເຫຼືອປະຊາຊົນ ແລະ ຟື້ນຟູເຂດທີ່ຖືກກະທົບຈາກໄພພິບັດຕ້ອງໄດ້ເອົາໃຈໃສ່ເປັນພິເສດ ພ້ອມທັງຟື້ນຟູຊີວິດການເປັນຢູ່ຂອງປະຊາຊົນເມືອງສະໜາມໄຊໃຫ້ມີຄວາມຄືບໜ້າ ແລະ ທັນການ; ສໍາລັບປະຊາຊົນທີ່ຍັງຢູ່ໃນເຕັ້ນ ແມ່ນໃຫ້ຮີບຮ້ອນສ້າງເຮືອນໃໝ່ສໍາເລັດໂດຍໄວ ເພື່ອໃຫ້ເຂົາເຈົ້າຍ້າຍໄປຢູ່ເຮືອນໃໝ່.
ດ້ານຂົງເຂດການເຕີບໂຕສີຂຽວ ແລະ ການພັດທະນາແບບຍືນຍົງ ຈະສຸມໃສ່ປະຕິບັດຄໍາສັ່ງ ເລກທີ 15/ນຍ; ຜັນຂະຫຍາຍ ແລະ ຈັດຕັ້ງປະຕິບັດແຜນແມ່ບົດຈັດສັນທີ່ດິນແຫ່ງຊາດ; ປັບປຸງລະບົບເຕືອນໄພລ່ວງໜ້າ ແລະ ກະກຽມຮັບມືກັບໄພພິບັດ ແລະ ສືບ ຕໍ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDG). ສຳລັບຂົງເຂດປ້ອງກັນຊາດ-ປ້ອງກັນຄວາມສະຫງົບ ແມ່ນສຸມໃສ່ຮັບ ປະກັນສະຖຽນລະພາບທາງການເມືອງ ແລະ ຄວາມສະຫງົບຂອງສັງຄົມ; ເອົາໃຈໃສ່ວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດ ເປັນຕົ້ນ ຕ້ອງສຸມໃສ່ຈັດຕັ້ງມະຕິ 056 ຂອງຄະນະບໍລິຫານງານສູນກາງພັກໃຫ້ປະກົດຜົນເປັນຈິງ. ສຳລັບຂົງເຂດການພົວພັນຮ່ວມມືຕ່າງປະເທດ ແລະ ການເຊື່ອມໂຍງກັບສາກົນ ຈະສືບຕໍ່ເສີມຂະຫຍາຍວຽກງານພົວພັນຮ່ວມມືສາກົນໃນຂອບ 2 ຝ່າຍ ແລະ ຫຼາຍຝ່າຍໃຫ້ດີຂຶ້ນກວ່າເກົ່າ; ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດໂຄງການ ແລະ ກິດຈະກໍາ ການຮ່ວມມືທີ່ໄດ້ຕົກລົງກັບບັນດາປະເທດເພື່ອນມິດ ແລະ ອົງການສາກົນໃຫ້ແຕກດອກອອກຜົນໂດຍໄວ (ໂດຍເອົາໃຈໃສ່ພິເສດຕໍ່ໂຄງການຮ່ວມມື ລາວ-ຫວຽດນາມ ແລະ ລາວ-ຈີນ) ທີ່ການນໍາ 2 ປະເທດ ໄດ້ຕົກລົງກັນ; ຄົ້ນຄວ້າ ແລະ ສ້າງໂຄງການຮ່ວມມື ເພື່ອຜັນຂະຫຍາຍບັນ ດາສັນຍາ ແລະ ບົດບັນທຶກການຮ່ວມມືກັບບັນດາປະເທດເພື່ອນມິດ ແລະ ອົງການສາກົນ.
