ໂຄງການກໍ່ສ້າງເສັ້ນທາງລົດໄຟ ລາວ-ຈີນ ຄືບໜ້າກວ່າ 50%
ທ່ານ ລັດຕະນະມະນີ ຄູນນີວົງ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ໃຫ້ຮູ້ວ່າ: ພາຍຫລັງໄດ້ເລີ່ມລົງມືກໍ່ສ້າງເສັ້ນທາງລົດໄຟ ແຕ່ຊາຍແດນ ລາວ-ຈີນ ຫານະຄອນຫລວງວຽງຈັນ ມີໄລຍະທາງຍາວ 417 ກິໂລແມັດ ມາຮອດປັດຈຸບັນມີຄວາມຄືບໜ້າຫລາຍກວ່າ 50% ເຊິ່ງຕົ້ນຕໍແມ່ນໄດ້ສຳເລັດການເຈາະອຸໂມງ 69 ຈຸດຂອງຈຳນວນ 200 ຈຸດ, ກໍ່ສ້າງຂົວສຳເລັດ 143 ແຫ່ງ. ສ່ວນວຽກງານປິ່ນອ້ອມອື່ນໆ ເປັນຕົ້ນການສ້າງເສັ້ນທາງ ແລະ ຂົວເຂົ້າຫາເຂດກໍ່ສ້າງ, ຕິດຕັ້ງໄຟຟ້າ-ນ້ຳປະປາແມ່ນສຳເລັດແລ້ວເປັນສ່ວນໃຫຍ່. ສຳລັບການຊົດເຊີຍຜົນກະທົບຕ່າງໆ ມາຮອດປັດຈຸບັນໄດ້ຈ່າຍຄ່າຊົດເຊີຍແລ້ວ 7 ງວດ ຕົກເປັນເງິນຫລາຍກວ່າ 850 ຕື້ກີບ.
ທ່ານຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ກ່າວວ່າ: ໂດຍລວມເຫັນວ່າການກໍ່ສ້າງແມ່ນດຳເນີນໄປຕາມແຜນການ ແລະ ຈະເປີດນຳໃຊ້ຢ່າງເປັນທາງການໃນປີ 2021 ແນ່ນອນ. ສ່ວນວຽກຮີບດ່ວນຈະສືບຕໍ່ປະຕິບັດໃນຕໍ່ໜ້ານີ້ແມ່ນແກ້ໄຂສິ່ງກີດຂວາງຕ່າງໆ, ເອົາໃຈໃສ່ຄຸ້ມຄອງການນຳເຂົ້ານ້ຳມັນເຊື້ອໄຟ, ວັດສະດຸກໍ່ສ້າງ, ຍານພາຫະນະ ແລະ ກົນຈັກອື່ນໆ ເພື່ອຮັບປະກັນໃຫ້ເສຍພາສີຖືກຕ້ອງຕາມລະບຽບກົດໝາຍ.