ລັດຖະມົນຕີກະຊວງການຕ່າງປະເທດຊີ້ນໍາວຽກງານຢູ່ແຂວງເຊກອງ
ໃນວັນທີ 7 ກຸມພານີ້, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ຫ້ອງວ່າການປົກຄອງແຂວງເຊກອງ ໂດຍການຕ້ອນຮັບຢ່າງອົບອຸ່ນຂອງທ່ານ ສີດາ ສຸວັນນະສາຍ ຮອງເລຂາພັກແຂວງ, ປະທານຄະນະກໍາມະການຍົກລະດັບດ່ານທ້ອງຖິ່ນດາກຕະອອກ-ນາມຢາງຂຶ້ນເປັນດ່ານສາກົນ, ມີພະນັກງານຫຼັກແຫຼ່ງພາຍໃນພະແນກການຕ່າງປະເທດແຂວງເຂົ້າຮ່ວມຕ້ອນຮັບ.
ກ່ອນອື່ນທ່ານໄດ້ຮັບຟັງການລາຍງານກ່ຽວກັບສະພາບການພັດທະນາເສດຖະກິດ-ສັງຄົມ ແລະ ຄວາມຄືບໜ້າໃນການກະກຽມຄວາມພ້ອມຍົກລະດັບດ່ານຊາຍແດນດາກຕະອອກ-ນາມຢາງ ເພື່ອກ້າວຂຶ້ນເປັນດ່ານສາກົນ ຈາກທ່ານຮອງປະທານຄະນະກໍາມະການຍົກລະດັບດ່ານດັ່ງກ່າວ ເຊິ່ງໄດ້ຍົກໃຫ້ເຫັນສະພາບຄວາມເປັນມາຂອງດ່ານຊາຍແດນທ້ອງຖິ່ນດາກຕະອອກ ແລະ ຄວາມພ້ອມທາງດ້ານຕ່າງໆທີ່ຈະຍົກຂຶ້ນເປັນດ່ານສາກົນ ເຊິ່ງດ່ານດັ່ງກ່າວຕັ້ງຢູ່ຫ່າງຈາກຕົວເມືອງດາກຈຶງໄປທາງທິດຕາເວັນອອກຊາຍແດນຫວຽດນາມ 21 km ແລະ ຫ່າງຈາກເທສະບານແຂວງເຊກອງ 94,6 km ຕິດກັບດ່ານນາມຢາງ ເມືອງນາມຢາງ ແຂວງກວາງນາມ ສສ ຫວຽດນາມ, ໃນປີ 2006 ດ່ານແຫ່ງດັ່ງກ່າວໄດ້ຮັບການສ້າງຕັ້ງຂຶ້ນເປັນດ່ານຊາຍແດນທ້ອງຖິ່ນເພື່ອອໍານວຍຄວາມສະດວກໃຫ້ແກ່ການຂະຫຍາຍຕົວຂອງເສດຖະກິດ-ສັງຄົມ ກໍຄືການໄປມາຫາສູ່ຂອງປະຊາຊົນດີຂຶ້ນ.
ຈາກນັ້ນ, ທ່ານລັດຖະມົນຕີກະຊວງການຕ່າງປະເທດ ກໍໄດ້ມີຄໍາເຫັນໂອ້ລົມ ເຊິ່ງທ່ານໄດ້ຍົກໃຫ້ເຫັນເຖິງສະພາບການຂອງໂລກ ແລະ ພາກພື້ນທີ່ມີການຜັນແປໄປຢ່າງວ່ອງໄວ ແລະ ສັບສົນ ພ້ອມທັງແຈ້ງໃຫ້ຊາບກ່ຽວກັບຜົນສໍາເລັດການເຂົ້າຮ່ວມກອງປະຊຸມອົງການສະຫະປະຊາຊາດຄັ້ງຫຼ້າສຸດທີ່ສະຫະລັດອາເມລິກາ. ຂະນະດຽວກັນ ທ່ານກໍໄດ້ເນັ້ນໜັກໃຫ້ຄະນະກໍາມະການຍົກລະດັບດ່ານທ້ອງຖິ່ນດາກຕະອອກ-ນາມຢາງຂຶ້ນເປັນດ່ານສາກົນ ຈົ່ງມີຄວາມໃກ້ສິດຕິດແທດລົງຕິດຕາມກວດກາສະພາບການຕາມເຂດພື້ນທີ່ ແລະການກະກຽມຄວາມພ້ອມຢ່າງເປັນປົກກະຕິ, ທຸກພາກສ່ວນທີ່ກ່ຽວຂ້ອງຈົ່ງເປັນເຈົ້າການໃນການຄຸ້ມຄອງດ້ານຕ່າງໆ ເປັນຕົ້ນດ້ານງົບປະມານໃຫ້ຮັບປະກັນ, ເປັນເຈົ້າການໃນການປົກປັກຮັກສາຄວາມສະຫົງບປອດໄພຂອງພື້ນທີ່ໂດຍພື້ນຖານ ແລະ ກໍາໄດ້ບັນຫາສາກົນ ເພື່ອສາມາດຮັບມືກັບບັນຫາຕ່າງໆທີ່ອາດຈະເກີດຂຶ້ນ.
