ລະ​ວັງກົນລວງເລື່ອງແຫຼ່ງທຶນກ້ອນໃຫຍ່ເຂົ້າມາລາວ

ລະ​ວັງກົນລວງເລື່ອງແຫຼ່ງທຶນກ້ອນໃຫຍ່ເຂົ້າມາລາວ - advert banner 728 90 728x90 - ລະ​ວັງກົນລວງເລື່ອງແຫຼ່ງທຶນກ້ອນໃຫຍ່ເຂົ້າມາລາວ

  ຄືດັ່ງທີ່ພວກເຮົາຮູ້ກັນແລ້ວວ່າ: ໃນປັດຈຸບັນ ບັນຫາເສດຖະກິດ, ການເງິນຂອງໂລກ ພວມຢູ່ໃນພາວະຫຼໍ່ແຫຼມ, ມີຄວາມສ່ຽງທີ່ເກີດຈາກຫຼາຍປັດໃຈ ຊຶ່ງມັນໄດ້ສົ່ງຜົນກະທົບຕໍ່ການພັດທະນາຂອງຫຼາຍປະເທດ ລວມທັງ ສປປ ລາວ. ໃນຂະນະດຽວກັນ; ກຸ່ມຄົນບໍ່ດີຈໍານວນໜຶ່ງທີ່ເປັນຄົນລາວ ແລະ ຄົນ​ຕ່າງ​ດ້າວທີ່ຢູ່ພາຍໃນ ແລະ ຕ່າງປະເທດໄດ້ເຄື່ອນໄຫວສວຍໃຊ້ຊ່ອງຫວ່າງໃນເງື່ອນໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງພວກເຮົາ ເພື່ອຕົວະຍົວະ ຫຼອກລວງ, ຊັກຊວນ, ດຶງດູດປະຊາຊົນເຮົາ ລວມ​ທັງ​ພະ​ນັກ​ງານ​ຈຳ​ນວນ​ໜຶ່ງ ​ທີ່ບໍ່​ຮູ້​ເທົ່າ​ເຖິງ​ການ​ເຂົ້າ​ຮ່ວມ​ຂະ​ບວນ​ການໃນຫຼາຍຮູບແບບ ດ້ວຍການໂຄສະນາຜ່ານປາກຕໍ່ປາກ, ພົບ​ປະ​ສັງ​ສັນ, ແລກ​ປ່ຽນ-ຮ່ວມ​ມື ໂດຍອ້າງວ່າ: ພວກເຂົາມີ “ເງິນ ຕາຕ່າງປະເທດມະຫາສານຢູ່ປະເທດນັ້ນ, ປະເທດນີ້ ແລະ ມີຄວາມຈິງໃຈທີ່ຢາກນໍາເອົາກ້ອນເງິນເຫຼົ່ານັ້ນ ເຂົ້າມາພັດທະນາສ້າງສາປະເທດ ວ່າຊັ້ນ!” ເຮັດໃຫ້ກຸ່ມຄົນຈໍານວນໜຶ່ງຫຼົງເຊື່ອ ແລ້ວວີ້ງເຕັ້ນເຂົ້າຫາພາກລັດ ເພື່ອໃຫ້ພາກສ່ວນກ່ຽວຂ້ອງຄົ້ນຄ້ວາ ພິຈາລະນາ ຊຶ່ງຄໍາໂຄສະນາດັ່ງກ່າວ ເປັນກົນອຸບາຍ,  ຂີ້ຕົວະ, ບໍ່ມີມູນຄວາມຈິງ, ບໍ່ມີໂຕຕົນ ທັງໝົດເປັນພຽງແອບແຝງ, ປັ່ນປ່ວນ ແນໃສ່ເຮັດໃຫ້ເສດຖະກິດຂອງຊາດ ກໍ່ຄືພາບພົດຂອງການຈັດຕັ້ງລັດເສຍຫາຍ ​ແລະ ​ໃນ​ຜ່ານ​ມາ​ກໍມີກຸ່ມຄົນຈໍານວນໜຶ່ງຍອມເສຍເງິນ, ຄໍາຂອງຕົນລົງທຶນໄປກ່ອນ ເພື່ອຄາດຫວັງຜົນປະໂຫຍດຕອບແທນສ່ວນແບ່ງໃນຕໍ່ໜ້າ. ແຕ່ໃນທີ່ສຸດກໍ່ບໍ່ໄດ້ຮັບອີ່ຫຍັງເລີຍ ເປັນພຽງກົນອຸບາຍ ເພື່ອຫຼອກລວງ, ສ້າງຄວາມສັບສົນ ແລະ ຫຍຸ້ງຍາກ​ແກ່ຂະແໜງການກ່ຽວຂ້ອງ.

