ຕາດວັງຫລວງ ແຫລ່ງທ່ອງທ່ຽວທຳມະຊາດນະຄອນຫລວງພະບາງ

ຖ້າເວົ້າເຖິງແຫລ່ງທ່ອງທ່ຽວທຳມະຊາດ, ນໍ້າຕົກຕາດທີ່ຢູ່ບໍ່ໃກ້ບໍ່ໄກຈາກນະ ຄອນຫລວງວຽງຈັນເຮົາ ແລະ ເໝາະແກ່ການເດີນທາງໃນຍາມວັນພັກນັ້ນນັບ ວ່າມີ ຢ່າງຫລວງຫລາຍແຕ່ຖ້າຕ້ອງການຢາກຊຶມຊັບກັບບັນຍາກາດ, ຄວາມງົດງາມ, ມີນໍ້າໄຫລ ແລະ ຄົງໄວ້ເຊິ່ງຄວາມອຸດົມສົມບູນທາງທຳມະຊາດ ນັ້ນອາດແມ່ນແຫລ່ງທ່ອງທ່ຽວ “ຕາດວັງຫລວງ” ຢູ່ເຂດເວີນກະເບົາເມືອງປາກງຶ່ມໄປຕາມເສັ້ນທາງເລກ 13 ໃຕ້ປະມານ 60 ກິ ໂລແມັດກໍຈະເຖິງສະຖານທີ່ ດັ່ງກ່າວ.

ຕາດວັງຫລວງ ເປັນ ຕາດທີ່ເກີດຈາກພະລານຫີນເນີນຍາວເປັນພັກໆລົງມາ ບໍ່ສູງຊັນຄືກັບຕາດອື່ນໆ ແຕ່ ມີຈຸດໃຫ້ຜູ້ໄປທ່ຽວຊົມໄດ້ລົງຫລິ້ນນໍ້າ 3 ຈຸດ. ໃນນັ້ນຈຸດໃຫຍ່ ແລະ ກວ້າງກວ່າ ໝູ່ເອີ້ນວ່າຕາດວັງຫລວງ.  ແຫລ່ງທ່ອງທ່ຽວແຫ່ງນີ້ຖືກພັດທະນາ ແລະ ເປີດໃຫ້ ທ່ຽວຊົມແລ້ວຕັ້ງແຕ່ປີ 2015 ເປັນຕົ້ນມາ. ບໍລິເວນຕາດຍັງຄົງໄວ້ເຊິ່ງຄວາມອຸດົມ ສົມບູນ, ສະດວກສະບາຍ,  ບັນຍາກາດຄວາມຊຸ່ມເຢັນ ຈາກຕົ້ນໄມ້ໃຫຍ່ອ້ອມຮອບທີ່ຂຽວສະອຸ້ມຕະຫລອດປີ.

ຜູ້ຈັດການຕາດ ດັ່ງກ່າວ ໃຫ້ຮູ້ວ່າ ຕະຫລອດໄຍະ 3 ປີ ຜ່ານມາຕາດແຫ່ງນີ້ໄດ້ສ້າງຄວາມດຶງດູດໃຈໃຫ້ນັກ ທ່ອງທ່ຽວເຂົ້າໄປທ່ຽວຊົມ ເປັນຈຳນວນຫລວງຫລາຍ, ເນື່ອງຈາກວ່າຕາດວັງຫລວງເປັນຕາດທີ່ເໝາະແກ່ ການພັກຜ່ອນ ແລະ ມີຄວາມ ສະດວກສະບາຍດ້ວຍການສ້າງສາຍສະລິງໃຫ້ຜູ້ມັກ ຄວາມທ້າທາຍ, ໄດ້ມີການ ຈັດສັນທີ່ພັກເຊົາ, ບ່ອນນັ່ງ ຫລິ້ນ ແລະ ມີຕະຫລາດປອດສານພິດໄວ້ຈຳໜ່າຍເຄື່ອງ ບໍລິໂພກຕ່າງໆໃຫ້ຜູ້ມາທ່ຽວ ຊົມອີກດ້ວຍ./.