ມົດລູກແຂງແຮງຈຶ່ງມີລູກໄດ້ງ່າຍ

       ມົດລູກແມ່ນອະໄວຍະວະພາກສ່ວນໜຶ່ງຂອງຮ່າງກາຍ ຫາກຮ່າງກາຍແຂງແຮງ, ເລືອດຈະໄຫລວຽນໄປລ້ຽງໄດ້ເຕັມທີ່ ເຮັດໃຫ້ມົດລູກແຂງແຮງ. ການເບິ່ງແຍງສຸຂະພາບຮ່າງກາຍໃຫ້ແຂງແຮງ ເຊັ່ນ : ການເບິ່ງແຍງເລື່ອງນຳ້ໜັກໂຕໃຫ້ຢູ່ໃນເກນມາດຕະຖານ, ບໍ່ຈ່ອຍ ຫລື ຕຸ້ຍຈົນເກີນໄປ, ການນອນຫລັບໃຫ້ພຽງພໍ, ການກິນອາຫານໃຫ້ຄົບ 5 ໝວດ ໂດຍສະເພາະຜັກ ແລະ ໝາກໄມ້, ດື່ມນຳ້ສະອາດມື້ລະ 8 ຈອກ ແລະ ງົດການດື່ມເຫລົ້າ, ສິ່ງມຶນເມົາ ແລະ ບໍ່ສູບຢາ.

     – ເບິ່ງແຍງສຸຂະພາບໃຈໃຫ້ແຂງແຮງ : ຄວາມເຄັ່ງຄຽດເຮັດໃຫ້ມົດລູກບໍ່ປົກກະຕິ ເພາະລະບົບຮໍໂມນຜິດປົກກະຕິ, ປະຈຳເດືອນຈຶ່ງມາບໍ່ປົກກະຕິ, ການຫລຸດຄວາມເຄັ່ງຄຽດມີຫລາຍວິທີ ບໍ່ວ່າຈະແມ່ນຮູ້ຈັກປົງ, ປ່ອຍວາງ,  ເບິ່ງໂລກໃນດ້ານບວກ, ຍິ້ມຫົວທຸກມື້, ໃຊ້ຊີວິດແບບພຽງພໍ, ປະຢັດ,ພໍໃຈໃນສິ່ງທີ່ຕົນມີຢູ່, ໃຫ້ອະໄພຜູ້ອື່ນ, ມີຈຸດມຸ່ງໝາຍໃນຊີວິດ.

     – ອອກກຳລັງກາຍສະໝໍ່າສະເໝີ : ເຮັດໃຫ້ພູມຕ້ານທານດີ,  ກ້າມຊີ້ນຫົວໃຈ ແລະ ປອດແຂງແຮງ, ຟອກເລືອດໄປລ້ຽງພາກ ສ່ວນຕ່າງໆຂອງຮ່າງກາຍໄດ້ດີ,ຊ່ວຍປ້ອງກັນມົດລູກອັກເສບ ແລະ ມົດລູກຕໍ່າ, ຄວນອອກກຳລັງກາຍເປັນປະຈຳ ເຊັ່ນ : ຂີ່ລົດຖີບ, ລອຍນຳ້, ແລ່ນ, ເຕັ້ນແອໂຣບິກ, ໂຢຄະ ເປັນຕົ້ນ ຢ່າງໜ້ອຍອາທິດລະ 4 ມື້ ເທື່ອລະປະມານ 30 ນາທີຂຶ້ນໄປ.

     – ລະວັງການຕິດເຊື້ອພະຍາດຕິດຕໍ່ທາງເພດສຳພັນ : ພະຍາດຕິດຕໍ່ທາງເພດສຳພັນເຮັດໃຫ້ເກີດອາການລົງຂາວ, ເຈັບປວດທ້ອງນ້ອຍ, ມີໄຂ້, ມົດລູກອັກເສບ ເຖິງຈະເຊົາກໍຍັງມີອາການປວດມົດລູກ, ປວດປະຈຳເດືອນ, ມີລົງຂາວຊຳ້ເຮື້ອ, ໄຂ້ໃນເວລາເປັນປະຈຳເດືອນ, ບໍ່ຖືພາ ຫລື ຖືພານອກມົດລູກ. ການຫລີກເວັ້ນການຕິດເຊື້ອພະຍາດຕິດຕໍ່ທາງເພດສຳພັນ ຈຶ່ງເປັນສິ່ງສຳຄັນຂໍ້ໜຶ່ງທີ່ເຮັດໃຫ້ມົດລູກດີ. ດັ່ງນັ້ນ ຄວນໃຊ້ຖົງຢາງອະນາໄມທຸກເທື່ອກັບຄົນທີ່ບໍ່ຮູ້ຈັກ ບໍ່ຮູ້ໃຈ ຫລື ບໍ່ໝັ້ນໃຈ.

     – ບໍ່ຍົກສິ່ງຂອງໜັກໆ : ການຍົກຍໍສິ່ງຂອງໜັກໆເຮັດໃຫ້ມົດລູກຕໍ່າ, ພົກຍ່ຽວກະທົບກະເທືອນຫາກຈຳເປັນຕ້ອງຍົກຍໍສິ່ງຂອງ ໜັກຄວນໄປຍ່ຽວອອກກ່ອນ.

     – ກວດຮ່າງກາຍ ແລະ ກວດພາຍໃນເປັນປະຈຳ : ເຖິງວ່າເຮົາຈະແຂງແຮງ ກໍຄວນກວດສຸຂະພາບຮ່າງກາຍເປັນປະຈຳ ເພື່ອຄົ້ນຫາພະຍາດໃນໄລຍະເລີ່ມຕົ້ນ ຫລື ຄວາມເຈັບປ່ວຍທີ່ມີຜົນຕໍ່ມົດລູກບໍ່ຫລາຍກໍໜ້ອຍ ເຊັ່ນ : ພະຍາດເບົາຫວານ ອາດເຮັດໃຫ້ມົດລູກອັກເສບ, ຕິດເຊື້ອ, ເປັນເຊື້ອລາ ແລະ ພະຍາດຊຳ້ເຮື້ອອື່ນໆ.

     – ບໍ່ກິນພືດພື້ນເມືອງ, ຢາສະຕີ ຫລື ອາຫານເສີມທີ່ມີຮໍໂມນເພດຍິງເປັນປະຈຳ ໂດຍບໍ່ໄດ້ປຶກສາທ່ານໝໍ : ການກິນຮໍໂມນເພດຍິງເປັນການເພີ່ມການອັກເສບຂອງມົດລູກເຮັດໃຫ້ມົດລູກໃຫຍ່, ຊີ້ນປົ່ງ, ມົດລູກຂະຫຍາຍຂະໜາດ ແລະ ເກີດມະເຮັງເນື້ອເຍື່ອຜົ້ງມົດລູກ ລ້ວນແຕ່ເປັນສາເຫດຂອງມົດລູກບໍ່ດີ ອາດເຮັດໃຫ້ບໍ່ສາມາດມີລູກໄດ້ ແລະ ຕ້ອງຜ່າຕັດມົດລູກ.