ສຳລັບຂົງເຂດນະໂຍບາຍ, ແຜນຍຸດທະສາດ, ກົດໝາຍ, ນິຕິກໍາລຸ່ມກົດໝາຍ ແລະ ການຄຸ້ມຄອງບໍລິຫານລັດ ຊຶ່ງມີແຜນຈະສ້າງນະໂຍບາຍ 4 ສະບັບ; ແຜນຍຸດທະສາດ 14 ສະບັບ; ກົດໝາຍ 31 ສະບັບ; ນິຕິກໍາລຸ່ມກົດໝາຍ 65 ສະບັບ ແລະ ຫົວຂໍ້ອື່ນໆ 24 ຫົວຂໍ້. ຄຽງຄູ່ກັບການສ້າງບັນດານິຕິກຳທີ່ກ່າວມານີ້ ກໍຈະໄດ້ເອົາໃຈໃສ່ວຽກງານຄຸ້ມຄອງບໍລິຫານລັດ ເປັນຕົ້ນແມ່ນໂຄສະນາເຜີຍແຜ່ບັນດານິຕິກໍາທີ່ໄດ້ສ້າງຂຶ້ນ; ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດນິຕິກໍາ ແລະ ແກ້ໄຂຜົນການກວດສອບ ແລະ ກວດກາ; ປັບປຸງກົງຈັກການຈັດຕັ້ງໃຫ້ກະທັດຮັດ, ເບົາບາງ ແລະ ສົມເຫດສົມຜົນ; (ພ້ອມທັງຄົ້ນຄວ້າ-ຜັນຂະຫຍາຍດໍາລັດ ວ່າດ້ວຍການຈັດຕັ້ງ ແລະ ເຄື່ອນໄຫວຂອງຂະແໜງການຕົນ ທັງຂັ້ນສູນກາງ ແລະ ທ້ອງຖິ່ນ (ແຂວງ ແລະ ເມືອງ) ໃຫ້ສໍາເລັດໄວ ແລະ ແທດກັບຕົວຈິງ).ສະກັດກັ້ນ ແລະ ຕ້ານປະກົດການຫຍໍ້ທໍ້ໃນການຄຸ້ມຄອງບໍລິຫານລັດ; ຊຸກຍູ້ການຈັດຕັ້ງປະຕິບັດນະໂຍບາຍ, ຄໍາຂວັນຮັກຊາດ ແລະ ພັດທະນາ; ສືບຕໍ່ສູ້ຊົນຮັບປະກັນຄວາມຍຸຕິທໍາທາງສັງຄົມ, ເປັນຕົ້ນ ຈັດຕັ້ງປະຕິບັດຄໍາຕັດສິນຂອງສານທີ່ມີຜົນທາງດ້ານກົດໝາຍໃຫ້ມີປະສິດທິພາບ ແລະ ເຂັ້ມງວດ; ກະກຽມ ແລະ ສ້າງແຜນພັດທະນາເສດຖະກິດ-ສັງຄົມແຫ່ງຊາດ; ກະກຽມສ້າງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປີ 2020 ແລະ ກະກຽມສ້າງແຜນພັດທະນາເສດຖະກິດ-ສັງຄົມ ແລະ ແຜນງົບປະ ມານ ແຫ່ງລັດ 5 ປີ ຄັ້ງທີ IX.
ເພື່ອເຮັດສຳເລັດວຽກຈຸດສຸມຕົ້ນຕໍຂອງລັດຖະບານນັ້ນ ຈຶ່ງຮຽກຮ້ອງໃຫ້ຂະແໜງການ ແລະ ທ້ອງຖິ່ນ ເປັນເຈົ້າການຜັນຂະ ຫຍາຍ ແລະ ຈັດຕັ້ງປະຕິບັດ ຕາມທິດ 3 ສ້າງ ແລະ ນຳເອົາດໍາລັດ 560/ນຍ ທີ່ໄດ້ກໍານົດໃຫ້ຂະແໜງການ ແລະ ທ້ອງຖິ່ນເອົາວຽກຈຸດສຸມຕົ້ນຕໍຂອງລັດຖະບານໄປຜັນຂະຫຍາຍເປັນວຽກຈຸດສຸມຂອງຕົນໃຫ້ສໍາເລັດ ໂດຍລັດຖະບານ ໄດ້ມອບໃຫ້ກະຊວງທີ່ກ່ຽວຂ້ອງ ປະຕິບັດ ແລ້ວ ສັງລວມລາຍງານຄວາມຄືບໜ້າໃນການຈັດຕັ້ງປະຕິບັດບາງວຽກຈຸດສຸມຂອງລັດຖະບານ ແລະ ຂອງບັນດາຂະແໜງ ການເປັນແຕ່ລະໄລຍະ (ທຸກໄຕມາດ); ບັນດາສະມາຊິກລັດຖະບານທີ່ປະຈຳຢູ່ທຸກຂະແໜງການ ຕ້ອງເປັນເຈົ້າການນໍາພາ-ຊີ້ນໍາການຜັນຂະຫຍາຍ ແລະ ຈັດຕັ້ງປະຕິບັດດໍາລັດສະບັບນີ້ໃຫ້ມີປະສິດທິຜົນ ແລະ ບັນດາຮອງນາຍົກລັດຖະມົນຕີ ຕິດຕາມ, ກວດກາ ແລະ ຊຸກ ຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມເພື່ອໃຫ້ບັນລຸຕາມທິດທາງຄາດໝາຍທີ່ວາງອອກ ລວມທັງແບ່ງຄວາມຮັບຜິດ ຊອບໃຫ້ຂັ້ນຂະແໜງການ ແລະ ທ້ອງຖິ່ນ ຄື: ຮອງລັດຖະມົນຕີ ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດວຽກງານໃນແຕ່ລະຂົງເຂດຕາມການມອບໝາຍຂອງລັດຖະມົນຕີ; ຮອງເຈົ້າແຂວງ ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດວຽກງານໃນແຕ່ລະຂົງເຂດຕາມການມອບໝາຍຂອງເຈົ້າແຂວງ.
#ໂດຍ: ຣັດສະໝີ ດວງສັດຈະ