ລະ​ວັງກົນລວງເລື່ອງແຫຼ່ງທຶນກ້ອນໃຫຍ່ເຂົ້າມາລາວ - lattana 1 - ລະ​ວັງກົນລວງເລື່ອງແຫຼ່ງທຶນກ້ອນໃຫຍ່ເຂົ້າມາລາວ

  ໃນຂະນະ​ດຽວ​ກັນກົດ​ໝາຍ​ວ່າ​ດ້ວຍການ​ຕ້ານ ແລະ ສະ​ກັດ​ກັ້ນ​ການ​ຟອກ​ເງິນ ແລະ ​ການ​ສະ​ໜອງ​ທຶນ​ໃຫ້​ແກ່​ການກໍ່​ການ​ຮ້າຍ​ຂອງ ສ​ປ​ປ ລາວ ມາດ​ຕາ 26 ​ກໍ່ໄດ້ລະບຸໄວ້ວ່າ: ການ​ພົວ​ພັນກັບ​ທະ​ນາ​ຄານ​ຕົວ​ແທນ; ສະ​ຖາ​ບັນ​ການ​ເງິນ ທີ່​ມີ​ການ​ພົວ​ພັນ​ທຸ​ລະ​ກິດ​ກັບ​ທະ​ນາ​ຄານ​ຕົວ​ແທນ ຫຼື ມີ​ການ​ພົວ​ພັນ​ອື່​ນ​ທີ່​ຄ້າຍ​ຄື​ກັນຕ້ອງ​ປະ​ຕິ​ບັດ​ດັ່ງ​ນີ້: 1. ກວດ​ກາ​ຄືນຖາ​ນະ​ນິ​ຕິ​ບຸກ​ຄົນ​ຂອງ​ທະ​ນາ​ຄານ​ຕົວ​ແທນ​ທີ່​ຕົນ​ພົວ​ພັນ​ທຸ​ລະ​ກິດ​ນຳ; 2. ເກັບ​ກຳ​ຂໍ້​ມູນ ​ຂ່າວ​ສານ ກ່ຽວກັບ​ລັກ​ສະ​ນະ​ດຳ​ເນີນ​ທຸ​ລະ​ກິດ​ຂອງ​ທະ​ນາ​ຄານ​ຕົວ​ແທນ; 3. ປະເມີນກ່ຽວກັບຄວາມເຊື່ອຖື ແລະ ການດໍາເນີນວຽກງານຄຸ້ມຄອງ ແລະ ກວດກາຂອງທະ​ນາ​ຄານ​ຕົວ​ແທນ​;  4.ປະເມີນການຈັດຕັ້ງປະຕິບັດວຽກງານ​​​ຕ້ານ ແລະ ສະ​ກັດ​ກັ້ນ​ການ​ຟອກ​ເງິນ ແລະ ​ການ​ສະ​ໜອງ​ທຶນ​ໃຫ້​ແກ່​ການກໍ່​ການ​ຮ້າຍ​ຂອງທະ​ນາ​ຄານ​ຕົວ​ແທນ ແລະ 5. ປະຕິບັດຕາມລະບຽບກົດໝາຍທີ່ກ່ຽວຂ້ອງໃນການເປີດສາຍພົວພັນທຸລະກິດກັບທະ​ນາ​ຄານ​ຕົວ​ແທນ. ຖ້າວ່າທະ​ນາ​ຄານ​ຕົວ​ແທນຫາກມີການພົວພັນທຸລະກິດ ຫຼື ເຮັດທຸລະກໍາກັບທະນາຄານທີ່ບໍ່ມີຕົວຕົນ ຫຼື ບໍລິສັດໃນກຸ່ມນັ້ນກໍ​ຕ້ອງ​ໄດ້​ຢຸດຕິ

