ໄຂ້ຫວັດໝູໃນຍີ່ປຸ່ນລະບາດແລ້ວ 5 ແຂວງ ກຳຈັດໝູ່ໝື່ນກວ່າໂຕ
ລັດຖະບານຍີ່ປຸ່ນແຈ້ງໃນວັນທີ 6 ກຸມພາວ່າ: ໄຂ້ຫວັດໝູລະບາດແລ້ວ 5 ແຂວງ ທາງການກຳລັງກຳຈັດໝູປະມານ 15.000 ໂຕ ເພື່ອຢັບຢັ້ງການແຜ່ລະບາດ.
ເຈົ້າໜ້າທີ່ກະຊວງກະສິກຳຍີ່ປຸ່ນ ຊີ້ແຈງວ່າ: ໄຂ້ຫວັດໝູທີ່ກຳລັງລະບາດໃນຍີ່ປຸ່ນບໍ່ແມ່ນສາຍພັນຮ້າຍແຮງທີ່ກຳລັງລະບາດໃນຈີນ ໂດຍພົບຢູ່ແຂວງກິຟຸ ທາງຕອນກາງຂອງປະເທດເປັນແຫ່ງທຳອິດໃນເດືອນກັນຍາປີກ່ອນ ເປັນການລະບາດຄັ້ງທີສອງຂອງຍີ່ປຸ່ນ ຫລັງຈາກມີການລະບາດຄັ້ງທຳອິດເມື່ອ 26 ປີກ່ອນ ຕໍ່ມາພົບຢູ່ແຂວງໄອຈິທີ່ຢູ່ຕິດກັນ. ໝູຈາກແຂວງນີ້ຖືກສົ່ງໄປແຂວງໂອຊາກາ ແລະ ອີກສາມແຂວງ ເຊິ່ງພົບໝູຕິດເຊື້ອເຊັ່ນກັນ ທາງການກຳລັງກຳຈັດ ແລະ ຝັງໝູໃນຟາມທີ່ໄດ້ຮັບຜົນກະທົບປະມານ 15.000 ໂຕ ເພື່ອຢັບຢັ້ງການແຜ່ລະບາດ.
ທ່ານ ໂຢຊິຮິເດະ ສຸກະ ຫົວໜ້າເລຂາທິການຄະນະລັດຖະບານ ຖະແຫລງໃນວັນທີ 6 ກຸມພາວ່າ: ທາງການຈະເຮັດທຸກຢ່າງເພື່ອຢັບຢັ້ງການແຜ່ລະບາດໃນວົງກວ້າງ ໂດຍໄດ້ໃຫ້ກະຊວງກະສິກຳ ແລະ ທ້ອງຖິ່ນທີ່ກ່ຽວຂ້ອງຮ່ວມກັນດຳເນີນມາດຕະການສະກັດກັ້ນກວດໝູຢ່າງວ່ອງໄວ ແລະ ຖີ່ຖ້ວນ, ອີກອັນໜຶ່ງ ໄຂ້ຫວັດໝູເປັນພະຍາດຮ້າຍແຮງເຖິງເສຍຊີວິດສຳລັບໝູລ້ຽງ ແລະ ໝູປ່າ, ແຕ່ບໍ່ຕິດເຊື້ອເຖິງຄົນ.