        ໃນກົດ​ໝາຍ​ດັ່ງກ່າວ, ມາດຕາ 50 ໄດ້ມີຂໍ້ຫ້າມທົ່ວໄປ ໄດ້ລະບຸວ່າ: ຫ້າມບຸກຄົນ, ນິຕິບຸກຄົນ ແລະ ການຈັດຕັ້ງ ມີພຶດຕິກໍາກ່ຽວກັບວຽກງານຕ້ານ ສະ​ກັດ​ກັ້ນ​ການ​ຟອກ​ເງິນ ແລະ ​ການ​ສະ​ໜອງ​ທຶນ​ໃຫ້​ແກ່​ການກໍ່​ການ​ຮ້າຍ ຄື: 1. ພົວພັນ ຫຼື ເຂົ້າຮ່ວມກັບ​ການ​ຟອກ​ເງິນ ແລະ ​ການ​ສະ​ໜອງ​ທຶນ​ໃຫ້​ແກ່​ການກໍ່​ການ​ຮ້າຍ; 2. ພົວພັນທຸກຮູບແບບ ຫຼື ໃຫ້ການຊ່ວຍເຫຼືອແກ່ຜູ້ຟອກ​ເງິນ ແລະ ​ຜູ້​ສະ​ໜອງ​ທຶນ​ໃຫ້​ແກ່​ການກໍ່​ການ​ຮ້າຍ; 3. ເປັນສື່ກາງ, ໃຫ້ສິນບົນແກ່ພະນັກງານ ແລະ ເຈົ້າໜ້າທີ່ທີ່ກ່ຽວຂ້ອງ ແລະ ອື່ນໆ.

          ສະນັ້ນ ເພື່ອຕ້ານ ແລະ ສະກັດກັ້ນບັນຫາດັ່ງກ່າວ, ຂໍໃຫ້ທຸກພາກສ່ວນ, ອົງການຈັດຕັ້ງລັດ-ເອກະຊົນ, ປະຊາຊົນ ແລະ ເຈົ້າໜ້າທີ່ ຕ້ອງຮ່ວມແຮງຮ່ວມໃຈເປັນເຈົ້າການຕ້ານ ແລະ ສະກັດກັ້ນການເຄື່ອນໄຫວຂອງກຸ່ມຄົນບໍ່ດີດັ່ງກ່າວ; ຢ່າໃຫ້ການຮ່ວມມືທຸກຮູບແບບ ແລະ ຢ່າຫຼົງເຊື່ອຕໍ່ກົນອຸບາຍ ຂອງກຸ່ມຄົນພວກນີ້ຢ່າງເດັດຂາດ, ພວກເຮົາຕ້ອງໃຫ້ການຮ່ວມມືກັບເຈົ້າໜ້າທີ່, ຊອກໃຫ້ເຫັນ, ຈັບໃຫ້ໄດ້ບຸກຄົນ ຫຼື ກຸ່ມແກ້ງທີ່ເຄື່ອນໄຫວບໍ່ດີໃຫ້ໝົດໄປ.

# ໂດຍ: ຣັດ​ສະ​ໝີ ດວງ​ສັດ​ຈະ